Yatiqaskañ sarnaqäwinaka: Ezequías

Ezequiasax 25 maranïskasakiw Judá markan reyipjam uttʼayasiwayi ukat mä wakiskir amtäwir puriñatakiw jikxatasïna: kuna kast reyïnisa uk amtañapänwa. ¿Awkipan jan wali luräwinakapampit wiytayaspachäni? Awkipax Diosar kutkatasiri Acaz reyïnwa. Aka reyixa, juchanakapat janipuniw arrepentiskänti, jiwañapäkan ni uka urusa. Jehová Diosan utapwa ñanqhachäna ukat kʼari yupaychäwinak uttʼayäna, ukhamaraki wawanakaparusa sacrificion luqtasin nakhantayäna (2 Crónicas 28:1-4). Ukampisa, Ezequiasax janiw Acaz reyin kʼari chuymapamp Jehová Diosar luqtañatakix apayaskänti. Janirakiw kuntï awkipax lurkäna uk lurañapapunïkänti. Jan ukasti, jupax Jehová “Tatitumpipuniwa suma sarnaqäna” (2 Reyes 18:6).

¿Jumat kamsasispasa? ¿Awkimasa jan ukax taykamasa chiqa yupaychäwit jiskʼachapxtamti? ¿Qhuru arunakampit chuym ustʼayapxtma? ¿Kuna jan walirusa yatintatäpxiti? Ukhamäkchisa , janiw jumax uka jan wali luräwinakapxa lurañamäkiti. Kunjamtï familiapax sarnaqapxatayna ukaxa, Ezequiasarux janiw kunjamäñapäkanti uk mayjtʼaykänti. Wali suma reyipunïnwa, “Judá markankir taqi reyinakapatxa jupat nayra, jan ukax qhipatsa, janipuniw khitis jupjamax utjkänti” (2 Reyes 18:5). Ukhamasti jupat yatiqasiñamawa: Familiamasay jan wal jikxataskchixa, jumatï Jehová Diosampipun sum sarnaqäta ukhaxa, jakäwiman nayrar sartaskakïtawa.