တၢ်မၤလိ ၁၂
“ယဟိဝၤယွၤ ဟ့ၣ်စိဟ့ၣ်ကမီၤ အဝဲသ့ၣ်လၢ ကစံၣ်တဲၤတဲလီၤတၢ် ဒူဒူ”
စီၤပီလူး ဒီးစီၤဘၢ်နါဘၤ အိၣ်ဒီးတၢ်ဆီၣ်လီၤသး, တၢ်သးဒူ ဒီးတၢ်တူၢ်န့ၢ်ခီၣ်ကဲ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၄:၁-၂၈
၁, ၂. ဖဲစီၤပီလူး ဒီးစီၤဘၢ်နါဘၤ အိၣ်လၢ ဝ့ၢ်လူစတြၤအခါ တၢ်ကဲထီၣ်သးဒ်လဲၣ်.
လၢဝ့ၢ်လူစတြၤန့ၣ် တၢ်သီၣ်တၢ်သဲအါမး. ဖဲန့ၣ် ပိာ်ခွါလၢ ပှၤတသ့ၣ်ညါအီၤဘၣ်ခံဂၤ မၤဘျါက့ၤ ပိာ်ခွါလၢ အခီၣ်ဟးဂီၤလၢ အအိၣ်ဖျဲၣ်ထီၣ်အခါတဂၤ. ဒီးပိာ်ခွါတဂၤအံၤ ဟးသ့ထီၣ်က့ၤအဃိ အသူၣ်ခုသးခု ဒီးအဖုကဆဲးဝဲ. ပှၤဝ့ၢ်ဖိတဖၣ် ကမၢကမၣ်ဒိၣ်မး ဒီးဆိမိၣ်ဝဲလၢ ပှၤခံဂၤအံၤ ကဲဝဲယွၤတဖၣ်. ဒီးကစၢ်စူ အပှၤလုၢ်တၢ်ဒိၣ်တဂၤ ဟဲစိာ်ဝဲ ကျီၢ်ဖါတဖၣ် ဒီးဖီကွီၤတဖၣ် လၢပှၤပိာ်ခွါခံဂၤအံၤအဂီၢ်. ဖဲအဝဲသ့ၣ် ကမၤသံကျီၢ်ဖါ လၢကလုၢ်ထီၣ်တၢ်အဂီၢ်အခါ စီၤပီလူး ဒီးစီၤဘၢ်နါဘၤ ကိးပသူထီၣ် ဒီးတြီအဝဲသ့ၣ်. စီၤပီလူး ဒီးစီၤဘၢ်နါဘၤ ဖှီညာ်လီၤ အနီၢ်ကစၢ်ဆ့ကၤ ဒီးကရီဃ့ၢ်နုာ်ဝဲလၢ ပှၤဂီၢ်မုၢ်တဖၣ်အကျါ. ဒီးဒ်သိး ပှၤဂီၢ်မုၢ်တဘါထီၣ်အဝဲသ့ၣ် တဂ့ၤအဂီၢ် အဝဲသ့ၣ် ဘၣ်ဃ့ကညး ပှၤဂီၢ်မုၢ်ဖးနးညါ.
၂ လၢခံ ပှၤယူဒၤဖိလၢ အထီဒါတၢ်တဖၣ် လၢအအိၣ်လၢ ဝ့ၢ်အၣ်တံၤအီာ် လၢပံၤစံၤဒံ ဒီးဝ့ၢ်အံၤကနံၤန့ၣ် ဟဲတုၤဝဲ. အဝဲသ့ၣ်တဲအၢတဲသီ စီၤပီလူးဒီးစီၤဘၢ်နါဘၤ ဒီးကွဲန့ၢ်လွဲန့ၢ် ပှၤဂီၢ်မုၢ်တဖၣ်လၢ ဝ့ၢ်လူစတြၤ. အဃိ ပှၤဂီၢ်မုၢ်လၢ အဘၣ်သး ဘူၣ်ထီၣ်ဘါထီၣ် စီၤပီလူးန့ၣ် ခဲအံၤအဝဲသ့ၣ် ကဝီၤဃာ်စီၤပီလူး ဒီးကွံာ်အီၤလၢလၢၢ် တုၤလၢ အတနီၣ်သးလၢၤဘၣ်ညါ. စီၤပီလူး အလိၤထီၣ်လုးထီၣ်လါ ဒီးအလိၤသွံၣ်လီၤဝဲ. ပှၤဂီၢ်မုၢ်တဖၣ် ဆိမိၣ်ဝဲလၢ စီၤပီလူးသံလံအဃိ အဝဲသ့ၣ်တွံၢ်ထီၣ်ကွံာ် စီၤပီလူးလၢဝ့ၢ်ချၢ.
၃. လၢတၢ်မၤလိတခါအံၤန့ၣ် ပကတဲသကိး တၢ်သံကွၢ်မနုၤလဲၣ်.
၃ ဘၣ်မနုၤအဃိ တၢ်ကဲထီၣ်သးဒ်အံၤလဲၣ်. ဘၣ်ဃးဒီး တၢ်ကဲထီၣ်သးဒီး စီၤဘၢ်နါဘၤ, စီၤပီလူး ဒီးပှၤဝ့ၢ်ဖိလၢ အအိၣ်လၢ ဝ့ၢ်လူစတြၤန့ၣ် မုၢ်မဆါတနံၤအံၤ ပှၤစံၣ်တဲၤတဲလီၤ တၢ်သးခုကစီၣ်တဖၣ် မၤလိန့ၢ်ဘၣ် မနုၤလဲၣ်. စီၤဘၢ်နါဘၤ ဒီးစီၤပီလူးန့ၣ် “ယဟိဝၤယွၤ ဟ့ၣ်စိဟ့ၣ်ကမီၤ အဝဲသ့ၣ်လၢ ကစံၣ်တဲၤတဲလီၤတၢ် ဒူဒူ” ဒီးအဝဲသ့ၣ် ဆဲးစံၣ်တဲၤတဲလီၤတၢ်အဃိ တၢ်အိၣ်ဖှိၣ်သးပှၢ်တဖၣ် ကွၢ်လိအဝဲသ့ၣ် အဒိအတဲာ် ကသ့ဒ်လဲၣ်.—မၤတၢ် ၁၄:၃.
“ပှၤစူၢ်က့ၤနာ်က့ၤတၢ် ဒီဒူၣ်” (မၤတၢ် ၁၄:၁-၇)
၄, ၅. ဘၣ်မနုၤအဃိ စီၤပီလူး ဒီးစီၤဘၢ်နါဘၤ လဲၤဝဲလၢ ဝ့ၢ်အံၤကနံၤလဲၣ် ဒီးဖဲန့ၣ် တၢ်ကဲထီၣ်သးဒ်လဲၣ်.
၄ ပူၤကွံာ်စှၤကိာ်သီန့ၣ် စီၤပီလူး ဒီးစီၤဘၢ်နါဘၤ အိၣ်လၢရိမ့ၤအဝ့ၢ်အၣ်တံၤအီာ် လၢပံၤစံၤဒံအပူၤ. ဖဲန့ၣ်ပှၤယူဒၤဖိတနီၤ ထီဒါက့ၤအဝဲသ့ၣ် ဒီးနီဟးထီၣ်ကွံာ် အဝဲသ့ၣ်လၢဝ့ၢ်ချၢ. ပှၤဖဲန့ၣ်တဖၣ် တဘၣ်သးကနၣ် စီၤပီလူး ဒီးစီၤဘၢ်နါဘၤဘၣ်. ဘၣ်ဆၣ် အဝဲသ့ၣ် သးတဟးဂီၤဘၣ် ဒီး “တရုၤလီၤကွံာ် ဟီၣ်ခိၣ်ကမူၣ်လၢ အဝဲသ့ၣ်အခီၣ်လိၤ.” (မၤတၢ် ၁၃:၅၀-၅၂; မး ၁၀:၁၄) စီၤပီလူး ဒီးစီၤဘၢ်နါဘၤ ဟးထီၣ်ကွံာ်ဝဲဖဲန့ၣ်မုာ်မုာ် ဒီးအးလီၤဝဲ ပှၤထီဒါတၢ်တဖၣ်န့ၣ်လၢ ကစၢ်ယွၤအစုပူၤ. (မၤတၢ် ၁၈:၅, ၆; ၂၀:၂၆) တၢ်ကဲထီၣ်သး ဒ်လဲၣ်ဒ်လဲၣ်နာ်က့ စီၤပီလူး ဒီးစီၤဘၢ်နါဘၤ ဆဲးအိၣ်ဒီးတၢ်သးခု ဒီးဆဲးစံၣ်တဲၤတဲလီၤတၢ် မုာ်မုာ်. အဝဲသ့ၣ် လဲၤတၢ်လၢ မုၢ်ထီၣ်ကလံၤထံးတကပၤ ဒီးဟးဝဲလၢခီၣ် ကအိၣ်လၢ အမံးလာ် ၁၀၀ (၁၅၀ ကံလိမံထၢၣ်). ဒီးအဝဲသ့ၣ် လဲၤတုၤလၢ ထါရဲးဒီးစူလထဲ ကစၢၢ်ကလိကျါ ဒီးတၢ်လီၢ်ဖဲန့ၣ် ဟီၣ်ခိၣ်ညၣ်ဂ့ၤမး.
၅ တၢ်လီၢ်အဆိကတၢၢ်တတီၤလၢ စီၤပီလူး ဒီးစီၤဘၢ်နါဘၤ လဲၤဝဲန့ၣ် မ့ၢ်ဝဲဝ့ၢ်အံၤကနံၤ လၢအမ့ၢ် တၢ်လီၢ်လၢ ပှၤပာ်ဒိၣ်ကြံးအတၢ်ဆဲးတၢ်လၤ. ဒီးဝ့ၢ်အံၤ အကဲဝဲဝ့ၢ်အရ့ဒိၣ်တဖျၢၣ်လၢ အအိၣ်လၢ ကီၢ်ကလၤတံ အဟီၣ်ကဝီၤ လၢရိမ့ၤအတၢ်ပၢဖီလာ်. a ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိ အတၢ်ဘူၣ်တၢ်ဘါအပူၤန့ၣ် အိၣ်ဝဲဖဲ ဝ့ၢ်တဖျၢၣ်အံၤအပူၤအါမး. ဒီးစီၤပီလူး ဒီးစီၤဘၢ်နါဘၤ နုာ်လီၤလၢ ဘူၣ်ဘျီၣ်ပူၤ ဒီးစံၣ်တဲၤတဲလီၤတၢ် ဒ်အဝဲသ့ၣ် မၤညီနုၢ်ဝဲအသိး. (မၤတၢ် ၁၃:၅, ၁၄) အဝဲသ့ၣ် “စံၣ်တဲၤတဲလီၤတၢ် သ့သ့ဘၣ်ဘၣ်အဃိ ပှၤယူဒၤဖိ ဒီးပှၤကြံးဖိတဖၣ် ကဲထီၣ် ပှၤစူၢ်က့ၤနာ်က့ၤတၢ် ဒီဒူၣ်.”—မၤတၢ် ၁၄:၁.
၆. ဘၣ်မနုၤအဃိ စီၤပီလူး ဒီးစီၤဘၢ်နါဘၤ အတၢ်သိၣ်လိန့ၣ် ထုးန့ၢ်ပှၤသး ဒိၣ်မးလဲၣ် ဒီးပကွၢ်လိ အဝဲသ့ၣ်ကသ့ဒ်လဲၣ်.
၆ ဘၣ်မနုၤအဃိ စီၤပီလူး ဒီးစီၤဘၢ်နါဘၤ အတၢ်သိၣ်လိန့ၣ် ထုးန့ၢ်ပှၤသးဒိၣ်မးလဲၣ်. ပထံၣ်ဘၣ်လၢ စီၤပီလူးန့ၣ် အကဲပှၤလၢအသ့ၣ်ညါ လံာ်စီဆှံအဆၢဂ့ၤဂ့ၤ. ဒ်သိး ပှၤကနာ်လၢ ယ့ၣ်ၡူး မ့ၢ်ဝဲမ့းၡံအၤအဂီၢ် စီၤပီလူးတဲဖျါထီၣ်ဝဲ လံာ်စီဆှံအဆၢတဖၣ်, တၢ်စံၣ်စိၤတဲစိၤ, ဝံအတၢ်စံးပာ် ဒီးစီၤမိၤၡ့ အတၢ်သိၣ်တၢ်သီ သ့သ့ဘၣ်ဘၣ်. (မၤတၢ် ၁၃:၁၅-၃၁; ၂၆:၂၂, ၂၃) မ့မ့ၢ်လၢ စီၤဘၢ်နါဘၤန့ၣ် ဖဲအတဲတၢ်အခါ အတၢ်ကတိၤတဖၣ် ပာ်ဖျါထီၣ်လၢ အသးအိၣ်ပှၤဂၤ. (မၤတၢ် ၄:၃၆, ၃၇; ၉:၂၇; ၁၁:၂၃, ၂၄) သနာ်က့ စီၤပီလူး ဒီးစီၤဘၢ်နါဘၤန့ၣ် ဖဲအဝဲသ့ၣ် သိၣ်လိတၢ်အခါ အဝဲသ့ၣ် တသန့ၤသးလၢ အနီၢ်ကစၢ်တၢ်သ့တၢ်ဘၣ်ဘၣ်. ဘၣ်ဆၣ် အဝဲသ့ၣ်သိၣ်လိတၢ်ဒ် “ယဟိဝၤယွၤ ဟ့ၣ်စိဟ့ၣ်ကမီၤ” အဝဲသ့ၣ်အသိး. အဃိ ဖဲပစံၣ်တဲၤတဲလီၤတၢ်အခါ ပကွၢ်လိအဝဲသ့ၣ် သ့ခီဖျိ ပဃုသ့ၣ်ညါပာ်စၢၤ လံာ်စီဆှံအဆၢဂ့ၤဂ့ၤ ဒီးဃုထၢ လံာ်စီဆှံအဆၢလၢ ကထုးန့ၢ် ပှၤဒိကနၣ်တၢ်ဖိအသး. တကးဒံးဘၣ် ပကဘၣ်ဃုကျဲလၢ ပကဟ့ၣ်ဂံၢ်ဟ့ၣ်ဘါပှၤဂၤ ဒီးမၤမုာ်ထီၣ် အဝဲသ့ၣ်အသး. ဒီးဖဲပသိၣ်လိတၢ်အခါ ပတဘၣ် သန့ၤသးလၢ ပနီၢ်ကစၢ်အတၢ်သ့တၢ်ဘၣ်ဘၣ်, ဘၣ်ဆၣ် ပကဘၣ်သူ ကစၢ်ယွၤ အကလုၢ်ကထါ သ့သ့ဘၣ်ဘၣ်.
၇. (က) ခီဖျိလၢ တၢ်သးခုကစီၣ်အဃိ တၢ်မနုၤကဲထီၣ်သးသ့လဲၣ်. (ခ) နဘူၣ်ထီၣ်ဘါထီၣ် ယဟိဝၤယွၤအဃိ နဟံၣ်ဖိဃီဖိ မ့ၢ်ထီဒါနၤန့ၣ် နကဘၣ်သ့ၣ်နီၣ်ထီၣ် မနုၤလဲၣ်.
၇ စီၤလူၤကၣ် ပာ်ဖျါထီၣ်ဝဲလၢ ပှၤလၢအအိၣ်လၢ ဝ့ၢ်အံၤကနံၤန့ၣ် တကနၣ် စီၤပီလူး ဒီးစီၤဘၢ်နါဘၤ ကိးဂၤဒဲးဘၣ်. “ပှၤယူဒၤဖိလၢ အတစူၢ်က့ၤ နာ်က့ၤတၢ်ဘၣ်တဖၣ်န့ၣ် ထိၣ်ဟူးထိၣ်ဂဲၤထီၣ် ဒီးကွဲန့ၢ်လွဲန့ၢ်ဝဲ ပှၤကလုာ်အဂၤတဖၣ် ဒ်သိးကထီဒါ ဒီပုၢ်ဝဲၢ်တဖၣ်အဂီၢ်.” အဃိ ဒ်သိးစီၤပီလူး ဒီးစီၤဘၢ်နါဘၤ ကမၤစၢၤပှၤဂၤလၢ ကသ့ၣ်ညါထီၣ် တၢ်သးခုကစီၣ်အဂီၢ် အဝဲသ့ၣ်ကဘၣ် “ဆဲးအိၣ်ဖဲန့ၣ် ဖးယံာ်ညါဒီး . . . စံၣ်တဲၤတဲလီၤတၢ် ဒူဒူ.” လၢခံ ပထံၣ်ဘၣ်လၢ “ပှၤဝ့ၢ်ဖိတဖၣ် အသးတလီၤပလိာ် လိာ်အသးဘၣ်. အဝဲသ့ၣ်တနီၤ အိၣ်ဃူဝဲ ပှၤယူဒၤဖိ ဒီးအဂၤတနီၤန့ၣ် အိၣ်ဃူဝဲ တၢ်မၢဖိတဖၣ်.” (မၤတၢ် ၁၄:၂-၄) ဆၢကတီၢ်ခဲအံၤစ့ၢ်ကီး ပှၤတနီၤကနၣ်ဝဲ တၢ်သးခုကစီၣ် ဒီးတနီၤန့ၣ် တကနၣ်ဝဲဘၣ်. ပမ့ၢ်ကွၢ် ဘၣ်ဃးဒီး တၢ်သးခုကစီၣ်န့ၣ် ပှၤတနီၤကအိၣ်ဃူပှၤ ဒီးတနီၤန့ၣ် ကထီဒါပှၤ. (မး ၁၀:၃၄-၃၆) ခီဖျိလၢ နဘူၣ်ထီၣ်ဘါထီၣ် ယဟိဝၤယွၤအဃိ နဟံၣ်ဖိဃီဖိ ကထီဒါနၤ. ဘၣ်ဆၣ် နကဘၣ်သ့ၣ်နီၣ်ထီၣ်လၢ အဝဲသ့ၣ်ထီဒါနၤန့ၣ် ဘၣ်သ့ၣ်သ့ၣ် ကမ့ၢ်ခီဖျိလၢ အဝဲသ့ၣ်နာ်ဝဲ တၢ်လံၣ်တၢ်လီ လၢပှၤဂၤတဲဝဲ ဘၣ်ဃးဒီး ယဟိဝၤပှၤအုၣ်အသး. သနာ်က့ နသကဲာ်ပဝးလၢအဂ့ၤန့ၣ် ကမၤစၢၤအဝဲသ့ၣ်ဒ်သိး အကထံၣ်ဝဲလၢ တၢ်လၢပှၤဂၤတဲဝဲန့ၣ် တမ့ၢ်တၢ်မ့ၢ်တၢ်တီဘၣ် ဒီးဘၣ်သ့ၣ်သ့ၣ် လၢအခံန့ၣ် အဝဲသ့ၣ်ကဆီတလဲ အတၢ်ပာ်သူၣ်ပာ်သး.—၁ ပ့း ၂:၁၂; ၃:၁, ၂.
၈. ဘၣ်မနုၤအဃိ စီၤပီလူး ဒီးစီၤဘၢ်နါဘၤ ဟးထီၣ်ကွံာ်လၢ ဝ့ၢ်အံၤကနံၤလဲၣ် ဒီးပန့ၢ်ဘၣ် တၢ်မၤလိဒ်လဲၣ်.
၈ တယံာ်ဘၣ်ဘျီ ပှၤထီဒါတၢ်တဖၣ် လၢဝ့ၢ်အံၤကနံၤန့ၣ် ကူၣ်ထီၣ်ဝဲလၢ ကကွံာ်သံ စီၤပီလူး ဒီးစီၤဘၢ်နါဘၤ လၢလၢၢ်. ဖဲပှၤတဲဘၣ် စီၤပီလူး ဒီးစီၤဘၢ်နါဘၤ ဝံၤအလီၢ်ခံ အဝဲသ့ၣ်ဟးထီၣ်ဖဲန့ၣ် ဒီးလဲၤစံၣ်တဲၤတဲလီၤတၢ်လၢ တၢ်လီၢ်အဂၤတတီၤ. (မၤတၢ် ၁၄:၅-၇) ဆၢကတီၢ်ခဲအံၤစ့ၢ်ကီး ပှၤစံၣ်တဲၤတဲလီၤတၢ်ဖိတဖၣ် မၤတၢ်လၢတၢ်ကူၣ်သ့ဒ်န့ၣ်လီၤ. အဒိ ဖဲပှၤတဲအၢတဲသီပှၤ ဒီးတဲဟးဂီၤ ပတၢ်သးခုကစီၣ်အခါ ပတဲဆၢက့ၤအဝဲသ့ၣ်ဒူဒူ. (ဖံလံး ၁:၇; ၁ ပ့း ၃:၁၃-၁၅) ဘၣ်ဆၣ် ပှၤမ့ၢ်တဲပျံၤတဲဖုးပှၤ ဒီးကမၤအၢမၤသီပှၤန့ၣ် ပတဘၣ်မၤတၢ်လၢ ကဒုးအိၣ်ထီၣ် တၢ်လီၤဘၣ်ယိၣ်အလီၢ်လၢ ပသးသမူ ဒီးပဒီပုၢ်ဝဲၢ်မုၣ်ခွါ အသးသမူအဂီၢ် နီတမံၤဘၣ်.—ကတိၤ ၂၂:၃.
“ဘူၣ်ထီၣ်ဘါထီၣ်က့ၤ ကစၢ်ယွၤလၢအမူဝဲ” (မၤတၢ် ၁၄:၈-၁၉)
၉, ၁၀. ဝ့ၢ်လူစတြၤန့ၣ် အိၣ်ဖဲလဲၣ် ဒီးဘၣ်ဃးဒီး ပှၤအိၣ်ဖဲန့ၣ်တဖၣ်န့ၣ် ပသ့ၣ်ညါဘၣ် မနုၤလဲၣ်.
၉ စီၤပီလူး ဒီးစီၤဘၢ်နါဘၤ လဲၤဝဲလၢ ဝ့ၢ်လူစတြၤ လၢအအိၣ်လၢ မုၢ်နုာ်ကလံၤထံးတခီ ဒီးဝ့ၢ်အံၤအိၣ်လၢ ရိမ့ၤအတၢ်ပၢဖီလာ်. ဝ့ၢ်အံၤအယံၤဝဲဒီး ဝ့ၢ်အံၤကနံၤ အမံးလာ် ၂၀ (၃၀ ကံလိမံထၢၣ်). ဝ့ၢ်လူစတြၤန့ၣ် အတၢ်အိၣ်သး လီၤဂာ်ဒီး ဝ့ၢ်အၣ်တံၤအီာ် လၢအအိၣ်လၢ ပံၤစံၤဒံ ဘၣ်ဆၣ် လၢဝ့ၢ်လူစတြၤန့ၣ် ပှၤယူဒၤဖိ တအိၣ်အါအါဘၣ်. လီၤဂာ်လၢ ပှၤအိၣ်ဖဲန့ၣ်တဖၣ် တဲတၢ်အါလၢ ကြံးကျိာ် ဘၣ်ဆၣ် အဝဲသ့ၣ်အနီၢ်ကစၢ်ကျိာ်န့ၣ် မ့ၢ်ဝဲပှၤလူၤကီၤနံဖိ အကျိာ်. ဒီးဘၣ်သ့ၣ်သ့ၣ် ဝ့ၢ်တဖျၢၣ်အံၤန့ၣ် ဘူၣ်ဘျီၣ်တအိၣ်ဘၣ်အဃိ စီၤပီလူး ဒီးစီၤဘၢ်နါဘၤ စံၣ်တဲၤတဲလီၤတၢ်လၢ တၢ်ဆါတၢ်ပှ့ၤအလီၢ်. လၢညါ ဖဲစီၤပ့းတရူးအိၣ်လၢ ဝ့ၢ်ယရူၤၡလ့ၣ်အခါ အမၤဘျါက့ၤ ပိာ်ခွါလၢ အခီၣ်တဂ့ၤဘၣ်တဂၤ. မ့မ့ၢ်လၢ ဝ့ၢ်လူစတြၤန့ၣ် စီၤပီလူး မၤဘျါက့ၤ ပှၤလၢအခီၣ်တဂ့ၤဘၣ် စးထီၣ်လၢ အအိၣ်ဖျဲၣ်ထီၣ်လံၤလံၤလံ. (မၤတၢ် ၁၄:၈-၁၀) ခီဖျိလၢ စီၤပ့းတရူး မၤတၢ်လီၤလးအဃိ ပှၤအါဂၤကဲထီၣ် ပှၤစူၢ်က့ၤနာ်က့ၤတၢ်. (မၤတၢ် ၃:၁-၁၀) မ့မ့ၢ်တၢ်လီၤလးလၢ စီၤပီလူး မၤဝဲန့ၣ် တၢ်ကဲထီၣ်သး လၢအဂၤတမံၤဟီ.
၁၀ ပှၤလၢအအိၣ်လၢ ဝ့ၢ်လူစတြၤန့ၣ် အဝဲသ့ၣ် ဘူၣ်ထီၣ်ဘါထီၣ် ယွၤလၢအကမၣ်. အဃိ ဖဲအဝဲသ့ၣ်ထံၣ် ပှၤလၢအခီၣ်တဂ့ၤဘၣ်တဂၤ ဟးသ့ထီၣ်က့ၤအခါ အဝဲသ့ၣ် ဆိမိၣ်ဝဲတဘျီဃီလၢ စီၤပီလူး ဒီးစီၤဘၢ်နါဘၤန့ၣ် ကဲဝဲယွၤတဖၣ်. အဃိ အဝဲသ့ၣ်ကိးဝဲ စီၤဘၢ်နါဘၤလၢ ကစၢ်စူ လၢအမ့ၢ် ကြံးအယွၤတဖၣ်အခိၣ် ဒီးကိးစ့ၢ်ကီးဝဲ စီၤပီလူးလၢ ကစၢ်ဟ့ၢ်မ့ၤ လၢအကဲ ကစၢ်စူအဖိခွါ ဒီးအကဲပှၤလၢ အတဲန့ၢ်တၢ်လၢ ယွၤတဖၣ်အဂီၢ်. (ကွၢ်တၢ်လွံၢ်နၢၣ် လၢအမ့ၢ် “ ဝ့ၢ်လူစတြၤ ဒီးတၢ်စူၢ်တၢ်နာ် ဘၣ်ဃးဒီး ကစၢ်စူ ဒီးကစၢ်ဟ့ၢ်မ့ၤ.”) ဘၣ်ဆၣ် စီၤဘၢ်နါဘၤ ဒီးစီၤပီလူး ကျဲးစၢးတဲနၢ်ပၢၢ် ပှၤဂီၢ်မုၢ်တဖၣ်လၢ အဝဲသ့ၣ်တကဲယွၤဘၣ်. ဒီးတၢ်လၢအဝဲသ့ၣ် တဲဝဲဒီးမၤဝဲန့ၣ် တမ့ၢ်ယွၤလၢအကမၣ်တဖၣ် ဟ့ၣ်စိဟ့ၣ်ကမီၤ အဝဲသ့ၣ်ဘၣ်, ဘၣ်ဆၣ်အကဲဝဲ ယဟိဝၤယွၤ လၢအမ့ၢ် ယွၤလၢအမ့ၢ်အတီတဂၤ ဟ့ၣ်စိဟ့ၣ်ကမီၤအဝဲသ့ၣ်.—မၤတၢ် ၁၄:၁၁-၁၄.
“ပာ်တ့ၢ်ကွံာ် တၢ်ကလီကလီတဖၣ်အံၤ ဒီးဘူၣ်ထီၣ်ဘါထီၣ်က့ၤ ကစၢ်ယွၤလၢအမူဝဲ လၢအတ့လီၤ မူခိၣ်, ဟီၣ်ခိၣ်.”—မၤတၢ် ၁၄:၁၅
၁၁-၁၃. (က) စီၤပီလူး ဒီးစီၤဘၢ်နါဘၤ တဲဘၣ်ပှၤလၢအအိၣ်လၢ ဝ့ၢ်လူစတြၤလၢ တၢ်ဂ့ၢ်မနုၤလဲၣ်. (ခ) စီၤပီလူး ဒီးစီၤဘၢ်နါဘၤ အတၢ်ကတိၤန့ၣ် ပာ်ဖျါထီၣ်လၢ အဝဲသ့ၣ်အိၣ်ဒီးတၢ်ထံၣ်ဒ်လဲၣ် ဒီးပဟံန့ၢ်တၢ်မၤလိ ကသ့ဒ်လဲၣ်.
၁၁ ပှၤဖဲန့ၣ်တဖၣ် ဘူၣ်ထီၣ်ဘါထီၣ် ယွၤလၢအကမၣ်တဖၣ် သနာ်က့ စီၤပီလူး ဒီးစီၤဘၢ်နါဘၤ ကျဲးစၢး စံၣ်တဲၤတဲလီၤအဝဲသ့ၣ် ဒီးကျဲးစၢးတဲတၢ်လၢ ကထုးန့ၢ် အဝဲသ့ၣ်အသး. ဒီးစီၤလူၤကၣ် အတၢ်ကွဲးနီၣ် ဘၣ်ဃးဒီး တၢ်ဂ့ၢ်တခါအံၤ မၤစၢၤစ့ၢ်ကီးပှၤဒ်သိး ပကသ့ၣ်ညါလၢ ဖဲပစံၣ်တဲၤတဲလီၤ ပှၤလၢတကဲ ခရံာ်ဖိတဖၣ်အခါ ပကဘၣ်မၤဒ်လဲၣ်. အဒိ စီၤပီလူး ဒီးစီၤဘၢ်နါဘၤ ဃ့ကညးဝဲ ပှၤဖဲန့ၣ်တဖၣ်လၢ “သုမၤဒ်အံၤ ဘၣ်လဲၣ်. ပဝဲစ့ၢ်ကီးပမ့ၢ် ပှၤဟီၣ်ခိၣ်ဖိလၢအိၣ်ဒီး တၢ်ဂံၢ်စၢ်ဘါစၢ်တဖၣ် ဒ်သိးဒီးသုလီၤ. ဒီးပစံၣ်တဲၤတဲလီၤ တၢ်သးခုကစီၣ်လၢသုအိၣ် ဒ်သိး သုကပာ်တ့ၢ်ကွံာ် တၢ်ကလီကလီတဖၣ်အံၤ ဒီးဘူၣ်ထီၣ်ဘါထီၣ်က့ၤ ကစၢ်ယွၤလၢအမူဝဲ လၢအတ့လီၤ မူခိၣ်, ဟီၣ်ခိၣ်, ပီၣ်လဲၣ်ဒီး တၢ်အိၣ်လၢအပူၤခဲလၢာ် တဂၤန့ၣ်အဂီၢ်လီၤ. လၢအပူၤကွံာ်န့ၣ် အဝဲဟ့ၣ်အခွဲးလၢ ပှၤကလုာ်အဂၤတဖၣ် ကမၤတၢ်ဖဲအသးလီၤ. ဘၣ်ဆၣ် အဝဲဟ့ၣ် တၢ်အုၣ်အသး ဘၣ်ဃးဒီး အနီၢ်ကစၢ်အဂ့ၢ် ခီဖျိလၢ အဝဲမၤဂ့ၤတၢ်အဃိလီၤ. အဝဲဒုးစူၤလီၤတၢ်လၢ မူခိၣ်လၢသုဂီၢ် ဒီးဒုးသၣ်ထီၣ် တၤသူတၤသၣ် ဘၣ်ဆၢဘၣ်ကတီၢ်, အဝဲဟ့ၣ်သု တၢ်အီၣ်တၢ်အီ အါအါဂီၢ်ဂီၢ် ဒီးမၤပှဲၤသုသးလၢ တၢ်သူၣ်ဖှံသးညီ.”—မၤတၢ် ၁၄:၁၅-၁၇.
၁၂ စီၤပီလူး ဒီးစီၤဘၢ်နါဘၤ အတၢ်ကတိၤန့ၣ် ပာ်ဖျါထီၣ်လၢ အဝဲသ့ၣ်အိၣ်ဒီး တၢ်ထံၣ်ဒ်လဲၣ် ဒီးပဟံန့ၢ်တၢ်မၤလိ ကသ့ဒ်လဲၣ်. အဆိကတၢၢ်န့ၣ် စီၤပီလူး ဒီးစီၤဘၢ်နါဘၤ တဆိမိၣ်လီၤသးလၢ အဝဲသ့ၣ် ပတီၢ်ထီန့ၢ်ဒံး ပှၤဖဲန့ၣ်တဖၣ်ဘၣ်. အဝဲသ့ၣ်မၤဘျါက့ၤ ပိာ်ခွါလၢ အခီၣ်တဂ့ၤဘၣ်တဂၤ သနာ်က့ အဝဲသ့ၣ် တထံၣ်လီၤသးဒ်သိး အအိၣ်ဒီး တၢ်စိတၢ်ကမီၤ လီၤလီၤဆီဆီဘၣ်. ဘၣ်ဆၣ် အဝဲသ့ၣ် အိၣ်ဒီးတၢ်ဆီၣ်လီၤသး ဒီးတဲဝဲလၢ အကဲပှၤမုၢ်ဆ့ၣ်မုၢ်ဂီၤ ဒ်သိးဒီး ပှၤဖဲန့ၣ်တဖၣ် ဒီးအဝဲသ့ၣ်အိၣ်ဒီး တၢ်ဂံၢ်စၢ်ဘါစၢ်စ့ၢ်ကီး. စီၤပီလူး ဒီးစီၤဘၢ်နါဘၤန့ၣ် အဝဲသ့ၣ် န့ၢ်ဘၣ်သးစီဆှံ ဒီးအဝဲသ့ၣ် ထူၣ်ဖျဲးထီၣ်လၢ တၢ်စူၢ်တၢ်နာ်ကမၣ်. တကးဒံးဘၣ် အဝဲသ့ၣ် အိၣ်ဒီးတၢ်မုၢ်လၢ်လၢ ကပၢဃုာ်တၢ်ဒီး ယ့ၣ်ၡူးခရံာ် လၢမူခိၣ်. ဘၣ်ဆၣ် အဝဲသ့ၣ် သ့ၣ်ညါဝဲလၢ ပှၤလၢအအိၣ်လၢ ဝ့ၢ်လူစတြၤစ့ၢ်ကီး မ့ၢ်ဒိကနၣ် ယ့ၣ်ၡူးခရံာ်အကလုၢ်န့ၣ် အဝဲသ့ၣ်န့ၢ်ဘၣ် တၢ်ဟ့ၣ်တဖၣ်အံၤသ့.
၁၃ ပှၤလၢပစံၣ်တဲၤတဲလီၤတဖၣ်န့ၣ် ပထံၣ်အဝဲသ့ၣ်ဒ်လဲၣ်. မ့ၢ်ပထံၣ်အဝဲသ့ၣ် လီၤဆီန့ၢ်ဒံးပှၤဧါ. ဖဲပမၤစၢၤပှၤဂၤ ဒ်သိးကနၢ်ပၢၢ်ထီၣ် တၢ်မ့ၢ်တၢ်တီ လၢလံာ်စီဆှံပူၤအခါ မ့ၢ်ပဘၣ်သးလၢ ပှၤဂၤကပတြၢၤပှၤဧါ မ့တမ့ၢ် မ့ၢ်ပကွၢ်လိ စီၤပီလူး ဒီးစီၤဘၢ်နါဘၤ အတၢ်ပာ်သူၣ်ပာ်သးဧါ. ဘၣ်ဃးဒီး တၢ်ဂ့ၢ်အံၤန့ၣ် ဒီပုၢ်ဝဲၢ်ခွါခၠါ ထ့ရးစၢၤ လၢအတီခိၣ်ရိၤမဲ တၢ်စံၣ်တဲၤတဲလီၤတၢ်မၤဖဲ ၁၈၇၀ တုၤလၢ ၁၉၁၆ နံၣ်န့ၣ် အပာ်လီၤန့ၢ်ပှၤ တၢ်ဒိတၢ်တဲာ်ဂ့ၤမး. ဒီပုၢ်ဝဲၢ်ခွါခၠါ ထ့ရးစၢၤ တဲဝဲလၢ “ဘၣ်ဃးဒီး တၢ်လၢပကွဲး ဒီးပသိၣ်လိတဖၣ်န့ၣ် ပတဘၣ်သးလၢ ပှၤကပတြၢၤပှၤဘၣ်. ပတဘၣ်သးစ့ၢ်ကီးလၢ ပှၤကကိးပှၤလၢ သရၣ်ဒိၣ် မ့တမ့ၢ် ရၤဘံဘၣ်.” ပထံၣ်ဘၣ်လၢ ဒီပုၢ်ဝဲၢ်ခွါရးစၢၤန့ၣ် အအိၣ်ဒီး တၢ်ဆီၣ်လီၤသး ဒ်သိးဒီး စီၤပီလူး ဒီးစီၤဘၢ်နါဘၤ. ပဝဲစ့ၢ်ကီး ဖဲပစံၣ်တဲၤတဲလီၤတၢ်အခါ ပတဘၣ်သးလၢ ပှၤကပတြၢၤပှၤဘၣ်. ဘၣ်ဆၣ် ပဘၣ်သးလၢ ပှၤကပတြၢၤ ဒီးဘူၣ်ထီၣ်ဘါထီၣ် “ကစၢ်ယွၤလၢအမူဝဲ” တဂၤဟီ.
၁၄-၁၆. တၢ်မၤလိခံခါတခါ ဒီးသၢခါတခါလၢ ပန့ၢ်ဘၣ်လၢ စီၤပီလူး, စီၤဘၢ်နါဘၤ ဒီးပှၤလၢအအိၣ်လၢ ဝ့ၢ်လူစတြၤ အအိၣ်န့ၣ် မ့ၢ်မနုၤလဲၣ်.
၁၄ စီၤပီလူး ဒီးစီၤဘၢ်နါဘၤ အတၢ်ကတိၤန့ၣ် ပာ်ဖျါထီၣ်န့ၢ်ပှၤ တၢ်မၤလိခံခါတခါလၢ အဝဲသ့ၣ်ကဲပှၤလၢ အသးအိၣ်ဆီတလဲသး ဒ်တၢ်အိၣ်သးအိၣ်ဝဲအသိး. ပမ့ၢ်ကွၢ် ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤ လၢအအိၣ်လၢ ဝ့ၢ်အံၤကနံၤန့ၣ် အဝဲသ့ၣ်သ့ၣ်ညါဝဲ ကစၢ်ယွၤကလုၢ်ကထါ ဒီးကစၢ်ယွၤရ့ဒီး ပှၤအံၣ်စရ့လးဖိအဂ့ၢ်. မ့မ့ၢ်ပှၤလူစတြၤဖိတဖၣ်န့ၣ် အဝဲသ့ၣ်တသ့ၣ်ညါ တၢ်ဂ့ၢ်တဖၣ်န့ၣ်ဘၣ်. သနာ်က့ ပှၤလူစတြၤဖိတဖၣ်န့ၣ် အဝဲသ့ၣ်ကဲ ပှၤသူၣ်အီၣ်ဖျးအီၣ်တၢ်. ဒီးတၢ်လီၢ်ဖဲန့ၣ်န့ၣ် မူခိၣ်စူၤမၢ်မၢ်အဃိ ဟီၣ်ခိၣ်ညၣ်ဂ့ၤမး. ဒီးပှၤဖဲန့ၣ်တဖၣ် မ့ၢ်ကွၢ်ဝဲအတၢ်သူၣ်အီၣ်ဖျးအီၣ် ဖီထီၣ်သၣ်ထီၣ်န့ၣ် အဝဲသ့ၣ်ကထံၣ်ဘၣ် တၢ်အုၣ်သး ဘၣ်ဃးဒီး တၢ်ဘၣ်တ့ကစၢ် အတၢ်ဂ့ၤတၢ်ဝါဒီဒူၣ်. အဃိ စီၤပီလူး ဒီးစီၤဘၢ်နါဘၤ သူဝဲတၢ်အဒိတဖၣ်အံၤ ဒ်သိးကတဲတၢ်လၢ ကထုးန့ၢ်အပှၤဒိကနၣ်တၢ်ဖိ အသး.—ရိ ၁:၁၉,၂၀.
၁၅ ပဝဲစ့ၢ်ကီး ဖဲပစံၣ်တဲၤတဲလီၤတၢ်အခါ ပကဘၣ်ကဲပှၤလၢ အသးအိၣ်ဆီတလဲသး ဒ်တၢ်အိၣ်သးအိၣ်ဝဲအသိး. အဒိ ပှၤမၤစံာ်ဖိတဂၤ မ့ၢ်သူၣ်လီၤဝဲ တၢ်ချံထဲတကလုာ် လၢစံာ်ပျီအါဘ့ၣ်အပူၤသနာ်က့ စံာ်ပျီလၢ အဘၣ်ကတဲာ်ကတီၤပာ်ဝဲ တဘ့ၣ်ဘၣ်တဘ့ၣ်န့ၣ် တဒ်သိးလိာ်သးဘၣ်. ဘၣ်သ့ၣ်သ့ၣ် စံာ်ပျီတနီၤန့ၣ် ဟီၣ်ခိၣ်ညၣ်ကပုာ်လံအဃိ အဖှံလီၤတၢ်ချံန့ၢ်ဝဲ တဘျီဃီ. မ့မ့ၢ် စံာ်ပျီလၢအဂၤတနီၤန့ၣ် ဘၣ်သ့ၣ်သ့ၣ် အကဘၣ်မၤဘၣ်ဂီၢ်ထီၣ် ဒီးမၤကဖီထီၣ်ဟီၣ်ခိၣ်ညၣ် တစဲးဖိဒံး. ဒ်န့ၣ်အသိး တၢ်ချံလၢပဖှံလီၤ လၢအမ့ၢ် ဘီမုၢ်အတၢ်သးခုကစီၣ် လၢအအိၣ်လၢ လံာ်စီဆှံပူၤန့ၣ် တဆီတလဲ နီတဘျီဘၣ်. အဃိ ဖဲပစံၣ်တဲၤတဲလီၤတၢ်အခါ ပကဘၣ်ကွၢ်လိ စီၤပီလူး ဒီးစီၤဘၢ်နါဘၤ ဒီးဆိမိၣ်ထံ ပှၤလၢပစံၣ်တဲၤတဲလီၤအီၤတဖၣ် အတၢ်အိၣ်သး ဒီးအတၢ်စူၢ်တၢ်နာ်. ပမ့ၢ်မၤဒ်န့ၣ်မၣ် ပဆီတလဲ ပတၢ်စံၣ်တဲၤတဲလီၤ အကျိၤအကျဲ ဒ်တၢ်အိၣ်သးအိၣ်ဝဲအသိး ကညီ.—လူၤ ၈:၁၁, ၁၅.
၁၆ တၢ်မၤလိသၢခါတခါလၢ ပန့ၢ်ဘၣ်လၢ စီၤပီလူး, စီၤဘၢ်နါဘၤ ဒီးပှၤလၢအအိၣ်လၢ ဝ့ၢ်လူစတြၤ အအိၣ်န့ၣ် မ့ၢ်မနုၤလဲၣ်. ပသ့ၣ်ညါလၢ တဘျီတခီၣ် ပကျဲးစၢးအဂ့ၤကတၢၢ်လံ ဘၣ်ဆၣ် တၢ်ချံလၢ ပဖှံလီၤန့ၣ် အလီၤဘၣ်လၢ လၢၢ်အဖီခိၣ် မ့တမ့ၢ် ပှၤတဂၤဂၤဟံးထီၣ်ကွံာ်အီၤ. (မး ၁၃:၁၈-၂၁) တၢ်မ့ၢ်ကဲထီၣ်သးဒီးနၤ ဒ်န့ၣ်န့ၣ် တဘၣ်သးဟးဂီၤတဂ့ၤ. စီၤပီလူးဒုးသ့ၣ်နီၣ်ထီၣ် ယ့ၣ်ၡူးအပျဲၢ်အဘီၣ် လၢအအိၣ်လၢ ဝ့ၢ်ရိမ့ၤအပူၤ ဒီးတဲအဝဲသ့ၣ်လၢ “ပဝဲတဂၤစုာ်စုာ် [ဃုာ်ဒီး ပှၤလၢ ပတဲသကိး လံာ်စီဆှံဒီးအီၤတဖၣ်န့ၣ်] ပကဘၣ်ဟ့ၣ် တၢ်စံးဆၢလၢ ကစၢ်ယွၤအအိၣ်လၢ ပနီၢ်ကစၢ်.”—ရိ ၁၄:၁၂.
“စီၤပီလူးဒီး စီၤဘၢ်နါဘၤ အးလီၤ တၢ်အိၣ်ဖှိၣ်သးပှၢ်တဖၣ်အံၤလၢ ယဟိဝၤယွၤ” အစုပူၤ (မၤတၢ် ၁၄:၂၀-၂၈)
၁၇. စီၤပီလူး ဒီးစီၤဘၢ်နါဘၤ ဟးထီၣ်လၢ ဝ့ၢ်ဒ့ၢ်ဘ့ၤ ဒီးဆဲးလဲၤဝဲဖဲလဲၣ် ဒီးဘၣ်မနုၤအဃိလဲၣ်.
၁၇ ပှၤလၢအအိၣ်လၢ ဝ့ၢ်လူစတြၤ ဆိမိၣ်ဝဲလၢ စီၤပီလူးသံလံအဃိ အဝဲသ့ၣ် တွံၢ်ထီၣ်ကွံာ်အီၤ လၢဝ့ၢ်ချၢ. ဘၣ်ဆၣ် ယ့ၣ်ၡူးအပျဲၢ်အဘီၣ်တဖၣ် ဟဲမၤစၢၤစီၤပီလူး ဒီးဒုးအိၣ်အီၤ လၢဝ့ၢ်ပူၤတနၤ. လၢခံတနံၤန့ၣ် စီၤပီလူး ဒီးစီၤဘၢ်နါဘၤ လဲၤဝဲလၢဝ့ၢ်ဒ့ၢ်ဘ့ၤ လၢအယံၤဝဲ အမံးလာ် ၆၀ (၁၀၀ ကံလိမံထၢၣ်). ပထံၣ်ဘၣ်လၢ စီၤပီလူးန့ၣ် ပှၤကွံာ်အီၤဒီးလၢၢ် ပူၤကွံာ်တယံာ်ဒံးဘၣ်အဃိ လၢအတၢ်လဲၤတဘျီအံၤန့ၣ် အဘၣ်လဲၤဝဲ ကီကီခဲခဲ ဒီးအဘၣ်ကီၤတၢ်ဆါနးမး. သနာ်က့ စီၤပီလူး ဒီးစီၤဘၢ်နါဘၤ ဆဲးလဲၤတၢ် ဒီးဖဲအဝဲသ့ၣ် လဲၤတုၤလၢ ဝ့ၢ်ဒ့ၢ်ဘ့ၤအခါ အဝဲသ့ၣ်ဒုးကဲထီၣ် “ပှၤတနီၤလၢ ယ့ၣ်ၡူး အပျဲၢ်အဘီၣ်.” တကးဒံးဘၣ် တချုးလၢ အဝဲသ့ၣ် က့ၤကဒါလၢ အအိၣ်တၢ်လီၢ် လၢဝ့ၢ်အၣ်တံၤအီာ် လၢကီၢ်စူၤရံဒံးဘၣ်န့ၣ် “အဝဲသ့ၣ် ဟဲက့ၤလၢ ဝ့ၢ်လူစတြၤ, ဝ့ၢ်အံၤကနံၤ ဒီးဝ့ၢ်အၣ်တံၤအီာ် [လၢပံၤစံၤဒံ].” ဘၣ်မနုၤအဃိ အဝဲသ့ၣ်တက့ၤလိၤလိၤ လၢအဟံၣ် ဒီးလဲၤဝဲလၢ တၢ်လီၢ်တဖၣ်န့ၣ်လဲၣ်. အဝဲသ့ၣ်လဲၤဝဲဖဲန့ၣ်ဒ်သိး ကဒုးဆူၣ်ထီၣ် “ယ့ၣ်ၡူး အပျဲၢ်အဘီၣ်တဖၣ်အသး ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဆဲးအိၣ်ဒီး တၢ်နာ်လၢအဂၢၢ်အကျၢၤ.” (မၤတၢ် ၁၄:၂၀-၂၂) ပထံၣ်ဘၣ်လၢ စီၤပီလူး ဒီးစီၤဘၢ်နါဘၤ ပာ်လီၤတၢ်ဒိတၢ်တဲာ် ဂ့ၤမး. အဝဲသ့ၣ်လိၣ်ဘၣ် တၢ်မၤမုာ်ထီၣ်က့ၤနာ်က့ အဝဲသ့ၣ်ထံၣ်ဝဲလၢ အကဘၣ်မၤစၢၤတၢ်အိၣ်ဖှိၣ်န့ၣ် အရ့ဒိၣ်န့ၢ်တၢ်အဂၤဒံး. ဆၢကတီၢ်ခဲအံၤစ့ၢ်ကီး ကဝီၤအပှၤကွၢ်တၢ် ဒီးမံၤၡၢၤနရံၤတဖၣ် ကွၢ်လိဝဲ စီၤပီလူးဒီးစီၤဘၢ်နါဘၤ အဒိအတဲာ်.
၁၈. တချုးလၢ ပှၤဃုထီၣ် ဒီပုၢ်ဝဲၢ်ခွါတဂၤလၢ တၢ်အိၣ်ဖှိၣ်သးပှၢ်ဒံးဘၣ်န့ၣ် တၢ်အိၣ်ဖှိၣ်သးပှၢ်ကရူၢ် ဘၣ်မၤဝဲမနုၤလဲၣ်.
၁၈ စီၤပီလူး ဒီးစီၤဘၢ်နါဘၤ ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်ဖိလၢ အတၢ်ကတိၤ ဒီးအတၢ်မၤ တကးဒံးဘၣ် အဝဲသ့ၣ်ပာ်ထီၣ် “တၢ်အိၣ်ဖှိၣ်သးပှၢ်တဖၣ် လၢတၢ်အိၣ်ဖှိၣ် ကိးဖျၢၣ်ဒဲးအပူၤ.” ပထံၣ်ဘၣ်လၢ “သးစီဆှံ ဆှၢလီၤ” စီၤပီလူး ဒီးစီၤဘၢ်နါဘၤ လၢမံၤၡၢၤနရံၤ အတၢ်လဲၤ. သနာ်က့ ဖဲအဝဲသ့ၣ် “အးလီၤ တၢ်အိၣ်ဖှိၣ်သးပှၢ်တဖၣ်အံၤလၢ ယဟိဝၤယွၤ” အစုပူၤအခါ အဝဲသ့ၣ် ဃ့ထုကဖၣ်တၢ် ဒီးဒုၣ်တၢ်အီၣ်. (မၤတၢ် ၁၃:၁-၄; ၁၄:၂၃) ဆၢကတီၢ်ခဲအံၤစ့ၢ်ကီး ဖဲပှၤဃုထၢထီၣ် တၢ်အိၣ်ဖှိၣ်သးပှၢ်တဖၣ်အခါ ပှၤမၤဝဲဒ်န့ၣ်. အဒိ တချုးလၢ တၢ်အိၣ်ဖှိၣ်သးပှၢ်ကရူၢ် ဆၢတဲာ်ဝဲလၢ ဒီပုၢ်ဝဲၢ်ခွါတဂၤ ကဲထီၣ်တၢ်အိၣ်ဖှိၣ်သးပှၢ် န့ၢ်လံဧါ တန့ၢ်ဒံးဘၣ်ဧါအခါ အဝဲသ့ၣ်ဃ့ထုကဖၣ် ဒီးသမံသမိးဝဲလၢ မ့ၢ်ဒီပုၢ်ဝဲၢ်ခွါတဂၤအံၤ တုၤထီၣ်ထီၣ်ဘး လၢကကဲထီၣ် တၢ်အိၣ်ဖှိၣ်သးပှၢ် ဒ်လံာ်စီဆှံ ပာ်ဖျါထီၣ်ဝဲ အသိးလံဧါ. (၁ တံၤ ၃:၁-၁၀, ၁၂, ၁၃; တံတူး ၁:၅-၉; ယၤ ၃:၁၇, ၁၈; ၁ ပ့း ၅:၂, ၃) ဒီးဖဲအဝဲသ့ၣ် သမံသမိး ဒီပုၢ်ဝဲၢ်ခွါတဂၤအံၤ အဂ့ၢ်အခါ အဝဲသ့ၣ်တကွၢ်ဝဲလၢ အအိၣ်လၢ တၢ်မ့ၢ်တၢ်တီအပူၤ ယံာ်ထဲလဲၣ်လံန့ၣ်ဘၣ်. ဘၣ်ဆၣ် အဝဲသ့ၣ်ကွၢ်ဝဲလၢ အသကဲာ်ပဝး, အတၢ်ကတိၤ ဒီးအတၢ်အိၣ်ထီၣ်အိၣ်လီၤန့ၣ် ပာ်ဖျါထီၣ်လၢ အအိၣ်မူဒ် သးစီဆှံ ဟံးစုနဲၣ်ကျဲအီၤ အသိးဧါ. ဒီးအဝဲသ့ၣ်ကွၢ်ဝဲလၢ ဒီပုၢ်ဝဲၢ်ခွါလၢ အကကဲထီၣ် တၢ်အိၣ်ဖှိၣ်သးပှၢ်တဂၤအံၤ အိၣ်ဒီးတၢ်ဂ့ၤတၢ်ဝါ ဒ်လံာ်စီဆှံပာ်ဖျါထီၣ်ဝဲ အသိးဧါ. (ကလၤ ၅:၂၂, ၂၃) ဝံၤဒီး ကဝီၤအပှၤကွၢ်တၢ် မ့ၢ်ထံၣ်ဝဲလၢ ဒီပုၢ်ဝဲၢ်ခွါတဂၤအံၤ တုၤထီၣ်ထီၣ်ဘးလၢ ကကဲထီၣ် တၢ်အိၣ်ဖှိၣ်သးပှၢ်လံန့ၣ် ကဝီၤအပှၤကွၢ်တၢ် ကပာ်ထီၣ်အီၤလၢ တၢ်အိၣ်ဖှိၣ်သးပှၢ်.—ထိၣ်သတြီၤဒီး ၁ တံၤ ၅:၂၂.
၁၉. တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အကဘၣ်ဟ့ၣ် တၢ်စံးဆၢလၢ မတဂၤလဲၣ် ဒီးအဝဲသ့ၣ်ကွၢ်လိ စီၤပီလူး ဒီးစီၤဘၢ်နါဘၤဒ်လဲၣ်.
၁၉ တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အဝဲသ့ၣ်ရ့ဒီးတၢ်အိၣ်ဖှိၣ်ဖိ ဒ်လဲၣ်ဒ်လဲၣ်န့ၣ် ယဟိဝၤယွၤထံၣ်ဝဲ ဒီးအဝဲသ့ၣ် ကဘၣ်ဟ့ၣ် တၢ်စံးဆၢလၢ ယဟိဝၤယွၤ. (ဧ့ၤ ၁၃:၁၇) ဒီးဒ်စီၤပီလူး ဒီးစီၤဘၢ်နါဘၤအသိး တၢ်အိၣ်ဖှိၣ်သးပှၢ်တဖၣ် ပာ်လီၤတၢ်ဒိတၢ်တဲာ်လၢ တၢ်စံၣ်တဲၤတဲလီၤအဂီၢ်စ့ၢ်ကီး. တကးဒံးဘၣ် အဝဲသ့ၣ်ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်ဖိ ဒီးထံၣ်ဝဲလၢ အကဘၣ်မၤစၢၤ တၢ်အိၣ်ဖှိၣ်ဖိတဖၣ်န့ၣ် အရ့ဒိၣ်ဒိၣ်မး.—ဖံလံး ၂:၃, ၄.
၂၀. ပမ့ၢ်ဖး ဒီပုၢ်ဝဲၢ်မုၣ်ခွါ လၢအသးတီတဖၣ် အတၢ်လဲၤခီဖျိအဂ့ၢ်အခါန့ၣ် ပကန့ၢ်ဘၣ် အဘျုးဒ်လဲၣ်.
၂၀ ဖဲစီၤပီလူး ဒီးစီၤဘၢ်နါဘၤ လဲၤဝဲမံၤၡၢၤနရံၤ အတၢ်လဲၤဝံၤဒီး ဟဲက့ၤလၢ ဝ့ၢ်အၣ်တံၤအီာ် လၢကီၢ်စူၤရံအခါ အဝဲသ့ၣ်တဲဖျါထီၣ်ဝဲ “တၢ်အါမံၤလၢ ကစၢ်ယွၤမၤဝဲ ခီဖျိအဝဲသ့ၣ် ဒီးတဲဖျါထီၣ်စ့ၢ်ကီးလၢ ကစၢ်ယွၤ အိးဟိထီၣ်ကျဲ ဒ်သိး ပှၤကလုာ်တဖၣ် ကစူၢ်က့ၤနာ်က့ၤတၢ် အဂီၢ်.” (မၤတၢ် ၁၄:၂၇) ဆၢကတီၢ်ခဲအံၤစ့ၢ်ကီး ဖဲပဖးဒီပုၢ်ဝဲၢ်မုၣ်ခွါ လၢအသးတီတဖၣ် အတၢ်လဲၤခီဖျိအဂ့ၢ်အခါန့ၣ် ပကထံၣ်ဘၣ်လၢ “ယဟိဝၤယွၤ ဟ့ၣ်စိဟ့ၣ်ကမီၤ အဝဲသ့ၣ်လၢ ကစံၣ်တဲၤတဲလီၤတၢ် ဒူဒူ” ဒီးဆိၣ်ဂ့ၤ အဝဲသ့ၣ်တၢ်မၤ. အဃိ ပကဘၣ်ကွၢ်လိ အဝဲသ့ၣ်အဒိအတဲာ် ဒီးဆဲးစံၣ်တဲၤတဲလီၤတၢ် ဒူဒူ.
a ကွၢ်တၢ်လွံၢ်နၢၣ် လၢအမ့ၢ် “ ဝ့ၢ်အံၤကနံၤ မ့ၢ်ဝဲ ပှၤဖြူၤကံဖိ အဝ့ၢ်.”
