1, 2. Ke modiro ofe wa go aga wo o o dirago, gona ke ka baka la’ng boemo bja mošomo wa gago e le bja bohlokwa kudu?

O ŠOMA ka thata modirong wa go aga. Modiro woo o šetše o tšere nako e telele o kgatlampana gomme o sa dutše o tla tšea nako e telele. Go ba go fihla ga bjale, modiro woo o be o dutše o le thata eupša e le o kgotsofatšago. Go sa šetšwe gore go direga eng, o ikemišeditše go se felelwe ke matla goba go se goge maoto, ka ge boemo bja modiro wa gago bo tla kgoma bophelo bja gago le bokamoso bja gago. Ke ka baka la’ng go le bjalo? Ka gobane ke wena yo a agwago!

² Morutiwa Juda o ile a gatelela gore re swanetše go ikaga. Ge a be a kgothaletša Bakriste gore ba “[dule] leratong la Modimo,” o ile a ba a bontšha ditemaneng tšeo lebaka le legolo la gore re dire bjalo ka gore: “Ikageng tumelong ya lena e kgethwakgethwa.” (Juda 20, 21) O ka ikaga ka ditsela dife gore o tiiše tumelo ya gago e le gore o dule leratong la Modimo? Anke re ahlaahleng dibopego tše tharo tša modiro wa go aga moyeng tšeo o lebanego le tšona.

3-5. (a) Sathane o nyaka go go aroša ka gore o be le pono efe ka dilo tšeo Jehofa a di nyakago go rena? (b) Pono ya rena ka dilo tšeo Modimo a di nyakago go rena e swanetše go ba efe, gomme e tla kgoma bjang tsela yeo re naganago ka yona? Nea mohlala.

³ Sa pele, re swanetše go matlafatša tumelo ya rena molaong wa Modimo. Ge o dutše o ithuta puku ye, o šetše o etše hloko melao e mentši ya Jehofa e lokilego ya mabapi le boitshwaro.  Pono ya gago ka yona ke efe? Sathane o nyaka go go fapoša e le gore o lebelele melao ya Jehofa, melao ya motheo le ditekanyetšo tša gagwe e le tšeo di go thibelago go thabela dilo tše dibotse le go go gatelela. O be a dutše a diriša leano le ga e sa le go tloga nakong ya ge le atlega morago kua Edene. (Genesi 3:1-6) Na leano la gagwe le tla šoma go wena? Se se ithekgile ka boemo bja gago bja kgopolo.

⁴ Ka mohlala: Ge o dutše o sepela serapeng se sebotse, o bona legora le le tiilego le le phagamego leo le go thibelago gore o se tsene karolong e itšego ya serapa. Karolo yeo ya serapa ya ka kua ga legora e bonagala e gogela. Mathomong, go ka direga gore o lebelela legora leo e le thibelo e sa nyakegego ya tokologo ya gago. Lega go le bjalo, ge o dutše o lebeletše o le mo legoreng leo, o bona tau e šoro e nyaka go hlasela selo se itšego e le ka kua ga lona! Ga bjale o lemoga seo ge e le gabotse se emelwago ke legora leo​—tšhireletšo. Na go na le sebata seo se nyakago go go hlasela gona bjale? Lentšu la Modimo le lemoša ka gore: “Dulang le hlaphogetšwe, le phakgame. Lenaba la lena Diabolo o sepelasepela go swana le tau e rorago, a nyaka yo a kago go mo metša.”​—1 Petro 5:8.

⁵ Sathane ke sebata se sešoro. Ka ge Jehofa a sa nyake gore re be bahlaselwa ba Sathane, O ile a rulaganya gore go be le melao yeo e ka re šireletšago ‘ditirong tše dintši tša bohwirihwiri’ tša yena yoo yo kgopo. (Baefeso 6:11) Ka gona, neng le neng ge re naganišiša ka melao ya Modimo, re swanetše go e lebelela e le pontšho ya lerato leo le tšwago go Tatago rena wa legodimong. Ge re lebelela melao ya Modimo ka tsela yeo, e fetoga mothopo wa tšhireletšo le lethabo. Morutiwa Jakobo o ngwadile gore: “Yo a lebeledišišago molaong o phethagetšego wo e lego wa tokologo gomme a o phegelela . . . o tla thabišwa ke go o dira.”​—Jakobo 1:25.

6. Ke tsela efe e kaonekaone yeo o ka agago tumelo melaong e lokilego ya Modimo le melaong ya gagwe ya motheo? Nea mohlala.

⁶ Go phela ka ditaelo tša Modimo ke tsela e kaonekaone ya go aga tumelo ya rena go Monei wa molao le bohlaleng bjoo bo tšwago melaong ya gagwe. Ka mohlala, “molao wa Kriste” o  akaretša taelo ya Jesu ya go ruta ba bangwe “dilo tšohle tšeo [a di] laetšego.” (Bagalatia 6:2; Mateo 28:19, 20) Le gona Bakriste ba tšeela godimo taelo ya go dula ba bokana gotee bakeng sa borapedi le go ba le segwera se se agago. (Baheberu 10:24, 25) Melao ya Modimo gape e akaretša kgothatšo ya go rapela Jehofa ka mehla, ka makga a mantši le ka go tšwa pelong. (Mateo 6:5-8; 1 Bathesalonika 5:17) Ge re dutše re phela ka ditaelo tše bjalo, re bona gabotse tlhahlo e lerato yeo di e neago. Go di kwa go re tlišetša tekanyo e kgolo ya lethabo le kgotsofalo yeo le ka mohla re ka se e hwetšego lefelong le ge e le lefe lefaseng le leo le nago le mathata. Ge o dutše o naganišiša kamoo o ilego wa holega ka gona ka go phela ka go dumelelana le melao ya Modimo, na ga e matlafatše tumelo ya gago?

7, 8. Lentšu la Modimo le kgonthišetša bjang bao ba tshwenyegago ka gore ba ka se kgone go kgomarela tsela e lokilego ge nywaga e dutše e feta?

⁷ Ka dinako tše dingwe, batho ba bangwe ba tshwenyega ka gore go tla ba thata kudu go kgomarela melao ya Jehofa ge nywaga e dutše e feta. Ba boifa gore ka tsela e itšego go ka direga gore ba palelwe. Ge e ba o nagana ka tsela yeo, dula o gopola mantšu a rego: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona. Ge feela le be le ka ela hloko ditaelo tša  ka, gona khutšo ya lena e be e tla etša noka gomme go loka ga lena gwa etša maphoto a lewatle.” (Jesaya 48:17, 18) Na o kile wa ema wa nagana kamoo mantšu ao a kgothatšago ka gona?

⁸ Jehofa mo o re gopotša gore re a holega ge re mo kwa. O re holofetša ditšhegofatšo tše pedi ge e ba re dira bjalo. Ya pele, khutšo ya rena e tla swana le noka​—e homotšego, e tletšego le e elelago. Ya bobedi, go loka ga rena go tla swana le maphoto a lewatle. Ge o eme lebopong la lewatle gomme o bogetše maphoto a etla ka go latelana, ga go pelaelo gore o bona seo se ka se ke sa kgaotša. O a tseba gore maphoto a tla dula a etla gomme a tla felela lebopong la lewatle ka nywaga e mentši e sa tlago. Jehofa o re go loka ga gago​—tsela ya gago ya go dira se nepagetšego—​go ka ba bjalo. Ge feela o katanela go mmotegela, le ka mohla a ka se go tlogele o palelwa! (Bala Psalme 55:22) Na dikholofetšo tše bjalo tše ruthetšago pelo di aga tumelo ya gago go Jehofa le melaong ya gagwe e lokilego?

9, 10. (a) Ke ka baka la’ng kgolo ya moya e le pakane e kgahlišago yeo Bakriste ba ka ipeelago yona? (b) Go bona dilo ka tsela ya moya go tlaleletša bjang lethabong?

⁹ Sebopego sa bobedi sa modiro wa gago wa go aga se boletšwe mantšung a a buduletšwego a rego: “A re phegeleleng kgolong.” (Baheberu 6:1) Kgolo ya moya ke pakane e kgahlišago yeo Mokriste a ka ipeelago yona. Ka go fapana le go phethagala mo go ka se fihlelelwego gona bjale, kgolo ya moya ke pakane yeo batho ba ka e fihlelelago. Go feta moo, Bakriste ba hwetša lethabo le legolo go hlankeleng Jehofa ge ba dutše ba gola moyeng. Ke ka baka la’ng go le bjalo?

¹⁰ Mokriste yo a godilego ka tsebo ke motho wa moya. O lebelela dilo go ya ka pono ya Jehofa. (Johane 4:23) Paulo o ngwadile gore: “Bao ba dumelelanago le nama ba bea menagano ya bona dilong tša nama, eupša bao ba dumelelanago le moya ba e bea dilong tša moya.” (Baroma 8:5) Go bona dilo ka tsela ya nama ga go tliše lethabo, ka ge gantši go bontšha boithati, go dira gore motho a bonele dilo kgauswi le go dira gore a tshwenyege ka dilo tše di bonagalago. Go bona dilo ka tsela  ya moya go tliša lethabo, ka ge go lebišitše ditaba go Jehofa, e lego “Modimo yo a thabilego.” (1 Timotheo 1:11) Motho wa moya o fagahletše go kgahliša Jehofa gomme o a thaba ge a lebeletšane le teko. Ka baka la’ng? Diteko di re nea dibaka tša go hlatsela Sathane gore ke moaketši le gore re hlagolele potego, e lego seo se kgahlišago Tatago rena wa legodimong.​—Diema 27:11; bala Jakobo 1:2, 3.

11, 12. (a) Paulo o boletše’ng ka “matla a go hlatha” a Mokriste, gomme lentšu leo le fetoletšwego e le “tlwaeditšego” le bolela’ng? (b) Mmele o swanetše go hwetša tlwaetšo efe e le gore o gole le go kgona go tia?

¹¹ Go ba motho wa moya le go gola tsebong go tlišwa ke go itlwaetša. Ela hloko temana ye: “Dijo tše di tiilego ke tša batho ba ba godilego moyeng, bao ba tlwaeditšego matla a bona a go hlatha ka go a diriša, e le gore ba kgethologanye se se nepagetšego le se se fošagetšego.” (Baheberu 5:14) Ge Paulo a be a bolela ka matla a rena a go hlatha a ‘tlwaeditšwego,’ o ile a diriša lentšu la Segerika leo go ka diregago gore ka tlwaelo le be le dirišwa mafelong a dipapadi tša go laetša matla a mmele tša Gerika lekgolong la pele la nywaga, ka ge le ka fetolelwa e le go ‘tlwaetšwa go swana le sebapadi seo.’ Ga bjale nagana seo se akaretšago tlwaetšo yeo.

¹² Ge re be re belegwa, mmele wa rena o be o se wa tlwaetšwa. Ka mohlala, leseana le ka se kgone go kwešiša gore matsogo le maoto a lona a manyenyane a swanetše go dirišwa bjang. Ka baka leo, leseana le emiša matsogo a lona ka ntle le lebaka, gaešita le go ipetha sefahlegong, e lego seo se ka dirago gore leseana le tenege e bile le makale. Ganyenyane-ganyenyane, ka go tlwaela go diriša ditho tša mmele, mmele o a tlwaela. Ngwana yo monyenyane o a abula, ge a gola o a sepela, gomme ge a tiiletše o a kitima. * Bjale go thwe’ng  ka sebapadi sa go laetša matla a mmele? Ge o bona ramabelo yo bjalo a tshelatshela le go menagana a le moyeng ka tsela e kgahlišago le e nepagetšego, ga go pelaelo mogopolong wa gago gore mešifa ya mmele ke kgale e tlwaeditšwe go dira se. Bokgoni bja sebapadi seo ga se bja itlela ka sewelo​—go ile gwa nyakega diiri tše dintši tša go itlwaetša. Beibele e dumela gore tlwaetšo e bjalo ya mmele e “hola ganyenyane.” Ruri go tlwaetša ga rena matla a rena a go hlatha a moya go tloga go le bohlokwa kudu!​—1 Timotheo 4:8.

13. Re ka tlwaetša bjang matla a rena a go hlatha?

¹³ Ka pukung ye, re šetše re ahlaahlile dilo tše dintši tšeo di tlago go go thuša gore o tlwaetše matla a gago a go hlatha e le gore o ka dula o botegela Jehofa o le motho wa moya. Naganišiša ka thapelo ka melao ya Modimo le melao ya gagwe ya motheo ge o dutše o dira diphetho bophelong bja gago bja letšatši le letšatši. Phethong e nngwe le e nngwe yeo o lebeletšanego le yona, ipotšiše gore: ‘Ke melao efe ya Beibele goba melao ya yona ya motheo yeo e sepedišanago le taba ye? Nka e diriša bjang? Ke tsela efe e tlago go kgahliša Tate wa legodimong?’ (Bala Diema 3:5, 6; Jakobo 1:5) Ka tsela yeo, phetho e nngwe le e nngwe yeo o e dirago e tla tlwaetša matla a gago a go hlatha. Tlwaetšo e bjalo e tla go thuša gore o dule o le motho wa moya e le ruri.

14. Ke kganyogo efe yeo e nyakegago e le gore re gole moyeng, eupša re swanetše go dula re gopola temošo efe?

¹⁴ Gaešita le ge motho a ka gola moyeng, kgolo yeo ka mehla ke yeo e tšwelago pele. Go gola go ithekgile ka dijo. Ka gona Paulo o itše: “Dijo tše di tiilego ke tša batho ba ba godilego moyeng.” Tsela e bohlokwa kudu ya gore o age tumelo ya gago ke ka go tšwela pele o iphepa ka dijo tše di tiilego tša moya. Ge o  dutše o diriša seo o ithutago sona ka mo go nepagetšego, seo se tloga se bontšha bohlale, le gona Beibele e re: “Bohlale ke selo se segolo.” Ka gona, re swanetše go hlagolela tlala ya kgonthe ya ditherešo tše dibotse tšeo Tatago rena a re neago tšona. (Diema 4:5-7; 1 Petro 2:2) Go ba gona, ge re hwetša tsebo le bohlale bja Modimo ga go nyakege gore re ikgogomoše. Go nyakega gore re itlhahlobe ka mehla e le gore re se dumelele boikgogomošo goba mafokodi a mangwe go tsema medu ka dipelong tša rena. Paulo o ngwadile gore: “Dulang le itekola go bona ge e ba le sa le tumelong, dulang le itlhatsela seo lena ka noši le lego sona.”​—2 Bakorinthe 13:5.

15. Ke ka baka la’ng lerato le nyakega e le gore re gole moyeng?

¹⁵ Go aga ntlo go ka fela, eupša mošomo wa go e boloka e le boemong bjo bobotse o sa tšwela pele. Go e hlokomela le go e lokiša go bohlokwa, gomme go ka nyakega gore e oketšwe ge maemo a fetoga. Go nyakega eng e le gore re gole ka tsebo le go kgomarela bomoya bja rena? Sa bohlokwa kudu ke lerato. Re swanetše go dula re gola leratong la go rata Jehofa le badumedigotee le rena. Ge e ba re se na lerato, tsebo ya rena ka moka le mediro e ka ba lefeela​—go swana le modumo o tsenago ka ditsebeng. (1 Bakorinthe 13:1-3) Ka go ba le lerato, re ka fihlelela kgolo ya Bokriste gomme ra tšwela pele re gola moyeng.

16. Ke kgopolo ya mohuta ofe yeo Sathane a e kgothaletšago, gomme ke tšhireletšo efe yeo Jehofa a re neilego yona?

¹⁶ Anke re hlahlobeng sebopego se sengwe sa modiro wa gago wa go aga. E le gore o ikage gore o be molatedi wa kgonthe wa Kriste, go nyakega gore o hlokomele tsela yeo o naganago ka yona. Sathane, e lego mmuši wa lefase le, o na le bokgoni bja go dira gore batho ba ineele dikgopolong tše di fošagetšego, ba dule ba letetše dilo tše mpe, ba se botane e bile ba hloke kholofelo. (Baefeso 2:2) Kgopolo e bjalo ke e kotsi go Mokriste go swana le lepolanka le le bodilego moagong wa go dirwa ka dikota. Se se thabišago ke gore Jehofa o re nea sedirišwa sa bohlokwa sa go iphemela​—kholofelo.

17. Lentšu la Modimo le bontšha bjang bohlokwa bja kholofelo?

 ¹⁷ Beibele e lokeletša dikarolo tše fapafapanego tša ditlhamo tša moya tšeo di nyakegago ntweng ya rena le Sathane gotee le lefase le. Karolo e bohlokwa ya ditlhamo tšeo ke kefa, e lego “kholofelo ya phološo.” (1 Bathesalonika 5:8) Mehleng ya Beibele lešole le be le tseba gore le ka se phologe ntweng ntle le kefa. Ka ge gantši e be e dirwa ka tšhipi gomme e bewa ka godimo ga lešela la go logwa goba kuane ya mokgopa, kefa yeo e be e kgonthiša gore bontši bja dibetša tšeo di bego di lebišitšwe hlogong di be di tla thedimoga ntle le gore di bake kgobalo e kgolo. Ka ge kefa e be e šireletša hlogo, kholofelo e ka šireletša monagano wa gago.

18, 19. Jesu o beile mohlala ofe wa go kgomarela kholofelo, gomme re ka mo ekiša bjang?

¹⁸ Jesu o beile mohlala o mogolo wa go kgomarela kholofelo. Gopola seo a ilego a se kgotlelela bošegong bja gagwe bja mafelelo ge a be a le lefaseng. Mogwera wa gagwe wa kgauswi o ile a mo eka e le gore a ikhweletše tšhelete. Yo mongwe o ile a ba a mo latola. Ba bangwe ba ile ba mo tlogela gomme ba tšhaba. Batho ba gabo ba ile ba mo hlanogela, ba nyaka gore a bolawe ka go tlaišwa diatleng tša madira a Baroma. Ga go pelaelo gore Jesu o ile a lebeletšana le diteko tše boima tšeo le ka mohla re ka se lebeletšanego le tšona. O thušitšwe ke’ng? Baheberu 12:2 e araba ka gore: “Ka baka la lethabo leo le bego le beilwe pele ga gagwe o ile a kgotlelela kota ya tlhokofatšo, a se be le taba le go hlabišwa dihlong gomme a dula ka letsogong la le letona la sedulo sa bogoši sa Modimo.” Jesu le ka mohla ga se a ka a lahlegelwa ke “lethabo leo le bego le beilwe pele ga gagwe.”

¹⁹ Ke lethabo lefe leo le bego le beilwe pele ga Jesu? O be a tseba gore ka go tšwela pele a kgotlelela, o tla tlaleletša go kgethagatšeng leina le lekgethwa la Jehofa. O be a tla nea bohlatse bjo bogolo bja gore Sathane ke moaketši. Ruri ga go na kholofelo yeo e bego e ka nea Jesu lethabo le legolo go feta leo! Le gona, o be a tseba gore Jehofa o tla putsa tsela ya gagwe ya potego​—le gore mo pele ga gagwe go letše nako e kgahlišago ya ge a tlo kopanywa gape le Tatagwe. Jesu o ile a dula a nagana ka kholofelo e bjalo e thabišago dinakong tše thata kudu. Go  nyakega gore re dire se se swanago. Le rena re na le lethabo leo le beilwego pele ga rena. Jehofa o re neile tokelo ya go thuša go kgethagatša leina la gagwe le legolo. Re ka hlatsela Sathane gore ke moaketši ka go kgetha Jehofa e le Mmuši wa rena le ka go dula leratong la Tatago rena re bolokegile go sa šetšwe gore ke diteko le meleko efe yeo re ka lebeletšanago le yona.

20. Ke’ng seo se ka go thušago gore o dule o na le pono e botse le kholofelo?

²⁰ Jehofa ga se a fo ikemišetša go putsa bahlanka ba gagwe ba botegago​—o fagahletše go dira bjalo. (Jesaya 30:18; bala Maleaki 3:10) O kgahlegela go nea bahlanka ba gagwe seo se kganyogwago ke dipelo tša bona. (Psalme 37:4) Ka gona boloka monagano wa gago o tiile kholofelong yeo e lego ka pele ga gago. Le ka mohla o se ke wa ineela dikgopolong tše fošagetšego, tše lešago dihlong gotee le tše kgopamego tša lefase la kgale la Sathane. Ge e ba o lemoga gore moya wa lefase le o tsena monaganong wa gago goba pelong ganyenyane-ganyenyane, rapela Jehofa ka potego gore a go nee “khutšo ya Modimo yeo e fetago kwešišo yohle.” Khutšo yeo Modimo a go neilego yona e tla diša pelo ya gago le matla a gago a monagano.​—Bafilipi 4:6, 7.

21, 22. (a) Ke kholofelo efe e kgahlišago yeo ba “lešaba le legolo” ba e tšeelago godimo? (b) Ke karolo efe ya kholofelo ya Bokriste yeo e go kgahlago kudu, gomme boikemišetšo bja gago ke bofe?

²¹ Ruri ke kholofelo e kgahlišago yeo o swanetšego go naganišiša  ka yona! Ge e ba o le yo mongwe wa ba “lešaba le legolo,” yo a tla “tšwago masetlapelong a magolo,” akanya ka bophelo bjoo kgauswinyana o tlago go bo phela. (Kutollo 7:9, 14) Ka ge Sathane le batemona ba gagwe ba tla be ba se sa hlwa ba le gona, o tla imologa ka tsela yeo ga bjale go lego thata go ka e kwešiša. Go ba gona, ke mang go rena yoo a kilego a lebeletšana le bophelo bjo bo hlokago tutuetšo e senyago ya Sathane? Ka ge kgateletšo yeo e tla ba e se gona, go tla thabiša gakaakang go šoma modirong wa go fetoša lefase gore e be paradeise ka tlase ga tlhahlo ya Jesu le babušigotee le yena ba 144 000 ba lego legodimong! Ruri re kgahlišwa ke tebelelo ya go bona malwetši ka moka le mafokodi a fedišitšwe, go amogela baratiwa ba rena ba lego mabitleng le go phela ka tsela yeo Modimo a bego a rerile gore re phele ka yona! Ge re dutše re eya phethegong, go tla ba go batamela moputso o mogolo kudu, e lego kholofetšo e begilwego go Baroma 8:21​—“tokologo ya letago ya bana ba Modimo.”

²² Jehofa o nyaka gore o fihlelele tekanyo e kgolo ya tokologo go feta yeo o ka e akanyago. Tsela e lebišago tokologong yeo e ithekgile ka go kwa. Na ga go nyakege gore o dire boiteko gona bjale gore o kwe Jehofa letšatši le lengwe le le lengwe? Ka gona, dira sohle seo o ka se kgonago, ka go ikaga tumelong ya gago e kgethwakgethwa, e le gore o dule leratong la Modimo ka mo go sa felego!