Owo Emi Ekpekpebede​—Paul

Apostle Paul ọdiọn̄ọ nte etiede enye ke idem. Enye etịn̄ akpanikọ ke ini ọdọhọde ete: “Ke ini nyomde ndinam se inende, se idiọkde odu ye ami.” Paul oyom ndinam se inende. Enye ewet ete: “Mmenen̄ede ndara ibet Abasi ke ọwọn̄esịt mi.” Nso idi mfịna ndien? Paul ọdọhọ ete: “N̄kụt ibet efen . . . nte an̄wanade ye ibet oro odude mi ke esịt onyụn̄ adade mi nte mbuotekọn̄ ọnọ ibet idiọkn̄kpọ emi odude ke ndido idem mi.” Mmeme emi inemke-nem Paul. Ntre, enye eseme ete: “Owo nditaha nte ami!”​—Rome 7:21-24.

Ndi mme mmeme fo ẹsinam fi ekere ke edi owo nditaha? Ke edide ntre, ti ke ama esitie Paul ntre ke idem ndusụk ini. Edi Paul ama ọfiọk n̄ko ke Christ akakpa ọnọ utọ owo nte imọ, ntak edi oro enye ọkọdọhọde ete: “Mmọkọm Abasi ke Jesus Christ Ọbọn̄ nnyịn!” (Rome 7:25) Paul akada uwa ufak Christ nte ẹnọ oro Abasi ọnọde imọ. Enye ekewet ete: ‘Eyen Abasi akamama mi onyụn̄ ayak idemesie ọnọ kaban̄a mi.’ (Galatia 2:20) Ke ini mmeme fo anamde idem emem fi, kere ban̄a uwa ufak Christ. Edieke idem ememde fi ke ntak mmeme fo, kûdedei ufre ke Christ akakpa ọnọ mme anamidiọk, idịghe mme mfọnmma owo.