1, 2. Owu na iilonga yokutunga shike, nomolwashike ongushu yiilonga yoye ya simana?

NATU tye nduno oto longo nuudhiginini miilonga yokutunga. Iilonga mbyoka owa kala noku yi longa uule wethimbo lyontumba noto tsikile oku yi longa sigo omonakuyiwa. Okuza sho we yi tameke oya kala iidhigu, ihe otayi nyanyudha. Kutya nduno oshike tashi holoka po, owa tokola toko kutya ito hulile ondjilakati noito longo nonyalo, molwaashoka iilonga mbyoka otayi ka guma onkalamwenyo yoye, nokuli nonakuyiwa yoye. Omolwashike mbela? Omolwaashoka oshilonga shoka to longo ongoye mwene to itungu.

² Omulongwa Judas okwa tsu omuthindo kutya otu na okwiitunga tse yene. Sho a ladhipike Aakriste yi “ikaleke mohole yaKalunga” okwa li wo a popi oshinima sha simana shoka tashi tu kwathele tu shi ninge a ti: “Itungileni kekankameno lyeitaalo lyeni eyapuki.” (Jud. 20, 21) Omomikalo dhini to vulu okwiitunga mwene, wu koleke eitaalo lyoye opo wu ikaleke mohole yaKalunga? Natu kundathane iitsa itatu mbyoka tayi vulu oku ku kwathela wu itunge pambepo.

3-5. (a) Satana okwa hala oku ku pukitha wu tale ko ngiini iitegelelwa yaJehova? (b) Ongiini tu na okukala hatu tala ko iitegelelwa yaKalunga, notashi ke tu nwetha mo ngiini? Shi thaneka.

³ Shotango, otwa pumbwa okukoleka eitaalo lyetu moompango dhaKalunga. Momukokomoko gwokukonakona  embo ndika, owi ilonga iitegelelwa yaJehova oyindji yuuyuuki yi na ko nasha neihumbato. Mbela owe yi tala ko ngiini? Satana okwa hala e ku pukithe wu tale ko oompango dhaJehova, omakotampango ge nomithikampango dhe ongo tadhi thiminike notadhi thindile kongudhi. Iineya mbyoka okwe yi longitha okuza nale muEden, sho a mono kutya ohayi pondola. (Gen. 3:1-6) Mbela iineya ye otayi ke ku pukitha? Oshindji oshi ikolelela kiikala yoye.

⁴ Oku shi thaneka: Natu tye nduno oto ende moparka ombwanawa, ihe manga to ende oto mono olugumbo lwondhalate olule lwa kola ndoka lwa topola ko ombinga yimwe yoparka. Ombinga ndjoka yi li molugumbo otayi monika nawa. Tango otashi vulika wu dhiladhile kutya olugumbo inalu pumbiwa nolwa ngambeka emanguluko lyoye. Sho to tala handiyaka yondhalate, owu wete onime tayi hundjunine oshihakanwa. Ngashingeyi oto mono kutya ondhalate nani oyi lile po egameno. Mbela opu na oshilikama sha nika oshiponga shoka tashi ku hundjunine ngashingeyi? Oohapu dhaKalunga otadhi tu londodha tadhi ti: “Omutondi gweni Satana ohe mú kundukidha, ta ndunduma a fa onime, ta kongo omuntu gwontumba, e mu ketsule po.” — 1 Pet. 5:8.

⁵ Satana oshilikama shi na onyanya. Molwaashoka Jehova ina hala tu ninge iihakanwa yaSatana, okwa tula po oompango ndhoka tadhi tu gamene ‘komakotokelo omawinayi’ gomuhindadhi. (Ef. 6:11) Ngele tatu tedhatedha kombinga yoompango dhaKalunga, otatu ka mona mudho ohole yaTate yetu gwomegulu. Ngele tatu dhi tala ko pamukalo ngoka, otadhi ka kala onzo yegameno noyenyanyu. Omuyapostoli Jakob okwa nyola a ti: “Ngoka ti italele mompango ya gwana yokumangulula, [e] te yi pulakene . . . ota yambekwa moku shi ninga.” — Jak. 1:25.

6. Omukalo gwa dhenga mbanda gwokutungila eitaalo koompango nokomakotampango gaKalunga guuyuuki oguni? Gandja oshiholelwa.

⁶ Okukala paipango yaKalunga oko omukalo gwa dhenga mbanda okutungila eitaalo lyoye mOmugandjimpango nomuunongo wiipango ye. Pashiholelwa, “ompango yaKristus” oya kwatela mo elombwelo lyaJesus tu longe yalwe  “ayihe mbyoka [e tu] lombwele.” (Gal. 6:2; Mat. 28:19, 20) Aakriste ohaya vulika wo kelombwelo ya tsikile aluhe okukala pokugongala opo ya longele Kalunga nokuladhipikathana. (Heb. 10:24, 25) Iipango yaKalunga oya kwatela mo wo ekumagidho tu kale hatu galikana aluhe kuye notashi zi komutima. (Mat. 6:5-8; 1 Tes. 5:17) Mokuvulika kiipango mbyoka, otatu ka mona shili kutya oyi li ewiliko lyopahole, notashi tu etele enyanyu nokukala twa gwanenwa, iinima mbyoka kaatu na mpoka tatu adha muuyuni mbuka wu udha uupyakadhi. Sho to tedhatedha nkene wa mona uuwanawa mokuvulika koompango dhaKalunga, mbela itashi koleke eitaalo lyoye mudho?

7, 8. Ongiini Oohapu dhaKalunga tadhi shilipaleke mboka tayi ipula kutya itaya ka vula okukala pamithikampango dhuuyuuki sho omimvo tadhi endele ko?

⁷ Omathimbo gamwe, yamwe ohayi ipula kutya otashi ka kala oshidhigu noonkondo okukala ya dhiginina oompango dhaJehova sho omimvo tadhi endele ko. Ohaya kala ya tila kutya otashi vulika ya ninge epuko. Ngele osho ho kala wu uvite ngawo, kaleka oohapu ndhika momadhiladhilo tadhi ti: “Ongame OMUWA Kalunga koye, ngoka tii ku longele shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya,  nuuyuuki otau tookele kungoye wa fa omakuthikuthi gomefuta.” (Jes. 48:17, 18) Mbela owe shi dhiladhila ngaa nale nkene oohapu ndhoka tadhi tu ladhipike?

⁸ Mpaka Jehova ote tu dhimbulukitha kutya otatu ka mona uuwanawa ngele tatu vulika kuye. Okwe tu uvanekela omalaleko nuuyamba gaali ngele tatu shi ningi. Lyotango, omayambeko getu otaga ka kala ga fa omulonga tagu tondoka omeya. Etiyali, uuyuuki wetu otawu ka kala wa fa omakuthikuthi gefuta. Ngele owa thikama komunkulofuta to tala omakuthikuthi sho taga tumbalala ga landulathana, oho kala wu shi shi kutya itaga ka mwena. Otaga ka tsikila okukala tage ya komunkulofuta sigo aluhe. Jehova okwa ti kutya uuyuuki woye, sha hala okutya, okulonga kwoye shoka shi li mondjila, otaku vulu okukala ngaaka. Shampa owala to kambadhala okukala omudhiginini kuye, ite ke ku etha wu ponye. (Lesha Episalomi 55:22.) Mbela omauvaneko ngoka taga nyanyudha omutima itaga tungu eitaalo lyoye muJehova nomiitegelelwa ye yuuyuuki?

9, 10. (a) Omolwashike uukuluntu wopambepo wu li elalakano lya dhenga mbanda kOmukriste? (b) Ongiini okutala ko iinima pambepo haku eta enyanyu?

⁹ Oshinima oshitiyali kombinga yokwiitunga kwoye osha popiwa moohapu ndhika dha nwethwa mo tadhi ti: “Tu lalakaneneni uukuluntu.” (Heb. 6:1) Okulalakanena uukuluntu wopambepo oshinima sha dhenga mbanda kOmukriste. Nonando itatu vulu okwaadha egwaneneno ngashingeyi, otatu vulu okwaadha uukuluntu wopambepo. Aakriste ohaya mono wo enyanyu enene mokulongela Jehova sho taya koko pambepo. Omolwashike shi li ngawo?

¹⁰ Omukriste ngoka a koka pambepo oha tala ko iinima ngaashi Jehova. (Joh. 4:23) Paulus okwa nyola a ti: “Mboka haa kala pahalo lyuuntu wawo, ohaa dhiladhila ngaashi uuntu wawo wa hala. Ihe mboka haa kala ngaashi Ombepo te ya lombwele, ohaa dhiladhila ngaashi Ombepo e shi hala.” (Rom. 8:5) Etaloko lyopantu ihali eta enyanyu lyolela, molwaashoka  ohali ningitha omuntu a kale i ihole, ihaa dhiladhila konakuyiwa noha lalakanene iinima yopamaliko. Etaloko lyopambepo ohali eta enyanyu, molwaashoka omuntu oha pulakene kuJehova ‘Kalunga omunelago.’ (1 Tim. 1:11, OB-1954) Omuntu a pyokoka pambepo oha kala a halelela okunyanyudha Jehova noha kala a nyanyukwa nonando ota makelwa. Omolwashike mbela? Omamakelo ohaga gandja ompito yokuulika kutya Satana omuniifundja noyokukakatela uudhiginini wetu shoka hashi nyanyudha Tate yetu gwomegulu. — Omayel. 27:11; lesha Jakob 1:2, 3.

11, 12. (a) Paulus okwa ti ngiini kombinga ‘yoondunge dhokuyoolola’ dhOmukriste, noshitya ‘okudheula’ otashi ti shike? (b) Olutu ohalu dheulwa ngiini, opo lu kale lwa kola nolwa pyokoka nawa?

¹¹ Opo wu koke pambepo owa pumbwa okwiidheula. Aahebeli 5:14 (OB-1954) otaya ti: ‘Iikulya ya kola oyaamboka ya koka, [ya dheulwa NW] noye na oondunge dha longekeka keigililo okuyoolola uuwanawa nuuwinayi.’ Sho Paulus a popi kombinga yoondunge dhetu dhokuyoolola dha ‘dheulwa,’ okwa longitha oshitya shOshigreka shoka sha li hashi longithwa olundji muudhano methelemumvo lyotango, shoka tashi vulu okutolokwa ‘omuntu ngoka hi itanauka mbali lwaali e li mombanda.’ Ngashingeyi dhiladhila kutya okwiidheula hoka okwa kwatela mo shike.

¹² Otwa valwa nomalutu inaaga dheulwa. Pashiholelwa, okahanona ihaka vulu okupangela omainyengo gomagulu nomaako gako. Ihe ohaka vulu okuyelula omaako nokwiidhenga nokuli moshipala shoka hashi ka uvitha nayi noku ka halutha. Mokukala taki inyenge aluhe, olutu lwako ohalu endele ko talu dheuka. Okanona ngele taka koko ohaka tameke taka kokaya, nopo nduno take ende sigo taka tameke okutondoka. * Ngele nani osho shi li ngawo, ongiini kombinga yomuntu  ngoka hi itanauna mbali lwaali e li mombanda? Ngele owa mono omudhani ngoka ta nanunuka nokwiihunya mumwe omanga e li mombanda ta fuula aatali note shi ningi nuunyakwa, nopwaahe na omalimbililo oto ka zimina kutya okwi idheula shili. Uunkulungu womuntu ngoka inawu holoka po owala ngeya, ihe oshe mu pula ethimbo olindji ti idheula opo a kale a pyokoka oku shi ninga. Ombiimbeli otayi popi kutya eidheulo lyopalutu “oli na ekwatho eshona.” Inashi simanenena tuu okudheula uupambepo wetu opo tu kale noondunge dhokuyoolola! — 1 Tim. 4:8.

13. Ongiini tatu vulu okudheula oondunge dhetu dhokuyoolola?

¹³ Membo ndika, otwa kundathana mo oshindji shoka tashi ke ku kwathela wu dheule oondunge dhoye dhokuyoolola opo wu vule okukala omudhiginini muJehova nowa pyokoka pambepo. Ngele to ningi omatokolo monkalamwenyo yoye yesiku nesiku, dhiladhila aluhe pamwe negalikano kombinga yomakotampango noompango dhaKalunga. Etokolo kehe to ningi, ipula to ti: ‘Mbela opu na oompango nomakotampango gOmbiimbeli ga pambathana noshinima shino? Ongiini tandi vulu oku ga tula miilonga? Onkatu yini tayi ka nyanyudha Tate gwomegulu?’ (Lesha Omayeletumbulo 3:5, 6; Jakob 1:5.) Etokolo kehe to ka ninga momukalo ngoka otali ka dheula oondunge dhoye dhokuyoolola. Edheulo ndyoka otali ke ku kwathela wu kale omuntu a pyokoka shili pambepo.

14. Otu na okukala hatu ipalutha ngiini opo tu koke pambepo, noshike tu na okukala twa kotokela?

¹⁴ Okukoka palutu ohaku hulu, ihe okukoka pambepo ihaku hulu. Okukoka okwi ikolelela kokulya kwetu. Onkene Paulus okwa ti: “Iikulya ya kola oyaakuluntu.” Opo wu tunge eitaalo  lyoye owu na okukala ho ipalutha niikulya ya kola yopambepo. Ngele to tula miilonga shoka to ilongo, oto ulike kutya owu na owino, nOmbiimbeli otayi ti: “Oshinima shotango okulikola owino.” Onkee ano, otu na okukala aluhe twa sa ondjala yoshili yi na ondilo ndjoka Tate yetu he tu pe. (Omayel. 4:5-7; 1 Pet. 2:2) Okukala tu na ontseyo nowino itashi ti kutya otu na okukala tu wete twa fa tu vule yalwe. Otwa pumbwa okwiikonakona aluhe opo uuntsa nenge omaunkundi galwe kaaga koke momitima dhetu. Paulus okwa nyola a ti: “Ikonakoneni, ne mu iyeleke opo mu tale ngele omu li tuu meitaalo.” — 2 Kor. 13:5.

15. Omolwashike ohole ya pumbiwa opo tu koke pambepo?

¹⁵ Egumbo otashi vulika li pwe okutungwa, ihe iilonga yoku li kaleka monkalo yi li nawa ihayi pu. Osha pumbiwa natango oku li opaleka, oku li kaleka monkalo ombwanawa noku li gwedhela uuna oonkalo tadhi lunduluka. Oshike twa pumbwa opo tu koke notu kale twa pyokoka pambepo? Kombanda yiinima ayihe, otwa pumbwa okukala tu na ohole. Otwa pumbwa okukokeka ohole yetu yokuhola Jehova nosho wo ooitaali ooyakwetu. Ngele katu na ohole, ontseyo niilonga yetu ayihe oyi li osima ngaashi owala ekudhilo lyokangendjo. (1 Kor. 13:1-3) Ngele otu na ohole, otatu ka koka nokuhuma komeho pambepo.

16. Okudhiladhila kuni Satana ta humitha komeho, negameno lini Jehova e tu pa?

¹⁶ Natu tale natango oshinima shimwe kombinga yokwiitunga kwoye. Opo wi itunge mwene wu li omulanduli gwashili gwaKristus, owu na okukotokela okudhiladhila kwoye. Satana omupangeli guuyuni mbuka, oku na ontseyo okuningitha aantu ya dhiladhile iinima mbyoka tayi ya teya omukumo, ya kale ya limbililwa, itaayi inekele yalwe nokaaye na etegameno. (Ef. 2:2) Okudhiladhila hoka okwa nika oshiponga kOmukriste ngaashi owala ontuko hayi vulu okuyona oohonga dhondunda. Shinyanyudha, Jehova okwe tu pa etegameno  ndyoka li li oshilongitho sha simanenena tashi tu gamene.

17. Ongiini Oohapu dhaKalunga tadhi ulike kutya etegameno olya simana?

¹⁷ Ombiimbeli oya popya iikondjitho yopambepo yi ili noyi ili mbyoka twa pumbwa opo tu kondjithe Satana nuuyuni mbuka. Oshikondjitho sha simana osho egala lyosheela ndyoka li li ‘etegameno lyehupitho lyetu.’ (1 Tes. 5:8) Pethimbo lyOmbiimbeli omukwiita okwa li e shi kutya ita ka hupa miita ngele ina zala egala lyosheela. Egala ndyoka olundji olya li lya longwa moshitenda e tali tulwa oshipa meni nolya li hali kandeke iikuti oyindji mbyoka ya thaneka komutse gwomukwiita opo kaayi mu ehameke unene. Ngaashi owala egala lyosheela lya li hali gamene omukwiita komutse, etegameno otali gamene omadhiladhilo goye.

18, 19. Jesus okwa tula po oshiholelwa shini shokukala netegameno, nongiini tatu vulu oku mu holela?

¹⁸ Jesus okwa tula po oshiholelwa sha dhenga mbanda shokukala netegameno. Dhimbulukwa shoka a li i idhidhimikile uusiku we wahugunina wonkalamwenyo ye kombanda yevi. Kuume ke kopothingo okwa li e mu gwaaleke omolwiimaliwa. Gumwe okwa li e mu idhimbike. Yalwe oya li ye mu thigi po e taya yi ontuku. Aantu yomoshigwana she oya li ye mu ekelehi noye mu gandja miikaha yaakwiita Aaroma ye mu alele komuti. Jesus okwa li shili a tsakaneke omamakelo omadhigu ngoka kaatu na esiku natu ka tsakaneke. Oshike sha li she mu kwathele? Aahebeli 12:2 otaya yamukula taya ti: “Omolwenyanyu ndyoka lya li lye mu tegelela okwi idhidhimikile esheko nokwa si eso [lyokomuti gwomahepeko NW]. Ngashingeyi okwa kuutumba kolulyo lwoshipangelapundi shaKalunga.” Jesus ina dhimbwa nando ‘enyanyu ndyoka lya li lye mu tegelela.’

¹⁹ Enyanyu lini lya li lya tegelela Jesus? Okwa li e shi shi kutya ngele okwi idhidhimikile omahepeko ota ka yambidhidha okusimanekitha edhina lyaJehova eyapuki. Ote ku ulika sha yela kutya Satana omuniifundja. Etegameno lya tya ngawo olya li lye etele Jesus enyanyu enene. Okwa li e shi shi wo  kutya Jehova ote ke mu laleka nuuyamba omolwuudhiginini we nokwa li a tegelela ompito ndjoka ombwanawa sho ta ka hangana ishewe naHe. Jesus okwa kaleke etegameno ndyoka linyanyudha momadhiladhilo sho a li momathimbo omadhigu. Otwa pumbwa okuninga sha faathana, molwaashoka natse otu na enyanyu lye tu tegelela. Jehova oha pe kehe gumwe gwomutse uuthembahenda wokuyapulitha edhina lye enene. Otatu vulu okuulika kutya Satana omuniifundja mokuhogolola Jehova e li Omupangeli gwetu nokwiikaleka mohole ye, kashi na nduno mbudhi kutya otatu ka adhika komamakelo ga tya ngiini.

20. Oshike tashi ku kwathele wu kale nomadhiladhilo gu uka nowu na etegameno?

²⁰ Jehova okwa halelela okupa aapiya ye aadhiginini ondjambi. (Jes. 30:18; lesha Maleaki 3:10.) Oha kala a nyanyukwa okupa aapiya ye shoka sho opalela omitima dhawo. (Eps. 37:4) Kaleka ano omadhiladhilo goye ga kola metegameno ndyoka li li komeho. Ino tameka nando okukala nomadhiladhilo omawinayi noga yonuka guuyuni waSatana. Ngele owu wete ombepo yuuyuni mbuka tayi ya momadhiladhilo nenge momutima gwoye, galikana kuJehova wa mana mo ‘e ku pe ombili ndjoka yi vule uunongo auhe.’ Ombili ndjoka yaKalunga otayi ka gamena omutima nomadhiladhilo goye. — Fil. 4:6, 7.

21, 22. (a) “Engathithi lyaantu” nenge ongundu onene otayi nyanyukilwa etegameno lini? (b) Oshitopolwa shini shetegameno lyopaKriste tashi ku nyanyudha noonkondo, nowa tokola toko okuninga shike?

 ²¹ Ku na tuu etegameno linyanyudha okutedhatedha kulyo! Ngele ngoye oshitopolwa ‘shengathithi lyaantu’ nenge ongundu onene ndjoka tayi ka ‘pita momahepeko omanene,’ dhiladhila konkalamwenyo ndjoka to ka mona masiku. (Eh. 7:9, 14) Uuna Satana noompwidhuli dhe kaaye po we, oto ka kala wa pepelelwa inoo shi mona nando onale. Olye gwomutse inaa tsakaneka nando onale omathiminiko okuza kuSatana? Ngele omathiminiko ge kaage po we, itatu ka kala tuu twa nyanyukwa okukutha ombinga miilonga yokulundulula evi li ninge oparadisa kohi yewiliko lyaJesus pamwe no 144 000 mboka taya ka pangela pamwe naye megulu! Enyanyu oli thike peni okumona omikithi adhihe nomauwehame kaayi po we, okuhambelela aaholike yetu mboka ya sa nokukala tu li monkalamwenyo ndjoka Kalunga a li a hala tu kale! Sho tatu ende tu uka kegwaneneno, otatu ka mona elaleko nuuyamba lya dhenga mbanda ndyoka lya popiwa mAaroma 8:21, sha hala okutya, ‘emanguluko neadhimo lyaana yaKalunga.’

²² Jehova okwa hala wu mone emanguluko enene ndyoka inoo mona nando onale. Opo wu ka mone emanguluko ndyoka, owu na okukala omuvuliki. Mbela inashi simana tuu okukala hatu vulika kuJehova kehe esiku? Onkee ano, ninga ngaashi to vulu opo wu kale nokutunga eitaalo lyoye eyapuki nowu kale mohole yaKalunga sigo aluhe.