1, 2. Se a te galuega fakatutu telā e aofia koe i ei, kae kaia e tāua ei te ‵lei o tau galuega?

KO GALUE malosi eiloa koe i se galuega fakatutu. Ko oti ne fai te galuega tenā i se taimi leva kae ka tumau eiloa tena faiga i tausaga e uke mai mua nei. Ne faigata te faiga o te galuega kae ne fakalotomalie foki. Faitalia a mea e ‵tupu, ko oti ne fai tau fakaikuga ke mo a eiloa e tiaki io me fakavāivāi koe i te faiga o te mea tenā, me i te tulaga ‵lei o tau galuega e pokotia i ei tou olaga i aso mai mua. Kaia e fai ei penā? Me i te galuega fakatutu tenā ko koe eiloa!

² Ne faka‵mafa mai ne te soko ko Iuta te galuega fakatutu telā e fai ne tatou ki a tatou eiloa. I te taimi ne fakamalosi atu ei ki Kelisiano ke tumau latou “i te alofa o te Atua,” ne fakaasi atu foki ne ia i te fuaiupu eiloa tenā a te auala e mafai ei o fai penā: “Ke puti ake eiloa koutou i te otou fakatuanaki e sili i te tapu.” (Iuta 20, 21) Ne a nisi auala e mafai ei o ati aka ne koe a koe eiloa, i te faiga o tou fakatuanaki ke malosi atu ko te mea ke tumau koe i te alofa o te Atua? Ke mafau‵fau tatou ki vaega e tolu o te galuega fakatutu i te feitu faka-te-agaga kolā ka fesoasoani atu i te atiakaga o tou fakatuanaki ke sinā malosi atu.

3-5. (a) Se a te kilokiloga ‵se e uiga ki fakatonuga a Ieova e manako Satani ke maua ne koe? (e) Se a te kilokiloga e ‵tau o maua ne tatou e uiga ki fakatonuga a Ieova kae e pokotia pefea ‵tou lagonaga i ei? Fakamatala mai.

³ A te mea muamua, e ‵tau o fakamalosi aka te ‵tou fakatuanaki ki tulafono a te Atua. I au sukesukega ki te tusi tenei, ko oti ne mafaufau koe ki nisi fakatonuga amio‵tonu a Ieova e uiga ki amioga. Se a la tau faka‵tau e uiga ki ei? E fia fakaloiloi ne Satani a koe ke kilo atu ki tulafono, akoakoga fakavae, mo tulaga amio‵tonu o Ieova e pelā me e ola saisaitia koe i ei, ke oko ki te fakasaua atu. Ko leva ne fakaaoga ne ia te togafiti tenei talu mai te taimi ne magoi ei tena fakaaogaga i Etena. (Kenese 3:1-6) E mata, ka fakaloiloigina koe ne tena togafiti tenei? E faka‵na malosi eiloa te tali ki tau kilokiloga.

⁴ Ke onoono ki se fakatusa: E sasale koe i se malae lausiusi kae matea ne koe se ‵pui telā e ‵pui ne ia se vaega o te malae tenā. E foliga mai me e gali te kogā laukele i te suā feitu o te ‵pui. I te taimi muamua, kāti ka mafaufau koe me e saisaitia tou saolotoga i te ‵pui tenei. Kae i te taimi ne fatio atu ei koe ki loto, matea ei ne koe i te suā feitu se leona fekai kae fakamataku! Ko matea ei ne koe te aoga o te ‵pui—se puipuiga. Nei la, e mata, e isi se manu telā e fakamataku ki a koe eiloa? E polopoloki mai te Muna a te Atua: “Ke toka kae matapula‵pula foki koutou! Me i te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia.”—1 Petelu 5: 8.

⁵ A Satani se manu fekai. Ona ko te mea e se manako a Ieova ke kai tatou ne Satani, ne fakatoka ne Ia a tulafono ke puipui ei tatou mai “auala ma‵sei” e uke o te tino  masei. (Efeso 6:11) Tela la, i taimi katoa e mafaufau ‵loto ei tatou ki tulafono a te Atua, e matea eiloa ne tatou i ei a te alofa o te ‵tou Tamana i te lagi. Kafai e ‵kilo atu tatou ki ei i se auala penā, ka fai eiloa a tulafono a te Atua mo fai se puipuiga mo te pogai o te fiafia lasi. Ne tusi mai te soko ko Iakopo: “Ka ko te tino e tausi faka‵lei ki te tulafono e fakakatoatoa ne ia te ‵lei, telā ko te tulafono o te saolotoga, kae ola foki i ei a ia . . . ka fakamanuia ne te Atua i ana mea e fai.”—Iakopo 1:25.

6. Se a te ‵toe auala ‵lei ke fakamalosi aka ei te fakatuanaki ki tulafono mo akoakoga fakavae a te Atua? Taku mai se fakaakoakoga.

⁶ A te ola e ‵tusa mo fakatonuga a te Atua ko te ‵toe auala ‵lei ke fakamalosi aka ei te ‵tou fakatuanaki ki te Tino Fai Tulafono mo te aoga o ana tulafono. E pelā mo “te tulafono a Keliso” e aofia i ei te fakatonuga a Iesu ke akoako atu ki nisi tino a “mea katoa kolā ne fakatonu” mai ne ia. (Kalatia 6:2; Mataio 28:19, 20) E fakatāua malosi foki ne Kelisiano te fakatonuga ke tumau i te ‵kau fakatasi i tapuakiga kae fakatau fakamalosi te suā tino ki te suā tino. (Epelu 10:24, 25) E aofia foki i fakatonuga a te Atua te fakamalosiga ke ‵talo faeloa ki a Ieova mai tou ‵kano loto. (Mataio 6:5-8; 1 Tesalonia 5:17) Kafai e ola tatou mai lalo i fakatonuga penā, ka matea faka‵lei atu ei ne tatou te aoga o fakatakitakiga kolā e tuku mai i ei. A te fakalogo ki ei e aumai i ei te fiafia mo te lotomalie kolā e se mafai o maua ne koe i se isi koga i te lalolagi tenei o fakalavelave. I te taimi e mafaufau ‵loto ei koe ki te aoga o te ola e ‵tusa mo tulafono a te Atua, e mata, e se fakamalosi aka i ei tou talitonu ki ei?

7, 8. E fakatalitonu atu pefea te Muna a te Atua ki a latou kolā e manava‵se me kāti e se mafai o tumau latou i se auala amiotonu i tausaga e uke?

⁷ E manava‵se a tino i nisi taimi me ko tō faigata ke ‵piki ‵mau ki tulafono a Ieova i tausaga katoa. E ma‵taku  a nisi tino me e mafai o taka‵vale latou. Kafai e oko atu a lagonaga penā ki a koe, ke masaua faeloa a pati konei: “Au ko te Aliki te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei. Moi ne faka‵logo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o ‵masa pakupaku! E penei e maua ne koutou te manumalo pelā mo galu kolā e ‵fati ki luga i te tafatai.” (Isaia 48:17, 18) Kai mafaufau aka eiloa koe e uiga ki te fakamalosi loto o pati konā?

⁸ E fakamasaua mai a Ieova i konei me e maua ne tatou a mea aoga mai te faka‵logo ki a ia. E lua a fakamanuiaga e folafola mai ne ia māfai e faka‵logo tatou. A te mea muamua, a te ‵tou filemu ka fai pelā me se vaitafe—e manino, e ‵fonu faeloa, e tumau. A te lua o mea, a te ‵tou amiotonu ka fai pelā mo galu o te tai. Kafai e tu koe i se tafatai kae onoono atu ki galu e fati‵fati ki luga i ei, e seai se fakalotolotolua me ka iloa ne koe i te mea tenā se faifaiga tumau. E iloa ne koe me ka tumau te faifaiga tenā ke oko ki te se-gata-mai. E fai mai a Ieova me i tou amiotonu—ko tou fai mea tonu — ka mafai eiloa o fai penā. Kafai e taumafai faeloa koe o fakamaoni ki a ia, ka se tuku tiaki lele eiloa ne ia koe ke takavale! (Faitau te Salamo 55:22.) E a, e se fakamalosi aka ne folafolaga fakamafanafana penā a tou fakatuanaki ki a Ieova mo ana fakatonuga amio‵tonu?

9, 10. (a) Kaia e fai ei te matua ‵lei e pelā me se fakamoemoega tafasili i te ‵lei mō Kelisiano? (e) E fesoasoani mai pefea te kilokiloga faka-te-agaga ke maua ne tatou te fiafia?

⁹ A te lua o vaega o tau galuega fakatutu e fakaasi mai i pati fakaosofia konei: “Taumafai ke oko atu tatou ki  te matua ‵lei.” (Epelu 6:1, NW) A te matua ‵lei se fakamoemoega tafasili i te ‵lei mō se Kelisiano. E se pelā mo te tulaga ‵lei katoatoa telā e se mafai o maua nei ne tino, a te matua ‵lei se fakamoemoega telā e mafai o maua. E se gata i ei, e lasi atu te fia‵fia o Kelisiano kolā e ga‵solo aka o ma‵tua i te lotou taviniga ki a Ieova. Kaia e fai ei penā?

¹⁰ A te Kelisiano matua ‵lei se tino faka-te-agaga. E mafaufau a ia ki mea katoa mai te kilokiloga a Ieova e uiga ki ei. (Ioane 4:23) Ne tusi mai a Paulo: “Me ko tino kolā e ola faka te foitino, e mafau‵fau faka te foitino. Ko tino foki kolā e ola faka te Agaga, e mafau‵fau foki faka te Agaga.” (Loma 8: 5) E foliki fua te fiafia e maua mai te kilokiloga faka-te-foitino, me e saga atu te tino ki a ia eiloa, e toetoe tena kilo, kae e saga atu fua ki mea o te olaga nei. A ko te kilokiloga faka-te-agaga e fakafiafia, me e saga atu eiloa te tino ki a Ieova, “te Atua fiafia.” (1 Timoteo 1:11, NW) E manako te tino faka-te-agaga o fakafiafia atu ki a Ieova kae e fiafia foki mai lalo i tofotofoga. Kaia? E maua ne tatou avanoaga i tofotofoga ke fakatalitonu  atu ei i a Satani se tino loi kae fakamalosi aka i ei te alofa fakamaoni, i te fakafiafia atu ki te ‵tou Tamana i te lagi.—Faataoto 27:11; Iakopo 1:2, 3.

11, 12. (a) Ne a pati a Paulo ne fai mai e uiga ki te ‘malosi o te mafaufau’ o se Kelisiano, kae se a te uiga o te pati telā e ‵fuli ki te “akoako”? (e) Se a te akoakoga telā e ‵tau o fai ki te foitino ko te mea ke poto i te tafao?

¹¹ E ati aka te tulaga faka-te-agaga mo te matua ‵lei e auala i te faiga o akoakoga. Mafaufau ki te fuaiupu tenei: “A meakai ma‵keke e mō tino ma‵tua fua, kolā ko oti ne akoako ke iloa ne latou o tami ki te kese‵kesega o te ‵lei mo te masei.” (Epelu 5:14) I te faipatiga a Paulo e uiga ki te malosi o ‵tou mafaufau kolā e ‘akoakogina,’ ne fakaaoga ne ia se pati Eleni telā kāti ne fakaaoga sāle i fale fai tafaoga o tino Eleni i te senitenali muamua, me e fakauiga foki ki te ‘akoakoga o se tino apo i te tafao [gymnast].’ Nei la, ke mafaufau ki mea kolā e aofia i vaegā akoakoga penā.

¹² I te taimi e fa‵nau mai ei tatou, e seki akoakogina ‵tou foitino. E pelā me se fakaakoakoga, e faigata o iloa ne se pepe a koga e olo ki ei ana tamā vae mo ana tamā lima. Tela la, e kapata valevale fua ana lima, ke oko ki ana mata, kae e fanoanoa kae e ofo foki i ei a ia. Kae e gasolo malielie aka eiloa te akoakoga o tena foitino mai i te fakagasue‵suega o ana vaega kese‵kese katoa. E kamata o ‵tolo te pepe, ko sasale, kae oti aka loa, ko tele te tamaliki. * Kae e a la te tino apo i te tafao? Kafai e matea ne koe te gali mo te ‵tonu o te takapilipili o tou tagata tenā  i te ea, e seai se fakalotolotolua i tou mafaufau e uiga ki te leva o te taimi ne akoakogina ei te foitino o tou tagata tenei. Ne seki sōna maua te poto o te tino tafao tenei—ne manakogina te fia o itula i te faiga o akoakoga mo fakamasaniga. E fai mai te Tusi Tapu me i vaegā akoakoga penā o te foitino e ‘foliki fua tena aoga.’ Kae e tāua fakafia atu a akoakoga faka-te-agaga ke fakama‵losi aka ei ‵tou mafaufau!—1 Timoteo 4: 8.

13. E akoako pefea ne tatou a ‵tou mafaufau ke ma‵losi?

¹³ E uke a mea ko oti ne sau‵tala tatou ki ei i te tusi tenei kolā e fesoasoani mai ke akoako ei ‵tou mafaufau ke ma‵losi ko te mea ke mafai o tumau tatou i te fakamaoni ki a Ieova e pelā me ne tino faka-te-agaga. ‵Talo kae mafaufau ‵loto ki akoakoga fakavae mo tulafono a te Atua i te faiga o au fakaikuga i aso takitasi o te olaga. I au fakaikuga katoa e fai, fesili ifo ki a koe: ‘Ne a tulafono io me ko akoakoga fakavae e fetaui mo te mea tenei? E fakaaoga pefea ne au? Se a te auala ka fakafiafia atu ei ki toku Tamana i te lagi?’ (Faitau te Faataoto 3:5, 6; Iakopo 1:5.) A fakaikuga takitasi e fai ne koe i te auala tenā ka fakaopoopo atu eiloa ki te akoakoga o tou mafaufau ke malosi. Ka fesoasoani atu a akoakoga penā ke tumau koe e pelā me se tino faka-te-agaga tonu.

14. Se a te fia kai telā e ‵tau o maua ne tatou ko te mea ke ga‵solo tatou ki mua i te feitu faka-te-agaga, kae se a te mea e ‵tau o fakaeteete faeloa tatou i ei?

¹⁴ E tiga eiloa e mafai o oko atu ki te tulaga ko te matua ‵lei, e isi faeloa se avanoaga ke gasolo atu ki mua i te feitu faka-te-agaga. E fakalagolago te gasolo aka o lasi te foitino ki meakai. Tenā eiloa te pogai o pati a Paulo: “A meakai ma‵keke e mō tino ma‵tua fua.” E tasi te auala tāua ki te fakamalosiakaga o tou fakatuanaki ko te kai ki meakai ma‵keke faka-te-agaga. I te taimi e fakaaoga ‵tonu  ei ne koe au mea e tauloto, ko te atamai eiloa tenā, kae e fai mai te Tusi Tapu: “A te ‵toe mea tāua eiloa e ‵tau o fai ne koe ko te ‵salaga o te poto.” Tela la, e ‵tau o fakamalosi aka ne tatou se fiakai tonu ki muna‵tonu tāua kolā e tuku mai ne te ‵tou Tamana ki a tatou. (Faataoto 4:5-7; 1 Petelu 2: 2) Kae e seai se pogai ke fakamata‵mata ei tatou māfai ko maua ne tatou te poto mo te atamai faka-te-agaga. E ‵tau o iloilo ifo faeloa ki a tatou ke mo a eiloa e tupu aka te fakamatamata mo nisi vāivāiga i ‵tou loto. Ne tusi mai a Paulo: “Ke sukesuke ifo faka‵lei koutou ki a koutou eiloa, me mata e ‵mautakitaki koutou i te otou fakatuanaki.”—2 Kolinito 13: 5.

15. Kaia e tāua ei te alofa ki te gasolo ki mua i te feitu faka-te-agaga?

¹⁵ E mafai o palele te fakatuga o se fale, kae e se mafai o oti a galuega e fai ki ei. E tāua foki tena tausiga mo te faka‵fouga o mea ma‵sei, mo nisi mea e mafai o fakaopoopo ki ei. Ne a mea e manakogina ko te mea ke ga‵solo aka tatou o ma‵tua ‵lei kae fakatumau te ‵tou malosi faka-te-agaga? Ko te alofa e sili i mea katoa. E ‵tau o gasolo aka faeloa o lasi te ‵tou a‵lofa ki a Ieova mo ‵tou taina tali‵tonu. Kafai e seai se alofa i a tatou, ka seai eiloa se aoga o ‵tou poto mo ‵tou galuega katoa e fai—ka pelā fua me ne atigi kapa e fakalogoā mai. (1 Kolinito 13:1-3) Ko te alofa e maua ei ne tatou te matua ‵lei faka-Kelisiano kae tumau i te ga‵solo ki mua i te feitu faka-te-agaga.

16. Ne a vaegā mafaufauga e fakamalosi aka ne Satani, kae se a te puipuiga ko oti ne tuku mai ne Ieova?

¹⁶ Ke mafau‵fau tatou ki se isi vaega o tau galuega fakatutu. Ko te mea ke tupu aka koe e pelā me se soko tonu o Keliso, e ‵tau o puipui a mea kolā e mafaufau koe ki ei. A Satani, te pule o te lalolagi tenei, e poto ‵ki i te faiga o tino ke mafau‵fau ki mea sē aoga, i a latou e se aoga, ke seai se loto talitonu, kae ke seai foki se fakamoemoega. (Efeso 2: 2) E fakama‵taku a vaegā mafaufauga penā ki se Kelisiano e pelā eiloa mo te fakamataku o lakau kolā e kaina ne manu i se fale laupapa. Se mea fakafiafia me e tuku mai ne Ieova se mea faigaluega ke puipui ei tatou—te fakamoemoega.

17. E fakaasi mai pefea i te Muna a te Atua a te tāua o te fakamoemoega?

¹⁷ E fakaasi mai i te Tusi Tapu a vaega kese‵kese o te gatu tau faka-te-agaga kolā e manakogina i te ‵tou taua atu ki a Satani mo te lalolagi tenei. E tasi te vaega tāua o te gatu tau tenā ko te pulou tau, ko te “fakamoemoega mō te fakaolataga.” (1 Tesalonia 5: 8) Ne iloa ne te sotia i aso o te Tusi Tapu me e se mafai o sao a ia i te taua i se taimi leva e aunoa mo se pulou tau. E faite sāle te pulou ki fiti kae kofu i loto ki pakili manu kolā ko oti ne vanisi faka‵lei, kae e faka‵mole keatea i ei a matasana kolā e sana atu ki te ulu o te sotia ke se pakia i ei. E pelā mo te puipui o te ulu ne te pulou tau, e penā foki te puipui o tou mafaufau ne te fakamoemoega.

18, 19. Ne a fakaakoakoga ne tuku mai ne Iesu i te fakatumauga o te fakamoemoega, kae e fakaakoako atu pefea tatou ki a ia?

¹⁸ Ne tuku mai ne Iesu te ‵toe fakaakoakoga tāua i te fakatumauga o te fakamoemoega. Mafaufau ki te logo‵mae ne kufaki ne ia i te po fakaoti o tena olaga i te lalolagi.  Ne tiakina a ia ne sena taugasoa pili ona ko tupe. Ne fakafiti a ia ne se isi taugasoa. Ne tiaki kae ‵tele keatea ana nisi taugasoa katoa mai i a ia. Ne ‵teke atu a tino o tena fenua tonu ki a ia, kae paka‵laga atu ke tamate a ia ne sotia Loma. E mafai o fai atu me ailoga e fe‵paki tatou mo fakalavelave katoa kolā ne pokotia ei a Iesu. Se a te mea ne fesoasoani atu ki a ia? E tali mai te Epelu 12:2: “Ne kufaki ne ia te sataulo ona ko te fiafia telā e fakatalitali mai ki a ia, kae ne seki fia saga foki ki tona mate fakalumalumagina i luga i te sataulo, ka ko nofo nei i te koga tāua, ko te feitu fakaatamai o te nofogaaliki o te Atua.” Ne seki puli lele i a Iesu “te fiafia telā e fakatalitali mai ki a ia.”

¹⁹ Se a te fiafia telā ne fakatalitali mai ki a Iesu? Ia, ne iloa ne ia me e auala i tena kufaki, ka fai i ei sena tusaga i te fakamalugaga o te igoa tapu o Ieova. Ka tuku atu ne ia i ei te ‵toe fakamaoniga sili i a Satani se tino loi. E seai se isi fakamoemoega ne fiafia atu ki ei a Iesu i lō mea konā! Ne iloa foki ne ia me ka lasi ‵ki te taui e maua ne ia mō tena fakamaoni—me ko pili mai te taimi fakafiafia ke toe fakatasi ei lāua mo tena Tamana. Ne mafaufau faeloa a Iesu ki te fakamoemoega fakafiafia tenā i loto i toe taimi faiga‵ta. E ‵tau foki o fai tatou penā. E isi foki se fiafia telā e fakatalitali mai ki a tatou. E fakaaloalo a Ieova ki a tatou taki tokotasi mai te tukumaiga o te tauliaga ke fai ‵tou tusaga i te fakamalugaga o tena igoa sili. E fakatalitonu atu ne tatou i a Satani se tino loi mai te faiga o Ieova mo fai te ‵tou Pule kae tausi tatou ke ‵malu i te alofa o te ‵tou Tamana faitalia a tofotofoga mo fakaosoosoga e fe‵paki mo tatou.

20. Se a te mea ka fesoasoani atu ke fakatumau ne koe a mafaufauga mo se fakamoemoega aoga?

²⁰ E se talia fua ne Ieova ke tuku atu se taui ki ana  tavini fakamaoni—e manako malosi eiloa a ia ki ei. (Isaia 30:18; faitau te Malaki 3:10.) E lasi tena fiafia o tuku atu ki ana tavini a mea ‵tonu kolā e ma‵nako latou ki ei. (Salamo 37: 4) Tela la, tausi ke ‵mau i tou mafaufau kae saga tonu atu ki te fakamoemoega telā e fakatalitali mai ki a koe. Ke mo a eiloa e talia ne koe a mafaufauga sē aoga, ma‵sei, kae faka‵numi o te lalolagi a Satani. Kafai e lagona ne koe me ko kamata o ulu atu te agaga o te lalolagi tenei ki tou mafaufau mo tou loto, ‵talo malosi ki a Ieova mō “te filemu o te Atua, telā e sili atu i mea e iloa ne tatou.” Ko te filemu tenā mai te Atua ka puipui ne ia tou loto mo tou mafaufau ke malosi.—Filipi 4:6, 7.

21, 22. (a) Se a te fakamoemoega fakaofoofogia telā e fakatāua ne te “vaitino tokouke”? (e) Se a te vaega o te fakamoemoega faka-Kelisiano e fakatāua malosi ne koe, kae se a tau fakaikuga ko oti ne fai?

²¹ Ko oko eiloa i te fakafiafia o te fakamoemoega ke mafaufau ‵loto koe ki ei! Kafai koe se vaega o te “vaitino tokouke,” kolā ka “‵sao i te fakasauaga lasi,” mafaufau la ki te olaga fou telā ka maua ne koe. (Fakaasiga 7:9, 14) Ona ko te mea ko oti ne ave keatea a Satani mo ana temoni,  ka maua eiloa ne koe se fakatapuga telā e faigata o fakaataata ne koe nei. Ko oi la i a tatou ko oti ne ola i se olaga e aunoa mo fakamalosiga ma‵sei a Satani? Kafai ko ‵galo atu a fakamalosiga ma‵sei konā, ko maua ei ne tatou te fiafia lasi i te ‵fuliga o te lalolagi mo fai se palataiso mai lalo i te takitakiga a Iesu mo pule lagolago e toko 144,000 i te lagi! E pefea te lasi o te ‵tou fia‵fia ke matea atu te fakaseaiga o masaki katoa, ke fakafetaui atu ki ‵tou tino pele mai loto i tanuga, ke ola i te olaga telā ne manako te Atua ke ola tatou i ei i te kamataga! I te ‵tou ga‵solo atu ki te tulaga ‵lei katoatoa, ko te pili atu foki tenā o tatou ki te folafolaga telā e fakaasi mai i te Loma 8:21—ko “te ‵kau fakatasi i te saolotoga ‵malu o te fanau a te Atua.”

²² E manako a Ieova ke maua ne koe a mea e uke mai te saolotoga telā e seki mafaufau aka eiloa koe ki ei. A te auala ke maua ei te saolotoga tenā e faka‵na eiloa ki te fakalogo. E mata, ka se aoga au taumafaiga katoa e fai ke fakalogo koe ki a Ieova i aso takitasi? Tela la, ke na tumau i te fakamalosi aka o tou fakatuanaki telā e sili i te tapu, ko te mea ke tumau koe i te alofa o te Atua ke oko eiloa ki te se-gata-mai!