1, 2. Suazilɛ gyima boni a ɛlɛyɛ a, na duzu ati a ɔhyia kɛ ɛyɛ ye kpalɛ a?

Ɛ NYE ɛbolo ɛlɛsi sua bie. Ɛbɔle ɔ bo la yehyɛ, yɛɛ ɔbahyɛ na wɔawie. Gyima ne yɛ se noko ɔyɛ ahunlundwolɛ. Wɔzi kpɔkɛ kɛ, ye biala anu, ɛnrɛgyakyi ye ɛzilɛ yɛɛ ɛnrɛmaa ɛ sa nu ɛnrɛdo, ɔluakɛ kɛzi ɛbayɛ ye biala la ɔbaha wɔ ɛbɛlabɔlɛ, bɔbɔ wɔ kenlebie. Duzu ati ɔ? Ɔluakɛ sua ne mɔ ɛlɛsi la a le ɛdawɔ!

² Ɛdoavolɛ Dwuudu zile kɛzi ɔwɔ kɛ yɛkɔ zo yɛmaa yɛ diedi nyi la azo. Mekɛ mɔɔ ɔdule Keleseɛnema folɛ kɛ “bɛzie bɛ nwo wɔ Nyamenle ɛhulolɛ ne anu la,” eza ɔhilele bɛ adenle kpalɛ mɔɔ bɛbahola bɛalua zo bɛayɛ zɔ la wɔ ngɛlɛlera ko ne ala anu, ɔhanle kɛ: “Bɛhɔ zolɛ bɛnyi na bɛgyinla kpundii wɔ bɛ diedi nwuanzanwuanza ne anu.” (Dwuudu 20, 21) Ndenle boni mɔ a ɛbahola wɔalua zo wɔamaa wɔ diedi anyi na wɔadɛnla Nyamenle ɛhulolɛ ne anu a? Bɛmaa yɛzuzu ndenle nsa mɔɔ yɛdua zo a yɛbanyi sunsum nu la anwo.

3-5. (a) Adwenle boni a Seetan kulo kɛ ɔbɛlɛbɛla wɔ ɔmaa ɛnyia wɔ Gyihova mɛla ne mɔ anwo a? (b) Adwenle boni a ɔwɔ kɛ yɛnyia wɔ Nyamenle mɛla ne mɔ anwo a, na kɛzi ɔwɔ kɛ ɔmaa yɛte nganeɛ ɛ? Maa nwolɛ neazo.

³ Mɔɔ lumua la, ɔwɔ kɛ yɛnyia diedi kpole wɔ Nyamenle mɛla ne mɔ anu. Wɔzukoa Gyihova tenlene mɛla dɔɔnwo mɔɔ fane ɛbɛlabɔlɛ nwo la wɔ buluku ɛhye anu. Adwenle  boni a wɔnyia ye wɔ nwo a? Seetan kulo kɛ ɔbɛlɛbɛla wɔ ɔmaa ɛte nganeɛ kɛ Gyihova mɛla, ye ngyinlazo nee ye ndenle ne mɔ azolilɛ yɛ se, na bɔbɔ ɔle adesoa. Yeva mɛlɛbɛla ɛhye yeli gyima ɔvi mekɛ mɔɔ ɔnwunle kɛ ɔyɛle gyima wɔ Yidɛn la. (Mɔlebɛbo 3:1-6) Asoo ɔbahola yeabɛlɛbɛla wɔ? Ɔbagyinla ɛ nwo zo.

⁴ Neazo bie ɛne: Fa ye kɛ ɛlua tola kɛnlɛma bie anloa, yɛɛ wɔnwu kɛ bɛlie ye foa bie anwo bane mɔɔ yɛ se la bɛhɔ anwuma. Tola ne ɛleka mɔɔ bɛlie nwolɛ bane la le kɛnlɛma. Bie a alumua ne, ɛbade nganeɛ kɛ bɛva bane ne mɔɔ bɛlie la bɛzi wɔ fanwodi nwo adenle. Noko mekɛ mɔɔ ɛlɛnea tola ne anu la, ɛnwunle kɛ awenade anwo ɛzulolɛ bie kpondɛ kɛ ɔkye nane bie ɔdi! Akee wɔnwu deɛmɔti bɛlie bane ne la​—ɔle banebɔlɛ. Ɛnɛ, asoo kpɔvolɛ anwo ɛzulolɛ bie kpondɛ kɛ ɔkye wɔ ɔ? Nyamenle Edwɛkɛ ne bɔ kɔkɔ kɛ: “Bɛyɛ bɛ nye gyɛlɛmgbɛɛnye na bɛzinza! Na bɛ kpɔvolɛ ne, mɔɔ le Abɔnsam, lua nu ɛlɛkpo kɛ awenade, ɔlɛkpondɛ awie yeahye ye yeali.”​—1 Pita 5:8.

⁵ Seetan le kpɔvolɛ mɔɔ anwo yɛ ɛzulolɛ. Gyihova ɛngulo kɛ Seetan kye yɛ la ati, yeyɛ mɛla dɔɔnwo mɔɔ bɔ yɛ nwo bane fi kpɔvolɛ ɛhye “agyiba ne mɔ” anwo la. (Ɛfɛsɛsema 6:11) Ɛhye ati, mekɛ biala mɔɔ yɛbadwenledwenle Nyamenle mɛla ne mɔ anwo la, ɔwɔ kɛ yɛnwu kɛ yɛ anwuma Selɛ ne kulo yɛ la ati a yeva zɔhane mɛla ne mɔ yemaa yɛ a. Saa yɛte ɔ bo zɔhane a, Nyamenle mɛla ne mɔ babɔ yɛ nwo bane na yɛ nye alie. Ɛdoavolɛ Gyemise hɛlɛle kɛ: “Awie mɔɔ neɛnlea fanwodi mɛla ne mɔɔ di munli la anu, na ɔsɔ nu dwaa ɔfa ɔbɔ ye ɛbɛla . . . la, yemɔ yɛɛ Nyamenle kɛyila ye wɔ ye ɛbɛlabɔlɛ nu a.”​—Gyemise 1:25.

6. Adenle kpalɛ boni a yɛkola yɛdua zo yɛnyia diedi wɔ Nyamenle tenlene mɛla nee ngyinlazo ne mɔ anu a? Maa nwolɛ neazo.

⁶ Saa yɛdi Nyamenle mɛla ne mɔ azo a, ɔbamaa yɛanyia diedi kpole wɔ Mɛla Maavolɛ ne anu na yɛanwu nrɛlɛbɛ mɔɔ wɔ ye mɛla ne mɔ anu la. Kɛ neazo la, menli mɔɔ yɛkilehile  bɛ ‘debie biala mɔɔ Gyisɛse ɛha ɛhile yɛ la’ boka “Kelaese mɛla ne” anwo. (Galeehyeama 6:2; Mateyu 28:19, 20) Eza Keleseɛnema bu mɛla mɔɔ se yɛyia nu dahuu yɛzonle na yɛmaa yɛ nwo anwosesebɛ la kɛ ɔhyia kpalɛ. (Hibuluma 10:24, 25) Nyamenle mɛla bieko a le kɛ yɛvi ahonle nu yɛva asɔneyɛlɛ yɛdo Gyihova anyunlu dahuu. (Mateyu 6:5-8; 1 Tɛsalonaekama 5:17) Mekɛ mɔɔ yɛlɛdi mɛla zɛhae mɔ azo la, yɛbanwu ye wienyi kɛ ɔle adehilelɛ mɔɔ ɛlɔlɛ wɔ nu. Saa yɛdi zo a, yɛnyia anyelielɛ nee anzondwolɛ kpole mɔɔ yɛnrɛnyia bie wɔ ewiade ɛhye mɔɔ ngyegyelɛ ɛlie ebia wɔ nu la ɛleka biala a. Saa ɛdwenledwenle kɛzi Nyamenle mɛla mɔɔ ɛdi zo la ɛboa wɔ la anwo a, asoo ɔmmaa ɛnnyia diedi kpole wɔ nu ɔ?

7, 8. Adenle boni azo a Nyamenle Edwɛkɛ ne maa bɛdabɛ mɔɔ bie a bɛsulo kɛ bɛnrɛhola bɛnrɛbɔ ɛbɛla tenlene bɛnrɛhɔ awieleɛ la anwosesebɛ a?

⁷ Ɔyɛ a, bie mɔ dwenle kɛ, ɔyɛ se kɛ bɛbali Gyihova mɛla zo. Bɛsulo kɛ bie a ɛnee bɛangola bie azo di. Saa ɛte nganeɛ zɔhane a, ɛnee kakye edwɛkɛ ɛhye: “Medame a mele [Gyihova] bɛ Nyamenle ne, mɔɔ kilehile bɛ maa bɛyɛ kpalɛ, na ɔdi bɛ nyunlu ɔkilehile bɛ adenle mɔɔ ɔwɔ kɛ bɛdua nu la. ‘O anrɛɛ bɛdiele me mɛla ne mɔ! Anrɛɛ bɛ [anzondwolɛ] kɛyɛ kɛ azule, na bɛ tenleneyɛlɛ ayɛ kɛ nyevile azɛlɛkye.’”  (Ayezaya 48:17, 18) Asoo wɔdwenle kɛzi edwɛkɛ ɛhye maa anwosesebɛ la anwo ɛlɛ?

⁸ Gyihova ɛlɛkakye yɛ wɔ ɛke kɛ yɛtie ye a ɔbawie yɛ boɛ. Yebɔ ɛwɔkɛ kɛ yɛbanyia nyilalɛ ngakyile nwiɔ. Mɔɔ lumua la, yɛ anzondwolɛ bayɛ kɛ azule​—ɔbabu zo, yeayɛ kpole, na yeadɛnla ɛkɛ dahuu. Mɔɔ tɔ zo nwiɔ, yɛ tenleneyɛlɛ bayɛ kɛ nyevile azɛlɛkye. Ɔda ali kɛ, saa ɛgyi nyevile nloa na ɛnea kɛzi azɛlɛkye ne mɔ bu toɔdoa zo la a, ɔmaa ɛte nganeɛ kɛ ɔbahɔ zolɛ dahuu. Ɛze kɛ azɛlɛkye ne bahɔ zo abu, ɔ bo ɛnrɛpɛ ɛlɛ. Gyihova se, kɛ wɔ tenleneyɛlɛ anzɛɛ wɔ ɛbɛla kpalɛ ɛbɔlɛ bayɛ la ɛne. Saa ɛbɔ mɔdenle ɛdi nɔhalɛ ɛmaa ye a ɔnrɛmaa ɛnrɛkpo aze ɛlɛ! (Bɛgenga Edwɛndolɛ 55:22.) Asoo ɛwɔkɛ zɛhae mɔɔ maa ahonle di fɛlɛko la ɛmmaa diedi mɔɔ ɛlɛ wɔ Gyihova nee ye tenlene mɛla ne mɔ anu la ɛnyɛ kpole ɔ?

9, 10. (a) Duzu ati a sunsum nu ɛnyilɛ le bodane kɛnlɛma maa Keleseɛnema a? (b) Adenle boni azo a sunsum nu adwenle boa maa yɛ nye die a?

⁹ Debie mɔɔ tɔ zo nwiɔ mɔɔ bamaa wɔ diedi anyi la da ali wɔ edwɛkɛ ɛhye mɔɔ vi Nyamenle ɛkɛ la anu: “Bɛmaa yɛhɔ zolɛ yɛzukoa yɛyɛ mgbanyinli.” (Hibuluma 6:1) Mgbanyinli anzɛɛ sunsum nu mɔɔ yɛnyi la le bodane kɛnlɛma maa Keleseɛnema. Yɛkola yɛnyi sunsum nu, ɔnle kɛ munlililɛ mɔɔ alesama ɛngola ɛndwu nwolɛ ɛnɛ la. Bieko, mekɛ mɔɔ Keleseɛnema ɛlɛnyi sunsum nu la, bɛ nye die kpole wɔ Gyihova ɛzonlenlɛ nu. Duzu ati ɔ?

¹⁰ Keleseɛnenli mɔɔ ɛnyi la le sunsum nu sonla. Ɔfa Gyihova anwo adwenle ɔsuzu ninyɛne nwo. (Dwɔn 4:23) Pɔɔlo hɛlɛle kɛ: “Bɛdabɛ mɔɔ bɛde nwonane nu la adwenle wɔ nwonane nu ninyɛne ɛyɛlɛ zo. Bɛdabɛ noko mɔɔ bɛtɛnla kɛmɔ Sunsum ne kile bɛ la adwenle wɔ Sunsum nu nyɛleɛ zo.” (Wulomuma 8:5) Nvasoɛ mɔɔ wɔ nwonane nu  adwenle zo la le ekyi, ɔluakɛ ɔle angomedi, ɔndwenle ɔngɔ moa, yɛɛ ɔtwe adwenle ɔkɔ nwonane afoa nu ninyɛne zo. Sunsum nu adwenle maa anyelielɛ, ɔluakɛ ɔtwe adwenle ɔkɔ Gyihova, ‘anyelielɛ Nyamenle ne’ anwo zo. (1 Temɔte 1:11) Sunsum nu sonla kulo kɛ ɔsɔ Gyihova anye yɛɛ sɔnea to ye bɔbɔ a ɔ nye die. Kɛmɔti ɛ? Sɔnea maa yɛnyia adenle yɛkile kɛ Seetan le adalɛ yɛɛ ɔmaa yɛ munlililɛ nu yɛ se, na ɔmaa yɛ anwuma Selɛ ne anye die.​—Mrɛlɛbulɛ 27:11; bɛgenga Gyemise 1:2, 3.

11, 12. (a) Duzu a Pɔɔlo hanle wɔ Keleseɛnenli “adwenle tumi” ne anwo a, na duzu a edwɛkɛkpɔkɛ mɔɔ bɛhile ɔ bo “bɛtete” ye la kile a? (b) Duzu ndetelɛ a sonlabaka ne hyia na yeahola yeayɛ gyima kpalɛ a?

¹¹ Ndetelɛ a maa awie nyi sunsum nu a. Suzu ngɛlɛlera ɛhye anwo: “Aleɛ mɔɔ anu yɛ ɛnlomboɛ la wɔ ɛkɛ maa bɛdabɛ mɔɔ bɛnyi, bɛdabɛ mɔɔ ɔluakɛ bɛfa bɛ adwenle tumi ne bɛdi gyima la ati, bɛtete ye na ɔkola ɔnwu ngakyile mɔɔ wɔ kpalɛ nee ɛtane nu la.” (Hibuluma 5:14, NW) Mekɛ mɔɔ Pɔɔlo ka adwenle tumi ne mɔɔ “bɛtete” ye anwo edwɛkɛ la, ɔbayɛ kɛ ɔvale Giliki edwɛkɛkpɔkɛ mɔɔ ɛnee bɛta bɛfa bɛdi gyima wɔ ɛleka mɔɔ ɛvoya mɔɔ lumua la anu Gilikima kɔkpundikpundi bɛ agbɔkɛ nu la a ɔlile gyima a, ɔluakɛ bɛkola bɛkile ɔ bo kɛ ‘awie mɔɔ bɛtete ye kɛ akolobuvolɛ’ la. Akee suzu mɔɔ ndetelɛ ɛhye kile la anwo nea.

¹² Mekɛ mɔɔ bɛwole yɛ la, ɛnee bɛtɛtetele yɛ sonlabaka ne. Kɛ neazo la, adɔma ɛngola ɛnva ɔ sa nee ɔ gyakɛ ɛnli gyima wɔ adenle kpalɛ zo. Yemɔti, adɔma toto ɔ sa mgbane mgbane, bɔbɔ ɔfa ɔpɛ ɔ nye zo ɔmaa ɔyɛ ye nyane na ɔsi ɔ nwo. Noko ɔlɛfa yeali gyima ngyikyi ngyikyi la ɛnee ɔlɛtete ye sonlabaka ne. Kakula ne kongo, ɔtia, na akee ɔnriandi. *  Na awie mɔɔ bu akolo la noko ɛ? Saa ɛnwu kɛ sonla zɛhae ɛlɛfa anyelielɛ awuluwulu, ahakyihakyi ɔ nwo wɔ anwomanyunlu a, ɛbaha ye ɛ ti anu kɛ yeva mekɛ tendenle a yetete ɔ nwo a. Debie mɔɔ awie mɔɔ bu akolo kola yɛ la ɛmba arɛlevilɛ nu ala​—ɔwɔ kɛ ɔfa mekɛ dɔɔnwo ɔtete ye sonlabaka ne. Baebolo ne ka kɛ agbɔkɛ nu ɛkpundikpundilɛ ɛhye anwo ‘hyia ekyi’ ala. Nea kɛzi ɔhyia kɛ yɛtete yɛ sunsum nu adwenle tumi ne a!​—1 Temɔte 4:8.

13. Kɛ ɔkɛyɛ na yɛatete yɛ adwenle tumi ne ɛ?

¹³ Yɛha ninyɛne dɔɔnwo mɔɔ baboa wɔ yeamaa wɔatete wɔ adwenle tumi ne na wɔahola wɔali nɔhalɛ wɔamaa Gyihova kɛ sunsum nu sonla la anwo edwɛkɛ wɔ buluku ɛhye anu. Saa ɛlɛsi kpɔkɛ alehyenlɛ ko biala a, fa asɔneyɛlɛ suzu Nyamenle ngyinlazo nee ye mɛla ne mɔ anwo kpalɛ. Kpɔkɛ biala mɔɔ ɛbazi la biza ɛ nwo kɛ: ‘Duzu a Baebolo ngyinlazo anzɛɛ mɛla ka ye wɔ nwolɛ a? Kɛ ɔkɛyɛ na meava meali gyima ɛ? Duzu a meyɛ a ɔbamaa me anwuma Selɛ ne anye alie a?’ (Bɛgenga Mrɛlɛbulɛ 3:5, 6; Gyemise 1:5.) Kpɔkɛ biala mɔɔ ɛbalua adenle ɛhye azo wɔazi la batete wɔ adwenle tumi ne kpalɛ. Ndetelɛ zɛhae baboa wɔ yeamaa wɔahɔ zo wɔayɛ sunsum nu sonla bɔkɔɔ.

14. Duzu a ɔwɔ kɛ yɛnyia nwolɛ atiakunluwɔzo na yɛanyi sunsum nu a, noko duzu a ɔwɔ kɛ yɛnea boɛ wɔ nwo a?

¹⁴ Yɛbahola yɛayɛ menli mɔɔ ɛnyi sunsum nu la ɛdeɛ, noko ɔwɔ kɛ yɛpele yɛkɔ yɛ nyunlu dahuu. Aleɛ a maa sonla nyi a. Pɔɔlo hanle kɛ: “Aleɛ mɔɔ anu yɛ ɛnlomboɛ la wɔ ɛkɛ maa bɛdabɛ mɔɔ bɛnyi.” Debie mɔɔ bamaa wɔ diedi anyi la a le kɛ ɛbahɔ zo wɔali sunsum nu aleɛ mɔɔ anu  yɛ ɛnlomboɛ la. Saa ɛfa mɔɔ wɔzukoa la ɛdi gyima kpalɛ a ɛnee ɛze nrɛlɛbɛ, na Baebolo ne ka kɛ: “Nrɛlɛbɛ le kpalɛ tɛla mgbɔba, debie biala mɔɔ ɛkulo kɛ ɛnyia ye la nee ye ɛnzɛ.” Ɛhye ati, ɔwɔ kɛ yɛnyia ɛhulolɛ mɔɔ anu yɛ se la kɛ yɛbazukoa nɔhalɛ mɔɔ sonle bolɛ mɔɔ yɛ anwuma Selɛ ne fa maa la. (Mrɛlɛbulɛ 8:11; 1 Pita 2:2) Noko, ɔnle kɛ ndelebɛbo nee Nyamenle nrɛlɛbɛ mɔɔ yɛbanyia la maa yɛmemaa yɛ nwo zo. Ɔwɔ kɛ yɛkɔ zo yɛneɛnlea yɛ nwo nu amaa anwomemaazo anzɛɛ subane ɛtane bie anzɔ ndinli wɔ yɛ ahonle nu. Pɔɔlo hɛlɛle kɛ: “Bɛnleɛnlea bɛ ahonle nu, na bɛnlea kɛ bɛtɛdɛ bɛ diedi ne anu. Bɛzɔ bɛ nwo bɛnlea.”​—2 Kɔlentema 13:5.

15. Duzu ati a ɛlɔlɛ hyia na yɛanyi sunsum nu ɛ?

¹⁵ Bɛkola bɛsi sua bɛwie, noko nwolɛ gyimayɛlɛ ɛnwie. Ɔwɔ kɛ ɔvi mekɛ mɔɔ kɔ mekɛ la, bɛyɛ gyima ngyikyi ngyikyi wɔ nwo, na bie a ɔbahyia kɛ bɛbuke nu. Duzu a yɛhyia na yɛanyi amaa yɛahɔ zo yɛayɛ sunsum nu menli a? Ɛlɔlɛ a hyia kpalɛ kpalɛ a. Ɔwɔ kɛ Gyihova nee yɛ gɔnwo mɔ diedima anwo ɛlɔlɛ mɔɔ yɛlɛ la kɔ zo yɛ kpole. Saa yɛnlɛ ɛlɔlɛ a, mɔɔ yɛze nee mɔɔ yɛyɛ la kɔsɔɔti bayɛ mgbane​—ɔbayɛ kɛ yɛlɛyɛ dede la. (1 Kɔlentema 13:1-3) Ɛlɔlɛ bamaa yɛayɛ Keleseɛnema mɔɔ ze deɛ na yɛahɔ zo yɛanyi sunsum nu.

16. Adwenle boni a Seetan maa menli nyia a, na duzu a Gyihova ɛva ɛmaa mɔɔ kola bɔ yɛ nwo bane a?

¹⁶ Bɛmaa yɛzuzu debie bieko mɔɔ hyia wɔ suazilɛ gyima ɛhye anu la anwo. Amaa wɔanyi kɛ Kelaese ɛdoavolɛ nɔhavo la, ɔhyia kɛ ɛnea ninyɛne mɔɔ ɛdwenle nwolɛ la kpalɛ. Seetan, ɛtane ewiade ye azo belemgbunli ne, ze kɛzi bɛbɛlɛbɛla menli bɛmaa bɛnyia adwenle mɔɔ ɛndenrɛ, bɛ sa nu to, na bɛ anyelazo wie la kpalɛ. (Ɛfɛsɛsema 2:2) Saa Keleseɛnenli nyia adwenle zɛhae a esiane wɔ nu kɛmɔ sua mɔɔ ye baka  ɛvo de la. Mɔɔ yɛ anyelielɛ la a le kɛ, Gyihova ɛmaa yɛ debie mɔɔ hyia mɔɔ kola bɔ yɛ nwo bane la​—anyelazo.

17. Kɛzi Nyamenle Edwɛkɛ ne kile kɛ anyelazo hyia ɛ?

¹⁷ Baebolo ne ɛhile sunsum nu konle tɛladeɛ mɔɔ yɛhyia na yɛahola yɛaho yɛatia Seetan nee ewiade ɛhye la. Konle tɛladeɛ ne foa mɔɔ hyia la a le bulalɛ kyɛlɛ ne mɔɔ le “ngoane ɛnyianlɛ nwo anyelazo” la. (1 Tɛsalonaekama 5:8) Baebolo mekɛ zo, ɛnee sogyanli ze kɛ ɔkɔ konle na ɔnzo ye bulalɛ kyɛlɛ ne a ɔnrɛnyia ɔ ti. Fane dɔɔnwo ne ala bɛfa bulalɛ a bɛyɛ kyɛlɛ ɛhye a na bɛava nane nwoma bɛayɛ ɔ kunlu; kyɛlɛ ne ɛmmaa debie biala mɔɔ bɛkɛdo la ɛnga sogyanli ne ati. Kɛmɔ bulalɛ kyɛlɛ bɔ sonla ti nwo bane la, zɔhane ala a anyelazo kola bɔ wɔ adwenle, anzɛɛ wɔ nzuzulɛ nwo bane a.

18, 19. Anyelazo mɔɔ ɔwɔ kɛ yɛnyia la anwo neazo boni a Gyisɛse yɛle a, na kɛ ɔkɛyɛ na yɛava ɔ gyakɛ ɛ?

¹⁸ Gyisɛse yɛle kɛzi ɔwɔ kɛ yɛnyia anyelazo la anwo neazo kɛnlɛma. Kakye mɔɔ ɔgyinlanle nu wɔ nɔe ne mɔɔ aleɛ kye a ɔbawu la. Ezukoa ti ɔ gɔnwo kpalɛ yele ye manle. Ko noko kpole ye hanle kɛ ɔnze ye. Ɔ gɔnwo mɔ mɔɔ ɛha la kpole ye na bɛnriandile. Ye sua zo amra hakyile bɛ nzi zile ye, na bɛdeanle nu bɛhilele Wulomu sogyama kɛ bɛhu ye wɔ amaneɛnwunlɛ baka zo. Yɛbahola yɛazi ye pi kɛ sɔnea mɔɔ Gyisɛse yiale la le kpole tɛla mɔɔ bɛado yɛ la. Duzu a boale ye a? Hibuluma 12:2 bua kɛ: “Ɔlua anyelielɛ mɔɔ ɛnee la ɔ nyunlu la ati, yeandwenle anyiemgba ewule ne mɔɔ ɔbawu [amaneɛnwunlɛ baka] ne azo la anwo, na kɛkala ɔde Nyamenle belemgbunli ebia ne fema zo.” Gyisɛse arɛle anvi “anyelielɛ mɔɔ ɛnee la ɔ nyunlu la” ɛlɛ.

¹⁹ Anyelielɛ boni a ɛnee la Gyisɛse anyunlu a? Ɛnee ɔze kɛ ɔkɔ zo ɔgyinla ngyegyelɛ ne anloa a, ɔbade Gyihova duma nwuanzanwuanza ne anwo. Ɔbali daselɛ kpole kɛ Seetan le adalɛ. Anyelazo biala ɛnle ɛkɛ mɔɔ bamaa Gyisɛse anye alie kpole zɛhae a! Ɛnee ɔze noko kɛ Gyihova bayila  ye kpalɛ wɔ ye nɔhalɛlilɛ nwo, yɛɛ ɔnrɛhyɛ ɔbazia yeahɔ ɔ Ze anwo lɔ. Gyisɛse manle anyelazo kɛnlɛma ɛhye dɛnlanle ye adwenle nu wɔ ye amaneɛnwunlɛ mekɛ kɔsɔɔti anu. Ɔwɔ kɛ yɛdayɛ noko yɛyɛ zɔ. Yɛdayɛ noko, anyelielɛ kpole la yɛ nyunlu. Gyihova di yɛ nuhua ko biala eni ɔlua adenle mɔɔ yemaa yɛnyia kɛ yɛbaboa yɛamaa bɛade ye duma kpole ne anwo la azo. Saa yɛfa Gyihova yɛyɛ yɛ Belemgbunli na yɛsie yɛ nwo wɔ yɛ Ze ne ɛhulolɛ nu a, ɔnva nwo ngyegyelɛ nee sɔnea biala mɔɔ bado yɛ la a, yɛbahile kɛ Seetan le adalɛ.

20. Duzu a bamaa wɔanyia adwenle mɔɔ tenrɛ la nee anyelazo a?

²⁰ Gyihova ɛnlɛ ɛhulolɛ kɛ ɔbayila ye azonvolɛ mɔɔ di nɔhalɛ la ala, eza ɔ nwo dɔ kɛ ɔbayɛ zɔ. (Ayezaya 30:18; bɛgenga Malakae 3:10.) Ɔ nye die kɛ ɔbamaa ye azonvolɛ anyia ninyɛne kpalɛ mɔɔ bɛkpondɛ la. (Edwɛndolɛ 37:4) Yemɔti fa wɔ adwenle sie anyelazo ne mɔɔ la ɛ nyunlu la azo kpalɛ. Mmadi Seetan ewiade dɛba ye anu adwenle ɛtane ne mɔɔ ɛkpɔlɔ na yehyea la anzi ɛlɛ. Saa ɛte nganeɛ kɛ ewiade ɛhye subane ɛlɛba wɔ adwenle anzɛɛ wɔ ahonle nu a, fi ahonle nu sɛlɛ Gyihova maa ɔmaa wɔ “[anzondwolɛ] ne mɔɔ bo sonla ndelebɛbo muala azo” la. Zɛhae anzondwolɛ ne mɔɔ Nyamenle fa maa la babɔ wɔ ahonle nee wɔ adwenle tumi ne anwo bane.​—Felepaema 4:6, 7.

21, 22. (a) Anyelazo kɛnlɛma boni a “menli pemgbenleamgbe” ne anye die nwo a? (b) Keleseɛnema anyelazo ne boni a ɛ nye die nwo kpalɛ a, na duzu a wɔbɔ kpɔkɛ kɛ ɛbayɛ a?

 ²¹ Nea anyelazo kɛnlɛma ko mɔɔ ɔwɔ kɛ ɛdwenle nwo a! Saa ɛboka “menli pemgbenleamgbe” ne mɔɔ baho adɔ zo “wɔ amaneɛnwunlɛ kpole ne anu la” anwo a, ɛnee suzu ɛbɛlabɔlɛ mɔɔ ɔnrɛhyɛ biala ɛbanyia la anwo. (Yekile 7:9, 14) Saa bɛye Seetan nee ye sunsum ɛtane ne mɔ bɛfi ɛkɛ a, ɛ nwo badɔ wɔ kpole mɔɔ ɛnrɛhola ɛnrɛde ɔ bo ɛnɛ a. Yɛ nuhua boni a ɛdɛnla ewiade mɔɔ Seetan ngyegyelɛ ɛnle nu la bie anu ɛlɛ a? Saa ngyegyelɛ ɛhye fi ɛkɛ a, nea kɛzi ɔbayɛ anyelielɛ kɛ yɛbaziezie azɛlɛ ne yɛamaa yeayɛ paladaese wɔ Gyisɛse nee ɔ gɔnwo mɔ 144,000 mɔɔ ɔ nee bɛ bali ebia wɔ anwuma la tumililɛ bo a! Nea kɛzi ɔyɛ yɛ fɛ kɛ yɛbanwu kɛ anwodolɛ nee ewule ngakyile ɛnle ɛkɛ bieko, yɛanwu yɛ alɔvolɛ mɔɔ ɛwu, na yɛadɛnla aze kɛmɔ Nyamenle kulo la! Mekɛ mɔɔ yɛlɛdi munli la, ɛnee yɛlɛbikye nyilalɛ kpole ne mɔɔ Nyamenle ɛbɔ nwolɛ ɛwɔkɛ wɔ Wulomuma 8:21​—“fanwodi ne mɔɔ Nyamenle amra lɛ ye” la.

²² Gyihova kpondɛ kɛ ɛnyia fanwodi kpole kpalɛ. Tieyɛ a bamaa wɔanyia zɔhane fanwodi ne a. Asoo ɔnfɛta kɛ ɛbɔ mɔdenle biala ɛnɛ kɛ ɛbadie Gyihova alehyenlɛ biala ɔ? Ɛnee kɛ ɔde ye biala la, kɔ zo nyi wɔ wɔ diedi nwuanzanwuanza ne anu, amaa wɔadɛnla Nyamenle ɛhulolɛ ne anu dahuu!