CHAPTA 12
“Jehoava Gi Dehn di Powa fi Preech Wid Korij”
Paal ahn Baarnabas mi shoa dat dehn hombl, dehn ga korij, ahn dehn neva giv op eena di minischri
Dis chapta bays pahn Aks 14:1-28
1, 2. Weh aal mi hapm wail Paal ahn Baarnabas mi deh da Lischra?
DI PEEPL da Lischra mi-di selibrayt ahn dehn mi soh eksaitid kaaz a aala di tingz weh dehn mi si. Paal ahn Baarnabas mi jos heel wahn man weh mi kripl fan ih baan. Di man mi soh hapi dat ih mi-di jomp rong. Az di peepl mi si weh mi-di hapm, dehn stay wid dehn mowt waid oapm ahn tink dehn da gaadz. Soh di prees weh serv di faals gaad Zoos bring sohn bul fi sakrifais eena dehn aana. Wid aala di naiz ahn komoashan, Paal ahn Baarnabas mi chrai stap di peepl fahn du weh dehn mi-di du. Soh dehn tayr dehn kloaz ahn bayg dehn fi noh wership dehn, til dehn fainali kanvins dehn.
2 Noh lang afta dat, sohn Jooz weh mi deh gens Paal ahn Baarnabas mi kohn fahn Aikoanyom ahn fahn Antiyak eena Pisidya. Dehn staat tu paizn di main a di peepl ahn tel dehn loan lai bowt Paal ahn Baarnabas. Di peepl bileev dehn an en op di dehn hayt dehn. Jos wach how tingz chaynj! Di saym peepl weh mi waahn wership Paal ahn Baarnabas erliya, stoan op Paal til ih aalmoas ded. Afta dehn don let owt dehn anga, dehn jreg Paal owtsaida di siti gayt. Ih badi mi brooz op an ih mi ga blod aal oava, soh dehn lef ahn deh sins dehn mi tink ih ded.
3. Weh kweschanz wi wahn diskos eena dis chapta?
3 Weh mi hapm bifoa dis terabl ivent? Weh preechaz a di gud nyooz tudeh ku laan fahn weh mi hapm wid Paal ahn Baarnabas ahn di peepl da Lischra? “Jehoava gi [Paal ahn Baarnabas] di powa fi preech wid korij” ahn dehn neva giv op eena dehn minischri. (Aks 14:3) How Kristyan eldaz ku kapidehn egzampl? Mek wi si.
“Wahn Lata di Jooish ahn Greek Peepl Mi Staat tu Bileev” (Aks 14:1-7)
4, 5. Wai Paal ahn Baarnabas gaahn da Aikoanyom, ahn weh mi hapm deh?
4 Sohn dayz erliya, Paal ahn Baarnabas mi deh da Antiyak eena Pisidya. Rait deh, sohn Jooz weh mi deh gens dehn chroa dehn owta di siti. Di peepl neva waahn lisn tu Paal ahn Baarnabas, bot dat neva mek dehn feel diskorij. Insted, “dehn shayk aaf di dos fahn dehn fut” fi shoa dat dehn neva rispansabl fi weh Gaad mi wahn du tu dehn peepl. (Aks 13:50-52; Mach. 10:14; Aks 18:5, 6; 20:26) Dehn mi kantinyu di preech sohnweh els ahn dehn mi hapi. Dehn waak bowt 100 mailz sowtees til dehn reech di siti a Aikoanyom, weh mi deh bitween di Taurus ahn Sultan mongtin dehn.
5 Aikoanyom da di fers plays Paal ahn Baarnabas gaahn tu. Di peepl deh mi fala di Greek kolcha, ahn da mi wan a di moas impoatant siti da Galaysha. a Wahn lata Jooish peepl ahn peepl weh mi jain di Jooish rilijan mi liv da Aikoanyom. Ahn, jos laik weh dehn mi aalwayz du, Paal ahn Baarnabas gaahn preech da di sinagag. (Aks 13:5, 14) Dehn mi “taak wid soh moch wizdom dat wahn lata di Jooish ahn Greek peepl mi staat tu bileev.”—Aks 14:1.
6. Wai Paal ahn Baarnabas da-mi gud teechaz, ahn how wi ku kapi dehn egzampl?
6 Paal ahn Baarnabas da-mi gud teechaz. Paal mi noa di Skripchaz gud-wan; hihn kuda mi kanek Baibl hischri, prafesi, ahn di Laa weh Gaad gi Moaziz fi proov dat Jeezas da-mi di Mesaiya. (Aks 13:15-31; 26:22, 23) Ahn Baarnabas mi shoa dat ih reeli kay bowt peepl bai di way ih taak tu dehn. (Aks 4:36, 37; 9:27; 11:23, 24) Paal ner Baarnabas mi pen pahn dehn oan andastandin, insted, “Jehoava gi dehn di powa fi preech.” How yoo ku kapi Paal ahn Baarnabas egzampl eena di preechin werk? Yu ku du dis: Stodi an andastan Gaad Werd gud. Chooz sohn vers weh ku kech di peepl atenshan. Luk fi wayz fi komfert peepl weh yu preech tu. An aalwayz bays yu teechin pahn Jehoava Werd, noh yu oan opinyan.
7. (a) How peepl rispan tu di gud nyooz? (b) Weh yu need fi memba if yu famili ton gens yu bikaaz yu wership Jehoava?
7 Bot noh evribadi da Aikoanyom mi hapi fi hyaa weh Paal ahn Baarnabas mi-di preech. Look seh dat “di Jooz weh neva bileev ster op di peepl a di nayshanz ahn mek dehn hayt di bradaz.” Paal ahn Baarnabas mi disaid fi stay ahn difen di gud nyooz ahn dehn mi en op di “spen wahn lang taim da Aikoanyom, ahn Jehoava gi dehn di powa fi preech wid korij.” Bikaaz a dat, “di peepl fahn di siti kudn mek op dehn main; som a dehn mi tek said wid di Jooz bot adaz mi tek said wid di apasl dehn.” (Aks 14:2-4) Tudeh, peepl aalso rispan tu di Kingdom mesij eena difrent wayz. Fi som, ih yoonait dehn; fi adaz, ih divaid dehn. (Mach. 10:34-36) If yu famili ton gens yu bikaaz yu di serv Jehoava, memba dat ih ku bee dat dehn bileev di lai dehn weh peepl seh bowt wi. Bot yu gud kandok ku proov dat dehndeh lai da noh chroo an ih mait chaynj di atichood a dehn wan weh deh gens yu.—1 Peet. 2:12; 3:1, 2.
8. Wai Paal ahn Baarnabas mi lef Aikoanyom, ahn weh wi laan fahn dehn egzampl?
8 Wahn lee wail afta dat, deh wan weh mi dehn gens di gud nyooz plan fi stoan Baarnabas ahn Paal. Wen dehnya too mishineri hyaa weh di Jooz mi-di plan fi du, dehn ron gaahn preech da wahn nada teritori. (Aks 14:5-7) Preechaz a di gud nyooz tudeh aalso ak waiz. Wen peepl seh bad tingz bowt wi er di mesij weh wi preech, wi taak op wid korij. (Fil. 1:7; 1 Peet. 3:13-15) Bot if wi si dat peepl waahn geh vailent, wi mek shoar wi dat wi noh du er seh sohnting foolish.—Prov. 2:3.
“Wership di Livin Gaad” (Aks 14:8-19)
9, 10. Wehpaat Lischra mi deh, ahn weh wi noa bowt di peepl weh liv deh?
9 Afta dat, Paal ahn Baarnabas gaahn da Lischra, weh da-mi wahn Roaman koloni bowt 20 mailz sowtwes fahn Aikoanyom. Lischra mi ga lata tingz eena kaman wid Antiyak eena Pisidya, eksep fi di fak dat wahn lata Jooish peepl neva liv da Lischra. Eevn doa dehn mi praabli taak Greek, dehn mayn langwij da-mi Likionyan. Ahn, praabli bikaaz dehn neva ga wahn sinagag eena di siti, Paal ahn Baarnabas gaahn preech eena wahn poblik ayrya. Rait deh, Paal mi aalso heel wahn man weh mi kripl fan ih baan. Dat da-mi wahn mirakl weh simila tu di wan weh Peeta mi du da Jeroosalem. (Aks 14:8-10) Bikaaz a di mirakl weh Peeta mi du, wahn krowd mi prayz Gaad ahn ton Kristyanz. (Aks 3:1-10) Bot di peepl mi rispan eena wahn difrent way wid Paal mirakl.
10 Di peepl da Lischra mi bileev eena faals gaadz. Dat da wai wen dehn si dat di kripl man mi staat waak ahn jomp rong, di peepl mi tink dat Paal ahn Baarnabas da-mi gaadz. Dehn mi kaal Baarnabas, Zoos, di cheef a di Greek gaadz, ahn dehn mi kaal Paal, Hermeez, di son a Zoos ahn di wan weh taak fi di ada gaadz. (Si di baks weh naym “ Lischra ahn di Peepl Weh Mi Wership Zoos ahn Hermeez.”) Bot, Baarnabas ahn Paal mi reeli waahn mek di peepl andastan dat dehn da noh gaadz ahn dat Jehoava, di onli chroo Gaad, da-mi di wan weh mi gi dehn di atariti fi preech ahn heel di kripl man.—Aks 14:11-14.
“Unu stap wership wotlis tingz ahn wership di livin Gaad, di wan weh mek di hevn ahn di ert.”—Aks 14:15
11-13. (a) Weh Paal ahn Baarnabas mi tel di peepl da Lischra? (b) Weh lesn wi ku laan fahn weh Paal ahn Baarnabas mi seh?
11 Eevn doa di peepl mi-di chrai wership dehn bikaaz di peepl dehn da neva Kristyanz, Paal ahn Baarnabas mi stil chrai reech dehn haat. Dehn tel dehn: “Bradaz, wai unu di du dehnya tingz? Wee da hyoomanz jos laik unu; wi fays di saym kaina sofarin laik unu. Wi di preech tu unu bowt di gud nyooz kaaz wi waahn unu stap wership wotlis tingz ahn wership di livin Gaad, di wan weh mek di hevn ahn di ert ahn di see an evriting weh deh eena dehn. Eena di paas, ih yoostu alow di nayshan dehn fi du weh dehn waahn. Ahn yet, ih stil gi wahn witnis bowt ihself wen ih du aala dehn gud tingz fi unu; ih giv unu rayn fahn hevn ahn di difrent froots akaadn tu dehn seezn; ih provaid food fi mek unu eet til unu satisfai ahn hapi.” (Aks 14:15-17) Fahn dis Baibl akonk weh Look mi rait, ih teech wi dat wi ku du di saym ahn preech tu peepl weh da noh Kristyanz.
12 Weh lesn wi laan fahn weh Paal ahn Baarnabas mi tel di peepl da Lischra? Fers, Paal ahn Baarnabas neva tink dat dehn beta dan di peepl weh dehn mi-di preech tu. Dehn mi hombl an admit dat dehn da-mi aadineri peepl jos laik dehn. Da chroo, Jehoava mi poar ih hoali spirit pahn Paal ahn Baarnabas ahn dehn neva bileev eena faals teechinz nohmoh. Ahn dehn mi aalso ga di hoap fi rool wid Jeezas da hevn. Bot dehn mi noa dat di peepl fahn Lischra kuda geh dehndeh saym gif if dehn obay Jeezas.
13 How bowt wee, wat da wi atichood tuwaadz di peepl weh wi preech tu? Wi andastan dat wi noh beta dan dehn? If di peepl weh wi help chrai prayz wi op, wi wahn kapi Paal ahn Baarnabas ahn mek aal di prayz an aana goh tu Jehoava? Brada Charles Taze Russel, weh mi tek di leed eena di preechin werk fahn rong 1870-1916, mi aalso set wahn gud egzampl fi wee. Eevn doa hihn da-mi wahn amayzin teecha, ih mi seh: “Wi noh waahn no prayz ner aana fi wiself er fi wi poblikayshanz. Ahn wi noh waahn nobadi kaal wi Revren er Rabai.” Brada Russel mi shoa di saym hombl atichood laik Paal ahn Baarnabas. Saym way soh, wen wi preech wi noh waahn peepl prayz wi, insted wi waahn help dehn geh fi noa “di livin Gaad.”
14-16. Weh ada lesnz wi laan fahn weh Paal ahn Baarnabas mi tel di peepl da Lischra?
14 Di sekant lesn wi ku laan fahn Baarnabas ahn Paal egzampl da fi adap tu difrent sichuwayshanz. Di Jooz ahn di peepl weh mi jain di Jooish rilijan da Aikoanyom mi ga nalij bowt di Skripchaz ahn bowt Gaad rilayshanship wid di nayshan a Izrel. Bot moas a di peepl da Lischra neva noa notn bowt dat, bikaaz moas a dehn da-mi faamaz. Da Lischra di sail mi rich ahn dehn mi ga gud weda; ih mi rayn wahn lat oava deh. Di peepl kuda si lata proof a Gaad kwaliti dehn laik eena di wandaful way how di lan mi projoos plenti ahn gud froot. Soh Paal ahn Baarnabas mi yooz da infamayshan fi preech tu di peepl da Lischra bowt Gaad.—Roam. 1:19, 20.
15 Yu tink wi ku kapi Paal ahn Baarnabas egzampl an adap tu peepl weh wi preech tu? Fi egzampl, eevn doa wahn faama wuda plaant di saym kaina seed pahn difrent sekshan a ih faam, ih kyaahn aalwayz yooz di saym metod fi pripyaa di sail. Sohn sail mait bee saaf ahn redi fi plaant wid, an ada sekshanz mait need moa werk bifoa dehn ku plaant pan it. Di saym ting hapm eena di preechin werk. Di seed weh wi plaant da aalwayz Gaad Kingdom weh deh eena Gaad Werd. Bot, laik Paal ahn Baarnabas, wi waahn chrai andastan peepl ahn weh dehn bileev, ahn yooz da infamayshan fi reech dehn haat wen wi preech tu dehn.—Look 8:11, 15.
16 Wahn terd lesn wi ku laan da dat eevn doa wi du aal weh wi kud fi reech peepl haat, wi noh fi feel diskorij if dehn noh rispan tu di Kingdom mesij. Wai? Bikaaz eevn doa wi chrai wi bes, di seed weh wi plaant mait jrap monks di rak dehn ahn kyaahn groa er sombadi mait tek di mesij fahn owta ih haat. (Mach. 13:18-21) If dat hapm tu yoo, memba weh Paal mi tel di disaiplz da Roam: “Gaad wahn joj eech wan a wi [inkloodin eech persn weh wi taak tu bowt di Baibl] akaadn tu weh wi du.”—Roam. 14:12.
Dehn “Lef Dehn Eena Jehoava Han” (Aks 14:20-28)
17. Wehpaat Paal ahn Baarnabas gaan afta dehn lef fahn Derbi, ahn wai dehn gaahn deh?
17 Afta di peepl da Lischra mi jreg Paal owta di siti ahn lef ahn deh kaaz dehn mi tink ih ded, di disaiplz mi sayv ahn an kehr ahn sohnweh fi stay fi di nait. Di neks day, Paal ahn Baarnabas mi chravl tu Derbi, weh mi deh bowt 60 mailz fahn Lischra. Dis chrip mosi mi haad fi Paal sins ih mi hert op bad afta dehn stoan ahn til dehn aalmoas kil ahn. Stilyet, hihn ahn Baarnabas mi kantinyu dehn jerni, ahn wen dehn mi reech da Derbi dehn “mek wahn lata nyoo disaiplz.” An insteda tek wahn shaatkot bak tu Antiyak eena Siriya, “dehn gaahn bak da Lischra, Aikoanyom, an Antiyak [Eena Pisidya].” Bot wai dehn gaahn bak da dehndeh plays? Fi “schrentn di bradaz eena dehndeh siti fi stay schrang.” (Aks 14:20-22) Soh, dehn shoa dat ih moa impoatant fi help di kangrigayshan dan fi tink bowt how dehn feel. Dehn set wahn wandaful egzampl! Tudeh, wi ga serkit oavaseeyaz ahn mishineriz weh kapi Paal ahn Baarnabas egzampl.
18. Weh aal hapm bifoa wahn brada geh apointid az wahn elda?
18 Paal ahn Baarnabas neva onli inkorij di disaiplz wid dehn werdz an egzampl, bot dehn aalso “apoint som a di bradaz fi bee eldaz eena eech kangrigayshan.” Eevn doa “di hoali spirit mi sen” Paal ahn Baarnabas pahn dehn mishineri jerni, dehn mi stil faas ahn pray wen dehn “lef [di eldaz] eena Jehoava han.” (Aks 13:1-4; 14:23) Tudeh, eldaz geh apointid eena wahn simila way. Bifoa di loakal badi a eldaz rekomen wahn brada fi bee wahn elda, dehn pray ahn si weda ih ga aala di spirichwal kwalifikayshanz bays pahn di Baibl. (1 Tim. 3:1-10, 12, 13; Taitos 1:5-9; Jay. 3:17, 18; 1 Peet. 5:2, 3) Di moas impoatant ting da noh how lang ih da wahn Kristyan, bot how ih bihayv, how ih taak, ahn how adaz si ahn shoa dat di hoali spirit di gaid ih laif. Wahn brada kwalifai fi bee wahn shepad eena di kangrigayshan wen ih fala di dairekshan fi eldaz weh deh eena di Baibl. (Gal. 5:22, 23) Da di serkit oavaseeya ga di rispansabiliti fi apoint eldaz eena di kangrigayshan.—Kompyaa wid 1 Timoti 5:22.
19. Hoo wahn joj di eldaz, ahn how dehn kapi Paal ahn Baarnabas egzampl?
19 Eldaz noa dat dehn haftu ansa tu Gaad fi how dehn chreet di kangrigayshan; da Gaad wahn joj dehn. (Heeb. 13:17) Jos laik Paal ahn Baarnabas, di eldaz tek di leed eena di preechin werk, dehn inkorij di bradaz ahn sistaz wid weh dehn seh, ahn dehn wilin fi shoa moa kansaan fi di kangrigayshan dan fi dehnself.—Fil. 2:3, 4.
20. Wai ih impoatant fi reed bowt di werk weh wi faytful bradaz ahn sistaz du?
20 Wen Paal ahn Baarnabas gaahn bak da Antiyak eena Siriya, “dehn tel di bradaz bowt evriting weh Gaad mi du chroo dehn, ahn dat hihn mi oapm di way fi mek ada nayshanz aksep di fayt.” (Aks 14:27) Tudeh, wi ku reed bowt aala di haad werk weh wi bradaz ahn sistaz du ahn wi si how Jehoava bles dehn. Dis inkorij wi fi waahn du moa soh dat “Jehoava gi [wi] di powa fi preech wid korij.”
a Si di baks weh naym “ Aikoanyom—Di Siti a di Peepl a Frijya.”
