1, 2. Paulu ani Barnabas Listrant asle tednam kitem zalem?

 LISTRANT aslole lok khub khuxal asat, karonn Paulun ani Barnabasan zolma thaun longddo aslolea eka munxak boro kelo. Ani to munis atam khuxalkaien uddio marta. Hem polloun thoinche lok ojap zaleat. Ani he don onvollkhi munis dev mhunn tankam dista. Tor Zeusacho ek pujari tanchea pasot fulanche har gheun ieta ani boilank haddun iodn bhettoupachi toiari korta. Hea vellar, Paulu ani Barnabas apnnachi bhokti korinakat mhunn lokam lagim vinoti kortat. Te aple kopdde pinztat ani khub proitn kelea uprantuch lok tanchem aikota.

² Uprant, Paulu ani Barnabasacho virodh kortale te Judev, Pisidiachea Antiok ani Ikoniuma thaun Listrant aile. Te Paulu ani Barnabasachem nanv piddʼddear korunk lagle. Ani tanchem aikon, Listrantle lok Paulu ani Barnabasacho dves korunk lagle. Thoddeach vella poilim je lok Pauluchi bhokti korunk sodhtale, tech lok Pauluk itlo fatraitat, ki to sintida bhair poddtta ani taka khub mar lagta. Uprant Paulu melo mhunn chintun te taka voddit xarachea darvonttea lagim haddun uddoitat.

3. Hea odheai-ant ami khoinchea prosnanche zobab polloitolim?

³ Punn hea bhirankull ghoddnne poilim kitem zalʼlem? Barnabas, Paulu ani Listrantlea lokam sovem jem ghoddlem, tantuntlean bori khobor porgott kortat tannim kitem xikonk zata? Toxench Paulu ani Barnabas, ‘Jehovachea odhikaran bhienastana porgottit gele,’ tantuntlean Kristi vhoddilamnim kitem xikonk zata? Hea tinui prosnanche zobab ami hea odheai-ant polloitolim.—Itihas 14:3.

4, 5. Paulu ani Barnabas Ikoniumant kiteak voitat, ani thoim kitem zata?

⁴ Thoddea disam poilinch, Paulu ani Barnabas Pisidiachem Romi xar Antiokant asle. Thoim thoddea Judevamnim tancho virodh kelʼlo ani tankam xarantlean bhair ghatlole. Te lok Paulu ani Barnabasachem aikonk sodhinasle. Tori astana, te niraxi zaunk nant, punn aplea “paim-anchi dhulʼl fafddun” xantin thoinchean gele. (Itihas 13:50-52; Mt. 10:14) Ani Dev  tea virodheanchi nit kortolo mhunn tankam Devachea hatant soddun gele. (Itihas 18:5, 6; 20:26) Tor tannim apli khuxalkai unni zaunk diunk na. Punn hea donui mixinori bhavamnim apli porgottnni chaluch dovorli. Te 150 kilometr dokxinn-udenti vatten cholon Taurus ani Sultanachea dongri vattara modem aslolem borem pik zatolea zagear pavle.

⁵ Paulu ani Barnabas survatek Ikoniumant ravtat. a Hea xarant Grik sonskrutaieche zaite lok ravtale. Toxench, hem Galasiechea Romi prantant aslolea mhotvachea xara modlem ek xar aslem. Hea xarant zaite Judev ani Judev dhorm apnnailʼle lok ravtale. Tor Paulu ani Barnabas tanchea chali pormonnem sobha-ghorant bhitor sortat ani porgottnni korunk lagtat. (Itihas 13:5, 14) Ani ‘te itle bore bhaxen uloitat, ki zaite Judev ani Grik lok bhavarth dovortat.’—Itihas 14:1.

6. Paulu ani Barnabas bore xikoupi kiteak asle, ani ami tanchi dekh koxi gheunk zata?

⁶ Paulu ani Barnabas bore xikoupi kiteak asle? Pauluk Devachea Utrachi khub bori zannvai asli. Jezuch bhasailʼlo Mesias mhunn dakhounk tannem bore bhaxen Bible-antlo itihas, bhasaunneo ani Moizesa udexim dilʼlea Kaideacho ulʼlekh kelo. (Itihas 13:15-31; 26:22, 23) Barnabas jea ritin uloilʼlo, tantuntlean taka lokanchi kallji asli mhunn dison ietalem. (Itihas 4:36, 37; 9:27; 11:23, 24) Punn te donui munis svotachea zannvaiecher patieun ravonk nant. Tachea bodlek, te ‘Jehovan dilʼlea odhikaran uloile.’ Amchea porgottnnechea kamant ami hea donui mixinori bhavanchi dekh koxi gheunk zata? Amkam Devachea Utrachi bori vollokh asonk zai. Toxench, amchea aiknnareank aikonk avoddttolem tea vixoi-ancher ami thoddim Bible-antlim versam sodhun dovrunk zatat. Tea bhair, ami porgott kortat tankam bhuzvonn diunk ami vatto sodhunk zatat. Ani dusreank xikoitana svotachea zannvaiecher nhoi, punn amchi xikounn sodanch Devachea Utracher adarit asonk zai.

7. (a) Bore khobrek lagon kitem zata? (b) Tumi Jehovachi bhokti kortat dekhun tumchea familint futt poddlea zalear tumi kitem ugddas dovrunk zai?

⁷ Punn Ikoniumant aslole soglech lok Paulu ani Barnabasachem aikonk toiar nasle. Hea vixim Lukas fuddem sangta: “Jea Judevamnim bhavarth dovrunk na tannim Judev nhoi tea lokank uksaile ani bhavanchea add tanchea monant koddsann bhorli.” Tor hea vellar thoinch ravon bore khobre pasot ulovop ekdom gorjechem aslem mhunn Paulun ani Barnabasan vollkhon ghetlem. ‘Thoim zaito vell sarun te bhienastana Devachem utor porgottit gele.’ Ani hea pasot, “xarantlea lokam modem futt poddli. Thodde Judevanchea vatten zale ani thodde apostlanchea vatten zale.” (Itihas 14:2-4) Aiz pasun bore khobrek lagon oxench zata. Thodde lok aikotat tednam, tanchea familint ekvott vaddtta. Punn thodde virodh kortat tednam futt poddtta. (Mt. 10:34-36) Tor tumi Jehovachi bhokti kortat dekhun tumchea familint futt poddlea zalear, tannim amchea vixim fotti aikolea dekhun tim amcho virodh kortat mhunn ugddas dovrat. Ani tumchea borea sobhavantlean tannim amchea vixim aikolʼleo khobro sarkeo nhoi mhunn dakhoun diat. Oxem kelolean, sovkas-sovkas korun amcho virodh kortat tancho sobhav bodlonk xokta.—1 Ped. 2:12; 3:1, 2.

8. Paulu ani Barnabas Ikoniumantlean kiteak gele, ani tanchea udharonnantlean ami kitem xikonk zata?

 ⁸ Thoddea vella uprant, Ikoniumant aslole virodhi Paulu ani Barnabasak fatraunk manddnni kaddttat. Punn tankam hea vixim kollon ieta tednam, te thoinchean dusrea vattarant voitat. (Itihas 14:5-7) Aiz pasun porgottnnaram tancheach bhaxen xanneponnan vagtat. (Filp. 1:7; 1 Ped. 3:13-15) Virodhi amkam kitem-i vaitt mhunnttat tednam ami tankam dhiran zobab ditat. Punn te amkam marunk sodhtat tednam, ami thoinchean dusrea vattarant voitat. Oxem korun ami amcho ani amchea bhav-bhoinnancho jiv dhokeant ghalinant.—Mho. 22:3.

9, 10. Listra khoim aslem, ani thoim ravtolea lokam vixim ami kitem zannant?

⁹ Paulu ani Barnabas Listrant gele, zo ek Romi jilʼlo aslo ani Ikoniumachea dokxinn-ostome vatten sumar 30 kilometr pois aslo. Pisidiachem Antiok ani Listra modem zaitem ek-sarkem aslem. Punn Listrant chodd Judev nasle. Thoim lok chodd korun Grik bhas uloitale. Punn tanchi mai-bhas Likaonia asli. Tea xarant ghoddie sobha-ghor naslem dekhun, Paulu ani Barnabas lok melltta thoim porgottnni korunk lagle. Jeruzalemant astana zolma thaun opong aslolea eka munxak Pedrun boro kelo tednam zaitea lokamnim bhavarth dovorlolo. (Itihas 3:1-10) Punn Listrant, zolma thaun longddo aslolea eka munxak Paulun boro kelo tednam tacho porinnam veglloch zalo.—Itihas 14:8-10.

¹⁰ Listrant aslole lok khottea devanchi bhokti kortale ani to longddo munis uddio marun cholonk laglo tednam, Paulu ani Barnabas dev oxem tea lokank dislem mhunn ami hea odheai-achea survatek polloilʼlem. Tannim Barnabasak Zeus mhunnttlo, zo tancho ek mukhel dev aslo ani Pauluk, Hermes mhunnttlo, zo Zeusacho put ani tanchea devancho sondex diupi  aslo. (Pan 97-acher aslolem, “ Listra Xar Ani Tantunt Zeus Ani Hermesachi Bhokti,” hem boks polloiat.) Punn Paulun ani Barnabasan apunn dev nhoi, punn Jehova zo khoro Dev aslo, tannem tankam ulounk ani tem vizmit korunk xokti dilʼli mhunn tea lokank somzaunk tannim nichov kelʼlo.—Itihas 14:11-14.

11-13. (a) Paulu ani Barnabasan Listrachea lokank kitem sanglem? (b) Paulun ani Barnabasan Listrachea lokank jem somzailem tantuntlean ami xikonk zata tem poilem lisanv khoinchem?

¹¹ Lok, Paulu ani Barnabasa sangata koxe-i bhaxen vagom, te porgottnni korit ravle. Khottea devanchi bhokti kortolea lokank ami koxi porgottnni korunk zai tea vixim Lukasan Bible-ant boroilʼlea hea ghoddnnentlean amkam xikonk melltta. Paulun ani Barnabasan aplea aiknnareank koxem somzailem tacher dhean diat. Tannim mhunnttlem: “Lokamno, tumi oxem kiteak kortat? Ami-i tumchea bhaxen sadharonn munis. Tumi heo upeog nasloleo vostu soddun, mollob ani prithum ani tachea bhitor asloleo sogleo vostu rochlolea jivea Deva lagim ieunchem mhunn ami tumkam bori khobor porgott kortat. Poilinchea kallar soglea raxttranchea lokank Devan ap-aple vatten cholonk dilem. Tori astana, to tumkam borem korit ravlo ani aplea vixim govai di-it ravlo. To tumkam mollbar thaun paus ani follam zatat tosle dis dita. To tumkam pottbhor khaunk dita ani tumchem kalliz khuxal korit ravta.”—Itihas 14:15-17.

¹² Paulun ani Barnabasan aplea aiknnareank jem kitem sanglem hantuntlean ami kitem xikonk zata? Poilem mhunnttlear, tannim eka munxak boro kelo mhunn apunn tea lokam poros vorte asat oxem tannim chintunk na. Tachea bodlek, aplea aiknnaream bhaxen tankam pasun oskotaieo asat mhunn tannim manun ghetlem. Paulu ani Barnabasak povitr xokti mellʼlli ani te  khotte bhokte thaun svotontr asle. Toxench, tankam Jezu sangata raj cholounk ek bhorvonso aslo. Ani Listrantlea lokamnim pasun Jezuchi adnea manun ghetli zalear, tankam pasun him dennim mellonk xoktalim mhunn tannim vollkhon ghetlem.

¹³ Tor ami porgottnni kortat tanchea sangata amcho sobhav koso asa? Ami amkanch amchea aiknnaream bhaxen ek-sarkim asat mhunn lekhtat kai? Ani Devachea Utrantlean ami dusreank sot xikoitat tednam, Paulu ani Barnabasa bhaxen ami svotachi vhoddvik korop pois kortat kai? Tea vixim, Charles Taze Russell-achem amkam ek borem udharonn asa. To sumar 1870-1916 poriant porgottnnechea kamant fuddakar ghetalo ani to ekdom boro xikoupi aslo. Tannem boroilem: “Amchea kamak lagon vo amchea prokaxonank lagon konnench amchi vakhannʼnni kelʼli amkam naka. Toxench, konnem-i amkam Manadik vo Rabbi mhunnttlolem pasun amkam naka.” Paulu ani Barnabasa bhaxen, Charles Taze Russell pasun khalti aslo. Teach bhaxen, ami porgottnni kortat tednam lokamnim amchi vhoddvik kelʼli amkam naka, punn tannim “jivea Deva” lagim ieun tachi seva keloli amkam zai.

14-16. Paulu ani Barnabasan Listrant ravtolea lokank jem sanglem tantuntlean ami xiktat tem dusrem ani tisrem lisanv khoinchem?

¹⁴ Dusrem lisanv mhunnttlear, Paulu ani Barnabasan lokanchea poristhiti pormonnem aplea uloupant bodol kelo. Listrant ravtole lok, Ikoniumant aslole Judev ani Judev dhorm apnnailolea lokam bhaxen nasle. Tankam Devachea Utra vixim vo Dev Izraelitkaram sovem koso vaglo tem khobor nasli. Punn tanchem modem kitem ek-sarkem aslem? Listrantle lok xetkam kortale ani thoim khub paus poddttalo ani folladik xetam aslim. Hea vorvim, Rochnnarak khub bore gunn asat mhunn tim pollounk xoktalim. Tor tanche modem kitem ek-sarkem aslem tem uzar korun, Paulu ani Barnabasan aplea uloupant bodol kelo.—Rom. 1:19, 20.

¹⁵ Paulu ani Barnabasa bhaxen, amchea poristhiti pormonnem ami amchea uloupant bodol korunk zata kai? Ami ek udharonn gheum-ia. Ek xetkar veg-veglle toreche zomnir ekuch torechem bim ghalta mhunn chintat. Punn thoddi zomin bim ghalche poilinch mov asta. Tor xetkarak chodd vavr korunk poddona. Punn thoddi zomin ghott asta. Tor ti toiar korunk taka khub vavr korcho poddtta. Tea bim-a bhaxen, ami porgott kortat to sondex ekuch zaun asa. To mhunnttlear, Bible-ant asloli Devachea Rajeachi bori khobor. Punn Paulu ani Barnabasa bhaxen, amkam veg-veglle toreche lok mellttat. Tor tanchi poristhiti ani patienni somzon gheun ami amchea uloupant bodol korunk zata.—Lukas 8:11, 15.

¹⁶ Paulu, Barnabas ani Listrantlea lokam thaun ami xikonk zata tem tisrem lisanv khoinchem? Lokanchea kallzant sotachem bim ghalunk ami zaite pavtti khub vavr kortat. Tori astana, thodde pavtti tem bim khoddpi zomnir poddtta vo noxtto ieun tem kaddun vhorta. (Mt. 13:18-21) Oslea vellar Paulun Romant aslolea xisank jim utram sanglim tim ami ugddas dovrunk zai. Tannem mhunnttlem: “Amchea modlo dor eklo [ami Devachea Utra vixim uloitat to dor ek munis pasun] Devak hixob ditolo.” (Rom. 14:12) Tor lok amchem aikonant zalear pasun, ami niraxi zaunchem nhoi!

17. Derbe uprant Paulu ani Barnabas khoim voitat, ani kiteak?

¹⁷ Listrachea lokamnim Pauluk fatrailea uprant, taka voddun xara bhair haddlo ani to melo mhunn somzon taka thoinch soddlo. Tea vellar, xisamnim taka vattailo ani te rati xarant ravonk taka ek zago dilo. Dusrea disa Paulu ani Barnabas, 100 kilometr cholon Derbek voitat. Ho provas korop kitlo kotthin aslo astolo ani tache kuddik kitli dukh asli astoli tea vixim ami chintunk zata. Karonn thoddeach voram poilim taka fatrailʼlo. Tori astana, to ani Barnabas soddun dinant. Punn Derbent pavlea uprant, te ‘zaitea zannank xis zaunk modot kortat.’ Uprant, Siriechea Antiokant begin pavta ti vatt dhorchea bodlek, ‘te Listra, Ikonium ani [Pisidiachea] Antiokant porot voitat.’ Karonn te thoinchea xisank ‘bhavarthant ghott ravonk urba’ diunk sodhtale. (Itihas 14:20-22) Khorench, hea donui bhavamnim amkam ekdom borem udharonn dovorlam! Tannim apleo gorzo nhoi, punn sobhecheo gorzo poileo dovorleo. Aiz tanchi dekh gheun, sorkittachi dekhrekh korpi ani mixinori toxench kortat.

18. Sobhent eka bhavak vhoddil mhunn nemchea poilim kitem zata?

¹⁸ Paulu ani Barnabasan aplea utramnim, ani ek borem udharonn dovrun Jezuchea xisank ghottai dili. Itlench nhoi, tannim “dor eke sobhent vhoddil” nemle. Mixinori sevent tankam “povitr xokten dhaddlole” tem khorem, punn tannim upas korun ani Jehova lagim magnnem korun, “vhoddilank Jehovachea hatant ghatle.” (Itihas 13:1-4; 14:23) Aiz pasun sobhent eka bhavak vhoddil mhunn nemchea poilim oxench zata. Sobheche vhoddil magnnem korun, to bhav vhoddil zaunk Bible-a pormonnem purto asa kai na tem polloitat. (1 Tim. 3:1-10, 12, 13; Tit. 1:5-9; Jak. 3:17, 18; 1 Ped. 5:2, 3) To bhav kednam thaun Jehovachi seva korta tem mhotvachem nhoi. Punn to povitr xoktechea margdorxona pormonnem kam korta mhunn tachea utramnim ani vagnnuken dison ieunk zai. Ani sobhent taka ek borem nanv asa kai na, tem-ui gorjechem asa. Dekhrekh korpeank asonk zai te gunn to aplea jivitant dakhoita zalear, to sobhent vhoddil mhunn seva korunk purto zata. (Gal. 5:22, 23) Sobhent vhoddilank nemchi zobabdari sorkittachea dekhrekh korpi bhavak asta.—1 Timotak 5:22 sor korat.

19. Vhoddil kitem zannant, ani te Paulu ani Barnabasachi dekh koxi ghetat?

¹⁹ Vhoddil bhav-bhoinnam sangata koxe vagtat tea vixim tannim Jehovak hixob diunk zai mhunn te zannant. (Heb. 13:17) Paulu ani Barnabasa bhaxen, te porgottnnechea kamant fuddakar ghetat, tanchea utramnim bhav-bhoinnank ghottai ditat ani apleo gorzo fattim dovrun sobhecheo gorzo poileo dovrunk te sodanch toiar astat.—Filp. 2:3, 4.

20. Amchea bhav-bhoinnanchea vavra vixim ami vachtat tednam amkam koso faido zata?

²⁰ Paulu ani Barnabas porot Siriechea Antiokant pavle tednam, “tannim sobhek ektthaim keli ani Devan tanchea udexim kelʼlea zaitea kamam vixim tankam sanglem. Toxench, Devan koxe toren Judev nhoi tea lokank bhavarth dovrunk vatt ukti keli tea vixim tankam sanglem.” (Itihas 14:27) Aizui amchim Kristi bhav-bhoinnam kortat tea vavra vixim ami vachtat ani Jehovan tanchea vavracher koxem besanv ghatlam tem polloitat tednam, ‘Jehovachea odhikaran bhienastana porgottit ravonk’ amkam urba melltta.