Mohlala—Paulo

Moapostola Paulo o be a tseba maikwelo a gagwe gabotse. O ile a dumela ka go tšwa pelong gore: “Ge ke kganyoga go dira se se lokilego, se sebe se gona go nna.” Paulo o be a nyaka go dira dilo tše di lokilego. O ngwadile gore: “Ruri ke kgahlwa ke molao wa Modimo go ya ka motho yo ke lego yena ka gare.” Bjale bothata bja gagwe e be e le eng? Paulo o itše: “Ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe wo o lego dithong tša ka.” Paulo o be a sa thabišwe ke diphošo tša gagwe. O llile ka gore: “Ruri ke motho yo a hlomolago pelo!”—Baroma 7:21-24.

Na diphošo tša gago di go dira gore o ikwe o hlomola pelo? Ge e ba go le bjalo, gopola gore Paulo le yena o ile a ikwa ka tsela yeo ka dinako tše dingwe. Eupša Paulo o be a tseba gape gore Kriste o hwetše batho ba go swana le yena, moo a bego a ka re: “A go lebogwe Modimo ka Jesu Kriste Morena wa rena!” (Baroma 7:25) Paulo o be a lebelela topollo e le mpho yeo e neilwego yena ka go lebanya. O ngwadile gore: ‘Morwa wa Modimo o nthatile gomme a ikgafela nna.’ (Bagalatia 2:20) Ge o ikwa o nyamile, naganišiša ka topollo. Le gona ge e ba diphošo tša gago di go nola moko, o se ke wa lebala gore Kriste o hwetše badiradibe, e sego batho ba ba phethagetšego.