Ehémplo porã: José

José ombohovái kuri peteĩ situasión ijetuʼúva. Ipatrón rembireko káda día ombyapura chupe oñeno hag̃ua hendive, péro José nopenái hese. Upéi pe kuñakarai heʼi jey Josépe oñeno hag̃ua hendive, péro haʼe odesidi ndojapomoʼãiha upéva ha heʼi chupe: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?”. Péro pe kuñakarai oitira Josépe ijaógui. Upémarõ José ojetyvyro chugui ha osẽ odipara upégui. Péva ohechauka José oĩ hague desidído ndojapomoʼãiha peteĩ mbaʼe ivaíva (Génesis 39:7-12).

Ikatu avei ndéve oñepresenta peichagua situasión. Ha ndepuʼaka hag̃ua hese, ndahaʼéi rejejokokuaánte vaʼerã, reikotevẽ avei ótra kósa. ¿Mbaʼépa upéva? Tekotevẽ nde voi rejapose nde pyʼaite guive umi mbaʼe ombovyʼáva nde Apohare Jehovápe. José ñandeichaguánte vaʼekue avei, ha oiméne katuete oguereko vaʼekue umi deséo ñande jaguerekóva. Péro haʼe ni nopensái vaʼekue ikatuha ojapo ogustávante chupe oimérõ upéva omoñeñandu vaíta Ijapoharépe. Nde avei ikatu rejapo upéva, iñimportanteterei rentende porã umi ojapóva koʼã mbaʼe vai ombosufriha Ñandejárape, ha haʼekuéra voi ojeperhudikaha. Upévare, esegíkena siémpre José ehémplo nderekopotĩ hag̃ua.