1, 2. ¿Tlen moneki tikchiuaskej pampa tichikajtoskej, uan tleka miak ipati?

TINOCHTIN tiknekij tichikajtoskej. Pero tla tiknekij tichikajtoskej, moneki kuali titlakuaskej, tikchiuaskej ejercicio uan nochipa timomaluiskej. Pampa ijkon tikchiuaskej, moneki timochijchikauaskej miak, pero amo timosotlauaj pampa tikmatij nin techpaleuia axkan uan satepan. Pero onka okse tlamantli tlen noijki moneki tikmaluiskej. Ma tikitakan nin tlamantli.

² Judas, imachtijka Jesús, otlajto itech nin ijkuak okinmilui akinmej okichiuayaj ken Cristo: “Xiyetokan itech itlasojtlalis toTajtsin Dios”. Noijki okinmilui ken uelis kichiuaskiaj nin: “Xikiskaltikan chikauak tlaneltokilistli” (Judas 20, 21, TNM). ¿Tlen uelis tikchiuaskej pampa tikiskaltiskej chikauak totlaneltokilis uan ijkon tiyetoskej itech itlasojtlalis toTajtsin Dios? Ma tikitakan eyi tlamantli tlen okachi moneki tikchiuaskej.

3-5. 1) ¿Tlen kineki Satanás ma timokuayejyekokan itech itlanauatiluan toTajtsin Dios? 2) ¿Ken moneki tikinmitaskej itlanauatiluan toTajtsin Dios, uan ken timomachiliskej ijkuak ijkon tikinmitaskej? Xikyekijto ika se neskayotl.

³ Achto, moneki okachi ma titlaneltokakan itech itlanauatiluan toTajtsin Dios. Itech nin amochtli yotimomachtijkej seki itlanauatiluan toTajtsin Dios tlen techiluia ken moneki tikpiaskej tonemilis. ¿Ken tikinmitaj itlanauatiluan  toTajtsin Dios? Satanás kineki techtlapololtis pampa ma timokuayejyekokan itlanauatiluan toTajtsin Dios uan principios bíblicos techtsakuiliaj uan techtlajyouiltiaj. Ijkon okichi itech xochitlali Edén uan okitak kuali okiski, ik non, axkan noijki ijkon kichijtok (Génesis 3:1-6). ¿Uelis techtlapololtis? Pampa tikmatiskej nin, moneki ma timotlajtlanikan kox tikitaj nochi tlamantli ken Jehová kita.

⁴ Ma tiktlalikan se neskayotl: ma tikijtokan tinejnenti itech se parque, uan san niman tikita tlatsaktok uan ayakmo ueli titlachia kanin okachi tlakualtsin. Amo mitspaktia tikita tlatsatok pampa amo mitskauilia tipanos kanin tikneki, pero ijkuak kuali titlachia, tikita se león tlen san kichixtok akin kikuas. Axkan tikajsikamati tlatsaktok pampa amo itlaj ma mitspano. Uan axkan, ¿onka se tekuani tlen kineki techkuas? ITlajtol toTajtsin Dios techiluia: “Xiisatokah iwa kuali xitlachixtokah. Porke nomokokolikni n amokualitlakatl kitemojtinemi akin kixpolos, kemi yaskia se lío non kitemojtinemi akin kitlankokototsas iwa kikuas” (1 Pedro 5:8).

⁵ Kema, Satanás ken se tekuani. Uan pampa Jehová amo kineki ma techkitski, otechmakak tlanauatilmej tlen techmaluiaj pampa amo ‘techkajkayawas’ Satanás (Efesios 6:11). Ik non, ijkuak timokuayejyekoaj itech itlanauatiluan toTajtsin Dios, tikitaj ye techtlasojtla miak. Ijkuak tikajsikamatij non, tikitaj itlanauatiluan techmaluiaj uan kichiuaj ma tiyolpakikan. Ijkon ken okijkuilo tlatitlanil Santiago: “Akin [...] moyekketsa itech n yekmilajka tlanawátili iwa kimopantia, iwa kichiwa tlan kijtoa non tlanawátili, nochipa paktos ika tlan kichiwa” (Santiago 1:25).

6. ¿Ken uelis tikchikauaskej okachi totlaneltokilis itech itlanauatiluan toTajtsin Dios tlen melauakej? Xikyekijto ika se neskayotl.

⁶ Ijkuak tikintlakamatij itlanauatiluan akin Kitemaka Tlanauatilmej, okachi mochikaua totlaneltokilis uan okachi titlaneltokaj itech itlanauatiluan. Se neskayotl, itech “itlanawatil Cristo” poui ‘titlamachtiskeh nochi tlan  otechchnawati’ (Gálatas 6:2; Mateo 28:19, 20). Akinmej tikchiuaj ken Cristo, noijki moneki tiktlakamatiskej tlanauatil kanin kijtoa moneki timonechikoskej pampa tikueyichiuaskej toTajtsin Dios, uan timoyolchikauaskej iuan tokniuan (Hebreos 10:24, 25). Noijki moneki tiktlakamatiskej itlanauatil toTajtsin Dios tlen techiluia moneki nochipa timotlatlaujtiskej itech Jehová ika nochi toyolo (Mateo 6:5-8; 1 Tesalonicenses 5:17). Ijkuak tikyekanaj tonemilis ika itlanauatiluan, tikitaj techyekanaj ika tlasojtlalistli, kichiuaj ma tiyolpakikan uan ma tikpiakan yolseuilistli, itlaj tlen amo tikajsiskej itech nin Tlaltikpak, kanin onka miak tlajyouilistli. Ijkuak timokuayejyekoaj ken tikatej kuali pampa tikintlakamatij itlanauatiluan toTajtsin Dios, okachi mochikaua totlaneltokilis.

7, 8. ¿Ken kinyolseuia iTlajtol toTajtsin Dios akinmej mokuayejyekoaj sapanoa oui nochipa kintlakamatiskej itlanauatiluan Jehová?

⁷ Sekimej motekipachoaj pampa mokuayejyekoaj sapanoa oui nochipa kintlakamatiskej itlanauatiluan Jehová. Momojtiaj pampa mokuayejyekoaj uelis tlajtlakolchiuaskej. Tla se tonal ijkon timomachilis, xikilnamiki tlen kijtoa Biblia: “Ne Jehová nimoDios, ne Akin nimitsmachtia pampa kuali xiyeto, Akin kichiua xinejnemi itech ojtli kanin moneki  tias. ¡Oh, tla melauak tikinkakis notlanauatiluan! Moyolseuilis yetos ken se aueyatl uan momelajkayo ken olas tlen kipia ueyi atl” (Isaías 48:17, 18). ¿Yotimokuayejyeko se tonal ken techyolchikauaj ninmej tlajtolmej?

⁸ Itech ninmej tlajtolmej, Jehová techilnamiktia techpaleuis itech ome tlamantli tla tikintlakamatij itlanauatiluan. Achto, toyolseuilis yetos ken se aueyatl: tlen mantok, tlen kipia miak atl uan yajtok. Ome, tomelajkayo yetos ken olas tlen kipia ueyi atl. Tla timokauaj itempa ueyi atl uan tikitaj ken uiuitsej olas, tikajsikamatij amo keman mopatlas non: atl nochipa ijkon uiuits. Noijki ijkon nochipa tikpiaskej tomelajkayo tla tikkakij Jehová. Tla timochijchikauaskej tiyetoskej tiyolmelajkej, Jehová amo keman kitekauilis ma tiuetsikan (xiktlajtolti Salmo 55:22). Ijkuak timokuayejyekoaj itech tlen Jehová techiluia uan itech itlanauatiluan tlen melauakej, okachi titlaneltokaj itech.

9, 10. 1) ¿Tleka tinochtin uelis timochijchikauaskej tikiskaltiskej totlaneltokilis? 2) ¿Tleka techpaleuia ma tiyolpakikan miak ijkuak tikitaj nochi tlamantli ken Jehová kita?

⁹ Ome, moneki tikchiuaskej ninmej tlajtolmej: “Matimoskaltikah itech totlaneltokalis” (Hebreos 6:1). Moneki tinochtin ma tikiskaltikan totlaneltokilis. Maski axkan amo uelis tikijtoskej amo keman tikchiuaskej tlen tlajtlakoli, kema uelis timochijchikauaskej pampa tikiskaltiskej totlaneltokilis. Ik non, akinmej tikchiuaj ken Cristo, okachi tiyolpakij ijkuak tiktekichiuiliaj Jehová pampa okachi moskaltijti totlaneltokilis. ¿Tleka ijkon tikijtoaj?

¹⁰ Akin kipia chikauak itlaneltokilis kita nochi tlamantli ken Jehová kita (Juan 4:23). Tlatitlanil Pablo okijto: “Akimeh nemih kemi nemi n tlaltikpaktlakah, okachi kintekipachoa tlan onka itech nin tlaltíkpaktli, pero akimeh nemih kemi n Espíritu [iespíritu toTajtsin Dios, TNM] kineki, yejwah okachi kintekipachoa kichiwaskeh tlan n Espíritu  kineki” (Romanos 8:5). Akinmej kichiuaj ken tlaltikpaktlakamej, amo yolpakij, pampa mokuayejyekoaj san intech uan san tlachixtokej itech tlamantli tlen onka itech Tlaltikpak. Akinmej kitaj nochi tlamantli ken Jehová kita, yolpakij pampa intlachialis kajki itech “toTajtsin Dios akin yolpaki” (1 Timoteo 1:11, TNM). Nochipa kinekij kiyolpaktiskej Jehová uan kuali momachiliaj maski tlajyouijtokej. ¿Tleka uelij tlaxikoaj? Pampa kimatij maski tlajyouiskej, uelis yetoskej yolmelajkej uan kiyolpaktiskej toTajtsin Dios pampa ijkon kiteititiskej Satanás tlakajkayaua (Proverbios 27:11; xiktlajtolti Santiago 1:2, 3).

11, 12. 1) ¿Tlen okijto Pablo itech akinmej “ya kuali kimatih kiyejyekoliah”, uan tlen kijtosneki “kuali kimatih”? 2) ¿Tlen moneki tikchiuaskej pampa totlalnakayo kimatis kichiuas miak tlamantli?

¹¹ Pampa tikiskaltiskej chikauak totlaneltokilis uan tikitaskej nochi tlamantli ken Jehová kita, moneki tikchiuaskej itlaj. Xikita tlen kijtoa nin tlaxelol: “Akimeh yochikawak intlaneltokalis, ya weletih kikuah nochi tlákuali, porke yejwah ya kuali kimatih kiyejyekoliah tlan kuali iwa tlan amokuali” (Hebreos 5:14). Ijkuak Pablo okijto “ya kuali kimatih kiyejyekoliah”, okijto se tlajtoli griego tlen okitekitiltiayaj akinmej kuali omomachtiayaj pampa kuali mauiltiskej. Axkan ma tikitakan tlen kijtosneki nin.

¹² Ijkuak ikaj nesi, amo ueli kinauatia itlalnakayo. Ma tiktlalikan se neskayotl. Se konetl amo kimati kanin katej imauan uan ikxiuan, ik non, uelis moixtlajtlatsinis uan satepan momojtis noso motlajtlachialtis. Pero yolik kimatis ken kitekitiltis itlalnakayo. Achto peua manejnemi, satepan kuali nejnemi uan peua motlaloa. * Pero ¿tlen kichiua akin mauiltia? Ma tikitakan se neskayotl, ijkuak tikitaj kuali kiuika  pelota akin mauiltia fútbol, tikmatij melauak kuali yomomachti. Kuali yikimati pampa miak horas yomomachti. Biblia kijtoa ijkuak tikmachtiaj totlalnakayo “okachitsi techpalewia”. Tikitaj okachi moneki kuali ma tikmachtikan totlalnamikilis, uan ijkon kimatis tlen kuali uan tlen amo kuali (1 Timoteo 4:8).

13. ¿Ken uelis tikmatis tikyejyekolis tlen kuali uan tlen amo kuali?

¹³ Itech nin amochtli, yotimomachtijkej miak tlamantli tlen mitspaleuis tikmatis tikyejyekolis tlen kuali uan tlen amo kuali, uan ijkon uelis tiyetos tiyolmelajki uan tikitas nochi tlamantli ken Jehová kita. Mojmostla ximotlatlaujti uan ximokuayejyeko ika principios bíblicos uan ika itlanauatiluan toTajtsin Dios ijkuak tikpejpenas tlen tikchiuas. Ximotlajtlani: “¿Tlen principio bíblico noso tlen tlanauatil uelis nechpaleuis itech nin tlamantli? ¿Ken uelis niktlakamatis non? ¿Kiyolpaktis noTajtsin Dios tlen nikchiuas?” (xiktlajtolti Proverbios 3:5, 6; Santiago 1:5). Tla nochipa ijkon timotlajtlanis ijkuak tikpejpenas tlen tikchiuas, okachi tikmatis tikyejyekolis tlen kuali uan tlen amo kuali. Non mitspaleuis tikitas nochi tlamantli ken Jehová kita.

14. ¿Tlen moneki pampa uelis tikiskaltiskej totlaneltokilis, uan tlen amo tikchiuaskej?

¹⁴ Maski yitikitaj nochi tlamantli ken Jehová kita, ok uelis timochijchikauaskej pampa okachi chikauak yetos totlaneltokilis. Pampa ikaj chikajtos moneki kuali tlakuas. Ijkon ken okijto Pablo: “Akimeh yochikawak intlaneltokalis, ya weletih kikuah nochi tlákuali”. Ken tikitaj, pampa chikauak tikpiaskej totlaneltokilis moneki tikkuaskej tlakuali tlen kitemaka  toTajtsin Dios. Noijki moneki tikpiaskej ixtlamatilistli, kijtosneki tikchiuaskej tlen timomachtiaj, pampa Biblia kijtoa: “Ixtlamatilistli non tlamantli tlen okachi ipati”. Ik non, moneki sapanoa ma tikileuikan tikkuaskej tlakuali tlen techmaka toTajtsin Dios itech tlen melauak (Proverbios 4:5-7; 1 Pedro 2:2). Pero maski tikmatiskej miak tlamantli uan tiyetoskej tiixtlamatkej, amo timoueyinekiskej noso timomachiliskej okachi tikmatij amo ken oksekimej. Moneki nochipa ma timotakan pampa itech toyolo amo peuas timoueyimatiskej. Itech nin tlamantli, Pablo okijto: “Nomejwah nomonewiah ximoyejyekokah kox milák nonkipiah tlaneltokálistli”. Kema, moneki kuali ma timotlachilikan ken tikpiaj tonemilis (2 Corintios 13:5).

15. ¿Tleka moneki tlasojtlalistli pampa tikpiaskej chipauak totlaneltokilis?

¹⁵ Uelis ikaj chikajtos uan kuali yetos, pero moneki kuali tlakuajtos uan momaluis. Ika totlaneltokilis noijki ijkon moneki tikchiuaskej. Uan tlasojtlalistli non tlen okachi moneki tikpiaskej. Kema, moneki okachi tiktlasojtlaskej Jehová uan tokniuan. Tla amo titetlasojtlaskej, amo itlaj ipati nochi tlen uelis tikmatiskej noso tikchiuaskej, pampa tiyetoskej ken ikaj tlen kijtoa kichiuas miak tlamantli uan saiktlami nion se amo kichiua (1 Corintios 13:1-3). Ken yotikitakej, moneki titetlasojtlaskej pampa tikpiaskej chikauak totlaneltokilis uan tikitaskej nochi tlamantli ken Jehová kita.

16. ¿Tlen kineki Satanás ma timokuayejyekokan, uan tlen techmaka Jehová tlen ika timopaleuiskej?

¹⁶ Eyi, moneki titlachixtoskej itech chialistli tlen Jehová techmaka. Ik non, moneki ma tikmaluikan tlen timokuayejyekoaj. ¿Tleka? Pampa Satanás tlanauatia nikan Tlaltikpak, sapanoa kimati ken kichiuas ma timokuayejyekokan amo itlaj kuali panos, itech tlen amo techyolchikaua, amo ma titlaneltokakan intech oksekimej nion ma  timokuatlamikan (Efesios 2:2). Tla akin kichiua ken Cristo ijkon mokuayejyekos, moijtlakos, ijkon ken moijtlakoa itlaketsal se kali ijkuak kikuaj okuilimej. Tiktlasojkamatiliaj Jehová pampa techmaka tlen ika timopaleuiskej: chialistli.

17. ¿Ika tlen tlamantli kineskayotia Biblia sapanoa ipati chialistli?

¹⁷ Biblia techiluia tlen poui itech tepostli ajsitok tlen uits itech toTajtsin Dios, tlen moneki pampa tikixnamikiskej Satanás uan akinmej kinyekana. Se tlamantli tlen poui itech non tepostli non tlen moneki “matimokuaonakiltikah iwa matikchiakah totemakixtilis” (1 Tesalonicenses 5:8). Yiuejkika, se soldado okimatiaya amo uelis makisaskia tla amo kiuikaskia icasco. Nin casco okichijchiuayaj ika tepostli uan okipiaya se tsotsoli, noso kuetlaxtli, ik non, soldado amo okachi kikokoskia itsonteko ijkuak kimakaskiaj. Noijki ijkon ken se casco kipaleuia totsonteko, chialistli kimaluia tokuayejyekol.

18, 19. ¿Ken otechmakak Jesús se kuali neskayotl ken moneki tikpiaskej chialistli, uan ken uelis tikchiuaskej ijkon ken ye?

¹⁸ Jesús ye akin okachi kuali otechmakak neskayotl ken moneki tikpiaskej chialistli. Ma tikilnamikikan ken otlajyoui itech yoak ijkuak omikik. Se iyolikni okitemaktili pampa okimakakej tomin. Okse iyolikni teixpan okijto amo okixmatiaya. Oksekimej okikajtejkej uan ocholojkej. Akinmej noijki oneskej itech altepetl kanin ye oneski, okixnamikej uan okuajtsajtsiayaj pampa soldados romanos ma kimiktikan. Jesús sapanoa otlajyoui. ¿Tlen okipaleui? Hebreos 12:2 techiluia: “Porke okimatia satepa de itlaijyowilis kipiaskia miak pakílistli, iwa axa ewatok ik iyekma kan Dios yayantitok”. Ken tikitaj, Jesús nochipa okilnamiktoka satepan “kipiaskia miak pakílistli”.

¹⁹ ¿Tlen pakilistli okichiaya Jesús? Okimatiaya tla ye tlaxikoskia, uelis tlapaleuiskia ma mochipaua itoka Jehová, uan kiteititiskia Satanás san tlakajkayaua. ¡Amo itlaj okachi kiyolpaktiskia Jesús! Noijki okimatiaya iTajtsin sapanoa kiteochiuaskia pampa ye okatka yolmelajki, uan amo miak  opoliuiaya pampa oksepa yetoskia iuan iTajtsin. Ijkuak Jesús okachi otlajyouijtoka, noijki okilnamiktoka nochi tlen kuali kiseliskia. Axkan, noijki ijkon ma tikilnamiktokan pakilistli tlen tikpiaskej satepan. Jehová techmaka se ueyi tlateochiualistli pampa techkauilia ma tikpaleuikan ma mochipaua itoka uan ma tikteititikan Satanás san tlakajkayaua. ¿Ken uelis tikchiuaskej? Tla tiktekichiuiliaj toTajtsin Dios akin Ueyititok, uan tla nochipa tikatej itech itlasojtlalis maski tikpiaskej miak ouijkayotl.

20. ¿Tlen mitspaleuis pampa timokuayejyekos itech tlen teyolchikaua uan nochipa tikpias chialistli?

²⁰ Jehová kineki kinteochiuas itekipanojkauan tlen yolmelajkej, kema, san mochixtok ijkon kichiuas (Isaías 30:18; xiktlajtolti Malaquías 3:10). Yolpaki miak ijkuak kinmaka itekipanojkauan tlen kineki inyolo (Salmo 37:4). Ik non, nochipa ma tikilnamiktokan chialistli tlen tikpiaj. Amo keman ma timokuayejyekokan tlen amo techyolchikaua, tlen sokio uan tlen amo kuali, ijkon ken mokuayejyekoaj akinmej Satanás kinyekana. Tla tikmachilia “espíritu de nin tlaltikpaktli” kalaktok itech moyolo uan itech mokuayejyekol, xiktlatlaujti Jehová ma mitsmaka “iyolsewilis [...], non amaka weleti kajsikamati”, tlen kimaluis moyolo uan mokuayejyekol (Filipenses 4:6, 7).

21, 22. 1) ¿Tlen kualtsin chialistli kipiaj akinmej poui itech “senmiaktikeh tlaltikpaktlakah”? 2) ¿Tlen okachi tikpatioita tejuatsin itech chialistli tlen tikpia, uan tlen moneki tikchiuas nochipa?

 ²¹ ¡Melauak se kualtsin chialistli tikpiaj! Tla tiyetoskej itech “senmiaktikeh tlaltikpaktlakah” tlen momakixtiskej itech “weyi tlaijyowílistli”, uelis tikseliskej miakej tlateochiualismej (Apocalipsis 7:9, 14). Axkan amo uelis timokuayejyekoskej ken tiyetoskej ika yolseuilistli ijkuak Satanás uan amo kuali iejekauan ayakmo yetoskej. Pampa, ¿akin itech tejuan amo keman yokiyejyeko Satanás? Ijkuak ayakmo yetos, ika miak pakilistli titekitiskej san sekan tikkuepaskej Tlaltikpak se kualtsin xochitlali, ijkuak Cristo uan 144,000 ualtlanauatiskej. ¡Uan ika miak pakilistli tikchiaj ma pojpoliui nochi kokolistli tlen onka, tikchiaj tikinseliskej akinmej tikintlasojtlaj ijkuak kinyolitiskej uan tiyolpakiskej ken toTajtsin Dios kineki ma tiyetokan! Ijkuak ayakmo tiyetoskej titlajtlakolejkej, okachi san niman uelis ‘timomakixtiskeh tiipilwah n Dios iwa ijkó sansikah tikpiaskeh weyílistli’ (Romanos 8:21).

²² Jehová kineki sepa ma timomakixtikan, pero moneki tiktlakamatiskej. ¡Melauak miak ipati mojmostla ma timochijchikauakan tiktlakamatiskej! Ik non, ¡xikchiua nochi tlen moneki pampa tikiskaltis chikauak motlaneltokilis, uan ijkon nochipa tiyetos itech itlasojtlalis toTajtsin Dios!