Owo Emi Ekpekpebede​—Joseph

Joseph osobo akwa mfịna. N̄wan eteufọk esie eyịre enye ndien ndien ete edidan̄ ye imọ. Ndien idahaemi n̄wan emi afiak edi! Edi Joseph inyịmeke. Ke nditịm ntịn̄, ibọrọ Joseph owụt ke tutu amama imọ idinamke orụk n̄kpọ oro. Joseph ọdọhọ enye ete: “N̄keme didie ndinam utọ akwa idiọkn̄kpọ emi nnyụn̄ ndue Abasi?” Ke ini n̄wan emi mîmaha ndision̄o idem n̄kpọn̄ enye​—idem akam omụmde enye​—Joseph iyakke bụt akpan enye ndifehe n̄wọrọ an̄wa! Joseph owụt ke imọ imekeme ndisọn̄ọ nda nnam se inende.​—Genesis 39:​7-​12.

Afo n̄ko emekeme ndisobo ukem idaha emi​—owo ekeme ndidọhọ fi edinam idan̄ ye imọ. Idịghe mfara ke idem kpọt edinam esịn. Akpa n̄kpọ akam edi afo ndinyene udọn̄ ndinam se inemde Andibot fo, kpa Jehovah Abasi, esịt. Joseph ama enyene udọn̄ idan̄ kpa nte afo nde. Edi enye ikedehedei iyom ndiyụhọ udọn̄ emi ke usụn̄ oro edinamde Andibot esie ayat esịt. Ukem ntre, oyom enen̄ede enịm ke Abasi esiyat esịt ye mbon oro ẹnamde oburobụt ido ye nte ke edinam emi esisan̄a ye afanikọn̄. Ntre kpep ndisọn̄ọ nda nnam se inende nyụn̄ ka iso nam emi ukem nte Joseph.