Ehémplo porã: Pablo

Apóstol Pablo isinséro ha omombeʼu porã la oñandúva. Haʼe heʼi: “Ajapose jave iporãva, pe ivaíva chestira”. Haʼe ningo peteĩ persóna ipyʼaporãva, upévare heʼive: “Che pyʼaite guive aguerohory Ñandejára léi”. Péro, ¿mbaʼe provlémapa ombohovái? Haʼe heʼi: “Ahechakuaa che retépe oĩha ótra léi oñorairõva Ñandejára léi ndive oĩva che akãme. Upe léi haʼe hína pe pekádo oĩva che retépe ha cheguerekóva ipoguýpe”. Pablo ombyasyeterei umi mbaʼe ojapo vaíva, ha upévare heʼi: “¡Ivaietépa ko che situasión!” (Romanos 7:21-24).

¿Ndépa reñeñandu jepi avei haʼéicha nosẽporãiramo ndéve peteĩ mbaʼe? Pablo ombyasy umi mbaʼe ndojapoporãiva, péro siémpre imanduʼa Jesús omano hague ñandepeʼa hag̃ua pekádo poguýgui. Upévare heʼi vaʼekue: “¡Aagradese Ñandejárape, pórke haʼe chesalváta ñande Ruvicha Jesucristo rupive!” (Romanos 7:25). Pablo oñandu pe rreskáte haʼeha peteĩ rregálo Jehová opreparáva chupe g̃uarãite, upévare heʼi: “[Ñandejára raʼy] ningo cherayhu ha omeʼẽ kuri hekove cherehehápe” (Gálatas 2:20). Sapyʼánte reñeñandu vaíramo, ejepyʼamongetákena pe rreskátere. Ha reñedesanimárõ oĩ rupi heta mbaʼe nosẽporãiva ndéve, ani nderesarái Jesús omeʼẽ hague hekove umi pekadór rehehápe, ndahaʼéi umi haʼéva perfékto rehehápe.