1, 2. Nguuli mulimu wakuyaka nguliikuchita, alimwi nkamboonzi nzila njubelekaayo niyandikana loko?

ULIKUBELEKA changuzu mumulimu wakuyaka. Mulimu ooyu wakawutalika chiindi alimwi ulikwiinkilila kunembo. Mulimu ooyu temuuba pe pesi upa kuti ukkutisikane. Ziyume zitete ulilipedelede kubeleka mulimu ooyu nkaambo nzila njubelekaayo ijatikizya buumi bwako. Nkamboonzi nikuli boobo? Nkaambo nduwe ulikuyakwa!

² Sikwiiya Juda, wakatondeezya kuti tweelede kuliyaka swebo tubeni. Nakasungwaazya maKristu kuti ‘baliyobole muluyando lwaLeza,’ wakatondeezya mbobakonzya kuzichita naakati: “Amuliyake mulusyomo lwanu lusalala.” (Juda 20, 21) Nziizili zimwi nzila zikonzya kukugwasya kuti usimye lusyomo lwako akuti ukkale kuli muluyando lwaLeza? Atulange-lange zintu zitatu zikonzya kukugwasya kuti usimye lusyomo lwako mumulimu wako wakuliyaka.

3-5. (a) Saatani uyanda kukweena kuti uzibone biyeni zyeelelo zyaJehova? (b) Tweelede kuzibona biyeni zyeelelo zyaLeza, alimwi zyeelede kutupa kuti tulimvwe biyeni? Kozyanisya.

³ Chakusaanguna, tweelede kusimya lusyomo lwesu kumilawu yaLeza. Mubbuku eeli wakiiya atalaa zyeelelo zyiingi zyaJehova ziluleme zyakulijata. Uzibona biyeni zyeelelo eezi? Saatani uyanda kukweena kuti ubonaanga milawu, malayilile  azyeelelo zyaJehova zilaminia alimwi ziladyamizya. Kuzwa chiindi, Saatani walikubelesya kakole aaka nkaambo kakazwidilila mumuunda waEdeni. (Matalikilo 3:1-6) Ino uyoochegwa na akakole aaka? Nsandulo yamubuzyo ooyu yeeme munzila njubonaayo zintu.

⁴ Muchikozyano: Atuti uyoobweendeenda mubusena bweebeka, mpawo wabona feensi iiyakilide chimwi chibeela chabusena oobo alimwi kakutanjiliki. Chibeela eecho chiyakililidwe chiboneka kacheebeka loko. Nubona feensi eeyi kakusaanguna ulakonzya kuyeeya kuti ilikukukachizya kuti ubotelwe. Pesi chiindi nulangisisya mukati, wabona mulavu mupati uyoosya loko kalokuyubilila umwi munyama kuti amujaye! Lino wabona kuti feensi eeyi njalukwabililo. Kuli munyama uyoosya uyanda kukujaya na? Jwi lyaLeza lituchenjezya kuti: “Amulibatamike akucenjela, nkaambo sinkondonyoko Saatani uleendeenda mbuli syuumbwa [mulavu] wabutambo akuya buyandaula ngwati lume.”—1 Petro 5:8.

⁵ Saatani uli mbuli munyama ulaalunya. Akaambo kakuti Jehova tayandi kuti Saatani atujaye, wakatupa milawu myiingi yakutukwabilila kuzwa “mumeneeno” aaSaatani. (BaEfeso 6:11) Chiindi nituyeeyesesya atalaa milawu yaLeza, tweelede kwiibona mbuli chitondeezyo chaluyando ndwalaalo Ndeende wesu wakujulu kuli ndiswe. Ikuti twabona milawu yaLeza munzila iili boobu, ilakonzya kutukwabilila akupa kuti tubotelwe. Sikwiiya Jakobo wakalemba kuti: “Usondela mulao mulondosi wabulubusi, akukakatila kuli nguwo . . . ngonguwe uuti longezegwe kukucita kwakwe.”—Jakobo 1:25.

6. Njiili nzila mbotu iikonzya kukugwasya kuti usimye lusyomo lwako kumilawu yaLeza iiluleme akumalayilile aakwe? Kozyanisya.

⁶ Kupona kweendelana milawu yaLeza ninzila mbotu yakusimya lusyomo lwesu kuli Sikutupa Milawu akubona kuti kutobela milawu yakwe mbusongo. Muchikozyano “mulao waKristo” uswaanizya mulawu waJesu wakuyiisya bamwi ‘makani oonse ngaakatulayilila.’ (BaGalatiya 6:2; Matayo 28: 19, 20) MaKristu alawubikkila maanu mulawu wakuswaanana antoomwe kuti akombe Jehova akusungwaazyania. (BaHebrayo 10:24, 25) Milawu yaLeza iswaanizya kukomba kuli Jehova chiindi choonse kazizwaansi amoyo. (Matayo 6:5-8; 1 BaTesalonika 5:17) Notupona kweendelanaa milawu eeyo, tulalibonena ameso eesu kuti ilatukwabilila. Kuswiilila milawu eeyi kweeta kubotelwa akukkutisikana nkututakonzi kujana munyika eeyi izwide bubi. Kuyeeyesesya atalaa mbokwakakugwasya kupona kweendelana amalayilile aLeza takusimyi lusyomo lwako na?

7, 8. Ino Jwi lyaLeza libasungwaazya biyeni aabo babonaanga bayookachilwa kuchita zintu ziluleme mukuya kwachiindi?

⁷ Bamwi babonaanga kulakonzya kuyoobayumina kupona kweendelana amilawu yaJehova mukuya kwachiindi. Bayoowa kuti bayookachilwa. Ikuti kulimvwa mbuboobo, yeeya majwi aaya: ‘Ndime Jehova Leza wako. Ndime uukwiisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.’ (Isaya 48:17, 18) Kuli mpuwakali wakkalaansi akuyeeya mbokonzya kusungwazigwaa majwi aaya na?

 ⁸ Mulugwalo oolu, Jehova utondeezya kuti kuswiilila milawu yakwe kugwasya ndiswe. Utusyomezya kutupa zilongezyo zibili, ikuti twamuswiilila.Chakusaanguna, luumuno lwesu luyooba mbuli mulonga, chaamba kuti taluyoomani pe. Chabili, bululami bwesu buyooba mbuli mayuwe aamulwizi. Ikuti waya kulwizi, mpawo wabona mayuwe kalookuuminina kunkomwe yalwizi, taakwe mubuzyo kuti mayuwe aayo takooyooleka kuchita oobo. Ulizi kuti mayuwe aaya anoowuminina kunkomwe yalwizi munyaka amunyaka. Jehova waamba kuti bululami bwako, kwaamba kuchita zintu ziluleme buyooba mbuli mayuwe aayo. Ikuti wiinkilila kunembo kusyomeka kuli nguwe takoyookulekelezya pe! (Bala Intembauzyo 55:22.) Ino zisyomezyo zili boobo tazisimyi lusyomo lwako kuli Jehova amuzyeelelo zyakwe ziluleme na?

9, 10. (a) Nkamboonzi maKristu nchayelede kupeekezya kusima muzintu zyabukombi? (b) Kujana kusima muzintu zyabukombi kwatugwasya biyeni kuti tubotelwe?

⁹ Chintu chabili mumulimu wako wakuyaka chitondezedwe mumajwi aakasololelwaa muuya uusalala aakuti: “Atuye kumbele kumakani abupati [aakusima.]” (BaHebrayo 6:1) MuKristu umwi awumwi weelede kupeekezya kuba muntu uusimide muzintu zyabukombi. Kusima muzintu zyabukombi kulakonzeka kumaKristu, takuli mbuli kumaninina ooku kutakonzeki pe lino. Kuyungizya waawo, chiindi nibalikusima muzintu zyabukombi, maKristu alabotelwa mukukomba Jehova. Nkamboonzi maKristu aayo nchabotelwa?

¹⁰ MuKristu uusimide muzintu zyabukombi ubona zintu mbuli mbwazibona Jehova. (Johane 4:23) Paulo wakalemba kuti: “Nkaambo basinyama balayeeya makani aanyama, anukuti basimuuya balayeeya makani aamuuya.” (BaRoma 8:5) Kuyeeya zintu zyanyama kupa kuti muntu atabotelwi nkaambo ngawatalika kuliyanda, katachilangilili kuzintu zili kunembo alimwi ngawabikkila maanu kukuyandisya  buvubi. Muntu ubikkila maanu kuzintu zyabukombi ulabotelwa nkaambo ukkala kayeeya Jehova, ‘Leza ubotelwa.’ (1 Timoteo 1:11) Muntu uusimide kuzintu zyabukombi uyanda kubotezya Jehova alimwi ulabotelwa nikuba kali mumasunko. Nkamboonzi nabotelwa? Nkaambo masunko atupa mweenya wakutondeezya kuti Saatani mubeji akupa kuti tusimye lusyomo lwesu alimwi eezi zibotezya Ndeende wesu wakujulu.—Tusimpi 27:11; bala Jakobo 1:2, 3.

11, 12. (a) Paulo wakatyeni atalaa “amiyeeyo iyakaiisigwa” yamuKristu, alimwi bbala lyakuti “iyakaiisigwa” lyambaanzi? (b) Mubili weelede kuyiisigwa biyeni kuti ukomene akuti usime?

¹¹ Chibotu chizwa munkasaalo, nkinkaako kuti tusime muzintu zyabukombi tweelede kuzyaanga zisime mukuliyiisya. Yeeya atalaa lugwalo oolu: “Zilyo ziyumu nzyabantu bakakomena, nkokuti zyababo abali amiyeeyo iyakaiisigwa kusala cibotu ecibi.” (BaHebrayo 5:14) Chiindi Paulo nakaambuula atalaa miyeeyo “iyakaiisigwa,” wakabelesya bbala lyachiGiriki lyakali kubelesegwa muchisobano chakupindimuka chakali kuchitwa kuchisi chaGreece. Bbala eeli lilakonzya kwaamba kuti ‘iyiisidwe mbuli sikupindimuka.’ Lino yeeya kuti kuyiisigwa ooku kuswaanizyaanzi.

¹² Chiindi nituzyalwa mibili yesu ngatiyiisidwe pe. Muchikozyano, mwana uuchili muniini takonzyi kuziba kuti maboko amawulaakwe alaali. Chimwi chiindi mwana nga ulikutambika maboko alimwi chakutaziba ngawalikwamba kumeso akutalika kulila. Kwiinda mukubelesya zizo zyamubili mwana unooli ulikuyiisya mubili wakwe. Nayabukomena mwana nga wazootalika kuyavula, kweenda akutalika kuchijana. * Ikuti mwana kaliyiisya munzila iili boobu, kujana  twatyeni asikupindimuka? Chiindi numubona kalikupindimuka munzila iigambya, ulakonzya kuzumina kuti mubili wakwe uyiisidwe kabotu. Kupindimuka munzila iili boobu takulichitikili pe akulikke, pesi wakatola chiindi chilamfu kalokuliyiisya. Bbayibbele lyaamba kuti kuyiisya mubili “kulagwasya buniini.” Chilayandikana kaka kuti tuyiisye miyeeyo yesu muzintu zyabukombi!—1 Timoteo 4:8.

13. Kujana twayiyiisya biyeni miyeeyo yesu?

¹³ Mubbuku eeli, twakiiya zintu zyiingi zikonzya kukugwasya kuti uyiisye miyeeyo yako kuti ukkale kusyomekede kuli Leza akuti ube muntu uusimide muzintu zyabukombi. Chiindi nosala zyakuchita mubuumi bwako, weelede kukomba akuyeeyesesya atalaa malayilile amilawu iizwa kuli Leza. Mukusala kwako koonse weelede kulibuzya kuti: ‘Njiili milawu naa malayilile aazwa muBbayibbele abeleka munkani eeyi? Kujana ndaabelesya biyeni? Nkuukuli kusala kukonzya kubotezya Ndeende wakujulu?’ (Bala Tusimpi 3:5, 6; Jakobo 1:5.) Kufumbwa kusala nkuchita kubelesya milawu amalayilile aazwa muBbayibbele, unooli ulikuyiisya miyeeyo yako. Kuliyiisya munzila iili boobo, kuyookugwasya kuti ube muntu uusimide muzintu zyabukombi.

14. Tweelede kubaa nzala yanyamaanzi kuti tusime muzintu zyabukombi, pesi niinzi nzitweelede kuchenjelela?

¹⁴ Nikuba muntu kasimide muzintu zyabukombi tazyaambi kuti tacheelede kwiinkilila kunembo kulisimya. Tweelede kulya kuti tukomene. Nchicho chakapa kuti Paulo alembe kuti: “Zilyo ziyumu nzyabantu bakakomena.”  Kulya chakulya chakumuuya chiyumu kulayandikana kuti ukonzye kusimya lusyomo lwako. Kubelesya nzuyiiya mbusongo. Bbayibbele lyaamba kuti: “Busongo ncintu cipati.” Nkinkaako, tweelede kubaa nzala yakwiiya kasimpe kayandikana nkitupegwaa Ndeende wesu. (Tusimpi 4:5-7; 1 Petro 2:2) Nikuba boobo, kubaa luzibo abusongo buzwa kuli Leza takweelede kupa kuti tube bantu balidunda pe. Tweelede kulilingula chiindi choonse kuti tutazumizyi kulidunda naa kumwi kuleezya kuti kunjile mumyoyo yesu akuti kukomene. Paulo wakalemba kuti: “Amulisukusye nubeni na muliimvwi mulusyomo, amulilingule nubeni.”—2 BaKorinto 13:5.

15. Nkamboonzi luyando ncholuyandikana kuti muntu asime muzintu zyabukombi?

¹⁵ Mulimu wakuyaka ng’anda ulakonzya kumana pesi wakwiilangania uliinkilila kunembo. Kwiibambulula akwiibotya kulayandikana alimwi chimwi chiindi ilakonzya kukomezegwa kweendelanaa zyiimo. Niinzi nzitweelede kuchita kuti tusime alimwi twiinkilile kunembo katusimide muzintu zyabukombi? Chintu chipati nkubaa luyando. Tweelede kwiinkilila kunembo mukuyanda Jehova abakombima. Ikuti katutakwe luyando, luzibo azintu nzituchita zinooli nzyabuyo mbuli mulangu usabila. (1 BaKorinto 13:1-3) Ikuti katulaa luyando, tulakonzya kuba maKristu aasimide alimwi tuyooyiinkilila kunembo katusimide muzintu zyabukombi.

16. Njiili miyeeyo isungwazigwaa Saatani, alimwi niinzi nchitupedwaa Jehova chikonzya kutukwabilila?

¹⁶ Atulange-lange chimwi chintu nchoyelede kuchita mumulimu wakuliyaka. Ikuti uliyake mukuba sikutobela Kristu wachoonzyo, weelede kubikkila maanu kuzintu nzuyeeya. Saatani, mweendelezi wanyika eeyi, ngusilweeno mupati alimwi upa kuti bantu babaa miyeeyo iitali kabotu, yakubula bulangilizi ayakutasyomeka. (BaEfeso 2:2) Miyeeyo iili  boobo ilakonzya kunyongania muKristu mbuli munanze mbulya bwizu amasekete aang’anda. Chilabotezya kuti Jehova utupede chimwi chintu chikonzya kutukwabilila, chintu eechi mbulangilizi.

17. Jwi lyaLeza likutondeezya biyeni kuyandikana kwabulangilizi?

¹⁷ Bbayibbele lyaambuula atalaa zilwanyo zisiyene-siyene zyakumuuya nzituyanda kuti tukonzye kulwanaa Saatani anyika yakwe. Chimwi chilwanisyo chiyandikana ningowani, ‘lufutuko ndotulangilila.’ (1 BaTesalonika 5:8) Chiindi, silumamba taakali kukonzya kuzwidilila munkondo ikuti katakwe ngowani. Ngowani eeyi yakali kupangwaa nsimbi alimwi yakazyungulukidwaa chikumba kuti kanta naa mivwi itakonzyi kuchisa mutwe wakwe. Mbuli ngowani mboyakali kukwabilila mutwe wasilumamba, bulangilizi bulakonzya kukwabilila miyeeyo yako.

18, 19. Jesu wakatusiila chikozyano chili biyeni chakubaa bulangilizi, alimwi kujana twamutobelezya biyeni?

¹⁸ Jesu wakatusiila chikozyano chili kabotu chakubaa bulangilizi. Yeeya mapenzi ngakaswaananaawo mubusiku bwakumamanino bwabuumi bwakwe bwaanyika. Mweenzinyina wakamuuzya akaambo kakuyanda mali. Umwi mweenzinyina wakamukaka kuti wakali mwizi. Bamwi bakamuchija. Bantu bamuchisi chakwe bakamwaaba kuli basilumamba bakuRoma kuti bamupenzye akumujaya. Kuboneekaanga Jesu wakaswaananaa masunko mapati kwiinda ngituswaana. Niinzi chakamugwasya kuti azunde masunko aaya? Nsandulo izwa mulugwalo lwa BaHebrayo 12:2 lwaamba kuti: ‘Nkaambo kalukondo ndwakabikilwa kunembo, wakazyandamana achisamu chakupenzegwa wakaubaula buusu, eno sunu ulikede kululyo lwachuuno cha-Leza.’ Jesu taakaleka kulangilila “lukondo ndwakabikilwa kunembo.”

¹⁹ Nkuukuli kubotelwa nkwakabikkilidwe Jesu? Wakalizi kuti, ikuti walisimya kumasunko aaya, wakali kuyoojatikizigwa mukusalazya zina lyaJehova lisalala. Wakali kuyootondeezya chaantanganana kuti Saatani mubeji. Taakwe  bumwi bulangilizi bwiinda oobu bwakali kukonzya kubotezya Jesu! Wakalizi kuti Jehova wakali kuyoomulongezya akaambo kakusyomeka. Alubo wakalizi kuti wakali kuyoobaamwi aWisi kujulu. Jesu wakali kukkala kayeeya atalaa bulangilizi oobu, nikuba muziindi zikatazya loko. Andiswe tweelede kuchita oobu. Andiswe kuli kubotelwa nkutulangilila kunembo. Jehova utupede choolwe chakuti tugwasyilizye mukusalazya zina lyakwe pati. Tulakonzya kutondeezya kuti Saatani mubeji kwiinda mukusala Jehova kuba Mweendelezi wesu akukkala katuli muluyando lwaNdeende wesu nikuba katuswananaa masunko mapati biyeni.

20. Niinzi chikonzya kukugwasya kuti ubaa miyeeyo iili kabotu abulangilizi?

²⁰ Jehova tayandi kugwasya babelesi bakwe basyomeka luzutu pesi ulaachiyandisyo chakubagwasya. (Isaya 30:18; bala Malaki 3:10.) Ulaachiyandisyo chakupa babelesi bakwe zintu nzibayanda. (Intembauzyo 37:4) Nkinkaako, kkala kuyeeya atalaa kuzuzikizigwa kwazisyomezyo zyaLeza. Utazumizyi miyeeyo iitali kabotu yanyika nkulukulu yaSaatani kuti ikunyonganie. Ikuti wanjilwaa muuya wanyika, komba kazizwaansi aamoyo kuli Jehova kuti akupe “luumuno lwa-Leza lwiinda miyeeyo yoonse.” Oolo luumuno lwaLeza luyookwabilila moyo amiyeeyo yako.—BaFilipi 4:6, 7.

21, 22. (a) Mbuubuli bulangilizi mbubalabo ‘bankamu mpati?’ (b) Mbuubuli bulangilizi buyandikana loko kuli nduwe, alimwi niinzi nchukanzide kuchita?

 ²¹ Bulangilizi oobu bulabotezya kaka! Ikuti kuli ‘wankamu mpati’ iitaakazwe “kumapenzi ayo mapati,” yeeya atalaa buumi mbuyojana lino-lino. (Ciyubunuzyo 7:9, 14) Ikuti Saatani amadimoni aakwe bakunyonyoonwa, uyoojana lukwabililo ndutanabaa buzuba walujana mubuumi bwako. Ino ngwani uutananyonganisigwaa lweeno lwaSaatani? Lwaakumana lweeno oolu, tuyoobotelelwaa kuchincha nyika mukuba paradayizi yeebeka aansi abweendelezi bwaJesu abali 144 000 mbayooyendelezyaabo kujulu! Tuyoobotelwa kubona kumana kwamalwazi oonse, kutambula bantu mbituyanda kabazwa mutubanda akuzuzikizigwa kwabuumi bwakakanzidwaa Leza kuzwa chiindi. Mbuli mbotuya kuba bantu bamaninide, kuyoozuzikizigwa chimwi chilongezyo chaambidwe mulugwalo lwa BaRoma 8:21, ‘lwaangunuko lwabulemu bwabana baLeza.’

²² Jehova uyanda kuti ukajane lwaangunuko ndutayeeyeli pe. Kuti tujane lwaangunuko oolu, tweelede kuswiilila. Tatweelede kuswiilila Jehova chamoyo woonse na? Yezya amanguzu aako woonse kwiinkilila kunembo mukusimya lusyomo lwako lusalala lukonzya kukugwasya kuti ukkale kuli muluyando lwaLeza mane kukabe kutamani!