Nasayaat nga Ulidan​—Ni Jose

Naipasango ni Jose iti narigat a situasion. Isu ket maulit-ulit a pinilit ti asawa ti amona a makidenna kenkuana. Ita, gargarienna manen! Ngem saan a nagpasulisog ni Jose. Kinapudnona, kastoy ti sititibker nga insungbatna: “Kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?” Idi gammatan ti asawa ti amona ta saan a maaklon daytoy ti panagkedkedna, dagus a nagtalaw ni Jose ket saanna nga imbain ti kasta nga inaramidna. Kinapudnona, nagtaray a rimmuar iti balay! Impakita ni Jose nga isu ket natarnaw iti moral.​—Genesis 39:7-12.

Mabalin a maipasangoka met iti kasasaad nga adda manggargari kenka a mangpennek iti seksual a tarigagaymo. Ti panagkedked ket saan a basta kinatibker ti pakinakem. Mangrugi dayta iti tarigagaymo a mangay-ayo iti Namarsua kenka a ni Jehova a Dios. Ni Jose ket addaan met iti seksual a tarigagay a kas kenka. Ngem dina mairusok a penken dagidiay a tarigagay iti di umiso a pamay-an ta dina kayat a pasakitan ti Namarsua kenkuana. Umasping iti dayta, nasken a kombinsidoka a kagura ti Dios ti moral a kinarugit nga agbanag iti panagsagaba inton agangay. Gapuna, ikagumaam a patanoren ken taginayonen ti moral a kinatarnaw nga imparangarang ni Jose.