1, 2. San e psa te Paulus nanga Barnabas de na ini Listra?

 WAN bigi dyugudyugu de na Listra. Wan man di malengri sensi di a gebore e dyompo lontu fu prisiri, baka di tu man di a no sabi meki a kon betre. Den sma no man bribi san den e si èn wan priester fu Seus e tyari kransi kon gi den tu man disi fu di den sma e denki taki den na gado. Mankaw e bro tranga èn den e meki babari te a priester e sreka den fu srakti den. Paulus nanga Barnabas e bari den sma fu no du den sani disi. Den e priti den krosi, den e dyompo go na mindri den sma èn den e aksi den fu no anbegi den. Nanga bun furu muiti den man tapu den sma fu no du dati.

² Ne Dyu gensman fu Antiokia na ini Pisidia èn fu Ikoniyum e doro drape. Den e taki wan lo ogr’ati lei fu drai na ede fu den sma fu Listra. Den ip’ipi sma di ben de klarklari fu anbegi Paulus e lontu en now èn den e fringi ston na en tapu teleki a flaw. Te den kba puru atibron na tapu Paulus, den e srepi en nanga ala kot’koti na en skin go na dorosei fu a foto èn den e libi en drape fu di den prakseri taki a dede.

3. Na sortu aksi wi o poti prakseri na ini a kapitel disi?

³ Fa a du kon taki den kfalek sani disi pasa? San preikiman fu a bun nyunsu na ini a ten disi kan leri fu den sani di psa nanga Barnabas, Paulus èn nanga den sma fu Listra di ben kenki den prakseri so esi? Barnabas nanga Paulus ben e hordoro na ini a preikiwroko èn „Yehovah ben gi den dek’ati fu taki nanga den sma sondro fu frede” (Tori 14:3). Fa Kresten owruman kan teki na eksempre fu den ret’ati man disi?

4, 5. Fu san ede Paulus nanga Barnabas go na Ikoniyum èn san psa drape?

⁴ Wan tu dei na fesi, sma ben yagi Paulus nanga Barnabas kmoto na ini a Rome foto Antiokia di de na ini Pisidia, baka di Dyu gensman sutu faya gi den sma fu a foto. Ma na presi taki den tu man disi las’ati, den „naki a doti puru fu den futu” leki wan warskow gi den sma fu a foto di no ben wani arki a bun nyunsu (Tori 13:50-52; Mat. 10:14). Paulus nanga Barnabas gwe sondro fu meki trobi èn den libi den gensman gi Gado (Tori 18:5, 6; 20:26). Den tu zendeling disi go doro nanga a preikiwaka fu den sondro fu lasi prisiri. Den waka sowan 150 kilometer go na zuid-owstusei èn den doro wan plata bergi pe a gron ben fatu. A plata bergi disi ben de na mindri den bergikontren fu Taurus nanga Sultan.

⁵ Paulus nanga Barnabas go fosi na Ikoniyum, wan fu den moro prenspari foto fu Galasia, wan kontren na ini a Gran Kownukondre Rome. Aladi Ikoniyum ben de wan kontren fu Rome, tog a Griki kulturu ben de prenspari drape. a Soleki fa Paulus nanga Barnabas ben gwenti du, dan den go na ini wan snoga èn den bigin preiki (Tori 13:5, 14). „A fasi fa den ben e taki meki taki wan bigi grupu Dyu nanga Grikisma tron bribiman.”​—Tori 14:1.

6. San meki taki Paulus nanga Barnabas ben de bun leriman èn fa wi kan teki na eksempre fu den?

⁶ Fu san ede den sani di Paulus nanga Barnabas taki, ben abi so furu krakti na tapu sma? Paulus ben sabi den Buku fu Bijbel heri bun. Na wan koni fasi a ben taki fu a historia, fu profeititori èn fu a Wet di Gado gi Moses. A ben du disi fu sori taki Yesus na a pramisi Mesias (Tori 13:15-31; 26:22, 23). A fasi fa Barnabas ben taki nanga sma ben sori taki a lobi den (Tori 4:36, 37; 9:27; 11:23, 24). Nowan fu den man disi ben e fertrow na tapu en eigi ferstan, ma den ben e taki fu di „Yehovah ben gi den dek’ati” fu du dati. Fa yu kan teki na eksempre fu den zendeling disi te yu e preiki? Te yu e du den sani disi: Sorgu taki yu kon sabi Gado Wortu bun. Leisi noso taki fu Bijbeltekst di o naki na ati fu yu arkiman. Suku bun fasi fa yu kan trowstu den sma di yu e preiki gi. Te yu e gi leri, dan du dati ala ten nanga yepi fu Yehovah en Wortu, no nanga yu eigi koni.

7. (a) Sortu bakapisi a bun nyunsu abi? (b) Efu yu famiri prati fu di yu e gi yesi na a bun nyunsu, dan san yu musu hori na prakseri?

⁷ Ma a no ala sma na Ikoniyum ben breiti fu yere san Paulus nanga Barnabas ben abi fu taki. Lukas e taki: „Den Dyu di no ben e  bribi, bigin meki wan lo dyugudyugu èn den meki den trakondre sma ati bron tapu den brada.” Paulus nanga Barnabas ben si taki a ben de fanowdu fu tan drape èn fu opo taki gi a bun nyunsu. Den „tan drape wan heri pisi ten” èn „Yehovah ben gi den dek’ati fu taki nanga den sma sondro fu frede”. A bakapisi ben de taki „wan prati ben kon na mindri den sma na ini a foto. Sonwan fu den ben teki a sei fu den Dyu èn trawan ben teki a sei fu den apostel” (Tori 14:2-4). Na ini a ten disi wan srefi sortu sani e psa te wi e preiki a bun nyunsu. Gi son sma a de wan krakti di e meki sma kon de wán èn gi trawan a e tyari pratifasi kon (Mat. 10:34-36). Efu yu famiri prati fu di yu e gi yesi na a bun nyunsu, dan hori na prakseri taki nofo tron sma e gens yu fu di den yere wan taktaki di no tru noso fu di sma e ferteri den soso ogr’ati lei fu wi. A moi fasi fa yu e tyari yusrefi kan sori taki den sani di sma e taki no tru. Te fu kba a kan safu na ati fu den sma di e gens yu.​—1 Petr. 2:12; 3:1, 2.

8. Fu san ede Paulus nanga Barnabas gwe libi Ikoniyum èn san wi kan leri fu na eksempre fu den?

⁸ Baka wan pisi ten den gensman na Ikoniyum meki mofo fu ston Paulus nanga Barnabas kiri. Di den tu zendeling disi kon yere a tori, den besroiti fu go preiki na ini wan tra kontren (Tori 14:5-7). Kownukondre preikiman na ini a ten disi e du a srefi koni sani disi. Te sma e kosi wi, te den e ferteri ogr’ati lei fu wi, noso te den gi wi por’nen, dan wi e opo taki sondro fu frede (Fil. 1:7; 1 Petr. 3:13-15). Ma te sma e suku fu du wi ogri, dan wi musu luku bun taki wi no du wan don sani di kan meki wi, noso wi Kresten brada nanga s’sa kisi mankeri.​—Odo 22:3.

9, 10. Pe Listra ben de èn san wi sabi fu den sma fu a foto disi?

⁹ Paulus nanga Barnabas go na Listra, wan kontren na ini a Gran Kownukondre Rome, sowan 30 kilometer na zuidwest-sei fu Ikoniyum. Furu sani na ini Listra ben de a srefi leki Antiokia na ini Pisidia, ma wan sani di ben de tra fasi na taki yu no ben abi furu Dyu na Listra. Aladi a kan taki den sma fu Listra ben e taki Grikitongo, tòg a mamatongo fu den ben de Likaoniatongo. Kande a foto no ben abi wan snoga èn dati meki Paulus nanga Barnabas bigin preiki na wan presi pe furu sma ben gwenti kon. Di Petrus ben de na ini Yerusalem, a meki wan man di ben malengri sensi di a gebore, kon betre. A wondru di Petrus du meki taki wan bigi grupu sma tron bribiman (Tori 3:1-10). Di Paulus ben de na Listra, a dresi wan man tu di ben lan sensi di a gebore (Tori 14:8-10). Ma a wondru di Paulus du, meki taki sani waka heri tra fasi.

¹⁰ Soleki fa skrifi na a bigin fu a kapitel disi, dan di a malengri man dyompo opo èn a bigin waka, den sma fu Listra di ben e anbegi falsi gado, wantewante kon denki wan heri tra sani. Barnabas den kari Seus, na edeman fu den gado, èn Paulus den kari Hermes, a manpkin fu Seus èn a takiman fu den gado. (Luku a faki di nen „ Listra, a foto pe sma ben e anbegi Seus nanga Hermes”.) Ma Barnabas nanga Paulus ben abi a fasti bosroiti fu meki den sma kon ferstan taki san den taki èn du, no ben de nanga yepi fu falsi gado, ma nanga yepi fu Yehovah, a wan-enkri tru Gado.​—Tori 14:11-14.

11-13. (a) San Paulus nanga Barnabas taigi den sma fu Listra? (b) San na wan sani di wi kan leri fu den sani di Paulus nanga Barnabas taki?

 ¹¹ Aladi wan lo span sani ben psa, tòg Paulus nanga Barnabas ben e du ala san den ben man fu doro na ati fu den arkiman fu den. A pisi tori disi di Lukas skrifi dyaso, e sori wi wan heri bun fasi fa wi kan preiki a bun nyunsu gi sma di e anbegi falsi gado. Luku san Paulus nanga Barnabas taki fu naki na ati fu den arkiman fu den: „Fu san ede unu e du den sani disi? Wi na libisma tu di abi den srefi swakifasi leki unu. Wi e ferteri unu a bun nyunsu, so taki unu kan drai baka gi den soso sani disi èn anbegi a libilibi Gado di meki hemel, grontapu, a se nanga ala sani na ini. Na ini a ten di psa, a gi pasi taki ala pipel ben kan du san den wani. Ma tòg Gado meki unu kon sabi en fu di a e du bun sani gi unu. A e gi unu alen kmoto fu hemel èn a meki den gron fu unu gi furu n’nyan. Na so unu man nyan un bere furu èn unu e firi prisiri.”​—Tori 14:15-17.

¹² San wi kan leri fu den wortu disi di e meki sma denki dipi fu sani? A fosi sani na taki Paulus nanga Barnabas no ben denki taki den ben betre moro den arkiman fu den. Den no ben e du neleki den na gado. Na presi fu dati, den sori sakafasi èn den taigi den arkiman fu den, di ben e anbegi falsi gado, taki den abi den srefi swakifasi leki den. A tru taki santa yeye ben kon na tapu Paulus nanga Barnabas èn den no ben poti bribi moro na ini falsi leri. Boiti dati, Gado ben blesi den nanga a howpu fu tiri makandra nanga Krestes. Ma den ben sabi tu taki den sma fu Listra ben o man kisi den srefi blesi dati te den ben o gi yesi na Krestes.

¹³ Fa wi musu si den sma di wi e preiki gi? Wi e si den leki sma di de neleki wi? Wi e teki na eksempre fu Paulus nanga Barnabas te wi e yepi trawan fu kon sabi den tru tori fu Gado Wortu? Wi e du neleki den, fu di wi no e suku fu meki sma prèise wi tumsi? Charles Taze Russell ben de wan heri bun leriman èn a ben e teki fesi na ini a preikiwroko na ini a lasti pisi fu a di fu 19 yarihondro èn na a bigin fu a di fu 20 yarihondro. A ben gi wi wan bun eksempre na ini a tori disi. A taki: „Wi no wani meki sma gi wi glori noso grani gi san wi e du noso gi san wi e skrifi. Wi no wani meki sma kari wi Pater, Domri noso Rabi.” Brada Russell ben sori sakafasi neleki Paulus nanga Barnabas. Na so a de tu taki wi no musu preiki fu suku glori gi wisrefi, ma fu yepi sma fu anbegi „a libilibi Gado”.

14-16. Sortu tra sani wi kan leri fu den sani di Paulus nanga Barnabas taigi den sma fu Listra?

¹⁴ Luku wan di fu tu sani di wi kan leri fu den sani di Paulus nanga Barnabas taki. Den ben man fiti densrefi na difrenti situwâsi.  Den Dyu nanga den sma di ben teki a Dyu bribi èn di ben e libi na Ikoniyum, ben sabi Bijbel noso den sani di Gado ben du gi a pipel Israel. Ma den sma fu Listra ben sabi pkinso nomo fu den sani disi noso den no ben sabi noti srefi. Awansi fa a no fa, den sma di ben e arki Paulus nanga Barnabas ben tan na ini wan kontren pe sma ben e prani gron. A weer na Listra no ben faya noso kowru tumsi èn a gron drape ben fatu. Den sma drape ben man si furu sani di ben sori den fa a Mekiman de. Den ben man si sani soleki den bun ten fu a yari di e meki taki furu n’nyan e gro. Den zendeling ben taki fu den sani disi di den arkiman ben sabi kba, so taki den ben man hari a prakseri fu den.​—Rom. 1:19, 20.

¹⁵ Wi kan fiti wisrefi tu neleki den? Aladi wan gronman kan prani a srefi sortu siri na difrenti gron fu en, tòg a kan gebroiki difrenti fasi fu sreka a doti. Kande a doti fu wan pisi gron lus’lusu kba èn a bun fu prani a siri drape. Ma gi tra pisi gron a gronman abi moro ten fanowdu fu sreka a doti. Na so a siri di wi e prani na a srefi ala ten. A siri dati na a Kownukondre boskopu di de fu feni na ini Gado Wortu. Ma efu wi de leki Paulus nanga Barnabas, dan wi o pruberi fu kon ferstan a situwâsi fu den sma di wi e preiki gi èn wi o kon ferstan tu sortu bribi den abi. Te wi sabi den sani disi, dan dati o yepi wi fu fiti a fasi fa wi e preiki a Kownukondre boskopu na den sma.​—Luk. 8:11, 15.

¹⁶ Wi kan leri wan di fu dri sani fu a tori di abi fu du nanga Paulus, Barnabas nanga den sma fu Listra. Awansi wi e du ala san wi man, tòg son leisi a siri di wi prani e hari puru noso a e fadon na tapu ston-gron (Mat. 13:18-21). Efu a sani dati e psa, dan no las’ati. Neleki fa Paulus ben taigi den disipel na Rome bakaten, dan „ibriwan fu wi [sosrefi ibri sma di wi fruteri sani fu Gado Wortu] o abi fu gi Gado frantwortu fu den sani di a du”.​—Rom. 14:12.

17. Pe Paulus nanga Barnabas go, baka di den kmoto na Derbe èn fu san ede den du dati?

¹⁷ Baka di sma srepi Paulus go na dorosei fu Listra èn den libi en drape fu di den prakseri taki a dede, den disipel kon tnapu na en lontu. A opo tnapu èn a feni wan presi na ini a foto fu tan a neti dati. A dei na en baka, Paulus nanga Barnabas bigin teki waka fu go na Derbe di ben de 100 kilometer moro fara. Wi no man kba ferstan fa Paulus en skin ben hati en di a teki a langa waka disi, fu di wan tu yuru na fesi nomo sma ben ston en. Tòg en nanga Barnabas  hordoro èn di den doro na Derbe, den yepi „furu sma fu tron disipel”. Ma na presi taki den teki a syatu pasi go baka na a oso fu den na ini Antiokia na ini Siria, „den drai go baka na Listra, Ikoniyum nanga Antiokia [na ini Pisidia]”. Fu san ede? Fu tranga ’den disipel èn fu gi den dek’ati fu tan bribi na ini Masra’ (Tori 14:20-22). Den tu man disi na wan moi eksempre trutru! Den ben feni den sani fu a gemeente moro prenspari leki den eigi sani. Kring-owruman nanga zendeling na ini a ten disi teki na eksempre fu den tu man disi.

18. San e psa fosi den poti wan brada leki owruman?

¹⁸ Paulus nanga Barnabas gi den disipel dek’ati nanga san den taki èn nanga san den du, èn „den poti owruman na ini ibri gemeente fu yepi den disipel”. Aladi ’a santa yeye ben seni [Paulus nanga Barnabas]’ fu preiki leki zendeling, tòg den begi èn den faste di „den libi den owruman disi na ini na anu fu Yehovah” (Tori 13:1-4; 14:23). Owruman e du a srefi sortu sani na ini a ten disi. Fosi den owruman fu a gemeente taki dati wan brada bun nofo fu tron owruman noso dinari ini a diniwroko, den e begi èn den e luku efu a brada e doro den markitiki di skrifi na ini Bijbel (1 Tim. 3:1-10, 12, 13; Tit. 1:5-9; Yak. 3:17, 18; 1 Petr. 5:2, 3). A no abi trobi o langa noso o syatu wan sma na wan Kresten kba. Na presi fu dati, a fasi fa a brada e taki, a fasi fa a e tyari ensrefi èn a fasi fa sma sabi en e sori omeni krakti a santa yeye abi na ini en libi. Te a doro den markitik fu opziener soleki fa Bijbel e taki, dan den owruman fu a gemeente sabi taki a bun nofo fu dini leki skapuman fu na ipi (Gal. 5:22, 23). A kring-owruman abi a frantwortu fu luku a tori disi moro fara.​—Luku 1 Timoteyus 5:22.

19. Na suma den owruman musu gi frantwortu èn fa den e teki na eksempre fu Paulus nanga Barnabas?

¹⁹ Owruman sabi taki den musu gi Gado frantwortu fu san den e du nanga a gemeente (Hebr. 13:17). Neleki Paulus nanga Barnabas, owruman e teki fesi na ini a preikiwroko. Den e gi den Kresten brada fu den dek’ati nanga san den e taki. Ala ten den sani fu a gemeente de moro prenspari gi den leki den eigi sani.​—Fil. 2:3, 4.

20. Sortu wini wi e kisi te wi e leisi fa den brada fu wi e preiki fayafaya?

²⁰ Di Paulus nanga Barnabas drai go baka na den oso na Antiokia na ini Siria, den taki fu „den furu sani di Gado ben meki den du. Den ferteri den [brada] tu taki a ben opo a pasi gi den trakondre sma, so taki den ben kan teki a bribi tu” (Tori 14:27). Te wi e leisi fa den Kresten brada fu wi tan preiki fayafaya èn te wi e si fa Yehovah blesi a muiti di den du, dan ’Yehovah o gi wi dek’ati fu tan taki nanga den sma sondro fu frede’.