1, 2. Ka iyou i nyi u lu maanaa, man er nan ve i doo u ú ver ishima sha mlu u tom wouwe?

TÔÔ ase wer ú ngu maan iyou sha gbashima wou cii. U hii u maan i ayange kar, man gba u ú maa i shighe gôgônan. Tom ne taver kpa u gema u doo ú kpen kpen. Er u taver nahan je kpa u kange ishima gbang wer u gba uwer ga, sha ci u mlu u tom wou ne una bende a uma wou hegen kua ken hemen je kpaa. Sha ci u nyi? Sha ci u ka we iyol you u lu iyou shon i ú lu maan la ye.

² Orhenen Yuda kaa wener gba u se maa iyol yase. Á wa Mbakristu kwagh ér ve ‘luun ken dooshima u Aôndo,’ shi a pase kwagh u vesen u una wase ve u lun ken dooshima u Aôndo la ken ivur i sha 20 la. Á kaa ér: “Maan nen ayol a en ken icighanjighjigh wen u nan.” (Yuda 20, 21) Ka igbenda i nyi nahan ia wase u u maan iyol you sha er u seer taver jighjigh u nan wou nahan u za hemen u lun ken dooshima u Aôndo? De se time nen sha avegher atar a ú fatyô u maan iyol you ken icighanjighjigh wou u nan yô.

3-5. (a) Satan una bume ú ér u nenge atindiakaa a Yehova nena? (b) Doo u se nengen atindiakaa a Yehova nena, man doo u kwagh ne una bende a vese nena? Tese ikyav.

³ Kwagh u hiihii u se er yô, ka u seer taver jighjigh wase ken atindi a Aôndo. Er ú tim ken takerada ne yô, ú hen atindi a perapera kpishi a Yehova a we sha kwagh u aeren a i gbe u se lu a  mi man a se palegh yô. Ú nenge atindiakaa a perapera a Yehova ne nena? Satan una soo u bumen we ér u nenge atindi kua akaawan a Yehova la wer nga yangen we a yange u eren kwagh u ú soo la shin nga nzughul a nzughul a we. Hii shighe u Satan bume mbamaren asev mba hiihii mbara sha imba gbenda ne ken sule u Eden la je, ngu bumen ior sha imba gbenda ne zan zan nyian. (Genese 3:1-6) We kpa una bume u nahana? Ka gbenda u ú eren kwagh la ua na ve una bume ú shin una bume ga ye.

⁴ Hen ase sha ikyav ne: Tôô wer u ngu zenden hen ijiir i memen i doonashe, i wa zegeigyar u taven hen ijiir shon vegher ugen. Ijiir i í yisi la dooashe kpen kpen. Alaghga sha hiihii la u nenge wer zegeigyar la ngu yangen we a yange u zenden zan ape u soo tsô. Kpa ú te ashe u kenger igyar vegher la yô ú nenge a begha ngu tan kume keren kwagh u una ya yô! Nahan u mase kaven er i we igyar la sha u kuran ior yô. Ma zege inyamkyume i bo ngi i í soo u kôron we hegen yôô? Mkaanem ma Aôndo ta se icin ér: “Lu nen geng ge geng shi kuran nen kpaa, orihyom wen diabolo ngu zenden er begha u tan kume nahan, keren or u una ya yô.”—1 Peteru 5:8.

⁵ Satan ka bo or u a keren ior mba una ya yô. Yehova soo ér Satan a ya se ga, nahan a wa atindi a kuran se sha “ayom” a iferor ne. (Mbaefese 6:11) Sha nahan yô, hanma shighe u se lu gbidyen kwar sha atindi a Aôndo yô se nenge atindi la ser ka gbenda u Ter wase u sha la a tese se dooshima na yô. Aluer se nenge a nahan yô, aa kura se shi aa na se msaanyol kpaa. Orhenen Yakobu nger ér: “Or u nan kenger sha tindi u vough u a pasen se a toho la shi nan veren ishima yô, á saan nan iyol . . . u eren tom” sha mi.—Yakobu 1:25.

6. Ka gbenda u hemban doon u nyi se kar sha mi ve se maa jighjigh u se lu a mi sha atindi kua akaawan a perapera a Aôndo laa? Tese ikyav.

⁶ Gbenda u hemban doon u se kar sha mi ve se maa jighjigh wase ken Aôndo u a ne se atindi la shi se nenge a kwaghfan u a lu ken atindi a na la yô ka u kuran a. U tesen ikyav yô, “tindi  u Kristu” wa u “kuran akaa a [a we se] kwagh sha mi” la cii ker. (Galatia 6:2; Mateu 28:19, 20) Mbakristu shi mba eren asenge sha tindi u i we ve ér ve kumban imôngo ve civir Aôndo shi ve taver asema ayol a ve la ga. (Mbaheberu 10:24, 25) Atindi a Aôndo shi kua kwagh u i we se ér se eren msen hen Yehova hanma shighe shi se eren un a ishima yase i môm la kpaa. (Mateu 6:5-8; 1 Mbatesalonika 5:17) Ka sea kuran atindi ne yô, se nenge ser Aôndo na se a sha dooshima sha u a hemen se yô. Aluer se mba kuran atindi ne yô, se zua a msaanyol man mkom u a ban ken tar u u mgbough a mbamzeyol yum ne. Ka wea gbidye kwar wea nenge er u kor atindi a Aôndo ve a wase u nahan, jighjigh wou a seer taver a taver ga he?

7, 8. Mkaanem ma Aôndo seer taver mba ishima i ze ve iyol ér alaghga vea kôr cio u kuran atindi a perapera a Aôndo anyom anyom ga la ishima nena?

⁷ Ashighe agen, ishima ka i̱ za mbagenev iyol ér, u eren sha atindi a Yehova anyom anyom la ka kwagh u taver. Ka ve cian ér alaghga a va gande ve iyol. Aluer kape we kpa ú henen la yô, lu a mkaanem man ken ishima, ma kaa ér: “Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.” (Yesaia 48:17, 18) I lu  nahan u gbidye kwar sha mkaanem man u nenge er ma lu ma taver se ishima vee?

⁸ Yehova umbur se ken avur ne ér aluer se mba ungwan un yô a lu se a inja. A tôndo zwa ér una ver se doo doo sha igbenda ihiar. Gbenda u hiihii yô, bem wase una lu er ifi nahan, inja na yô, bem wase una dumbur shi una bee mayange ga. Kwagh u sha uhar yô, perapera wase una lu er agôndo a zegemnger nahan. Aluer u tile hen kpezegemnger ú nenge er agôndoamnger a lu moughon yô, u fa je wer kape aa za hemen u moughon tan sha kpetar gbem je la. Yehova kaa ér kape perapera wou shin ieren you i vough la kpa ia lu je la. Er u lu civir Yehova sha mimi her tsô yô, una wase u u za hemen u eren nahan gbem! (Pasalmi 55:22) Imba ityendezwa ingin nahan i seer maan jighjigh u ú ne Yehova shi u lu a mi ken atindiakaa a na a perapera la ga he?

9, 10. (a) Doo u Mbakristu vea za hemen sha mlu u vian la sha ci u nyi? (b) Aluer se mba a mnenge u Aôndo yô, se zua a msaanyol nena?

⁹ I pase vegher u sha uhar u i gbe u u maa iyol you ken icighanjighjigh wou u nan la ken mkaanem man, ér: “Se za nen hemen sha mlu u vian la.” (Mbaheberu 6:1) Doo u Orkristu nana za hemen sha mlu u vian la. Uumace vea fatyô u lun vough hegen ga, nahan kpa se fatyô u zan hemen sha mlu u vian la. Shi Mbakristu ka vea civir Yehova man vea zaan hemen sha mlu u vian la yô, i saan ve iyol kpishi. Sha ci u nyi?

¹⁰ Orkristu u nan vie yô, ka or u akaa a ken jijingi a gbe nan ishima yô. Nan nengen akaa er Yehova kpa a nengen a nahan. (Yohane 4:23) Paulu nger ér: “Mba ve lu ken iyol yô, mba veren ishima sha akaa a iyolough; kpa mba ve lu ken jijingi yô, gema ka akaa a jijingi ve veren ishima sha mi ye.” (Mbaromanu 8:5) Mba ve lu a mnenge u iyolough yô, mba zough a msaanyol ga, sha ci u mba hembe veren ishima sha iyol ve man inyaregh ki keren tseegh. Kpa mba ve lu a mnenge u Aôndo yô, mba zough a msaanyol, gadia ve hemba veren ishima sha Yehova, “Aôndo u sar sar” la. (1 Timoteu 1:11, NW) Or u akaa a ken jijingi a  gbe nan ishima yô, ka maan nan iyol u eren akaa a doon Yehova shi ka nana̱ tagher a imeen je kpa i saan nan iyol. Sha ci u nyi? Ameen ka a bugh se ian i tilen sha mimi dông shi tesen ser Satan ka or u aie, nahan se na i saan Ter wase u sha la iyol.—Anzaakaa 27:11; Yakobu 1:2, 3.

11, 12. (a) Paulu ôr ér nyi sha kwagh u “mkav wase u ken ishima” laa, man inja i ishember i “hoghor” la ér nyi? (b) Or ka nan hii u eren kwagh a alegh a iyolough a nan kure kure zan zan i va hoghor nan nena?

¹¹ Saa or nana tsaha iyol i nan ve nana hemba veren ishima sha akaa a ken jijingi shi nana za hemen sha mlu u vian la ye. Hen ase sha kwagh u ivur ne i er ne, i kaa ér: “Kwaghyan u taver yô, ngu sha ci u mbaganden, ka ve mba ve er tom sha mkav u ken ishima, hoghor ve u paven kwagh u dedoo a kwagh u bo.” (Mbaheberu 5:14) Shighe u Paulu lu ôron kwagh u mba ve er tom sha mkav u ken ishima, i “hoghor” ve u paven kwagh u dedoo a u bo la, a yar tom a ishember i ken zwa Grika i yange a ôron kwagh u mba eren anumbe a dughun igyônôgyô sha aôndo senen tilen shin inya mba sha derianyom u hiihii la ve i ter i yô. A fatyô u geman ishember shon kpaa ér ‘u karen iyol er or u eren anumbe a dughun igyônôgyô nahan.’ Iyolkaren ne ka kwagh u kiriki ga cii.

¹² Shighe u se lu anikyundanev la, lu a hoghor se u eren kwagh a alegh a iyolough a ase ga. U tesen ikyav yô, ankyundan ka nan fa u veren angahar man ave a nan gigh gigh ga. Ashighe kpishi ka nan jingir ave sha ibume, nan hua akughur sha ishi, nan cia iyol shi i nyoon nan kpaa. Kpa ka nan za hemen u eren akaa a alegh a iyolough a nan tegh tegh tsô i va hoghor nan. Shighe a karen yô nan hii u kperan, maa nan gba zenden shi yevese je kpaa. * Kpa gema or u eren anumbe  a dughun igyônôgyô di ye? Ka wea nenge nana̱ dughun igyônôgyô sha aôndo sha inja inja, a doo kenger nahan, ú fa je wer nan kar iyol gbem nahan iniumbe ne hoghor nan. Nan tema tsô nan gba fan u eren iniumbe ne ga, nan kar iyol ica i gba. Bibilo kaa ér imba iyolkaren ne ‘ngi a inja kpeghee’ tsô. Kpa u tsaase mkav wase u ken jijingi la yô, ka kwagh u injaa je gande.—1 Timoteu 4:8.

13. Se tsaase mkav wase u ken ishima la nena?

¹³ Se hen akaa kpishi ken takerada ne a aa wase u u tsaase mkav wou u ken ishima la sha er u za hemen u civir Yehova sha mimi, u waan atindi a Aôndo ikyo yô. Henen sha akaawan a Aôndo man atindi a na kpoghuloo shi eren msen sha kwagh u atindi a na zum u ú soo u tsuan kwagh u ú er yô. Hanma kwagh u ú soo u eren cii yô, pine iyol you wer: ‘Ka hanma tindi ken Bibilo a er kwagh sha kwagh nee? Me er sha tindi ne nena? Me er nyi ve a doo Terem u sha laa?’ (Anzaakaa 3:5, 6; Yakobu 1:5) Aluer u pine iyol you mbampin mban yô kwagh u ú tsough u eren cii una seer tsaase mkav wou u ken ishima la. Kwagh ne una wase u, nahan u lu or u akaa a ken jijingi aa gba u ishima tsung yô.

14. Sea soo ser se vese ken jijingi yô, kanyi i doo u ia sar se, nahan kpa gba u se palegh nyi?

¹⁴ Er hanma wase nana fatyô u vian ken jijingi nahan kpa, u seer vesen ken jijingi yô ka kwagh u a ze hemen gbem yô. Ka kwaghyan a ne ve or vesen ye. Sha nahan yô, Paulu kaa ér: “Kwaghyan u taver yô, ngu sha ci u mbaganden.” Kwagh u vesen u una wase u u za hemen u maan jighjigh wou yô, ka u yan kwaghyan u ken jijingi gbem. Aluer u ngu eren sha akaa a u  hen la vough yô, ka kwaghfan je la, man Bibilo kaa ér: “Akaa a a sar u cii a kuma sha na ga.” Nahan yô, i̱ sar se tsung u zuan a mimi u injaa u Ter wase u sha a ne se la. (Anzaakaa 8:11; 1 Peteru 2:2) Sea lu a mfe man kwaghfan u Aôndo kpa doo u se hingir mbamoron iyol ga. Doo u se timen ayol a ase hanma shighe se nengen sha er ihyagh shin aeren a bo agen aa ya tor ken a vese ga yô. Paulu nger ér: “Kar nen ayol a en sha u né fa aluer nea lu ken jighjigh u nan yô, time nen ken ayol a en.”—2 Mbakorinte 13:5.

15. Dooshima ngu hange hange sha u wasen se u vesen ken jijingi sha ci u nyi?

¹⁵ Ka a̱ maa iyou a̱ bee kpa, mba de tom sha i̱ ga. Ka i gba u a sôron i̱, shi ka a̱ gba hange hange u a seer kparyou ugen kpa i seer. Gba u se er nyi ve se za hemen sha mlu u vian la, shi se za hemen u yan ikyar vea Aôndo? Kwagh u vesen u una wase se yô, ka dooshima. Gba u Yehova man anmgbianev asev mba ken Kristu vea za hemen u doon se ishima. Aluer se mba a dooshima ga yô, mfe wase man ityom i se eren sha u civir Aôndo la cii ia lu gbilinkwagh, se hingir er iyôgh ki uvan nahan. (1 Mbakorinte 13:1-3) Aluer se mba a dooshima yô, se za hemen sha mlu u vian la shi se vesen ken jijingi se seer a seer kpaa.

16. Satan ngu bumen ior ér ve henen nyi, man kanyi Yehova a ne ér i̱ kura se?

¹⁶ Se mase timen sha vegher u sha utar u i gbe u u maa iyol you ken icighanjighjigh wou u nan la. Kwagh u una wase u u maa iyol you, u lu ordondon Kristu u mimi yô, ka u veren ishima sha gbenda u u henen kwagh la. Satan, u a lu tor u tar ne la fa u bumen ior ér ve henen sha akaa a nan ve ishimayinan man mciem shi kera nan orgen jighjigh ga, kua akaa a aa na uma una due ve ishima kpaa. (Mbaefese 2:2) Imba mhen ne una vihi Orkristu njighe njighe er hur ka a vihi haav mbu iyough nahan. Kpa kwagh ka a er i doo yô, Yehova na se kwagh  u injaa u una kura se yô, kwagh shon yô ka ishimaverenkeghen.

17. Mkaanem ma Aôndo tese mluainja u ishimaverenkeghen nena?

¹⁷ Bibilo ter ikyav mbi utyaav mbi se hua ve se nôngo ityav a Satan man tar ne yô. Kwagh u vesen ken ikyav mbi utyaav mbin yô ka agunduutya, “ka ishimaveren keghen myom je la.” (1 Mbatesalonika 5:8) Ushoja mba sha ayange a i lu ngeren Bibilo la fa ér aluer ve hua agunduutya ga yô alaghga ityav mbia wua ve. Yange i er agunduutya ne sha iyô, i kange ikyôvough sha mi i yisa. Agunduutya yange a kura ityough ki orshoja sha er ma ikyagh ki tswamev kia gber nan ivav sha ityou kehelee ga yô. Er agunduutya a kor ityough nahan, kape ishimaverenkeghen kpa i̱ kor mhen wase je la.

18, 19. Yesu ver se ikyav i nyi sha kwagh u lun a ishimaverenkeghene, man se dondo un nena?

¹⁸ Yesu ver se ikyav i injaa sha kwagh u lun a ishimaverenkeghen. Umbur ican i yange ya hen tugh nav mbu masetyô shin tar la. Huror na u ishima ishima ugen nenge un mker sha inyar. Ugen di nyiman un. Mbagenev mbara undu un, yevese cica cii. Ityô na mough num a na, ve sendegh ér ushoja mba Mbaromanu ve er un ican zan zan ve wua un. Se fatyô u kaan ser Yesu yange ya ican i se tsa sha won kpa se ya ga yô. Lu nyi i wase unu? Mbaheberu 12:2 kaa ér: “A taver ishima [sha kon u mtsaha], A kera wa kunya ikyo ga sha ci u iember i i ver Un sha ishi la, A za tema sha uwegh ku yanegh ku ikyônough ki Aôndo ki torough.” Yesu yange lu a “iember i i ver Un sha ishi la” ken ishima shighe u lu yan ican la.

¹⁹ Ka iember i nyi i ver Yesu sha ishi? Yange fa ér ishimataver na ia wase un u tseghan icighanti i Yehova. Sha nahan yô, una tese ér Satan ka or u aiegh. Ishimaverenkeghen igen i môm tsô ngi i̱ yange ma i na Yesu iember í a zua a mi la ga! Yange fa ér aluer un civir Yehova sha mimi yô una zua a injar i vesen. Lu u ica a gba ga tsô una hide a za kohol Ter na sha, vea lu imôngo saan saan. Yesu lu a ishimaverenkeghen ne ken ishima sha shighe u lu yan ican kpishi la. Ka kwagh u i doo u se kpa se  er je ne. Se kpa se mba a iember i i ver se sha ishi yô. Yehova na hanma wase ian i icivirigh i wasen u tseghan iti na. Nyityô imeen man ican i se tagher a mi cii, aluer se ta ikyaa a Yehova ser ngu Tor Uhembancii shi se za hemen u lun ken dooshima u Ter wase yô, se tese ser Satan ka or u aiegh.

20. Kanyi ia wase u u lu a mhen u vough shi u lu a ishimaverenkeghene?

²⁰ Yehova wa iyol u veren mba ve lu civir un sha mimi la doo doo tseegh tsô ga, kpa gba un ishima u eren nahan je gande. (Yesaia 30:18; Malaki 3:10) Doo un u kuren asaren a vough a mbacivir un la cii. (Pasalmi 37:4) Nahan za hemen u lun a ishimaverenkeghen i va nengen akaa a Aôndo a tende zwa u nan se la. Mayange je de lumun wer mbamhen mba bov, mba ve hôngor shi ve lu geseghee mba tar u Satan u ú sôôn karen ne, ve iv u ken ishima ga. Aluer u nenge wer, jijingi u tar ne ngu nyôron we ken ishima yô, sôn Yehova kpoghuloo a na u “bem u Aôndo u a gande hanma mfe wase cii” la. Nahan bem u Aôndo ne una kura mhen wou man ishima you kpaa.—Mbafilipi 4:6, 7.

21, 22. (a) Ka ishimaverenkeghen i doon i nyi “zegeikpelaior” i lu a mini? (b) Ka ishimaverenkeghen i Mbakristu i nyi i̱ hembe doon we ciili, man ú kange ishima wer u er nyi?

²¹ Nenge imba ishimaverenkeghen i̱ injaa i̱ í doo u u henen  sha mi ne sha wono! Wea lu môm ken “zegeikpelaior” i̱ ia va ‘due ken zegecan’ la yô, hen sha uma u ica a gba ga tsô u ember la. (Mpase 7:9, 14) A va timin Satan man azôv a na kera yô u zua a mpeveryol u ma wase môm nana fatyô u pasen er una ngee a kighir ga yô. Se ôr nahan sha ci u ma or môm ngu a vande ember uma u se lu ôron kwagh na ne a mbamzeyol mba tar u Satan ne shio ga. Mbamzeyol mban vea karen kera yô, a doo se kpishi u sôron tar ne hingir paradiso sha hemen u Yesu man iorov 144,000 mba vea tema tor a na imôngo sha la! Saan se iyol kpishi u va ember uma sha shighe u angev mbua kera lu ga, shighe u se kegh mba doon se ishima mba a nder ve gbenda la shi se ember uma er Aôndo yange soo ér se ember sha hiihii la! Er se lu hingir uumace mba vough kure kure yô, shighe una va u se zua a injar i vesen i i tende zwa a vese ken Mbaromanu 8:21 ér a za a vese ken “mlu u engem u lun a ikyangenev ga u ônov mba Aôndo” la.

²² Yehova soo ér u va zua a mlu u lun a ikyangenev ga u doon tsung. Kwagh u una na ve u va kera lu ken ikyangenev ga sha gbenda u kpilighyol ne yô, ka u ungwan imo i Yehova. Nahan ú nenge wer doo u ú nôngo kpoghuloo u ungwan imo i Yehova hanma iyange ga he? Sha nahan yô, nôngo sha afatyô wou cii za hemen u maan iyol you ken icighanjighjigh wou u nan la, shi lu ken dooshima u Aôndo gbem sha won!