1, 2. Ki arive ler Pol avek Barnabas i dan lavil Lis?

 I ANNAN en kantite dezord dan lavil Lis. En zonm ki son lipye ti paralize depi son nesans pe sote telman i kontan akoz de dimoun ki i pa konnen in geri li. Bann dimoun i etonnen e en pret i anmenn girlann pour sa de zonm ki lafoul i krwar zot bann bondye. Bann toro pe fer tapaz ler en pret Zous pe prepare pour touy zot. Pol ek Barnabas i kriy avek lafoul pour dir zot aret fer sa bann keksoz. Zot desir zot lenz, tay kot lafoul e sipliy zot pour pa ador zot. Menm si zot fer bokou zefor, zot pros pour pa kapab anpes sa lafoul ador zot.

² Apre, bann Zwif sorti Antyos, Pisidi ek Ikonyonm ki opoz zot, i vin dan sa lavil. Zot konmans koz an mal lo Pol ek Barnabas e bann dimoun dan lavil Lis i krwar zot. Sa menm lafoul ki ti anvi ador Pol i vir lo li e saboul li avek ros ziska ki i perdi konnesans. Ler zot ti’n fini tir zot lakoler lo Pol, zot trenn li an deor lavil e kit li laba akoz zot krwar i’n mor.

3. Ki kestyon nou pou reponn dan sa sapit?

³ Kwa ki ti fer sa sityasyon arive? Ki leson bann proklanmater i kapab aprann avek sa ki ti arive avek Pol ek Barnabas e osi avek sa bann dimoun dan lavil Lis ki ti sanz zot nide vitman? Ki mannyer bann ansyen dan kongregasyon i kapab swiv legzanp Barnabas ek Pol ki ti fidel, ki ti persevere dan predikasyon e ki “Zeova ti donn zot lafors pour pres avek lardyes”?​—Akt 14:3.

4, 5. Akoz Pol ek Barnabas ti al Ikonyonm e ki ti arive laba?

⁴ Detrwa zour pase, bann Zwif ki ti opoz Pol ek Barnabas ti’n fer problenm avek zot e zot ti zet Pol ek Barnabas an deor lavil Antyos, Pisidi ki ti en lavil Romen. Dan plas dekouraze, sa de zonm “ti tap zot lipye pour tir lapousyer” akoz bann zabitan sa lavil pa ti aksepte sa mesaz. (Akt 13:50-52; Mat. 10:14) Pol ek Barnabas ti kit sa landrwa anpe e zot ti les Bondye fer sa bann dimoun pey konsekans zot  aksyon. (Akt 18:5, 6; 20:26) Sa de misyonner ti kontinyen al prese dan lazwa. Zot ti marse pour en zistans apepre 150 kilomet dan direksyon sides e zot ti ariv lo en plato ki ti ant Montanny Tauros ek Montanny Sultan.

⁵ Premyerman, Pol ek Barnabas ti al Ikonyonm, en lavil kot bann dimoun ti pe kontinyen swiv kiltir Grek e i ti enn bann lavil pli enportan dan Galasi, en provens Romen. a I ti annan en kantite Zwif ki ti reste dan sa lavil e i ti osi annan en kantite dimoun ki ti’n konverti dan larelizyon Zwif. Parey labitid, Pol ek Barnabas ti antre dan sinagog e zot ti konmans prese. (Akt 13:5, 14) Zot “ti koz sitan byen ki en gran lafoul Zwif ek Grek ti vin disip.”​—Akt 14:1.

6. Akoz Pol ek Barnabas ti bann bon ansenyan e ki mannyer nou kapab swiv zot legzanp?

⁶ Akoz sa ki Pol ek Barnabas ti dir ti fer zot ganny bann bon rezilta? Pol ti konn byen Lekritir. I ti kapab koz lo listwar, lo bann profesi e lo Lalwa Moiz pour li prouve ki Zezi ti Mesi. (Akt 13:15-31; 26:22, 23) Lafason ki Barnabas ti koze ti montre ki i ti enterese avek lezot. (Akt 4:36, 37; 9:27; 11:23, 24) Pol ek Barnabas pa ti depan lo zot prop konnesans me “Zeova [ki] ti donn zot lafors” pour koze. Ki mannyer ou kapab swiv legzanp sa de misyonner dan sa travay predikasyon? Ou kapab fer sa bann keksoz swivan: Konn byen Labib, swazir bann verse dan Labib ki kapab enteres bann dimoun ki ekout ou, rod bann fason pratik pour rekonfort bann dimoun ki ou pres avek e toultan servi Parol Zeova pour ansennyen dan plas depan lo ou prop konnesans.

7. (a) Ki mannyer dimoun i reazir anver sa bon nouvel? (b) Ki ou devret rapel si i annan divizyon dan ou fanmir akoz ou pe obei sa bon nouvel?

⁷ Par kont, pa tou dimoun Ikonyonm ki ti kontan pour tann sa ki Pol ek Barnabas ti annan pour dir. Lik ti osi dir ki “bann Zwif ki pa ti krwar ti ensit e met presyon lo dimoun lezot nasyon pour ki zot vir kont bann frer.” Pol ek Barnabas ti realize ki zot ti bezwen reste e defann sa bon nouvel, alor zot ti “pres avek lardyes pour en bon pe letan dan sa lavil.” Sa ti fer ki bann “dimoun dan sa lavil pa ti tonm dakor avek kanmarad, serten ti an faver bann Zwif me lezot ti an faver bann zapot.” (Akt 14:2-4) Ozordi, dimoun i reazir menm parey anver sa bon nouvel. Sa bon nouvel i fer serten dimoun ini avek kanmarad me i osi fer serten dimoun divize avek kanmarad. (Mat. 10:34-36) Si i annan divizyon dan ou fanmir akoz ou pe obei sa bon nouvel, ou devret rapel ki souvan bann dimoun i opoz ou akoz zot in tann bann rimer oubyen akoz dimoun in koz an mal lo nou. Si ou annan en bon kondwit, sa pou kapab montre sa bann dimoun ki opoz ou ki sa bann rimer pa vre e petet sa pou kapab fer zot sanz zot pwennvi.​—1 Pyer 2:12; 3:1, 2.

8. Akoz Pol ek Barnabas ti kit Ikonyonm e ki leson nou kapab aprann avek zot legzanp?

 ⁸ Apre en pe letan, bann dimoun Ikonyonm ti fer konplo pour saboul Pol ek Barnabas avek ros. Ler sa de misyonner ti tann sa, zot ti deside pour al pres dan en lot landrwa. (Akt 14:5-7) Ozordi, bann proklanmater i fer byen atansyon parey Pol ek Barnabas. Ler bann dimoun i akiz nou, nou koz avek lardyes. (Fili. 1:7; 1 Pyer 3:13-15) Me si dimoun i vyolan avek nou, nou devret evite fer okenn keksoz ki kapab met nou lavi ek lavi nou bann frer ek ser an danze.​—Prov. 22:3.

9, 10. Kote lavil Lis ti ete e ki nou konnen lo bann dimoun ki ti reste laba?

⁹ Pol ek Barnabas ti al dan lavil Lis, en koloni Romen ki ti apepre 30 kilomet dan sid was Ikonyonm. Bann dimoun dan lavil Lis ti viv byen avek bann dimoun dan lavil Antyos, Pisidi me konpare avek lavil Antyos, i ti napa en kantite Zwif ki ti reste dan lavil Lis. Menm si bann dimoun ti koz Grek, zot langaz maternel ti Likaonyen. Pol ek Barnabas ti konmans pres dan bann landrwa piblik petet akoz i ti napa sinagog dan sa lavil. Ler Pyer ti Zerizalenm, i ti geri en zonm ki ti paralize depi son nesans. Ler Pol ti dan lavil Lis, i ti geri en zonm ki son lipye ti paralize depi son nesans. (Akt 14:8-10). Me akoz sa mirak ki Pyer ti’n fer, en kantite dimoun ti vin bann disip. (Akt 3:1-10) Me sa mirak ki Pol ti fer ti annan en rezilta konpletman diferan.

¹⁰ Parey nou’n vwar o konmansman sa sapit, ler sa zonm ki son lipye ti paralize ti leve e konmans marse, sa lafoul dan lavil Lis ki ti ador bann fo bondye ti tonm lo en move konklizyon. Zot ti konmans apel Barnabas, Zous ki ti sef bann bondye e zot ti apel Pol, Ermes ki ti garson Zous e port parol bann bondye. (Vwar sa bwat “ Lavil Lis e ladorasyon Zous ek Ermes.”) Par kont, Barnabas ek Pol ti determinen pour  fer sa lafoul konpran ki pa sa bann fo bondye ki ti’n donn zot lotorite pour dir e fer sa bann keksoz, me Zeova, sa sel vre Bondye ki ti’n donn zot sa lotorite.​—Akt 14:11-14.

11-13. (a) Ki Pol ek Barnabas ti dir bann dimoun dan lavil Lis? (b) Ki leson nou kapab aprann avek sa ki Pol ek Barnabas ti dir?

¹¹ Malgre sa sityasyon difisil, Pol ek Barnabas ti kontinyen fer tou sa ki zot ti kapab pour tous leker sa bann dimoun ki ti pe ekout zot. Lik ti servi sa sityasyon pour montre en bon fason pour pres sa bon nouvel avek bann dimoun ki ador bann fo bondye. Remarke ki mannyer Pol ek Barnabas ti esey tous leker sa bann dimoun ki ti pe ekout zot. Zot ti dir: “Bann zanmi, akoz zot pe fer sa? Nou osi nou bann zonm ki annan menm febles parey zot. Nou pe anons zot sa bon nouvel pour ki zot vir ledo avek sa bann keksoz initil e tourn ver sa Bondye vivan ki’n fer lesyel, later, lanmer ek tou sa ki ladan. Dan lepase, Bondye in permet tou bann nasyon fer sa ki zot ti oule. Me kantmenm sa, i’n toultan revel son lekor par fer dibyen ler i’n donn zot lapli sorti dan lesyel, bann bon rekolt dapre sezon, i’n donn zot dekwa manze e fer zot zwaye.”​—Akt 14:15-17.

¹² Ki leson nou kapab aprann avek sa ki Pol ek Barnabas ti dir? Premyerman, Pol ek Barnabas pa ti konsider zot pli siperyer ki sa bann dimoun ki ti pe ekout zot. Zot pa ti fer krwar ki zot ti pli siperyer ki lezot. Me plito, zot ti demontre limilite e zot ti admet ki zot ti annan menm febles avek sa bann dimoun. Pol ek Barnabas ti’n ganny lespri sen e zot ti nepli krwar bann fo lansennyman. Zot ti osi annan sa lespwar pour al dirize ansanm avek Zezi dan lesyel. Me zot ti konnen ki bann dimoun dan lavil Lis ti kapab ganny sa bann menm kado si zot obei Zezi.

¹³ Ki mannyer nou vwar bann dimoun  ki nou pres avek? Eski nou vwar zot egal avek nou? Anmezir ki nou ed lezot aprann laverite ki dan Parol Bondye, eski parey Pol ek Barnabas, nou evite rod laglwar pour nou prop lekor? Charles Taze Russell ti en bon ansenyan e i ti diriz sa travay predikasyon a lafen diznevyenm syek e konmansman ventyenm syek, in kit en bon legzanp pour nou swiv. I ti ekri: “Nou pa anvi ganny rekonnet pour sa ki nou’n fer oubyen pour sa ki nou’n ekri e nou pa ni menm anvi ganny apele Ansenyan oubyen en lot tit.” Frer Russell ti demontre limilite parey Pol ek Barnabas. Pareyman, ler nou prese nou pa anvi anmenn laglwar lo nou prop lekor me nou anvi ed bann dimoun pour tourn ver “sa Bondye vivan.”

14-16. Ki sa dezyenm ek trwazyenm leson nou kapab aprann avek sa ki Pol ek Barnabas ti dir bann dimoun dan lavil Lis?

¹⁴ Annou vwar en dezyenm leson ki nou kapab aprann avek sa diskour. Pol ek Barnabas ti pare pour adapte zot fason ansennyen. Kontrerman avek bann Zwif ek bann dimoun ki ti’n konverti dan larelizyon Zwif dan lavil Ikonyonm, serten zabitan Lis pa ti konn bokou lo Lekritir oubyen lo sa ki Bondye in fer pour nasyon Izrael e serten pa ti konn nanryen lo sa bann keksoz. Sa bann dimoun ki ti pe ekout Pol ek Barnabas ti reste dan en landrwa kot i ti annan bann laferm. Lis ti annan en bon klima e i ti annan bann bon kalite later pour plante. Par egzanp, pandan bann sezon kot zot ti ganny en kantite rekolt, zot ti kapab vwar en kantite levidans ki montre bann kalite ki nou Kreater i annan. Sa bann misyonner ti koz lo sa bann keksoz pour fer dimoun rezonnen.​—Rom. 1:19, 20.

¹⁵ Eski nou osi nou kapab adapte nou fason ansennyen? Menm si en fermye i kapab plant menm kalite lagrenn dan diferan plantasyon, i bezwen prepar sa bann later dan diferan fason. I kapab ki serten sa bann later i deza mou e sa fermye i kapab zis senm lagrenn. Me parfwa sa fermye i bezwen fer plis travay lo serten later avan i senm lagrenn. Pareyman, sa lagrenn ki nou plante i toultan parey, setadir sa mesaz Rwayonm ki dan Parol Bondye. Me si nou fer parey Pol ek Barnabas, ler nou pres avek bann dimoun, nou pou esey konpran zot sirkonstans ek larelizyon. Apre, nou pou kapab servi sa lenformasyon pour adapte fason ki nou anons sa mesaz Rwayonm.​—Lik 8:11, 15.

¹⁶ Nou kapab aprann en trwazyenm leson avek sa resi konsernan Pol, Barnabas ek bann dimoun dan lavil Lis. Menm si nou fer tou sa ki nou kapab, parfwa sa lagrenn ki nou’n senmen i ganny arase oubyen i tonm lo ros kot napa bokou later. (Mat. 13:18-21) Si sa i arive, pa bezwen dekouraze. Parey Pol ti rapel bann disip dan lavil Ronm, “sakenn [setadir, sak dimoun ki nou anons Parol Bondye avek] pou rann kont avek Bondye pour son prop lekor.”​—Rom. 14:12.

17. Kote Pol ek Barnabas ti ale ler zot ti kit Derb e akoz?

¹⁷ Apre ki zot ti’n trenn Pol an deor lavil Lis e kit li laba akoz zot ti krwar i’n mor, bann disip ti rasanble otour li e i ti leve e retourn dan lavil pour li pas lannwit. Son lannmen, Pol ek Barnabas ti fer en vwayaz 100 kilomet pour al Derb. Sirman, i ti difisil pour Pol fer sa vwayaz akoz i ti dan douler vi ki i ti’n ganny saboule avek ros zis detrwa erdtan avan sa. Me kantmenm sa, Pol ek Barnabas ti persevere e ler zot ti ariv Derb, zot ti ed “en bon pe dimoun pour vin disip.” Apre, dan plas pran sa semen pli kourt pour zot retourn kot zot Antyos, Siri, “zot ti retourn Lis, Ikonyonm ek Antyos, [Pisidi].” Akoz zot ti fer sa? Pour zot “fortifye bann disip, ankouraz zot pour reste dan lafwa.” (Akt 14:20-22) Pa sa i en bon legzanp ki sa de zonm in kite pour nou! Zot ti met lentere kongregasyon avan zot prop lentere. Ozordi, bann sirveyan rezyonal ek bann misyonner i swiv zot legzanp.

18. Ki mannyer bann ansyen i ganny apwente?

¹⁸ Pol ek Barnabas pa ti zis fortifye bann disip par sa ki zot ti dir ek sa ki zot ti fer me zot ti osi apwent “bann ansyen dan sak kongregasyon pour ed zot.” Menm si zot “ti’n ganny anvoye par lespri sen” pour sa vwayaz misyonner, Pol ek Barnabas ti priye e zennen ler zot ti “konfye sa bann ansyen avek Zeova.” (Akt 13:1-4; 14:23) Ozordi osi nou fer parey zot. Avan ki konsey ansyen i apwent en frer dan kongregasyon, zot priye e zot servi Labib pour deside si sa frer i kalifye. (1 Tim. 3:1-10, 12, 13; Tit 1:5-9; Zak 3:17, 18; 1 Pyer 5:2, 3) Me sa pa depan zis lo kantite letan ki sa frer in batize. Me plito, son fason koze, son kondwit ek son repitasyon i montre ki kantite lespri sen pe ed li dan son lavi. Alor, si i annan bann kalite ki Labib i dir ki en sirveyan i bezwen annan, sa pou montre ki i kalifye pour servi konman en berze pour troupo Bondye. (Gal. 5:22, 23) Sirveyan rezyon ki responsab pour apwent bann frer.​—Konpar 1 Timote 5:22.

19. Ki bann ansyen i konnen e ki mannyer zot kapab imit Pol ek Barnabas?

¹⁹ Bann ansyen ki’n ganny apwente zot konnen ki zot bezwen rann kont avek Bondye pour lafason ki zot pran swen avek kongregasyon. (Ebr. 13:17) Parey Pol ek Barnabas, bann ansyen i diriz sa travay predikasyon. Zot dir bann frer ek ser bann keksoz ki pou fortifye zot. Zot osi pare pour met lentere kongregasyon avan zot prop lentere.​—Fili. 2:3, 4.

20. Ki mannyer ler nou lir konsernan bann travay ki nou bann frer in fer, sa i kapab ed nou?

²⁰ Finalman, ler Pol ek Barnabas ti retourn Antyos, Siri, kot zot ti’n konmans zot vwayaz misyonner, zot ti rakont “sa kantite keksoz ki Bondye ti’n fer atraver zot e ki i ti’n ouver laport pour ki bann dimoun lezot nasyon i aksepte lafwa.” (Akt 14:27) Ler nou lir konsernan bann travay ki nou bann frer ek ser in fer e ler nou vwar ki mannyer Zeova in beni zot zefor, sa pou ankouraz nou pour kontinyen “pres avek lardyes” e Zeova pou donn nou lafors.