Abo Wingapashanya—Paulo

Umutumwa Paulo alandile pa fyo aleumfwa. Mu bufumacumi atile: “Ilyo mfwaya ukucita icalungama, nsanga ndecita icabipa.” Paulo alefwaya ukulacita icalungama. Atile: “Mu mutima wandi mwena nalitemwisha amafunde ya kwa Lesa.” Nomba bwafya nshi akwete? Paulo atile: “Imona . . . ifunde limbi lilelwa ne funde lya matontonkanyo yandi no kulantwala bunkole kwi funde lya lubembu ilili mu filundwa fyandi.” Paulo aleba no bulanda nga afilwa ukucita icalungama. Alandile ukuti: “Yangu ne mulanda wine wine!”—Abena Roma 7:21-24.

Bushe nga walufyanya ukucita fimo ulaba no bulanda? Nga ca kuti ulomfwa ubulanda, ibukisha ukuti nangu fye ni Paulo na o e fyo limo aleumfwa. Nomba Paulo alishibe ukuti Kristu afwilile abantu ababa nga ena. E calengele Paulo ukulanda ukuti: “Ndetootela Lesa pantu akampususha muli Yesu Kristu Shikulwifwe!” (Abena Roma 7:25) Paulo alemona icilubula ukuti bwali bupe ubo bamupeele fye. Atile: ‘Umwana wa kwa Lesa, alintemenwe no kuipeela pa mulandu wa ine.’ (Abena Galatia 2:20) Ilyo waba no bulanda, tontonkanya pa cilubula. Kabili nga ca kuti ifyo ulufyanya ukucita fyalenga wafuupulwa, wilaba ukutila Kristu afwilile ababembu, te bantu abapwililika.