1, 2. Ngumuphi umsebenti wekwakha lowentako, futsi kungani kubalulekile kutsi uwente kahle?

USEBENTA kamatima emsebentini wakho wekwakha. Lomsebenti sewuchubeke sikhatsi lesidze futsi kungatsi usetawuchubeka nasesikhatsini lesitako. Kute kube ngunyalo, lomsebenti ulukhuni kepha uyenetisa. Nobe kungatsiwa kwentekani, utimisele kuchubeka ngenshiseko uwenta ngobe kuwenta kahle kutawutsintsa imphilo yakho ngisho nelikusasa lakho. Kungani kunjalo? Ngobe lesakhiwo lesakhiwako singuwe cobo lwakho!

² Umfundzi Juda ugcizelela lesidzingo sekutsi sitakhe. Ngesikhatsi akhutsata emaKhristu kutsi ‘atigcine elutsandvweni lwaNkulunkulu,’ kuyo yona lencenye waveta lokubaluleke kakhulu lokungasisita kutsi sikwati kwenta njalo, watsi: “Yakhanani ekukholweni lokungcwele.” (Juda 20, 21) Ngutiphi tindlela longatakha ngato, futsi ucinise lukholo lwakho kute utigcine elutsandvweni lwaNkulunkulu? Ase sikhulume ngetindlela letintsatfu letingakusita kutsi utakhe elukholweni.

3-5. (a) Sathane ufuna kukudukisa kute ube namuphi umbono ngetincabekelwane taJehova? (b) Ngumuphi umbono lokufanele sibe nawo ngetincabekelwane taNkulunkulu, futsi loko kufanele kuyitsintse njani indlela lesitiva ngayo? Fananisa.

³ Kwekucala, sidzinga kucinisa lukholo lwetfu emtsetfweni waNkulunkulu. Ngesikhatsi usafundza lencwadzi, ufundze  ngetincabekelwane letinyenti taJehova letilungile tekutiphatsa. Ucabangani ngato? Sathane ufuna kukudukisa, akwente ucabange kutsi imitsetfo, timiso, kanye netindlela taJehova tilukhuni futsi tiyacindzetela. Abesolo ayisebentisa lendlela kusukela ayibona isebenta e-Edeni. (Genesisi 3:1-6) Lelisu lakhe lingakudukisa yini wena? Kutawuya ngendlela wena lotibheka ngayo tintfo.

⁴ Ase sibekise: Njengobe uhambahamba epaki lenhle, uyacaphela kutsi incenye yayo letsite ibiyelwe. Lendzawo lengekhatsi yinhle futsi iyakhanga. Ekucaleni, lolutsango lokubiyelwe ngalo ungalubheka njengentfo lekuvimbela inkhululeko. Kepha njengobe ubuka ngale kwalo, ubona libhubesi lelinelulaka linyenyela silwane. Nyalo-ke sewuyabona kutsi lolutsango lokubiyelwe ngalo lusivikelo kangakanani kuwe. Sikhona yini silwane lesiyingoti lesikunyenyelako nyalo? LiVi laNkulunkulu liyecwayisa: “Zitsani, nilindze. Sitsa senu, Sathane, siyajangaza emkhatsini wenu njengelibhubesi lelibhodlako, sitfungatsa lesingahle simmite.”—1 Phetro 5:8.

⁵ Sathane usilwane lesinelunya. Ngenca yekutsi Jehova akafuni kutsi sibe kudla kwaSathane, usiphe imitsetfo letawusivikela ‘ebucilini’ balomubi. (Efesu 6:11) Ngako-ke, ngaso sonkhe sikhatsi lapho sizindla ngemitsetfo yaNkulunkulu, kufanele sibone lutsandvo lwaBabe wetfu wasezulwini kuyo. Lapho siyibheka ngaleyo ndlela, imitsetfo yaNkulunkulu iba ngumtfombo wesivikelo kanye nenjabulo. Umfundzi Jakobe wabhala: “Kepha lobukisisa emtsetfweni losikhululako bese uhamba ngawo . . . lowo-ke utawuba ngulobusisiwe ekwenteni kwakhe.”—Jakobe 1:25.

6. Nguyiphi indlela lencono kakhulu yekwakha lukholo emtsetfweni nasetimisweni taNkulunkulu letilungile? Niketa sibonelo.

⁶ Kuphila ngemitsetfo yaNkulunkulu kuyindlela lencono kakhulu yekucinisa lukholo lwetfu kuMshayi wemtsetfo kanye nasekuhlakanipheni kwemitsetfo yakhe. Cabanga nganasi sibonelo: “Umtsetfo waKhristu” ufaka ekhatsi umyalo waJesu wekufundzisa labanye ‘konkhe layale ngako.’ (Galathiya 6:2;  Matewu 28:19, 20) EmaKhristu aphindze awutsatse njengalobaluleke kakhulu umtsetfo wekuhlangana kute akhonte Nkulunkulu futsi akhane. (Hebheru 10:24, 25) Imitsetfo yaNkulunkulu iphindze ihlanganise kuthandaza njalo kuJehova, nangalokusuka enhlitiyweni. (Matewu 6:5-8; 1 Thesalonika 5:17) Njengobe siphila ngalemitsetfo, sibona ngalokucacile kutsi iticondziso telutsandvo. Kuyilalela kusiniketa injabulo lenkhulu kanye nekwenetiseka lesingeke sikutfole kulelive lelinetinkinga. Lukholo lwakho alucini yini lapho uzindla ngaloko lokuzuzile ngekuphila ngemitsetfo yaNkulunkulu?

7, 8. LiVi laNkulunkulu libacinisa njani labo labakhatsateke ngekutsi angeke bakwati kutigcina balungile njengobe iminyaka ichubeka?

⁷ Ngaletinye tikhatsi labanye bakhatsatwa kutsi njengobe iminyaka ihamba, kutawuba matima kunamatsela emitsetfweni yaJehova. Banekwesaba kutsi ngandlela tsite bangase behluleke. Nakungenteka nje utive ngalendlela, gcina nankha emavi lalandzelako engcondvweni: ‘Naku lokushiwo nguSimakadze, uMhlengi wenu, Longcwele waka-Israyeli, utsi: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lokufanele nihambe ngayo. Kube mane naniyilalela imiyalo yami, kuthula nenhlalakahle yenu ngabe kunjengemifula, kulunga  kwenu kube njengemagagasi elwandle.”’ (Isaya 48:17, 18) Wake wacabanga yini ngendlela lamavi lacinisa ngayo?

⁸ Kulamavi, Jehova usikhumbuta kutsi siyazuza ngekumlalela. Usetsembisa tibusiso letimbili nangabe senta kanjalo. Kwekucala, kuthula kwetfu kutawufanana nemfula lomkhulu nalogeletako. Kwesibili, kulunga kwetfu kutawufanana nemagagasi elwandle. Nangabe ume ngaselusentseni lwelwandle ubukela emagagasi alandzelana, kungenteka uba nemuva wekutsi angeke aphele. Uyati kutsi lamagagasi atawuchubeka eta, asondzela kakhudlwana ngaselusentseni tikhatsi letinyenti. Jehova utsi kulunga kwakho—lokukwenta kwakho lokulungile—kutawufanana nalawo magagasi. Yingci nje nawutimisela kuhlala wetsembekile kuye, angeke akushiye. (Fundza Tihlabelelo 55:22.) Tetsembiso letinjalo letikhutsatako atilwakhi yini lukholo lwakho kuJehova nasetincabekelwaneni takhe letilungile?

9, 10. (a) Kungani kuvutfwa kungumgomo lomuhle kumaKhristu? (b) Kubheka tintfo ngembono waNkulunkulu kuyiletsa njani injabulo?

⁹ Sici sesibili semsebenti wakho wekwakha sivetwe kahle kunankha emavi laphefumulelwe: ‘Asichubekele embili ekuvutfweni.’ (Hebheru 6:1) Kuvutfwa kungumgomo lomuhle kumaKhristu. Kuyafinyeleleka, akufanani nekuphelela, bantfu labangeke babenako nyalo. Ngetulu kwaloko, emaKhristu atfola injabulo lenkhulu ekukhonteni Jehova njengobe achubeka nekuvutfwa. Kungani kunjalo?

¹⁰ UmKhristu lovutsiwe ubuka tintfo ngembono waJehova. (Johane 4:23) Pawula wabhala: ‘Labahamba ngenyama banaka kwenyama, kodvwa labahamba ngemoya banaka kwemoya.’ (Roma 8:5) Kubheka tintfo ngembono wenyama kuletsa injabulo lencane, ngobe umbono wenyama webugovu, awubheki tintfo ngeliso lelibanti, futsi unaka umcebo. Kubheka tintfo ngembono waJehova kuletsa injabulo lenkhulu, ngobe usuke unake Jehova, ‘Nkulunkulu lojabulako.’ (1 Thimothi 1:11) Umuntfu lobheka tintfo ngembono waJehova ulangatelela  kumjabulisa, futsi uyajabula nalapho alingwa. Kungani? Tilingo tiveta ematfuba ekufakazela kutsi Sathane ungumcambimanga, kanye nematfuba ekuhlakulela bucotfo, ngaloko sijabulise Babe wetfu losezulwini.—Taga 27:11; fundza Jakobe 1:2, 3.

11, 12. (a) Yini Pawula layisho ‘ngemcondvo’ wemaKhristu, futsi lisho kutsini ligama lelitsi kucecesha? (b) Ngukuphi kuceceshwa umtimba lokufanele ukutfole kute ukhule futsi usebente kahle?

¹¹ Kuvutfwa kanye nekubheka tintfo ngembono waNkulunkulu kutfolakala ngekuticecesha. Ase unake nali livesi: “Kudla lokucinile kwebantfu lasebakhulile, lasebanemicondvo lehlutekile, leseyikwati kwehlukanisa lokuhle nalokubi.” (Hebheru 5:14) Lapho Pawula akhuluma ngemicondvo lehlutekile, ‘leseyiceceshiwe,’ wasebentisa ligama lesiGriki lelalivame kusetjentiswa etindzaweni tekuticecesha nobe kutilolonga eGrisi yelikhulu lekucala, ngobe ingahunyushwa ngekutsi ‘loceceshwe njengemuntfu lowelula imisipha.’ Nyalo-ke asewucabange ngekutsi kuticecesha lokunjalo kuhlanganisani.

¹² Ngesikhatsi sitalwa, imitimba yetfu yayingakaceceshwa. Ase sibekise: Umntfwana akakucondzi kunyakata kwetinyawo netingalo takhe. Kungako atinyakatisa, ate atishaye ngato ebusweni, lokunyintfo lemenyanyisa futsi imcansule kakhulu. Ngenca yekuwusebentisa, kancane kancane umtimba wakhe uyacecesheka. Umntfwana ucala kukhasa, ahambe, ngemva kwaloko acale kugijima. * Kepha-ke, kutsiwani ngemuntfu lowelula imisipha? Lapho umbona agcuma, asontsa tinyawo emoyeni ngalobukhulu buciko, uvele ungangabati kutsi umtimba wakhe unjengemshini lolungiswe kahle. Lelikhono lalomuntfu alizange litivelele ngengoti—kwadzingeka aticeceshe ema-awa lamanyenti. LiBhayibheli liyavuma kutsi kucecesha umtimba “kunenzuzo kwesikhashana nje.” Uyabona-ke kutsi  kubaluleke kangakanani kucecesha imicondvo yetfu?—1 Thimothi 4:8.

13. Singayicecesha njani imicondvo yetfu?

¹³ Kulencwadzi sicoce ngetintfo letinyenti letingacecesha imicondvo yetfu kute sitewuhlala setsembekile kuJehova njengebantfu lababheka tintfo ngembono wakhe. Cabangela ngemthandazo timiso kanye nemitsetfo yaNkulunkulu njengobe wenta tincumo ekuphileni kwakho kwamalanga onkhe. Kuto tonkhe tincumo lokufanele utente, tibute naku: Ngumiphi imitsetfo nobe timiso teliBhayibheli letisebentako kulendzaba? Ngingatisebentisa njani? Yini letawukwenta Babe wami losezulwini ajabule? (Fundza Taga 3:5, 6; Jakobe 1:5.) Sincumo ngasinye lowusenta kanjalo sitawucecesha umcondvo wakho. Kuceceshwa lokunjalo kutawukusita ekutseni ubheke tintfo ngembono waJehova futsi uhlale unjalo.

14. Yini lokufanele siyilambele kute sikhule ebuhlotjeni betfu naNkulunkulu, futsi yini lokufanele siyigadze?

¹⁴ Nobe umuntfu angakufinyelela kuvutfwa, sihlale sikhona sidzingo sekukhula ebuhlotjeni bakhe naNkulunkulu. Kukhula kusekelwe ekudleni. Kungako Pawula atsi: “Kudla lokucinile kwebantfu lasebakhulile.” Lokubalulekile kute wakhe lukholo lwakho kutsi uchubeke udla kudla lokucinile kwakamoya. Njengobe uchubeka usebentisa loko lokufundzile, wenta ngekuhlakanipha, futsi liBhayibheli litsi ‘kuhlakanipha kuyintfo leyinhloko.’ Ngenca yaloko, kudzingeka silambele emaciniso laligugu Babe wetfu lasiniketa wona. (Taga 4:5-7; 1 Phetro 2:2) Kepha-ke, kuba nelwati kanye nekuhlakanipha kwaNkulunkulu akusiniketi sizatfu sekutenta ncono nobe sekutikhukhumeta. Kufanele sitihlole njalo, kute sibone kuchosha nobe lobunye butsakatsaka lobungase bakheke futsi bukhule  etinhlitiyweni tetfu. Pawula wabhala: “Tihlolisiseni nine ngekwenu nibone kutsi nibambelele yini ekukholweni kwenu. Tivivinyeni nine.”—2 Khorinte 13:5.

15. Kute sikhule ebuhlotjeni betfu naNkulunkulu, kungani lutsandvo lubalulekile?

¹⁵ Indlu ingase yakhiwe iphele, kepha umsebenti usuke usachubeka. Kudzingeka igcinwe isesimeni lesikahle, ilungiswe lapho kudzingeke khona, futsi kungase kudzingeke kutsi ikhuliswe lapho timo tishintja. Yini lesiyidzingako kute sikhulise futsi silondvolote buhlobo betfu naJehova? Lokubaluleke kakhulu, lutsandvo. Kudzingeka sichubeke sikhula elutsandvweni lwetfu ngaJehova nangebazalwane betfu lesinabo. Nangabe site lutsandvo, lonkhe lwati kanye nemisebenti yetfu luyawuba lite—njengemsindvo longasho lutfo. (1 Khorinte 13:1-3) Nangabe sinelutsandvo, singakufinyelela kuvutfwa, futsi sichubeke sikhula ebuhlotjeni betfu naNkulunkulu.

16. Sathane ufuna kwenta bantfu bacabange ngayiphi indlela, futsi ngusiphi sivikelo Jehova lasiniketa sona?

¹⁶ Ase siphindze sikhulume ngalesinye sici longasisebentisa ekwakheni. Kute ukwati kutakha njengemlandzeli waKhristu locotfo, kufanele ugadze indlela yakho yekucabanga. Sathane, umbusi walelive, unelikhono lekwenta bantfu bacale kucabanga ngetintfo letibenta beve buhlungu, bahlale baneluvalo, futsi baphelelwe nalitsemba. (Efesu 2:2) Kucabanga lokunjalo kungase kube yingoti kumKhristu, kufanane nesihlahla lesidliwa ngumuhlwa. Kepha lokujabulisako kutsi Jehova usiniketa sivikelo lesibalulekile lesingasisita—lokulitsemba.

17. LiVi laNkulunkulu likuveta njani kubaluleka kwelitsemba?

¹⁷ LiBhayibheli libala tincenye letehlukahlukene tetikhali temphi, lesitidzingako kute simelane naSathane nalelive. Lesinye sikhali semphi lesibaluleke nakakhulu, impantitje ‘lelitsemba letfu lensindziso.’ (1 Thesalonika 5:8) Lisotja langesikhatsi seliBhayibheli lalati kutsi lalingeke lisindze emphini nalite  impantitje. Impantitje yayisigcoko lesasivame kwentiwa ngensimbi bese kunanyatsiselwa boya nobe sikhumba ekhatsi kuso. Lempantitje yayisita lisotja kutsi lingalimali kakhulu lapho lishaywe enhloko. Njengobe impantitje yayivikela inhloko, kunjalo nangelitsemba, lingavikela ingcondvo kanye nendlela yakho yekucabanga.

18, 19. Ngusiphi sibonelo sekutigcina sinelitsemba Jesu lasibeka, futsi tsine singamlingisa njani?

¹⁸ Jesu wasibekela sibonelo lesiyinhloko sekutigcina sinelitsemba. Usayikhumbula yini indlela lahlupheka ngayo ngebusuku bakhe bekugcina alapha emhlabeni, ngesikhatsi umngani wakhe lomkhulu amtsengisa etitseni? Lomunye webangani bakhe waze waphika nekutsi uyamati. Labanye bavele bamlahla futsi babaleka. Ngisho nebantfu baseveni lakubo bamlahla, futsi baze batjela emasotja emaRoma kutsi ambulale ngekumhlupha. Kuyacaca kitsi sonkhe kutsi Jesu wabhekana neluvivinyo lolubuhlungu kakhulu, lokungekho naloyedvwa emkhatsini wetfu longase abhekane nalo. Kepha yini leyamsita? Incwadzi yemaHebheru 12:2 iyasiphendvula: “Ngenca yekujabula labekubekelwe Jesu wacinisela ngekwetfwala [sigodvo sekuhlushwa], wangete walinaka lihlazo laso; wahlala ngesekudla sesihlalo sebukhosi saNkulunkulu.” Jesu akazange akukhohlwe “kujabula labekubekelwe.”

¹⁹ Ngukuphi kujabula Jesu labebekelwe kona? Bekati kutsi ngekubeketela, abengaba nencenye ekungcwelisweni kwelibito laJehova lelingcwele. Abenganiketa bufakazi lobukhulu bekutsi Sathane ungumcambimanga. Leli kwakukuphela kwelitsemba lelalinganiketa Jesu injabulo lenkhulu. Lokunye lokwamsita, kutsi bekati ngemvuzo Jehova abetamniketa wona ngenca yekwetsembeka kwakhe—nekutsi madvutane kwakutawufika sikhatsi lapho abetawuphindze ahlangane naBabe wakhe. Lapho timo tiba matima emhlabeni, Jesu abehlala njalo acabanga ngalelitsemba. Natsi kudzingeka sente lokufananako, ngobe natsi sinelitsemba lelibekwe embikwetfu. Jehova unikete ngamunye wetfu lilungelo lekusita kute kungcweliswe  libito lakhe lelikhulu. Natsi singafakazela kutsi Sathane ungumcambimanga, ngekutsi sikhetse kukhonta Jehova njengeMbusi wetfu, futsi sitigcine siphephile elutsandvweni lwaBabe wetfu, nangetulu kwanobe nguluphi lushushiso nobe tilingo lesibhekana nato.

20. Yini lengakusita kutsi ungacabangi ngetintfo letikuvisa buhlungu naletikwenta uphelelwe litsemba?

²⁰ Akusiko kutsi Jehova umane nje ufuna kutiniketa umvuzo tinceku takhe letetsembekile—kepha uyakulangatelela kwenta kanjalo. (Isaya 30:18; fundza Malakhi 3:10.) Uyakujabulela kuniketa tinceku takhe letilungile loko lokufiswa tinhlitiyo tato. (Tihlabelelo 37:4) Ngako-ke, gcina ingcondvo yakho etsembeni lelibekwe embikwakho. Ungayivumeli kutsi icabange ngetintfo letikuvisa buhlungu, letingcolile, futsi letiguculelwe, lokuyindlela live laSathane lelicabanga ngayo. Nangabe ucaphela kutsi indlela yekucabanga yalelive seyicala kungena engcondvweni nasenhlitiyweni yakho, thandaza ngekutimisela kuJehova kute utfole “kuthula kwaNkulunkulu lokwendlula konkhe kwati.” Lokuthula lokuvela kuNkulunkulu kutawulondvolota inhlitiyo kanye nemicabango yakho.—Filiphi 4:6, 7.

21, 22. (a) Nguliphi litsemba lelimangalisako labo ‘besicumbi lesikhulu’ labahlale bacabanga ngalo? (b) Nguliphi litsemba lelikutsintsa kakhulu wena, futsi yini lotimisele kuyenta?

²¹ Leli litsemba lelijabulisa kakhulu lokufanele sihlale sicabanga  ngalo. Nangabe uyincenye ‘yesicumbi lesikhulu,’ ‘lesitawuphuma ekuhluphekeni lokukhulu,’ cabanga ngekuphila lotawukutfola madvutane. (Sembulo 7:9, 14) Njengobe Sathane nemadimoni akhe batawube sebangekho, utawutfola inkhululeko longeke uyitfole nyalo. Ukhona yini emkhatsini wetfu longatange acindzetelwe kuyenga kwaSathane? Ngako-ke, lapho konkhe lokucindzetelwa sekuphelile, sitawujabulela kugucula lomhlaba ube lipharadisi, sicondziswa nguJesu kanye nalabo layawubusa nabo ezulwini labangu-144 000. Injabulo lesitawube sinayo iyawuba yinkhulu nakakhulu lapho sesibona konkhe kugula kanye nekukhubateka kucedvwa, nalapho sesemukela bantfu lesibatsandzako emathuneni, futsi sesiphila ngendlela Nkulunkulu labevele ayihlosile. Njengobe sitawube siba ngulabaphelele, kunemvuzo lomkhulu lotawube usondzela, setsembiso lesivetwe encwadzini yemaRoma 8:21—‘lokuyinkhululeko nebukhosi bebantfwana baNkulunkulu.’

²² Jehova ufuna utfole inkhululeko lenkhulu kunaleyo wena longase uyicabange. Kepha indlela leholela kuleyo nkhululeko itawutfolakala kuphela ngekulalela. Akusiyo yini intfo lencono kutsi utimisele kulalela Jehova malanga onkhe? Ngako-ke, chubeka utakha ekukholweni kwakho lokungcwele, ngobe ngekwenta kanjalo, utawutigcina elutsandvweni lwaNkulunkulu phakadze naphakadze!