1, 2. Serbisu saida mak Ita halo daudaun? Tanbasá mak serbisu neʼe importante tebes?

HANOIN toʼok, Ita serbisu makaʼas atu halo buat ida. Ita halo ida-neʼe kleur ona, maibé presiza tempu barak liután atu halo kompletu. Serbisu neʼe susar tebes, maibé toʼo agora, Ita sente kontente. Ita-nia laran-metin ona katak maski hasoru susar saida deʼit, Ita sei la sai baruk no sei la husik serbisu neʼe. Ita hatene katak serbisu neʼe importante no Ita-nia moris ho Ita-nia futuru depende ba serbisu neʼe. Tanbasá? Tanba serbisu neʼebé Ita halo daudaun mak atu halo boot liután, ka hametin, Ita-nia fiar!

² Dixípulu Judas hatete katak importante atu halo ida-neʼe. Iha ninia surat neʼebé fó laran-manas ba ema kristaun atu “hela nafatin iha Maromak nia domin”, nia mós hatudu oinsá mak sira bele halo nuneʼe. Nia dehan: “Hakaʼas an atu halo boot liután imi-nia fiar.” (Judas 20, 21) Iha dalan saida deʼit mak Ita bele halo boot liután ka hametin Ita-nia fiar atubele hela nafatin iha Maromak nia domin? Mai ita koʼalia kona-ba dalan tolu neʼebé sei ajuda ita atu hametin liután ita-nia fiar.

3-5. (a) Satanás hakarak lohi Ita atu iha hanoin saida kona-ba Maromak Jeová nia ukun-fuan sira? (b) Tanbasá mak Maromak fó ukun-fuan mai ita? Ida-neʼe sei book ita atu sente oinsá? Esplika toʼok ho ai-knanoik.

³ Primeiru, ita presiza hametin ita-nia fiar ba Maromak nia ukun-fuan. Iha livru ida-neʼe, Ita aprende ona buat barak  kona-ba hahalok sira neʼebé Maromak Jeová simu. Oinsá Ita sente kona-ba buat sira-neʼe? Satanás hakarak lohi Ita atu hanoin katak Maromak Jeová fó ukun-fuan no matadalan barak demais atu hanehan Ita, no halo Ita sente katak Ita la iha liberdade. Satanás uza lasu ida-neʼe husi tempu uluk kedas kuandu nia konsege lohi Eva iha Eden. (Gênesis 3:1-6) Ita mós sei monu ba Satanás nia lasu ida-neʼe ka lae? Neʼe depende ba Ita-nia haree kona-ba Maromak nia ukun-fuan no matadalan sira.

⁴ Hanoin toʼok: Ita laʼo halimar iha jardín neʼebé kapás, no Ita haree didin besi aas haleʼu fatin ida. Husi liʼur, fatin neʼe haree kapás no Ita hakarak atu tama. Karik Ita hanoin: ‘Tanbasá mak ema halo didin neʼe?’ Maibé kuandu Ita haree didiʼak, Ita haree leaun siʼak ida neʼebé buka atu han animál seluk! Agora Ita hatene ona tanbasá mak presiza didin neʼe. Didin neʼe proteje Ita husi leaun. Iha Ita-nia moris rasik, Ita tenke sees husi perigu ruma neʼebé hanesan leaun ka lae? Maromak nia Liafuan fó avizu mai ita: “Keta lanu bá, maibé matan-­moris. Imi-nia funu-balun, katak, Diabu, laʼo mai laʼo bá hanesan leaun ida, hodi buka atu han ema ruma.”​—1 Pedro 5:8.

⁵ Satanás mak hanesan leaun neʼebé siʼak. Maromak Jeová lakohi Satanás atu han ita. Tan neʼe nia halo ukun-fuan sira atu proteje ita atu labele monu iha Satanás nia “babeur aat”. (Efeso 6:11) Entaun, kuandu ita hanoin kleʼan kona-ba tansá mak Maromak fó ninia ukun-fuan, ita sei komprende katak ita-nia Aman iha lalehan hadomi tebes ita. Se ita komprende ida-neʼe, Maromak nia ukun-fuan sei halo ita sente haksolok no seguru. Dixípulu Tiago hakerek: “Ema neʼebé hateke didiʼak ba ukun-fuan loloos neʼebé soi ema, . . . neʼebé halo tuir duni nia, sei hetan Maromak nia bensa iha buat hotu neʼebé nia halo.”​—Tiago 1:​25.

6. Saida mak dalan neʼebé diʼak liu atu hametin ita-nia fiar ba Maromak nia ukun-fuan neʼebé loos? Fó toʼok ezemplu.

⁶ Moris tuir Maromak nia ukun-fuan mak dalan neʼebé diʼak liu atu hametin ita-nia fiar ba Maromak, ita-nia Ukun-Fuan Naʼin, no mós ba ninia ukun-fuan sira neʼebé diʼak tebes. Porezemplu, “Kristu nia ukun-fuan” inklui mós ninia  mandamentu atu hanorin ema atu halo tuir ‘buat hotu neʼebé nia haruka’. (Galasia 6:2; Mateus 28:19, 20) Ema kristaun simu mós mandamentu atu sempre halibur hamutuk hodi adora Maromak no atu fó laran-manas ba malu. (Ebreu 10:24, 25) Maromak nia ukun-fuan mós haruka ita atu halo orasaun beibeik ba Maromak Jeová no halo husi laran. (Mateus 6:5-8; 1 Tesalonika 5:17) Kuandu ita moris tuir mandamentu hirak-neʼe, ita sei komprende ho klaru liután katak mandamentu sira-neʼe mak nuʼudar matadalan neʼebé diʼak. Hodi halo tuir Ita sei sente haksolok neʼebé Ita la bele hetan kuandu halo tuir mundu neʼe nia hakarak. Se Ita hanoin kleʼan kona-ba oinsá mak Ita rasik hetan bensaun hodi moris tuir Maromak nia ukun-fuan, Ita-nia fiar sei sai metin liután, loos ka lae?

7, 8. Oinsá mak Maromak nia Liafuan bele ajuda ema neʼebé sente taʼuk katak iha futuru karik sira sei monu ba sala?

⁷ Dala ruma, ema balun hanoin katak iha futuru sira sei hasoru situasaun neʼebé susar no sira sei husik Maromak Jeová nia ukun-fuan. Sira taʼuk katak karik sira sei monu ba sala. Se Ita mós sente hanesan neʼe, hanoin nafatin liafuan tuirmai neʼe: “Haʼu, Jeová, mak ó-nia Maromak, Ida neʼebé hanorin ó atu ó bele hetan buat neʼebé diʼak, Ida neʼebé halo ó laʼo iha dalan neʼebé ó tenke laʼo. Oh, se ó fó duni atensaun ba haʼu-nia ukun-fuan! Hodi nuneʼe, ó-nia dame sei sai hanesan mota  neʼebé suli, no ó-nia justisa sai hanesan laloran tasi.” (Isaías 48:17, 18) Ita hanoin kleʼan tiha ona kona-ba oinsá mak liafuan sira-neʼe bele fó kmaan ba Ita?

⁸ Maromak Jeová fó-hanoin mai ita katak ita sei hetan bensaun kuandu halo tuir nia. Nia promete bensaun rua. Primeiru, haree toʼok mota kapás neʼebé nafatin suli hodi halo jardín ida sempre buras. Ita-nia dame sei sai hanesan mota neʼe hodi halo ita-nia moris sempre kontente. Segundu, ita-nia justisa sei sai hanesan laloran tasi. Se Ita bá tasi-ibun, Ita haree laloran tasi neʼebé baku bá baku mai. Ita hatene katak laloran neʼe sei nunka para. Maromak Jeová hatete katak Ita-nia justisa⁠—Ita-nia moris neʼebé tuir dalan neʼebé loos​—bele kontinua ba nafatin hanesan laloran neʼe. Se Ita hakaʼas an atu halo tuir Maromak, nia sei la husik Ita atu monu! (Salmo 55:22) Liafuan ida-neʼe hametin Ita-nia fiar ba Maromak Jeová no ninia ukun-fuan sira, loos ka lae?

9, 10. (a) Tanbasá mak sai ema boot iha dalan espirituál mak planu neʼebé diʼak tebes? (b) Tanbasá mak ema neʼebé hanoin buat neʼebé espíritu nian bele sai kontente?

⁹ Bíblia hatudu dalan ida tan atu ajuda ita atu hametin liután Ita-nia fiar. Neʼe mak: “Laʼo ba oin hodi sai ema boot.” (Ebreu 6:1) Planu ida neʼebé diʼak tebes ba ema kristaun mak atu sai ema boot iha dalan espirituál. Ema ida la bele sai perfeitu, maibé ita hotu bele sai ema boot iha dalan espirituál. No mós se ita sai boot iha dalan neʼe, ita-nia haksolok sei aumenta liután kuandu serbí Maromak Jeová. Tanbasá?

¹⁰ Ema neʼebé boot iha dalan espirituál katak ema neʼebé hanoin uluk oinsá Maromak Jeová nia hanoin. (Joao 4:23) Paulo hatete: “Sira neʼebé moris tuir isin, hanoin deʼit buat neʼebé isin nian, maibé sira neʼebé moris tuir espíritu, hanoin buat neʼebé espíritu nian.” (Roma 8:5) Ema neʼebé hanoin buat neʼebé isin nian sei la hetan ksolok neʼebé loos, tanba nia hanoin liuliu kona-ba ninia an rasik no rikusoin, no ladún hanoin kona-ba rezultadu husi nia hahalok. Maibé ema  neʼebé hanoin buat neʼebé espíritu nian iha haksolok neʼebé loos, tanba hanoin uluk kona-ba Jeová, “Maromak neʼebé haksolok”. (1 Timoteo 1:11, MF) Ema neʼebé hanoin kona-ba buat neʼebé espirituál hakarak tebes atu halo Maromak Jeová kontente, no nia rasik mós kontente nafatin maski hasoru susar. Tanbasá? Tanba kuandu hasoru susar, ida-neʼe mak oportunidade ba ita atu hatudu katak Satanás mak bosok-teen, no atu hamriik metin hodi apoia Maromak. Ida-neʼe mós halo ita-nia Aman iha lalehan sente kontente.​—Provérbios 27:11; Tiago 1:2, 3.

11, 12. (a) Saida mak Paulo hatete kona-ba “ema boot”? Liafuan “komprende ona”, neʼebé Paulo temi, katak sá loos? (b) Atu isin bele book an ho diʼak, ita presiza atu halo saida?

¹¹ Atu sai ema boot iha dalan espirituál, ita presiza treinu ita-nia an. Hanoin toʼok liafuan neʼe: “Fó etu tasak ba ema boot, ba sira neʼebé komprende ona atu hatene buat neʼebé diʼak husi buat neʼebé aat.” (Ebreu 5:​14) Liafuan “komprende ona” tradús husi lia-gregu, neʼebé katak “treinu ona”. Paulo uza liafuan iha lia-gregu neʼebé baibain uza ba ema neʼebé halo treinu atu tuir desportu. Tan neʼe, “sira neʼebé komprende ona” bele tradús fali “sira neʼebé halo treinu ona atu tuir desportu”. Agora, hanoin toʼok oinsá mak ema halo “treinu” hanesan neʼe.

¹² Kuandu ita foin moris, ita-nia isin seidauk simu treinu. Porezemplu, bebé la bele book ninia liman no ain tuir ninia hakarak. Tan neʼe, bebé book ninia liman arbiru deʼit no dala ruma baku nia an rasik no hakfodak. Neineik-neineik, tanba nia treinu atu book liman no ain, nia aprende atu kontrola ninia liman no ain. Hodi treinu, nia aprende atu dolar, laʼo, no ikusmai nia sai labarik boot no bele halai. * Entaun, oinsá kona-ba ema boot neʼebé tuir desportu? Kuandu Ita haree  ema ida halo kamballota neʼebé kapás iha anin leten no dulas nia isin, no toʼo rai la monu, Ita haree katak ninia isin hanesan borraxa neʼebé mamar. Nia bele halo nuneʼe tanba halo treinu barak, laʼós mosu derrepente deʼit. Bíblia hatete katak treinu isin nian hanesan neʼe halo “diʼak” uitoan. Maibé, diʼak liután atu treinu ita-nia laran atu hatene buat neʼebé diʼak husi buat neʼebé aat!​—1 Timoteo 4:8.

13. Oinsá mak ita bele treinu ita-nia an atu sai ema boot iha dalan espirituál?

¹³ Iha livru neʼe, ita koʼalia tiha ona buat barak neʼebé bele ajuda Ita atu treinu Ita-nia an hodi bele laran-metin nafatin ba Maromak Jeová. Entaun, antes foti desizaun iha Ita-nia moris loron-loron nian, hanoin kleʼan kona-ba Maromak nia ukun-fuan no matadalan no halo orasaun. Husu ba Ita-nia an: ‘Bíblia iha ukun-fuan no matadalan saida kona-ba ida-neʼe? Oinsá mak haʼu bele halo tuir ukun-fuan no matadalan sira-neʼe? Oinsá mak haʼu bele halo kontente haʼu-nia Aman iha lalehan?’ (Provérbios 3:5, 6; Tiago 1:5) Hodi halo hanesan neʼe antes foti desizaun ida-idak, Ita bele treinu Ita-nia laran hodi bele komprende buat neʼebé loos no sala. No treinu hanesan neʼe sei ajuda Ita atu laʼo ba oin hodi sai ema boot iha dalan espirituál.

14. Atu laʼo ba oin nafatin iha dalan espirituál, ita presiza sente hamlaha ba saida? Ita tenke kuidadu kona-ba saida?

¹⁴ Maski karik Ita sai boot ona iha dalan espirituál, Ita presiza hakaʼas an atu nafatin laʼo ba oin. Atu ema sai forte, nia presiza hahán. Entaun Paulo hakerek: “Fó etu tasak ba ema boot.” Atu Ita-nia fiar sai forte, importante tebes atu han etu espirituál nian. No mós, halo tuir buat neʼebé Ita aprende. Tuir  loloos, liafuan “matenek” dehan katak halo tuir buat neʼebé Ita hatene ona. No Bíblia hatete: “Matenek mak buat neʼebé importante liu.” Tan neʼe, ita presiza sente hamlaha ba lia-loos neʼebé folin-boot, neʼebé ita-nia Aman haraik mai ita. (Provérbios 4:5-7; 1 Pedro 2:2) Ladiʼak duni se koñesimentu no matenek halo ita foti-an. Tan neʼe, ita presiza hanoin beibeik kona-ba ita rasik nia hahalok atu labele husik foti-an ka hahalok ladiʼak seluk sai abut iha ita-nia laran. Paulo hakerek: “Haree didiʼak imi an atu haree imi moris iha fiar ka lae. Koko imi an.”​—2 Korinto 13:5.

15. Atu laʼo ba oin, tanbasá mak importante atu haburas domin?

¹⁵ Karik Ita halo serbisu atu harii uma, no uma neʼe kompletu ona. Maski nuneʼe, Ita-nia serbisu la para. Ita presiza hadiʼa beibeik buat neʼebé sai aat, no dala ruma presiza halo uma neʼe sai boot liután tuir situasaun. Atu ita sai ema boot iha dalan espirituál no hadiʼa beibeik ita-nia hahalok, ita presiza atu halo saida? Importante liu mak haburas domin. Ita presiza atu haburas nafatin ita-nia domin ba Maromak Jeová no ba ita-nia maluk fiar-naʼin. Se ita la iha domin, ita-nia koñesimentu no serbisu hotu sei sai saugati deʼit​—hanesan ita halo barullu deʼit. (1 Korinto 13:1-3) Maibé se ita haburas domin, ita bele sai ema boot neʼebé nafatin hadiʼa an hodi hakbesik liután ba Maromak.

16. Satanás hakaʼas an nafatin atu halo ema hanoin oinsá? Protesaun saida mak Maromak Jeová fó mai ita?

¹⁶ Mai ita koʼalia kona-ba buat ida tan neʼebé importante atu hametin ita-nia fiar. Atu laʼo ba oin nuʼudar Kristu nia dixípulu ida neʼebé loos, Ita presiza atu kuidadu ho Ita-nia neon. Satanás, nuʼudar ukun-naʼin mundu neʼe nian, nia matenek tebes atu halo ema hanoin ladiʼak kona-ba buat hotu, neon-kraik, no neon-susar. (Efeso 2:2) Hanoin hanesan neʼe iha perigu tebes, hanesan ai neʼebé fuhuk lori perigu ba uma tomak. Maibé ita sente kontente tanba Maromak Jeová fó buat ida neʼebé proteje ita-nia neon. Neʼe mak esperansa.

17. Oinsá mak Maromak nia Liafuan hatudu katak importante atu iha esperansa?

 ¹⁷ Bíblia temi kona-ba hatais funu nian oioin neʼebé mai husi Maromak, neʼebé ita bele uza hodi luta hasoru Satanás no ninia mundu. Buat ida neʼebé importante mak “esperansa kona-ba maksoin” nuʼudar kapasete atu taka ulun. (1 Tesalonika 5:8) Soldadu iha tempu Bíblia nian hatene katak fasil ba inimigu atu oho sira se la taka kapasete. Sira-nia kapasete halo husi besi no iha laran iha animál nia kulit ka hena neʼebé mahar. Tan neʼe maski buat ruma kona soldadu nia ulun, kapasete bele proteje atu la bele hetan kanek. Hanesan neʼe, esperansa bele proteje Ita-nia neon no hanoin.

18, 19. Jesus fó ezemplu saida kona-ba kaer metin ba esperansa? Oinsá mak ita bele halo tuir ninia ezemplu?

¹⁸ Jesus fó ezemplu diʼak liu hotu kona-ba kaer metin ba esperansa. Hanoin toʼok kona-ba susar oioin neʼebé nia hasoru iha kalan ikus iha ninia moris nuʼudar ema iha mundu. Ninia belun ida saran nia tanba hakarak osan. Belun ida seluk nega nia. Sira seluk husik nia no halai-sees tiha. Ema husi nia rai rasik mak kontra hasoru nia hodi haklalak atu nia hetan kastigu-­mate iha tropa Roma nia liman. Loos duni, ita sei la hasoru susar neʼebé boot liu fali susar neʼebé Jesus simu. Saida mak ajuda nia atu tahan hasoru susar sira-neʼe? Bíblia hatán iha Ebreu 12:2: “Tan ksolok neʼebé nia atu hetan, nia simu krús [“ai-riin terus nian”, MF], la hodi moe. Ohin, nia tuur ona iha Maromak nia kadunan nia sorin-kuana.” Entaun, maski iha terus laran, Jesus nunka haluha “ksolok neʼebé nia atu hetan”.

¹⁹ Ksolok saida mak Jesus atu hetan? Nia hatene katak, hodi tahan hasoru susar sira-neʼe, nia bele hola parte atu halo Jeová nia naran sai santu. Nia mós bele fó sasin neʼebé boot liu, katak Satanás mak bosok-teen. La iha esperansa seluk tan neʼebé bele fó ksolok hanesan neʼe ba Jesus! Nia mós hatene katak, Maromak Jeová sei fó kolen neʼebé kapás se nia tahan toʼo rohan​—lakleur tan, nia sei hela hamutuk filafali ho ninia Aman. Jesus hanoin nafatin kona-ba esperansa furak neʼe iha tempu susar hotu. Ita mós presiza halo hanesan neʼe. Hanesan ho Jesus,  ita mós bele hetan ksolok. Maromak Jeová hafolin ita ida-idak hodi fó knaar neʼebé furak atu hola parte atu halo ninia naran sai santu. Ita mós bele fó sasin katak Satanás mak bosok-teen kuandu ita hili Maromak Jeová nuʼudar ita-nia Ukun-Naʼin neʼebé boot liu no hela nafatin iha ita-nia Aman nia domin, maski hasoru susar no babeur oioin.

20. Saida mak ajuda ita atu kaer metin ba esperansa?

²⁰ Maromak Jeová laʼós deʼit prontu atu fó kolen ba ninia atan neʼebé laran-metin ba nia, maibé nia hakarak tebes atu halo nuneʼe. (Isaías 30:18; Malaquias 3:10) Nia gosta tebes atu fó buat neʼebé ita hakarak, se ita-nia hakarak mak loos. (Salmo 37:4) Tan neʼe keta haluha esperansa neʼebé Ita sei hetan iha futuru. Hakaʼas an atu luta hasoru hanoin neʼebé laloos, neʼebé mai husi Satanás nia mundu. Se Ita sente katak mundu nia hanoin komesa atu tama iha Ita-nia neon no laran, halo orasaun ho laran ba Maromak Jeová atu husu katak ninia dame bele ‘hela iha Ita-nia fuan no laran’. Dame husi Maromak sei proteje Ita-nia neon no laran.​—Filipe 4:6, 7.

21, 22. (a) Esperansa furak saida mak Maromak fó ba “ema-lubun boot”? (b) Ita gosta liu atu hanoin kona-ba esperansa saida? Ita laran-metin ona atu halo saida?

²¹ Diʼak atu hanoin kona-ba esperansa neʼebé furak tebes, loos ka lae? Se Ita mak parte husi “ema-lubun boot” neʼebé sei sai husi terus makaʼas, hanoin toʼok kona-ba moris neʼebé  lakleur Ita sei hetan. (Apokalipse 7:9, 14) Iha mundu neʼebé ita moris daudaun, sé mak hatene moris neʼebé la hetan susar husi Satanás nia mundu? La iha! Maibé iha futuru Satanás no ninia anju aat sira sei la iha ona, no Ita sei sente kmaan tebes. Agora ita bele hanoin kona-ba moris iha futuru neʼebé diʼak no kontente, maibé realidade sei sai diʼak liután. Iha tempu neʼebá, ita sei haksolok hodi halo serbisu atu halo mundu sai fali hanesan jardín ida neʼebé kapás tebes, no Jesus ho ninia maluk naʼin-144.000 neʼebé ukun iha lalehan sei tau matan ba serbisu hotu neʼe! Liután neʼe, ita sei sente kontente tebes tanba moras sei la iha tan, ita bele hasoru fali ema neʼebé mate ona, no ema hotu sei moris tuir dalan neʼebé Maromak hakarak horiuluk kedas. Kuandu hanoin kona-ba ida-neʼe, ita-nia laran sai haksolok tebes! Neineik-neineik ita sei sai perfeitu, toʼo tempu neʼebé ita sei simu kolen neʼebé kapás liután. Neʼe mak buat neʼebé Maromak promete iha Roma 8:21, katak liberdade atu “sai husi situasaun atan nian . . . hodi halo parte nuʼudar Maromak nia oan”.

²² Maski Ita koko atu hanoin, Ita-nia hanoin latoʼo atu hatene loos kona-ba liberdade neʼebé Maromak Jeová hakarak fó ba Ita iha futuru. Atu hetan liberdade neʼe Ita tenke halo tuir Maromak Jeová agora. Entaun, diʼak atu hakaʼas an atu halo tuir Maromak Jeová iha Ita-nia moris loron-loron nian, loos ka lae? Tan neʼe, kontinua atu halo boot liután Ita-nia fiar, hodi hela nafatin iha Maromak nia domin!