1, 2. Kai nge si terjadi sanga Paulus ras Barnabas i Listera?

 GUNTAR me Listera. Lit sekalak dilaki si cacat lahirna nari. Lompat-lompat ia perban riahna ukurna kenca ipepalem dua dilaki si la itandaina. Mamang kel ate jelma si enterem janah akap kalak e duana dilaki e dewa. Emaka lit sekalak imam arah Zeus si maba mahkota man duana dilaki e. Baba imam-imam e ka lembu-lembu janah sikapkenna guna igeleh. Usahaken Paulus ras Barnabas mpengadi kalak e. Rigatken Paulus ras Barnabas pakenna janah lompat kalak e ku tengah-tengah jelma si enterem e. Menam la terlarang kalak e jelma si enterem e nembah kalak e.

² Kenca si e, seh me kalak Jahudi arah Antiokia Pisidi ras Ikoni. Kalak e penentang. Pitnah kalak e Paulus ras Barnabas, janah mulai me segat ate kalak Listera man duana dilaki e. Tangtangna isembah jelma si enterem e atena Paulus, tapi gundari kepungna janah benterina Paulus alu batu ngasa pingsan. Kenca cidahken kalak e rawana man Paulus, sarenna Paulus si enggo terdarehen ras meratahen dagingna ku darat gerbang kota perban akap kalak e ia enggo mate.

3. Penungkunen kai saja si nandangi sibahas bas pasal enda?

³ Kai si terjadi sope kejadin e? Kai si banci ipelajari perberita si gundari arah kai si terjadi man Barnabas, Paulus, bage pe penduduk Listera e? Uga pertua Kristen banci ngusih Barnabas ras Paulus si setia bas pelayanen, janah ‘la kalak e mbiar ngerana perban bereken Jahwe kuasa?​—Perb. 14:3.

4, 5. Engkai maka Paulus ras Barnabas lawes ku Ikoni, janah kai si terjadi i je?

⁴ Piga-piga wari sope si e, Paulus ras Barnabas terpaksa lawes arah Antiokia Pisidi eme kota si lit i Roma. I je, lit kalak Jahudi si nentang  kalak e janah pelawesna kalak e arah kota e nari. Tapi labo kitik ukur kalak e. “Agui Paulus ras Barnabas abu si lit bas nahena” perban penduduk kota e la nggit ngaloken berita kalak e. (Perb. 13:50-52; Mat. 10:14) Paulus ras Barnabas lawes alu dame, janah pediatna kalak si nentang e ngaloken akibatna arah Dibata. (Perb. 18:5, 6; 20:26) Duana utusen injil e tetap meriah ukurna, janah teruskenna perdalanenna guna erberita. Erdalan me kalak e kira-kira 150 kilometer ku arah tenggara. Kenca si e, seh me kalak e i dataren tinggi si subur si lit antara pegunungen Taurus ras pegunungen Sultan.

⁵ Tangtangna, singgah Paulus ras Barnabas bas Ikoni. a Kota e mpertahanken budaya Junani, janah kota e eme salah sada kota si pentingna bas propinsi Galati. Bas kota e pe enterem kalak Jahudi si terpandang, janah enterem ka kalak si ngikutken agama Jahudi. Bagi biasana, masuk me Paulus ras Barnabas ku ingan pulung kalak Jahudi janah mulai erberita i je. (Perb. 13:5, 14) “Perban beluh kalak e ngajar, enterem kalak Jahudi ras kalak Junani jadi kalak si erkiniteken.”​—Perb. 14:1.

6. Kai si erban mejile hasil pengajaren Paulus ras Barnabas, janah uga kita banci ngusih kalak e?

⁶ Engkai maka mejile kel hasilna arah cara Paulus ras Barnabas ngerana? Mbue kel pemeteh Paulus kerna Pustaka si Badia. Beluh kel ia nggunaken sejarah, nubuat, bage pe Undang-Undang Musa guna mbuktiken maka Jesus eme Mesias si ijanjiken. (Perb. 13:15-31; 26:22, 23) Adi Barnabas, ermediate kel ia man kalak. (Perb. 4:36, 37; 9:27; 11:23, 24) Duana dilaki enda labo ngandalken pengangkanna sendiri, tapi ngerana kalak e “perban bereken Jahwe kuasa” man kalak e. Uga carandu ngusih duana utusen injil e bas pendahin erberita? Lakokenlah enda: Pelajarilah Kata Dibata alu tutus. Daramilah ayat-ayat si mbelin kemungkinenna meriah akap kalak megikenca. Darami ka cara-cara guna mpegegehi kalak si megiken kam. Lalaplah ban Kata Jahwe si jadi dasar ajarenndu, ula kepentarenndu sendiri.

7. (a) Uga nge tanggapen kalak megi berita si meriah? (b) Adi keluargandu terbagi perban berita si meriah, kai nge si perlu ingetndu?

⁷ Tapi, labo kerina kalak bas Ikoni meriah ukurna megiken Paulus ras Barnabas. Nina Lukas, “Kalak Jahudi si la tek, pengaruhina kalak arah bangsa si deban ngelawan Paulus ras Barnabas.” Isadari Paulus ras Barnabas maka perlu kalak e tading i je guna mbela berita si meriah. Emaka “gunaken kalak e melala waktu i je . . . La kalak e mbiar ngerana.” Hasilna, “penduduk kota e jadi terbagi. Lit si mihak kalak Jahudi, lit ka si mihak rasul-rasul.” (Perb. 14:2-4) Gundari pe, la seri tanggapen kalak kerna berita si meriah. Lit si nggit ngaloken, janah dungna gejapkenna persadan. Tapi lit ka si nentang, emaka gejapkenna perpecahen. (Mat. 10:34-36) Adi keluargandu lanai ersada perban kam ngelayani Jahwe, ingetlah maka biasana lit si  nentang kita perban salah informasi si begina kerna Saksi Jahwe. Tapi, perbahanenndu si mehuli banci mbuktiken maka kai si begina e labo tuhu. Dungna, kalak si nentang kam ndai banci erkusur ukurna.​—1 Pet. 2:12; 3:1, 2.

8. Engkai maka Paulus ras Barnabas lawes nadingken Ikoni, janah kai si banci siusih arah kalak e?

⁸ Kenca piga-piga waktu, penentang-penentang si lit bas Ikoni erban rencana guna mbenteri Paulus ras Barnabas. Kenca iteh Paulus ras Barnabas kerna si e, putusken kalak e pindah je nari janah erberita ku daerah si deban. (Perb. 14:5-7) Perberita Kerajan si gundari pe perlu bijaksana bagi kalak e. Sanga kataken kalak si la mehuli kerna kita ntah pe kerna beritata, pang kita mbela kinitekenta. (Pil. 1:7; 1 Pet. 3:13-15) Tapi, adi mulai kasar perbahanenna, ula kita nekat, perban e banci ngancam kegeluhenta bage pe kegeluhen turang seninata.​—Kua. 22:3.

9, 10. I ja nge Listera e, janah uga nge pendudukna?

⁹ Paulus ras Barnabas lawes ku Listera. Listera e daerah si ikuasai Roma, kira-kira 30 kilometer i sebelah barat daya Ikoni. Melala si seri antara Listera ras Antiokia Pisidi. Tapi bas Listera, la enterem kalak Jahudi. Amin pe penduduk Listera mbelin kemungkinenna banci bahasa Junani, bahasa ibu kalak e eme bahasa Likaoni. Banci saja la lit ingan pulung kalak Jahudi bas kota e, emaka Paulus ras Barnabas mulai erberita bas ingan jelma si enterem. Sanga Petrus i Jerusalem, pernah pepalemna kalak si cacat lahirna nari. I Listera, Paulus pe mpepalem sekalak dilaki si cacat mulai lahirna nari. (Perb. 14:8-10) Mukjizat si iban Petrus erban enterem kel kalak jadi kalak si erkiniteken.  (Perb. 3:1-10) Tapi beda kel tanggapen kalak man mukjizat si iban Paulus.

¹⁰ Kalak Listera tek man dewa-dewa. Emaka sanga dilaki si cacat e banci lompat ras erdalan, akap kalak e Paulus ras Barnabas dewa-dewa. Kataken kalak e maka Barnabas eme Zeus, kepala dewa-dewa. Katakenna ka Paulus eme Hermes, anak Zeus, si jadi juru bicara dewa-dewa. (Nen kotak “ Listera bage pe Ibadah man Zeus ras Hermes.”) Tapi, Barnabas ras Paulus tetap erusaha gelah benar min pengangkan jelma si enterem e. Ate kalak e, iteh jelma si enterem e min maka kalak e labo dewa-dewa, janah Jahwe Dibata si benar me si mereken kuasa man kalak e guna ngerana ras erban mukjizat.​—Perb. 14:11-14.

11-13. (a) Kai nge si kataken Paulus ras Barnabas man penduduk Listera? (b) Kai nge pelajaren pertama si banci siusih arah kata-kata Paulus ras Barnabas?

¹¹ Gia guntar sangana situasina, tetap usahaken Paulus ras Barnabas erberita man kalak e. Arah kejadin si icatat Lukas enda banci siteh uga cara erberita si mejile man kalak si labo Kristen. Perdiatekenlah kai si kataken Paulus ras Barnabas, “Engkai maka bage ban kena? Kami pe manusia nge, lit kang kelemahen kami bagi kena. Kami sangana mberitaken berita si meriah man kena, gelah tadingken kena kerina si sia-sia enda, jenari sembah kena Dibata si nggeluh si erban langit, doni, laut, ras kerina isina. Bas jaman si nai, pediat Dibata kerina bangsa rate-ate. Tapi tetap cidahkenNa diriNa arah perbahanenNa si mehuli. BereNa kena udan, musim rani, puaskenNa kena alu pangan, janah meriah banNa ukur kena.”​—Perb. 14:15-17.

¹² Kai nge si banci sipelajari arah kata-kata Paulus ras Barnabas e? Si pertama,  Paulus ras Barnabas labo anggapna hebaten ia asangken kalak si megiken ia. Tapi akuina maka lit nge kelemahenna bali bagi kalak si deban. Memang, Paulus ras Barnabas enggo ngaloken kesah si badia janah enggo bebas arah ajaren palsu. Enggo ka dat kalak e arapen guna merentah ras Kristus. Tapi, sadari kalak e maka penduduk Listera pe banci ka ngaloken pemere si seri adi patuh kalak e man Kristus.

¹³ Uga nge perasanta nandangi kalak si jumpa ras kita sanga erberita? Sianggap nge kalak e seri ras kita? Sanga sisampati kalak si deban erlajar kebenaren arah Kata Dibata, siusih nge Paulus ras Barnabas alu la ndarami pujin man diri sendiri? Charles Taze Russell jadi usihen si mehuli i bas si enda. Ia sekalak guru si hebat si minpin pendahin erberita kira-kira tahun 1870 seh ku 1916. Itulisna bagenda: “La ate kami gelah kami ntah tulisen kami ipuji ntah pe ndatken penghormaten. Labo ka ate kami igelari Bapak Pendeta ntah pe Rabbi.” Sipat si meteruk ukur arah Turang Seninata Russell enda bali bagi Paulus ras Barnabas. Tujunta erberita labo gelah kita imuliaken, tapi nampati kalak nembah “Dibata si nggeluh.”

14-16. Kai nge pelajaren si peduaken ras si peteluken si banci sidat arah kata-kata Paulus ras Barnabas man penduduk Listera?

¹⁴ Perdiateken pelajaren si peduaken si banci sidat arah kata-kata Paulus ras Barnabas. Paulus ras Barnabas nggit nyesuaiken diri. Penduduk Listera la bagi kalak Jahudi bage pe kalak si ngikutken agama Jahudi bas Ikoni. Penduduk Listera e la lit pemetehna kerna Kitap-Kitap si Badia, bage pe kerna uga hubungen Dibata ras bangsa Israel. Bicara lit pe pemetehna, sitik ngenca. Penduduk Listera e perjuma-juma, subur tanehna, janah rusur ka udan i je. Banci mbue idah kalak e bukti kerna sipat-sipat Pencipta arah hasil jumana. Igunaken Paulus ras Barnabas me kerina informasi e guna erberita man kalak e.​—Rom. 1:19, 20.

¹⁵ Nggit nge kita nyesuaiken diri? Amin pe seri benih si nandangi isuanken sekalak perjuma-juma, adi beda jenis tanehna, beda ka cara nikapken taneh e. Lit taneh si enggo megembur janah enggo banci mis isuani. Lit ka taneh si perlu isikapken lebe gelah banci isuani. Bage ka pe, benih si nandangi sisuan lalap nge seri eme berita Kerajan arah Kata Dibata. Tapi siusihlah Paulus ras Barnabas, siusahaken ngangkai situasi ras latar belakang agama kalak si jumpa ras kita sanga erberita. Kenca enggo siangkai, nggit kita nyesuaiken carata mpeseh berita Kerajan.​—Luk. 8:11, 15.

¹⁶ Lit pelajaren si peteluken si banci sidat arah kejadin i Listera. Amin pe enggo siusahaken si mehulina, benih si enggo sisuan e banci saja itangko ntah pe ndabuh ku taneh si erbatu-batu. (Mat. 13:18-21) Adi bage si terjadi, ula kita nyerah. Bas pudi wari, ikataken Paulus man murid-murid i Roma maka “masing-masing pagi kita [termasuk tiap kalak si mbahas Kata Dibata ras kita] ertanggung jawap man Dibata.”​—Rom. 14:12.

17. Kenca lawes Paulus ras Barnabas nadingken Derbe, ku ja ka nge kalak lawes, janah engkai?

¹⁷ Kenca Paulus isaren ku darat Listera janah akap kalak ia enggo mate, reh murid-murid nampati ia ras mereken ingan erberngi bas kota e. Paginna, berkat ka Paulus ras Barnabas ku Derbe, kira-kira 100 kilometer dauhna. Pasti banci sibayangken uga serana kap Paulus bas dalan perban piga-piga jam sope si e ibenteri kalak ia. Tapi Paulus ras Barnabas tetap megenggeng. Kenca seh i Derbe, sampati kalak e “enterem kalak jadi murid.” Amin pe ingan e enggo ndeher ku pos kalak e eme Antiokia Siria, labo kalak e ku je. “Mulih kalak e ku Listera, Ikoni, ras ku Antiokia [Pisidi].” Erkai? “Pegegehi kalak e murid-murid gelah tetap erkiniteken.” (Perb. 14:20-22) Seh kel jilena usihen arah duana dilaki enda! Utamakenna kepentingen runggun labo kepentingenna sendiri. Gundari pe, pertua keliling ras utusen injil ngelakoken si bage.

18. Kai saja nge si ilakoken i bas ngelantik pertua-pertua?

¹⁸ Selain mpegegehi murid-murid arah ranan ras perbahanenna, Paulus ras Barnabas ngelantik “piga-piga pertua bas tiap runggun.” Memang, Paulus ras Barnabas ngelakoken perdalanen utusen injil perban ‘iutus kesah si badia,’ tapi tetap kalak e ertoto ras erpuasa sanga “pediat kalak e Jahwe . . . si mperdiateken pertua-pertua e.” (Perb. 14:23; 13:1-4) Gundari pe bage ka nge si ilakoken. Sope sekalak dilaki iusulken gelah ilantik jadi pertua, badan pertua setempat ertoto janah mperdiateken enggo nge dilaki e memenuhi syarat Pustaka. (1 Tim. 3:1-10, 12, 13; Tit. 1:5-9; Jak. 3:17, 18; 1 Pet. 5:2, 3) Si pentingna eme uga rananna, perbahanenna, janah uga ia itandai kalak, perban e me si mbuktiken uga belinna pengaruh kesah si badia bas geluhna. Labo penting kel uga dekahna ia jadi kalak Kristen. Si nentuken enggo banci ia jadi permakan bas runggun eme adi enggo penuhina syarat-syarat jadi pengawas bagi si ikataken bas Pustaka. (Gal. 5:22, 23) Pertua keliling me si ertanggung jawap ngelantik kalak si iusulken e.​—Bandingken 1 Timotius 5:22.

19. Kai si arus ipertanggung jawapken pertua-pertua, janah uga kalak e ngusih Paulus ras Barnabas?

¹⁹ Pertua-pertua si terlantik pe tehna maka arus pertanggung jawapkenna man Dibata carana njaga runggun. (Heb. 13:17) Bagi Paulus ras Barnabas, pertua-pertua pe arah lebe bas dahin erberita. Pegegehi kalak e turang senina arah kata-katana. Janah pelebe kalak e kepentingen runggun, labo kenyamanenna.​—Pil. 2:3, 4.

20. Kai gunana adi sibaca laporen kerna kesetian turang seninata?

²⁰ Sanga Paulus ras Barnabas dungna mulih ku Antiokia Siria, ceritaken kalak e “mbue kel si enggo lakoken Dibata arah kalak e. Ceritaken kalak e ka kerna uga Dibata mbuka dalan gelah bangsa si deban erkiniteken.” (Perb. 14:27) Adi sibaca kerna kesetian turang seninata janah siidah uga Jahwe masu-masu kalak e, teriahken me kita guna ‘la mbiar ngerana perban bereken Jahwe kuasa.’