Nasayaat nga Ulidan​—Ni Pablo

Realistiko ni apostol Pablo no maipapan iti rikriknana. Sipupudno nga inaminna: “No kayatko nga aramiden ti umiso, ti dakes ti adda kaniak.” Naimbag a tao ni Pablo. “Pudno a pagragsakak ti linteg ti Dios maitunos iti kinatao nga adda iti unegko,” insuratna. Ania ngarud ti problemana? Kuna ni Pablo: “Makitak . . . ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.” Saan a nagragsakan ni Pablo dagiti biddutna. “Nakaay-ay-ayak a tao!” kinunana.​—Roma 7:21-24.

Panagriknam kadi ket nakaay-ay-ayka gapu kadagiti biddutmo? No wen ti sungbatmo, laglagipem nga adda tiempo nga uray ni Pablo ket nakarikna met iti kasta. Ngem ammo ni Pablo a natay ni Jesus agpaay kadagiti tattao a kas kenkuana, isu a kinunana: “Pagyamanan iti Dios baeten ken Jesu-Kristo nga Apotayo!” (Roma 7:25) Imbilang ni Pablo ti subbot kas regalo nga agpaay kenkuana a mismo. Insuratna: ‘Ti Anak ti Dios inayatnak ken inyawatna ti bagina maipaay kaniak.’ (Galacia 2:20) No ay-ay-ayem ti bagim, utobem ti maipapan iti subbot. Ken no maup-upayka gapu kadagiti pagkurkurangam, dimo liplipatan a natay ni Jesus para kadagiti managbasol, saan ket a para kadagiti perpekto a tattao.