PELAJAR 12
“Ngena Kuasa ke Diberi Jehovah, Seduai Iya Ulih Bejaku enggau Berani”
Paul seduai Barnabas ngayanka pemaruh ati, pengeliat ati sereta pemerani
Bepelasarka Surat Kereja Rasul 14:1-28
1, 2. Nama sekeda utai ke nyadi lebuh Paul seduai Barnabas ba Listra?
ORANG ba Listra begau. Tu ketegal siku lelaki ke mati kaki kenyau ari ada engkejuk pengudah digeraika Paul enggau Barnabas. Orang amat tekenyit sereta alit ati. Siku imam mai sengkilung bungai ngagai Paul seduai Barnabas. Mayuh orang pechaya seduai iya petara. Bisi mega imam petara Seus mai sapi nyadika pemeri kena nyembah Paul enggau Barnabas. Taja pia, Paul enggau Barnabas enggai orang nyembah seduai iya. Ketegal nya, seduai iya pan nyarikka gari diri lalu belanda ngagai orang mayuh. Paul enggau Barnabas bebendar nagang sida ngambika enda nyembah seduai iya. Pengudah bebendar nagang sida, nya baru orang ba Listra badu deka nyembah seduai iya.
2 Udah nya, orang ke ngelaban orang Judah datai ngagai Listra. Sida tu datai ari Pisidia Antiok enggau Ikonium. Sida datai laban deka ngasut orang mayuh ba Listra. Ketegal nya, orang ba Listra nuku Paul ngena batu nyentukka iya luput. Pengudah nya, sida ngirit Paul pansut ari Listra laban sida ngumbai iya udah mati.
3. Nama sekeda tanya ke deka dikerandauka kitai ba pelajar tu?
3 Nama utai ke nyadi pengudah Paul dituku ngena batu? Nama ulih dipelajarka kitai ari utai ke nyadi ba Paul seduai Barnabas, sereta orang ba Listra? Pia mega, Paul enggau Barnabas nginjil ‘ngena kuasa ke diberi Jehovah, sereta bejaku enggau berani.’ (SKR. 14:3) Nya alai, baka ni bala tuai gempuru ulih neladan pengeliat ati Paul enggau Barnabas ba pengawa nginjil?
“Mayuh Orang . . . Arap” (Surat Kereja Rasul 14:1-7)
4, 5. Nama kebuah Paul enggau Barnabas ngagai Ikonium, lalu nama utai ke nyadi ba dia?
4 Beberapa hari sebedau nya, Paul seduai Barnabas dibai pansut ari nengeri Pisidia Antiok. Orang Judah ba dia ngelaban sereta ngenusahka pengawa seduai iya. Taja pia, seduai iya enda asa ati. Paul seduai Barnabas “nesai debu ari kaki seduai iya” laban orang ba dia enggai ningaka pesan ke dibai seduai iya. (SKR. 13:50-52; Mat. 10:14) Nya alai, Paul seduai Barnabas ninggalka Pisidia Antiok. Seduai iya ngawakka Petara ngakim orang ba dia. (SKR. 18:5, 6; 20:26) Seduai iya mengkang gaga ati neruska pengawa nginjil, lalu nyambung pejalai sida kira-kira 150 kilometer tunga ke tenggara. Udah nya, seduai iya datai ba endur ti bebukit ke bisi ba entara endur ke dikumbai Taurus enggau Sultan.
5 Terubah iya, Paul seduai Barnabas datai ba Ikonium. Orang ba Ikonium nitihka budaya Gerika. Pia mega, Ikonium nya siti ari nengeri ti penting ba Galatia. a Bisi mayuh orang Judah sereta sida ke megai pengarap Judah diau ba Ikonium. Baka ke suah digaga, Paul enggau Barnabas ngagai balai gempuru lalu berengkah nginjil. (SKR. 13:5, 14) “Seduai iya landik bejaku, nyentukka mayuh orang Judah enggau orang Gerika arap.”—SKR. 14:1.
6. Nama kebuah Paul seduai Barnabas ulih nyadi pengajar ti landik, lalu baka ni kitai ulih neladan seduai iya?
6 Nama kebuah chara Paul enggau Barnabas bejaku ulih narit minat orang? Paul nemu mayuh pasal jaku Petara. Ketegal penemu nya, iya landik nerangka sejarah, jaku benabi sereta Adat Moses. Iya nemu chara ngaitka semua topik nya ngambika ulih nunjukka bukti Jesus endang Messiah ti disemaya. (SKR. 13:15-31; 26:22, 23) Pia mega, chara Barnabas bejaku nunjukka iya amat ibuhka orang. (SKR. 4:36, 37; 9:27; 11:23, 24) Seduai iya enda bepanggai ba penemu diri empu, tang bejaku “ngena kuasa ke diberi Jehovah.” Baka ni nuan ulih neladan Paul seduai Barnabas ba pengawa nginjil? Nuan ulih nitihka sekeda chara tu: (1) Ngulihka penemu pasal Bup Kudus. (2) Pilih meh ayat Bup Kudus ke ulih nyapai ati bala peninga nuan. (3) Giga meh chara ngambika ulih ngelantangka ati peninga nuan. (4) Nuan patut nginjil ngena penemu ari Bup Kudus, ukai bepanggai ba penemu diri empu.
7. (a) Nama utai ke ulih nyadi ketegal pengawa nginjil pasal Berita Manah? (b) Nama patut dikingatka nuan enti sema ruang bilik nuan enda agi beserakup ketegal nuan milih deka ngasika pesan Berita Manah?
7 Kebendar iya, enda semua orang ba Ikonium rindu ningaka pesan ti dibai Paul seduai Barnabas. Ba senentang tu, Luke nulis: “Orang Judah ke enda arap ngasut orang ari bansa bukai ngambika ngelaban.” Taja pia, Paul seduai Barnabas nemu, seduai iya patut ngetanka Berita Manah lalu terus diau ba Ikonium. Nya alai, seduai iya “ngena mayuh awak . . . bejaku enggau berani.” Ketegal nya, “orang mayuh ba nengeri nya nyau bebagi nyadi dua raban. Sekeda nyukung orang Judah, lalu sekeda agi nyukung bala rasul nya.” (SKR. 14:2-4) Kemayaharitu, utai ti sama mega ulih nyadi ketegal pesan Berita Manah. Ba sekeda orang, pesan Berita Manah ulih mai penyerakup. Tang ba orang bukai, nya ulih ngasuh ruang bilik sida bepechah-belah. (Mat. 10:34-36) Ambika chunto, nuan engka milih deka ngasika pesan Berita Manah, lalu nya engka ngasuh ruang bilik nuan enda agi beserakup. Enti pia, ingat meh pekara tu. Pengawa sakal suah nyadi ketegal jaku petenah sereta jaku jai orang bukai. Taja pia, enti nuan mengkang ngetanka ulah ti manah, nya ulih nunjukka jaku orang enda betul. Lalu orang ke ngelaban nuan engka deka berubah.—1 Pet. 2:12; 3:1, 2.
8. Nama kebuah Paul enggau Barnabas ninggalka Ikonium, lalu nama ulih dipelajarka kitai ari utai ke digaga seduai iya?
8 Nyau kelama, orang ke ngelaban ba Ikonium ngaga pelan deka nuku Paul seduai Barnabas ngena batu. Pengudah seduai iya nemu pasal pelan tu, seduai iya ngaga pemutus deka ngagai endur bukai ngambika ulih nginjil. (SKR. 14:5-7) Kitai ke nyadi penginjil Berita Manah kemayaharitu mega deka nitihka teladan Paul enggau Barnabas. Kitai mega deka bejimat ngereja pengawa nginjil. Lebuh orang bejaku kasar enggau kitai, kitai deka bejaku enggau berani. (Plp. 1:7; 1 Pet. 3:13-15) Taja pia, enti kitai nemu orang bisi pelan deka ngemediska kitai, kitai enggai ngereja utai ti ulih nganu nyawa kitai enggau menyadi Kristian kitai.—J-lam. 22:3.
“Nyembah Petara ti Idup” (Surat Kereja Rasul 14:8-19)
9, 10. Listra bisi ba dini, lalu nama utai ke ditemu kitai pasal orang ke diau ba dia?
9 Paul seduai Barnabas ngagai Listra. Listra dipegai perintah Rome, lalu bisi ba kira-kira 30 kilometer ari begian barat daya Ikonium. Nengeri Listra bisi kaul ti manah enggau nengeri Pisidia Antiok. Ba dia bisi mayuh orang Judah. Tang, ba Listra mayuh orang ngena bansa jaku Gerika. Taja pia, sida ngena jaku Likonia kenyau ari ada. Orang ba Listra engka enda ngena bansa jaku Judah laban nadai balai gempuru ba dia. Nya alai, Paul seduai Barnabas nginjil ba endur orang mayuh. Lebuh ba Jerusalem suba, Peter kala ngeraika siku lelaki ke mati kaki kenyau ari ada. Lalu ba Listra, Paul mega ngeraika siku lelaki ke bisi penimpang ti sama. (SKR. 14:8-10) Ketegal kereja ajih ke digaga Peter, mayuh orang arap. (SKR. 3:1-10) Taja pia, kereja ajih ke digaga Paul ngasuh utai bukai nyadi.
10 Baka ke disebut ba pun pelajar tu, orang mayuh ba Listra salah faham lebuh sida meda lelaki ke mati kaki nya digeraika. Nya alai, sida ngumbai Barnabas nya Seus, iya nya ketuai ke semua petara. Lalu sida ngumbai Paul nya Hermis, iya nya anak Seus sereta pengari ke semua petara. (Peda kutak “ Listra enggau Jalai Pengarap ke Nyembah Seus sereta Hermis.”) Tang Barnabas seduai Paul deka orang nemu, sida bejaku sereta ngaga kereja ajih ngena kuasa Jehovah, ukai ngena kuasa petara ti pelesu.—SKR. 14:11-14.
‘Ninggalka utai ke nadai guna nya lalu nyembah Petara ti idup. Iya meh ke ngaga langit enggau dunya.’—Surat Kereja Rasul 14:15
11-13. (a) Nama utai ke dipadah Paul seduai Barnabas ngagai sida ke diau ba Listra? (b) Nama ulih dipelajarka kitai ari jaku Paul seduai Barnabas?
11 Taja pan enda senang, tang Paul seduai Barnabas agi bebendar ngiga chara nyapai ati bala peninga sida. Ba senentang tu, Luke bisi nulis pasal chara nginjil ngagai orang ke enda arap. Peratika meh utai ke disebut Paul seduai Barnabas ngagai bala peninga sida: “Nama kebuah kita ngereja semua tu? Kami pan mensia ke bisi pengelemi baka kita. Kami nusui Berita Manah ngagai kita, ngambika kita ninggalka utai ke nadai guna nya lalu nyembah Petara ti idup. Iya meh ke ngaga langit, dunya, tasik, enggau semua utai dalam nya. Ba rebak ke suba, taja pan Petara nejuka semua bansa ngereja utai nitihka peneka diri, tang Iya agi ngereja utai ti manah kena meri saksi pasal Diri Empu. Iya meri kita ujan ari langit sereta musin ti mansutka mayuh asil. Iya mega meri kita mayuh pemakai kena ngemuaska ati kita sereta ngasuh kita gaga ati.”—SKR. 14:15-17.
12 Nama ulih dipelajarka kitai ari jaku Paul seduai Barnabas? Kesatu, seduai iya enda ngumbai diri manah agi ari bala peninga sida. Tang, seduai iya baruh ati ngaku diri bisi pengelemi ti sama baka sida. Amat, Paul seduai Barnabas udah nerima kuasa kudus sereta dilepaska ari ajar ti pelesu. Seduai iya mega bisi peluang sama merintah enggau Jesus. Taja pia, Paul seduai Barnabas sedar, orang ba Listra pan ulih nerima berekat ti sama enti semua sida ngasika Jesus.
13 Nama runding ke patut dikembuan kitai pasal orang ke ditemu kitai ba pengawa nginjil? Kati kitai ngumbai sida sama aja enggau kitai? Lebuh kitai ngajar orang pasal Bup Kudus, kati kitai neladan Paul seduai Barnabas enggau enda ngemuliaka diri empu? Aram meh kitai beratika teladan Charles Taze Russell. Iya siku pengajar Bup Kudus ti amat manah. Iya ngiring pengawa nginjil ba ujung abad ke-19, sereta ba pun abad ke-20. Iya nulis: “Kami enggai orang meri mulia ngagai kami. Kami mega enggai orang kelalu balat muji litaricha ke ditulis sereta diasilka kami. Kami mega enggai dikumbai Paderi tauka Rabbi.” Ba senentang tu, menyadi Russell neladan pemaruh ati ke diayanka Paul enggau Barnabas. Sama mega, kitai nginjil ukai ketegal deka ngemuliaka diri empu. Tang, kitai deka nulung orang nyembah “Petara ti idup.”
14-16. Nama utai bukai ke ulih dipelajarka kitai ari jaku Paul seduai Barnabas ngagai orang Listra?
14 Tu meh utai ti kedua ke ulih dipelajarka kitai ari jaku Paul seduai Barnabas. Seduai iya nemu nelebaka diri nitihka siti-siti situasi. Nama kebuah kitai bejaku munyi nya? Perundingka tu, orang Judah enggau orang ke megai pengarap Judah ba Ikonium bisi penemu pasal jaku Petara. Taja pia, orang ba Listra enda nemu pasal jaku Petara tauka pasal kaul Petara enggau bansa Israel. Tang, sida ba Listra ngereja pengawa betanam betupi. Listra bisi tanah ti subur. Pia mega, gaya hari ba dia amat manah. Nya alai, orang ba Listra ulih meda bukti ti nunjukka Petara ke ngaga semua utai. Nambahka nya, sifat Petara ulih terang dipeda kelebih agi maya musin ngetau. Nya alai, Paul seduai Barnabas enggau orang ba Listra tentu setuju enggau pekara tu. Ketegal nya, seduai iya ulih narit minat orang Listra ngena topik ke sama dipechaya sida.—Rom. 1:19, 20.
15 Kati kitai mega ulih jampat nelebaka diri nitihka situasi orang ba endur kitai nginjil? Peratika chunto tu, siku pekebun engka nanam mayuh benih ti sama ba ladang iya. Taja pan iya nanam benih ti sama, tang iya patut ngena mayuh macham chara kena nyediaka tanah ke deka dikena. Ambika chunto, sekeda tanah engka ulih terus dikena nanam benih. Tang, tanah ke bukai engka patut disediaka enggau manah dulu sebedau dikena. Sama mega, kitai diatu benung nanam benih ti sama, iya nya pesan pasal Perintah Petara. Taja pia, kitai deka neladan Paul seduai Barnabas. Kitai deka nemu situasi sereta jalai pengarap ke dipegai orang ba endur kitai nginjil. Enggau nya, baru meh kitai ulih ngubah chara kitai nginjil nitihka situasi sida.—Luk. 8:11, 15.
16 Tu meh utai ti ketiga ke ulih dipelajarka kitai bekaul enggau utai ke nyadi ba Paul, Barnabas enggau sida ba Listra. Taja pan kitai udah bebendar, tang benih ke ditanam kitai engka dirampas tauka labuh ba tanah ti bebatu. (Mat. 13:18-21) Enti tu nyadi, anang meh putus asa! Tu meh utai ke dipadah Paul ngagai bala murid ba Rome, “Petara deka ngakim tiap iku kitai [tu nyengkaum tiap iku orang ke kala diajar kitai] nitihka pengawa ke udah digaga kitai.”—Rom. 14:12.
‘Seduai Iya Nyerahka Sida ngagai Jehovah’ (Surat Kereja Rasul 14:20-28)
17. Kini tunga pejalai Paul enggau Barnabas pengudah seduai iya ninggalka Derbe, lalu nama kebuah?
17 Paul diirit pansut ari Listra laban orang mayuh ngumbai iya udah mati. Nama nyadi pengudah nya? Bala murid begelumu ngelingi iya. Paul pan angkat lalu bemalam ba nengeri nya. Pengudah nya, Paul seduai Barnabas bejalai 100 kilometer ngagai Derbe. Pejalai nya tentu enda senang ba Paul laban iya baru udah dituku ngena batu. Taja pia, Paul seduai Barnabas tetap liat ati. Lebuh seduai iya datai ba Derbe, seduai iya nulung “mayuh orang nyadi murid Jesus.” Pengudah nya, seduai iya ngena jalai ti panjai agi lebuh pulai ngagai Siria Antiok. “Seduai iya pulai baru ngagai Listra, Ikonium, enggau [Pisidia] Antiok.” Nama tuju iya? Paul enggau Barnabas deka ‘ngeringka ati bala murid ba dia, lalu meransang sida ngambika pengarap sida mengkang tegap.’ (SKR. 14:20-22) Teladan Paul seduai Barnabas amat meransang! Seduai iya ngenuluka bala menyadi ba raban gempuru, ukai diri empu. Kemayaharitu, tuai ti ngabas sereta bala pengerintis ke dianjung indu opis bebendar deka nitihka teladan seduai iya.
18. Baka ni chara bala tuai gempuru dipilih?
18 Paul enggau Barnabas ngeringka bala murid nengah jaku sereta teladan. Seduai iya mega ngereja lebih ari nya. Bup Kudus madahka, Paul enggau Barnabas milih “bala tuai gempuru ke tiap iti raban gempuru.” Endang amat, pengawa pejalai nginjil Paul seduai Barnabas dikereja “nengah iring kuasa kudus Petara.” Taja pia, seduai iya agi besampi sereta bepasa. Bup Kudus madahka: “Seduai iya . . . nyerahka sida [bala tuai gempuru] ngagai Jehovah.” (SKR. 13:1-4; 14:23) Chara ti sama mega dititihka kemayaharitu. Sebedau milih siku menyadi lelaki nyadi tuai gempuru, bala tuai gempuru ke bukai patut besampi dulu. Udah nya, sida deka mansik syarat ke udah ditetapka Bup Kudus. Lalu sida deka beratika sekalika menyadi lelaki nya layak tauka enda. (1 Tim. 3:1-10, 12, 13; Tit. 1:5-9; Jas. 3:17, 18; 1 Pet. 5:2, 3) Bala tuai gempuru enda meda sekalika iya udah lama nyadi orang Kristian tauka enda. Tang sida meda baka ni kuasa kudus bekereja ba pengidup iya. Tu ulih dipeda nengah jaku, ulah enggau pemanah nama ke dikembuan iya ba mua orang mayuh. Enti menyadi lelaki nya nitihka syarat ke udah ditetapka Bup Kudus, nya baru iya ulih layak nyadi tuai gempuru. (Gal. 5:22, 23) Tuai ti ngabas bisi tanggungjawap milih menyadi lelaki ke layak nyadi tuai gempuru.—Bandingka 1 Timoti 5:22.
19. Bala tuai gempuru betanggungjawap ngagai sapa, lalu baka ni sida ulih neladan Paul enggau Barnabas?
19 Bala tuai gempuru betanggungjawap ngagai Petara. Nya alai, sida bebendar nyaga bala menyadi ba raban gempuru. (Heb. 13:17) Baka Paul enggau Barnabas, bala tuai gempuru kemayaharitu ngiring pengawa nginjil. Suba, Paul enggau Barnabas ngeringka bala murid nengah jaku sida. Lalu seduai iya mega ngenuluka utai ke diguna bala menyadi ba raban gempuru.—Plp. 2:3, 4.
20. Baka ni kitai deka ngulihka penguntung lebuh macha pasal pengawa ti digaga menyadi lelaki kitai?
20 Lebuh Paul seduai Barnabas pulai baru ngagai Siria ba Antiok, seduai iya madah “mayuh utai ke udah digaga Petara nengah seduai iya. Paul enggau Barnabas mega madah ngagai sida pasal Petara ke udah muka jalai, ngambika orang ari bansa bukai ulih arap.” (SKR. 14:27) Lebuh kitai macha pasal pengawa ke dikereja bala menyadi lelaki Kristian kitai, lalu meda chara Jehovah merekatka pengawa sida, kitai mega diperansang deka terus bejaku enggau berani ngena kuasa ke diberi Jehovah.
a Peda kutak “ Ikonium—Nengeri Orang Prigia.”
