1, 2. Den ki proyekto di konstrukshon bo ta enbolbí, i dikon e kalidat di bo trabou ta masha importante?

BO TIN basta dia ta traha riba konstrukshon di un edifisio. Por lo pronto e proyekto ei lo no kaba. E trabou no ta fásil, pero e ta duna bo gran satisfakshon. Bo ta determiná ku pase loke pase lo bo no entregá ni floha. Bo ke hasi un trabou di bon kalidat ya ku bo bida, i asta bo futuro, ta dependé di dje. Ta di kiko nos ta papia? Wèl, e edifisio bou di konstrukshon ta bo mes!

² Disipel Hudas a bisa ku ta masha importante pa nos fortalesé, òf edifiká, nos mes. El a skirbi: “Fortalesé boso santísimo fe.” * (Hudas 20, 21) Hasiendo esaki, kristiannan lo “keda den e amor di Dios.” Kon nos awe por ‘fortalesé nos fe’? Laga nos analisá tres aspekto di e proyekto di konstrukshon spiritual akí.

3-5. (a) Satanas ke laga bo kere kiko tokante e rekisitonan di Yehova? (b) Kon nos mester mira e rekisitonan di Dios, i kon nos lo sinti nos si nos ta mira nan asina? Ilustrá esei.

³ Na promé lugá, nos tin ku fortalesé nos fe den e leinan di Dios. Durante bo estudio di e buki akí, bo a konsiderá basta di Yehova su rekisitonan hustu relashoná ku kondukta. Kiko bo ta pensa di nan? Satanas ke laga bo kere ku e  lei-, prinsipio- i normanan di Yehova ta muchu restriktivo, asta opresivo. E táktika ei a dun’é masha bon resultado den hòfi di Edén, i p’esei semper el a sigui us’é. (Génesis 3:1-6) E táktika akí lo funshoná riba bo tambe? Esei ta dependé mashá di e manera ku bo ta mira e rekisitonan divino.

⁴ Laga nos duna un ehèmpel: Bo ta kana keiru den un parke bunita i ta topa un kurá di waya haltu i sólido ku ta blòkia un parti masha agradabel di e parke. Na promé instante, lo bo por mira e waya komo un restrikshon innesesario di bo libertat. Pero, ora bo wak mas aleu, tras di e waya, bo ta mira un leon feros ta slùip un bestia! Awor bo ta komprondé pakiko e kurá t’ei: pa bo protekshon! Akaso tin un bestia feros ta slùip bo aworakí? E Palabra di Dios ta spièrta: “Mantené boso sano huisio i sea alerta. Boso atversario, Diabel, ta kana rònt manera un leon ku ta grita, buskando ken e por habraká.”—1 Pedro 5:8.

⁵ Satanas ta manera un bestia masha feros ku ta yag riba hende. Yehova no ke pa nos bira su víktima i ta p’esei El a duna nos leinan pa protehá nos di e tantísimo “trampanan” di e Malbado ei. (Efesionan 6:11) P’esei, ora nos ta meditá riba e leinan di Dios, nos mester mira nan pa loke nan ta: un muestra di e gran amor di nos Tata selestial. Ora nos ta mira e leinan di Dios di e manera ei, nos ta sinti un goso i ta haña un sintimentu di siguridat. Disipel Santiago a skirbi: “Esun ku ta wak kuidadosamente den e lei perfekto ku ta trese libertat, i ta persistí den hasi esei, [lo] ta felis hasiendo esei.”—Santiago 1:25.

6. Kua ta e mihó manera pa fortalesé nos fe den e leinan i prinsipionan hustu di Dios? Duna un ehèmpel.

⁶ E mihó manera pa fortalesé nos fe den nos Gran Legislador, Yehova, i den e sabiduria di su leinan ta di apliká su mandamentunan den nos bida diario. Esei ta enserá obedesé e “lei di Kristu,” ku ta inkluí e mandamentu di Hesus pa siña otro hende tambe ‘kumpli ku tur loke el a  manda.’ (Galationan 6:2; Mateo 28:19, 20) Komo kristian, nos ta tuma na serio tambe e instrukshon di reuní huntu pa adorá Dios i pa disfrutá di bon asosiashon. (Hebreonan 10:24, 25) Un otro mandamentu di Dios ta pa resa na dje frekuentemente i di kurason. (Mateo 6:5-8; 1 Tesalonisensenan 5:17) Segun ku nos ta biba na armonia ku e mandamentunan ei, nos ta keda mas i mas konvensí ku nan ta reflehá e amor di Dios. Nos ta realisá ku ora nos obedesé nan, nan ta duna nos un goso i satisfakshon ku hamas nos lo por haña den e mundu yen di problema akí. Sin duda, nos fe den e leinan ei ta bira mas fuerte ora nos meditá riba e manera ku nos a benefisiá personalmente pasobra nos a obedesé nan.

7, 8. Kon e Palabra di Dios ta trankilisá esnan ku ta preokupá ku kisas nan lo no por keda semper fiel?

⁷ Algun kristian tin biaha ta pensa ku lo ta difísil pa nan obedesé e leinan di Yehova aña aden aña afó. Nan tin miedu ku nan lo frakasá. Si un dia bo sinti asina, kòrda riba e palabranan akí: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera  ola di laman.” (Isaías 48:17, 18) Bo a yega di para ketu i pensa ki un gran animashon e palabranan ei ta?

⁸ Akinan Yehova ta rekordá nos ku si nos obedes’é, nos lo risibí dos benefisio. Di promé, nos pas lo ta manera un riu: trankil, abundante i kontinuo. Di dos, nos hustisia lo ta manera ola di laman. Si bo para kantu di laman i wak e olanan drenta, un tras di otro, bo ta haña un sensashon di eternidat, pasobra bo sa ku e olanan lo sigui bini kantu pa semper. Yehova ta bisa ku bo hustisia—bo manera di biba di akuerdo ku loke ta korekto i hustu—por ta manera esei. Tanten ku bo ta hasi esfuerso pa keda fiel na dje, lo e no laga bo frakasá nunka! (Salmo 55:22) Bo no ta haña ku e promesanan alentador ei ta fortalesé bo fe den Yehova i den su rekisitonan hustu?

9, 10. (a) Dikon madures ta un meta ekselente pa kristiannan? (b) Kon un punto di bista spiritual ta yuda nos haña goso?

⁹ Un di dos aspekto di bo proyekto di konstrukshon ta ser revelá den e siguiente palabranan inspirá: “Laga nos hasi esfuerso pa alkansá madures.” (Hebreonan 6:1) Na kontraste ku perfekshon, ku awor ta fuera di nos alkanse, madures kristian ta un meta ekselente ku nos tur por logra. Ademas, segun ku nos ta madurá, nos ta haña mas i mas goso den sirbi Yehova. Kon bini?

¹⁰ Un kristian maduro ta un persona spiritual, esta, un persona ku tin un bon relashon ku Yehova, i e ta mira kosnan for di e punto di bista di Yehova. (Huan 4:23) Pablo a skirbi: “Esnan ku ta biba segun karni ta fiha nan mente riba e kosnan di karni, pero esnan ku ta biba segun spiritu, riba e kosnan di spiritu.” (Romanonan 8:5) Hende ku tin un punto di bista karnal, òf puramente humano, no por ta felis, pasobra hopi biaha nan ta egoista, materialista i tin un mente será. Ma hende ku tin un punto di bista  spiritual ta felis, pasobra nan bida ta enfoká riba Yehova, “e Dios felis.” (1 Timoteo 1:11) Nan ta ansioso pa agrad’é i ta sinti goso asta ora nan fe ta bou di prueba. Dikon? Pasobra kedando fiel, nan ta haña chèns di demostrá ku Satanas ta un mentiroso i a la bes nan ta kultivá integridat, loke ta hasi kurason di nan Tata selestial kontentu.—Proverbionan 27:11; Santiago 1:2, 3.

11, 12. (a) Kiko Pablo a rekomendá nos pa hasi ku nos “kapasidat di komprondé,” i kiko e palabra “entrená” ta nifiká? (b) Ki entrenamentu e kurpa mester haña pa e madurá i bira ágil?

¹¹ Nos ta desaroyá spiritualidat i madures pa medio di práktika òf entrenamentu. Esei ta loke e siguiente versíkulo akí ta indiká: “Kuminda sólido ta pa hende madurá, esta, pa esnan ku a usa nan kapasidat di komprondé i asina a entrená esaki pa distinguí loke ta bon for di loke ta malu.” (Hebreonan 5:14) Pablo a bisa ku nos tin ku “entrená” nos kapasidat di komprondé. Akinan el a usa un palabra griego ku den promé siglo tabata komun den e gimnasionan di Gresia, ya ku literalmente e ta nifiká ‘di train manera un gimnasta.’ Pensa un ratu riba kiko e entrenamentu ei ta enserá.

¹² Ora nos a nase, nos no por a kontrolá nos kurpa pasobra e no tabata di train. Por ehèmpel, un bebi apénas sa unda su man- ku su pianan ta i no por koordiná nan. P’esei e ta zuai nan pa loko, i asta sa dal su mes den kara, loke ta sorprend’é i spant’é. Pero pokopoko, segun ku e ta usa su kurpa, e ta logra domin’é: e ta kuminsá gatia, despues ta dal su promé stapnan i, ku tempu, e por asta kore. * Pero kiko di un gimnasta? Ora bo mira un atleta asina ta  bula i drei rònt den laira ku un presishon i elegansia magnífiko, no tin duda den bo mente ku su kurpa ta manera un mashin hopi bon di stèl. Pero su abilidat no a bini pa kasualidat; ta hopi ora el a entrená pa logra esei. Segun Beibel, e tipo di “entrenamentu físiko [ei] ta yuda ku algu,” pero e entrenamentu di nos kapasidat di komprondé ta hopi mas balioso!—1 Timoteo 4:8.

13. Kon nos por entrená nos kapasidat di komprondé?

¹³ Den e buki akí, nos a konsiderá hopi punto ku por yuda bo entrená bo kapasidat di komprondé pa asina bo por keda fiel na Yehova komo un persona spiritual. Por ehèmpel, ora bo tin ku tuma desishon den bo bida di tur dia, pensa riba e prinsipio- i leinan di Dios i hasi orashon tokante nan. Puntra bo mes kada biaha: ‘Kua lei òf prinsipio bíbliko ta relashoná ku e asuntu akí? Kon mi por apliká nan? Mi Tata selestial lo keda kontentu ku loke mi ke hasi?’ (Proverbionan 3:5, 6; Santiago 1:5) Si bo kria e kustumber di hasi esaki promé ku bo tuma desishon, bo ta entrená bo kapasidat di komprondé. Esei lo yuda bo madurá i keda ku un aktitut realmente spiritual.

14. Pa krese den sentido spiritual, nos tin ku habri nos apetit pa kiko spesialmente, pero ki aktitut nos mester evitá?

¹⁴ Maske nos alkansá madures spiritual, semper tin lugá pa sigui krese. Pa logra esaki ta masha importante pa nos wak nos nutrishon spiritual. Manera Pablo a bisa: “Kuminda sólido ta pa hende madurá.” Pa fortalesé bo fe bo mester sigui tuma alimento spiritual sólido. Ademas, bo tin ku  atkerí sabiduria, es desir, sa kon pa pone na práktika loke bo ta siña. Esei ta masha importante, pasobra Beibel ta bisa ku “sabiduria ta mihó ku rubí, i tur loke hende por deseá no ta di kompará kuné.” Pues, nos tin ku habri nos apetit pa e bèrdatnan maravioso ku nos Tata ta siña nos. (Proverbionan 8:11; 1 Pedro 2:2) Sinembargo, e echo ku nos tin mas konosementu i sabiduria divino no ke men ku nos mester bira arogante òf sinti ku nos ta masha kos. Nos tin ku analisá nos mes regularmente pa hasi sigur ku orguyo òf kualke otro debilidat no ta poderando di nos kurason. Pablo a skirbi: “Sigui saminá boso mes pa sa si boso ta den e fe, sigui pone boso mes na prueba pa demostrá ki tipo di hende boso ta.”—2 Korintionan 13:5.

15. Dikon amor ta indispensabel pa nos por sigui krese den sentido spiritual?

¹⁵ Ora bo kaba di traha un kas, ainda bo no ta kla. Mester manten’é i drech’é i, si sirkunstansia kambia, tin biaha ta asta nesesario pa rèk e. Ku nos spiritualidat ta meskos. Kiko nos mester hasi pa ten’é den bon kondishon i pa e krese? Mas ku tur kos, amor. Nos tin ku sigui krese den amor pa Yehova i pa nos rumannan den fe. Si nos no tin amor, tur nos konosementu i tur loke nos ta hasi lo no bal nada; lo e ta manera hopi boroto pòrnada. (1 Korintionan 13:1-3) Ku amor, nos por alkansá madures i sigui krese den sentido spiritual.

16. Satanas ta fomentá ki tipo di pensamentu, i ki protekshon Yehova a perkurá pa nos?

¹⁶ Laga nos konsiderá e di tres aspekto di bo proyekto di konstrukshon. Pa bo por desaroyá bo mes komo un berdadero siguidó di Kristu, bo tin ku vigilá bo manera di pensa. Satanas, e gobernante di mundu, ta maestro den stimulá pensamentunan negativo, pesimismo, deskonfiansa  i desesperashon den hende. (Efesionan 2:2) E maneranan di pensa ei ta mesun peligroso pa un kristian ku komehein ta pa un kas di palu. Pero danki na Yehova, nos tin un manera importante pa protehá nos mes: nos speransa.

17. Kon e Palabra di Dios ta ilustrá e importansia di speransa?

¹⁷ Beibel ta menshoná e vários partinan di e armadura spiritual ku nos tin mester pa lucha kontra Satanas i su mundu. Un parti importante ta e hèlm, esta, “e speransa di salbashon.” (1 Tesalonisensenan 5:8) Den tempu bíbliko, un sòldá tabata usa hèlm di metal i tabata bistié riba un mùts di felpa òf di kueru, pa e gòlpinan dirigí kontra su kabes kousa ménos daño. E tabata sa ku lo e no a dura largu den bataya sin un hèlm. Awèl, meskos ku un hèlm ta protehá bo kabes, asina speransa por protehá bo mente, bo pensamentunan.

18, 19. Kon Hesus a demostrá kiko mantené speransa ta nifiká, i kon nos por imit’é?

¹⁸ Hesus a demostrá perfektamente kiko mantené speransa ta nifiká. Pensa riba tur loke el a sufri e último anochi di su bida riba tera. Un amigu íntimo a traishon’é pa plaka. Un otro a deklará públikamente ku e no konos’é. E otronan a hui bai lag’é. Su propio paisanonan a bira kontra dje i eksigí pa e muri un morto kruel na man di sòldá romano. Nos por bisa sin ningun duda ku Hesus a konfrontá prueba hopi mas difísil ku kualke un di nos lo konfrontá. Kiko a yud’é perseverá? Hebreonan 12:2 ta kontestá: “Pa motibu di e goso ku tabata sper’é, el a soportá morto na un staka di tormento, sin preokupá ku e bèrgwensa ku esei a trese kuné, i a sinta na man drechi di e trono di Dios.” Hesus nunka a pèrdè “e goso ku tabata sper’é” for di bista.

¹⁹ Ki goso esei tabata? E goso di sa kiko e ta logra kedando fiel: lo el a kontribuí na santifikashon di Yehova su nòmber santu i duna e prueba máksimo ku Satanas ta un mentiroso. Ningun speransa lo por a duna Hesus mas  goso! Ademas, e tabata sa ku Yehova lo a rekompens’é rikamente pa su fieldat i ku pronto lo el a disfrutá atrobe di e maravioso kompania di su Tata. Hesus a keda enfoká riba e speransa gososo ei durante e momentonan di mas difísil ku el a pasa aden. I nos tin ku hasi meskos. Nos tambe tin goso ta spera nos. Yehova ta duna kada un di nos e privilegio di yuda santifiká su gran nòmber i demostrá ku Satanas ta un mentiroso. Kon nos ta hasi esaki? Esei ta ora nos skohe nos Tata komo Soberano i keda den e siguridat di su amor, sin importá ki prueba i tentashon nos haña nos kuné.

20. Kiko por yuda bo keda ku un aktitut positivo i ku speransa?

²⁰ Yehova no solamente ta dispuesto pa rekompensá su fiel sirbidónan, e ta asta ansioso pa hasié. (Isaías 30:18; Malakías 3:10) Ta un plaser p’e di por kumpli ku e deseonan hustu di nan kurason. (Salmo 37:4) Pues, enfoká riba e speransa ku bo tin bo dilanti. No adoptá nunka e manera di pensa negativo, degradá i trosí di e mundu bieu akí di Satanas. Si bo ta sinti ku e spiritu di e mundu akí pokopoko ta afektá bo mente òf kurason, pidi Yehova fervientemente pa duna bo “e pas di Dios ku ta surpasá tur komprondementu.” E pas ei lo protehá bo kurason i bo mente.—Filipensenan 4:6, 7.

21, 22. (a) Ki speransa glorioso e “multitut grandi” tin? (b) Ki faseta di e speransa kristian tin mas balor pa bo, i kiko ta bo determinashon?

 ²¹ Ki un speransa maravioso bo tin! Si bo ta parti di e “multitut grandi” ku lo “sobrebibí e tribulashon grandi,” pensa riba e bida ku ta spera bo. (Revelashon 7:9, 14) Ta difísil pa imaginá e alivio ku lo bo sinti ora ku Satanas i su demoñonan lo no t’ei mas. Ta kua di nos a yega di biba sin e preshon- i tentashonnan di Satanas? Unabes ku e preshon ei no t’ei mas, lo ta un gran goso di por transformá e tera den un paradeis bou di e guia di Kristu i e 144.000 ku lo goberná for di shelu huntu kuné. Ki maravioso ta e speransa di mira tur malesa i enfermedat ser eliminá, di risibí bèk nos sernan kerí ku resusitá, i di disfrutá di e bida ku Dios originalmente tabata ke pa nos tin! Segun ku gradualmente nos ta bira perfekto, nos ta yega mas serka di un rekompensa asta mas grandi ainda, revelá na Romanonan 8:21: “E glorioso libertat di e yunan di Dios.”

²² Yehova ke pa bo alkansá e mayor libertat ku bo por imaginá, i e kaminda ku ta hiba na e libertat ei ta obedensia. Akaso no ta bale la pena pa bo hasi tur bo esfuerso pa obedesé Yehova dia aden dia afó? Pues, sigui fortalesé bo santísimo fe pa asina bo por keda den e amor di Dios pa tur eternidat!