1, 2. Nemene la itre ewekë ka traqa lo Paulo me Banaba e Lusetara?

 JOLE menu hë e Lusetara. Hnene la lue trenyiwa hna aloine la ketre geny ca qane lo kola hnahon, matre nyën ha sesësesë me madrin. Nge itre atr a sue me hain. Traqa fë pi hi hnene lai atre huuj i Zeus la itre nyine thaip kowe la lue thupëtresij, ke kola mekun hnene la itre atr ka hape, lue haze nyidro. Itre kau a ihonyi treqene la tro la atre huuj i Zeus a humuth iume ej. Ngo Paulo me Banaba a kuië zezenyi pi la lue iheetre i nyidro me sue kowe la ka alanyimu ka hape, tha tro kö a thili koi nyidro. Ngo jole catre koi nyidro troa sewe angatr.

² Ngo traqa pi hi la angetre Iudra ka icilekeu qa Anetioka e Pisidia me Ikonio. Hnei angatr hna silitrengathoi Paulo me Banaba me apoizinën la mekune ne la angetre Lusetara. Ame lo itre ka thili koi nyidro, ke angatr pena ha a cile xötreithi Paulo, me tranyi angeic hnei etë uti hë la thatre koilo. Ase jë hi angatr nue la trenge hni i angatr, hule zozone pi hi angatr la ngönetrei i Paulo uti hë e tröne la traon, me nue angeic e cili ke kola mekun ka hape, meci hë.

3. Nemene la itre hnying nyine tro sa ce wange ngöne la mekene celë?

³ Hna traqa tune kaa la jole celë? Nge ame hë kowe la itretre cainöj enehila, nemene la itre ini nyine troa kapa qa ngöne la itre ka traqa koi Banaba, Paulo memine la angetre Lusetara ka imothenge? Nge tune kaa la aqane tro la itre qatre thup a xötrethenge la tulu i Banaba me Paulo, lue ka catre cainöj “jëne la mene i Iehova”?—Itre hu. 14:3.

4, 5. Hnauëne laka, tro pi Paulo me Banaba a tro Ikonio, nge nemene la ka traqa e cili?

⁴ Itre hnepe drai qëmeken, hna helë Paulo me Banaba qa ngöne la traon i angetre Roma e Anetioka ne Pisidia, thupene lo itretre Iudra a icilekeu. Ngo tha dekurag pi kö nyidro. Hnene pë hë lo lue thupëtresij hna “jumejume pi la dro ne la lue ihnatrapaca” i nyidro kowe lo itre atr ne la traon ka tha kepe nyidro. (Itre hu. 13:50-52; Mat. 10:14) Nyidroti pë hë a tro tingetinge jë me nue Akötresie troa amekötin lo itre ka icilekeu. (Itre hu. 18:5, 6; 20:26)  Ka madrine palahi nyidro. Matre hnei nyidro hna sisedrën la huliwa ne cainöj trootro. Thupene la hnei nyidro hna trongën la 150 km kowe la götrane kolojë, traqa ju hi nyidro kowe la ketre götrane akawan la lue wetr, ene Taurus me Sultan, nge gaa lolo troa eëny.

⁵ Ame pe, hnei nyidroti hna pane cil e Ikonio. a Ketre nöj ka tru ne la province i angetre Roma e Galatia, nge hna löth pala kö hnene la aqane mele i angetre Geres. Nge ka tiqa hnei angetre Iudra me itre trenyiwa ka xom la hmi i angatr. Tune lo hna majemin, hnei Paulo me Banaba hna lö kowe la sunago me nyiqane cainöj. (Itre hu. 13:5, 14) “Nge pine laka, lolo catre la aqane ithanata i nyidro, nyimutre la angetre Iudra me Geres ka hane lapaun.”—Itre hu. 14:1.

6. Hnauëne laka, kola atrein hamë ini hnei Paulo me Banaba, nge nemene la aqane tro sa nyitipu nyidro?

⁶ Hnauëne laka, atrein hnyawa Paulo me Banaba hamë ini? Pine laka atre hnyawa hi Paulo la Tusi Hmitrötr. Atreine hi angeic qaja la aqane ce tro la nöjei ewekë ka traqa ekö memine lo itre hna perofetan me itre Wathebo matre troa anyipicin ka hape, Iesu hi la Mesia hna thingehnaean. (Itre hu. 13:15-31; 26:22, 23) Nge ame Banaba, ke ka nyipiewekëne la itre atr. (Itre hu. 4:36, 37; 9:27; 11:23, 24) Tha hnei nyidroti kö hna xötrethenge la sipu inamacan i nyidro, ngo nyidroti a ithanata jëne “la mene i Iehova.” Nemene la aqane tro eö a nyitipu nyidro la eö a cainöj trootro? Nyipiewekë tro eö a atre hnyawa la Tusi Hmitrötr, matre troa atreine iëne la itre xötr ka troa thue aja kowe la atr. Thele jë la itre aqane troa akeukawane la itre atr hnei eö hna cainöj kow. Nge loi e tro pala hi a nyitrepene la itre mekun hnei eö hna hamën hnene la Tusi Hmitrötr, ngo tha qa ngöne kö la itre sipu mekuna i eö.

7. (a) Nemene la thangane la maca ka loi? (b) Maine hna aisan la fami i eö hnene maca ka loi, nemene la nyine tro eö a mekun?

⁷ Matre ame e Ikonio, tha madrine kö la itre xan troa dreng la hna cainöjën hnei Paulo me Banaba. Öni Luka, “Ngo hnene pe la itre xa angetre Iudra ka tha lapaune kö hna amejëne la icilekeu, me ukune la itre atre ne fen troa methinëne la itre trejin.” Ame hnei nyidroti hna trotrohnine ka hape, ijine tro lai a isigöline la maca ka loi, matre hnei nyidroti hna “pane lapa aqeanyi ju e cili.” Qa ngöne lai, “hna thawaluëne la ka ala nyim, ke hetre itre ka nyixöle i angetre Iudra, nge itre xane a nyixöle i ange aposetolo.” (Itre hu. 14:2-4) Celë fe hi ka traqa enehila. Maca ka loi a acasine la itre xan me aisan la itre xan. (Mat. 10:34-36) Maine kola aisane la fami eö hnene la maca ka loi, ke the thëthëhmine kö laka, ame la itre xan, kola icilekeu thupene la hna dreng la itre mejene ithanata menu maine hna ixöjetrije pena. Ngo e tro eö a thiina ka loi, ke tro ha mama koi angatr laka, trengathoi la hnei angatr hna dreng, nge tro hë angatr a saze.—1 Pet. 2:12; 3:1, 2.

8. Pine nemene matre tro pi Paulo me Banaba qa Ikonio, nge nemene la ini koi së enehila?

⁸ Ame hë e thupen, hnene la angetre Ikonio hna ce axeciëne troa tranyi  Paulo me Banaba hnei etë. Atre jë hi nyidro, nyidroti pa feke jë kowe la ketre nöj hnë troa cainöj ngön. (Itre hu. 14:5-7) Loi e tro fe hane hmek hnene la itre ka cainöjën la maca ka loi enehila. Qëmekene la itre ka ithanata angazony, tha tro kö sa xou troa cainöj. (Fil. 1:7; 1 Pet. 3:13-15) Ngo e drenge hë së ka hape kola ha pi isi, hmeke jë! The nyi ka atre kö! Wanga tro easë memine la sinatronge së a eatr menu.—Ite edomë 22:3.

9, 10. Ekaa la traon e Lusetara, nge nemene la pengön la itre atr e cili?

⁹ Hnei Paulo me Banaba hna tro e Lusetara, ketre nöj hna musi kow hnei angetre Roma ngöne la götrane kolojë ne Ikonio. Ame Lusetara me Anetioka e Pisidia, ke lue traon ka ce huliwa. Ngo tha tiqa kö hnei angetre Iudra e Lusetara. Maine ka qene Geres hnyawa ju hë la itre atren, ngo ame la sipu qene hlapa i angatr, ke qene Lukaonia. Kola mekune ka hape, pëkö sunago e cili, matre hnei Paulo me Banaba hna cainöj ngöne la ketre götrane gaa tru atr. Nge tui Peteru lo e Ierusalema, hnei Paulo fe e Lusetara hna aloine la ketre genyi ca qane lo kola hnahon. (Itre hu. 14:8-10) Thupene la iamamanyikeu i Peteru, nyimutre la itre ka lapaun. (Itre hu. 3:1-10) Ngo tha celë kö la ka traqa thupene la iamamanyikeu i Paulo.

¹⁰ Ame la itre atr e Lusetera, ke itre ka thil koi itre haze. Matre ame la kola a caa tro cil lo ka genyi ca, ke hnei angatr hna mekun ka hape, lue haze Banaba me Paulo. Öni angatr, ame Banaba ke Zeus, tixe ne la itre haze, nge ame Paulo ke Hermes, nekö i Zeus, nge qene qaja ne la itre haze. (Goeëne jë lo hna eköhagen “ Lusetara Memine La Hmi i Zeus Me Hermes.”) Ngo hnei Paulo me Banaba hna qaja mekötin ka hape, ame la atreinei nyidro ke qaathei Iehova, nyipi Akötresie ka cas, ngo tha qaathene kö la itre haze.—Itre hu. 14:11-14.

11-13. (a) Nemene la hna qaja hnei Paulo me Banaba kowe la angetre Lusetara? (b) Nemene la pane ini hne së hna xom qa ngöne lo itre hna qaja hnei Paulo me Banaba?

 ¹¹ Ngacama ka jole la ewekë ka traqa, ngo hnei Paulo me Banaba hna thele troa ketr la hni ne la itre ka drei nyidro. Luka a amamane hnyawa e celë la aqane troa cainöj kowe la itre atr ka thatre Akötresie. Easa öhne e celë la aqane tro fë Paulo me Banaba la maca kowe la itre atr ka drei nyidro, la nyidroti a hape: “Hnauëne la nyipunie a ujë tun? Ketre lue atre fe hi nyio la, nge lue ka tria fe hi nyio tui nyipunie, ngo nyio pe a cainöjëne la maca ka loi koi nyipunie matre tro nyipunieti a trotrije la itre huliwa ka gufa cili, me tro kowe la Akötresie ka mel, atre xupe la hnengödrai me fen, me hnagejë, me nöjei ewekë e hnin. Ame petre kö ekö, hnei nyidrëti hna nue la itre nöje troa isa kuci mekun. Ngo eje hi laka, hetre ewekë pala hi ka anyipicine la lolo i nyidrë, ke hnei nyidrëti hna hamëne la mani koi nyipunie, me itre ijine menuë xen matre ameji nyipunie me amadrinëne la itre hni i nyipunie.”—Itre hu. 14:15-17.

¹² Nemene la itre ini nyine tro së a xom qa ngöne la trenge ithanata i Paulo me Banaba? Ame la hnapan, ke tha hnei Paulo kö me Banaba hna mekune ka hape, ka sisitria kö nyidro hui itre xan. Tha nyidroti kö a amamane ka hape, tru catr la atreine i nyidro, ke hnei nyidro hna aloin la ketre atr. Waea! Nyidroti pe a qaja ka hape, ceitui nyidro me angatr. Ngo ame pe, hnei nyidro hna kapa la uati hmitrötr, nge hna thepe nyidroti qa ngöne la itre ini ka thoi. Nge tro fe nyidroti a hane ce joxu me Keriso. Ngo atre hi nyidro laka, ijije fe hi tro la angetre Lusetara a hane kapa la ahnahna cili, e tro angatr a drengethenge Keriso.

¹³ Nemene la aqane tro sa goeëne la itre atr hne së hna cainöj kow? Hapeu, ame koi easë, ke ceitu së hi me angatr? Nge ame la easë a ini angatr la itre nyipici qaathei Akötresie, easë kö a thupën matre tha tro kö a thele troa atrunyi së? Hnei Charles Russel  ketre atr ka atreine hamë ini nge ka elemekene la huliwa ne cainöj qëmekene lo kola xejë lo itre macatre 1900, hna cinyanyine ka hape: “Tha ajane kö eahun troa atrunyi eahun me pi mama fë la sipu pengö hun me itre itusi hun. Ketre, tha ajane kö hun troa hë hun ka hape, Hnamiatr maine Rabbi.” Ceitune hi la aqane ipië i trejin Russel me Paulo me Banaba. Ketre, ame la easë a cainöj, ke tha kolo kö matre troa atrunyi së. Ngo göi tro pe a xatuane la itre atr troa atre la “Akötresie ka mel.”

14-16. Nemene fe la itre xaa ini hne së hna xom qa ngöne la aqane cainöje i Paulo me Banaba kowe la angetre Lusetara?

¹⁴ Ame la hnaaluene ini nyine troa kapa qa ngöne la cainöj celë, ke hnei Paulo me Banaba hna saze la aqane ithanata i nyidro kowe la itre atr. Tha ceitu kö la angetre Lusetara memine la angetre Iudra me itre ka ce hmi me angatr qa Ikonio. Pine laka alanyimu thene la angetre Lusetara ka thatre la Itre Hna Cinyihan memine la aqane ujë i Akötresie kowe la angetre Isaraela. Ngacama thatre Akötresieti kö la angetre Lusetara, ngo ame la hnei angatre hna atre hnyawa, ke ene la ihnadro me aqane troa huliwan ej me eëny. Ame la götran hnei angatr hna lapa, ke gaa hetre tim göi itre feja, nge gaa lolo la dro troa eëny. Matre canga tro hi a mama koi angatr la pengöi Akötresie, jëne la itre ewekë hnei angatre hna öhn. Hnei Paulo me Banaba hna ithanatane lai me angatr matre troa qeje Akötresie.—Rom. 1:19, 20.

¹⁵ Atreine kö së troa tui nyidro, ene la troa saze la aqane ithanata së? Ngacama casi hi la itine feja hna troa jum, ngo isapengöne kö la dro. Matre loi e tro la atre eënyi a hnëkën la dro thenge la pengöne ej. Ame la itre xaa hnadro, ke gaa hmelek matre ijije hi troa canga trane la itre itin e cili. Ngo ame ngöne la itre xaa götran, ke nyipiewekë troa pane hnëkën hnyawan la dro. Haawe, ceitui hi lai memine la itine hne së hna jum, ene la maca ne la Baselaia i Akötresie hnine la Tusi Hmitrötr. Eje hi, tune lo hna kuca hnei Paulo me Banaba, loi e tro sa pane atre hnyawa la aqane mele ne la itre atr hne së hna cainöje kow, memine la hmi angatr. Ame hë la easa cainöj koi angatr, atre hë së la aqane tro sa hamën la itre ini.—Luka 8:11, 15.

¹⁶ Hetre hnaakönine ini nyine tro sa xom qa ngöne la aqane cainöje i Paulo me Banaba kowe la angetre Lusetara. Maine hnëkë hnyawa ju hë së, ngo ame la itre xaa itine feja, ke hna feje itre ej, maine ka mala pena hune la hnënge etë. (Mat. 13:18-21) Maine troa traqa tune lai, the hnehengazo menu kö. Tune lo hna amexej hnei Paulo kowe la itretre dreng e Roma, “qa ngöne lai, tro asë hi së [memine fe la itre atr hne së hna qeje Tusi Hmitrötre kow] a isa qeje thiinan qëmeke i Akötresie.”—Rom. 14:12.

17. Hna tro ië hnei Paulo me Banaba thupene la kola tro qa Derebe, nge pine nemen?

¹⁷ Ame e Lusetara, lo kola nue Paulo kösë ka meci hë, ke hnene la itretre drenge hna nyihnyawa angeic, matre cile hmaca jë hi angeice me tro kowe la traon troa meköl ngöne la jidr. Ame ngöne la drai thupen, hnei Paulo me  Banaba hna tro Derebe, 100 km qa lai. Tha fene hace kö la akötre i Paulo la kola xom hmaca la gojenyi thupene la itre ewekë ka traqa koi angeic, lo kola tranyi angeic hnei etë. Ngo ame pe, tha cile pi kö angeic me Banaba. Eje hi, ame la nyidroti a traqa e Derebe, hnei nyidroti hna “xatuan la itre xan troa xötrethenge Iesu.” Matre e thupen, tha hnei nyidroti kö hna xom la gojenyi ka tro meköt a tro Anetioka ne Suria, lo götrane hnei nyidroti hna lapa ngön. Ngo hnei nyidroti hna bëeke hmaca a tro e Lusetara me Ikonio me Anetioka e Pisidia. Göi troa u? Göi troa ithuecatre hmaca kowe la itretre dreng e cili matre “acatrene la lapaun i angatr.” (Itre hu. 14:20-22) Hane hi lai ketre tulu koi së. Hnei nyidroti hna amë panëne la itre huliwa ne la ekalesia, nge pine pë hë la aja i nyidro. Ame enehila, ke kolo fe a hane xötrethenge la tulu i nyidro hnene la itretre thupë sirkoskripsio me itre mesinare.

18. Nemene la aqane acile la itre qatre thup?

¹⁸ Tha hnei Paulo me Banaba kö hna ithuecatr hmekuj kowe la itretre dreng jëne la itre trenge ithanata me tulu i nyidro. Ngo hnei nyidroti fe hna ‘acile la itre qatre thup ngöne la itre ekalesia.’ Ngacama uati hmitrötr la ka “tro xomi” nyidro ngöne la huliwa ne mesinare, ngo hnei nyidroti kö hna pane thith me tha xen qëmekene troa “nue . . . koi Iehova” la itre qatre thup hna acil. (Itre hu. 13:1-4; 14:23) Eje hi, ka tune hnyawa fe enehila. Ame la kola mekune troa acile la ketre trejin troa qatre thup, ke tro la lapa ne la itre qatre thup ngöne la ekalesia a pane thith. Nge thupene lai, angatr a ce wange ka hape, hetrenyi kö thene lai trejin la itre thiina ka ej e hnine la Tusi Hmitrötr. (1 Tim. 3:1-10, 12, 13; Tito 1:5-9; Iako. 3:17, 18; 1 Pet. 5:2, 3) Tha kolo kö a troa iëne la ketre trejin, ke ekö hë angeice hmi. Ngo ame la ka nyipiewekë, ke aqane ithanata i angeic, me thiina i angeic me aqane atre angeic e hnine la ekalesia. Hane hi la ka troa amamane ka hape, hetrenyi thei angeic la uati hmitrötr i Akötresie. Matre e öhne hë thei angeic la itre thiina hna qaja e hnine la Tusi Hmitrötr, ke ijiji angeice hë troa xome la hnëqa ne atre thupë mamoe i Akötresie. (Gal. 5:22, 23) E cili, tro hë la atre thupëne la sirkoskripsio a acili angeic.—Wange ju la 1 Timoteo 5:22.

19. Drei la ka troa amekötin la itre qatre thup, nge tune kaa la aqane nyitipu Paulo me Banaba hnei angatr?

¹⁹ Tro la itre qatre thup a mekune hnyawa ka hape, tro angatr a isa qeje thiina koi Akötresie, göi aqane thupëne angatr la ekalesia. (Heb. 13:17) Tui Paulo me Banaba, angatr fe a amamai tulu ngöne la hna cainöj trootro. Angatr a thuecatrene la itretre dreng jëne la itre trenge ewekë i angatr. Ketre mina, ka tru la itre huliwa ne la ekalesia hune la itre sipu aja i angatr.—Fil. 2:3, 4.

20. Nemene la thangane e tro sa e ngöne la itre itusi së, la aqane huliwa nyipici ne la itre trejin?

²⁰ Ame la Paulo me Banaba a bëek e Anetioka ne Suria, “nyidroti a qejepengöne jë la nöjei ewekë hnei Akötresieti hna kuca jëne nyidro, hatrene laka, Akötresie a fe gojenyi kowe la itre atre ne fen troa lapaun.” (Itre hu. 14:27) Ketre, ame fe la easë a e la itre aqane huliwa nyipici ne la itre trejin, me aqane amanathithi angatr hnei Akötresie, celë hi ka thuecatre koi së tro fe a hane catr cainöj.