1, 2. (a) Penungkunen penting kai saja nge si arus ukuri badan pinpinen abad pertama? (b) Kai si nampati badan pinpinen abad pertama erban keputusen si tepat?

 KERINA kalak si lit bas ruangen e merhat kel meteh keputusen kai si nandangi iban. Rasul-rasul ras pertua-pertua sitatapen perban tehna enggo seh me waktuna erban keputusen si penting. Arus ijawap kalak e penungkunen si penting kerna masalah sunat. Perlu denga nge kalak Kristen ndalanken Undang-Undang Musa? Beda nge cara Jahwe ngenen kalak Kristen Jahudi ras si labo Jahudi?

² Dilaki-dilaki si jadi badan pinpinen e enggo ngukuri melala keterangen. Enggo ukuri kalak e nubuat bas Kata Dibata bage pe kesaksin langsung si mbuktiken maka kalak Kristen si labo Jahudi ipasu-pasu Jahwe. Kerina kalak e enggo mpeseh pendapatna. Enggo lengkap informasi si iperluken kalak e guna erban keputusen. Banci idah kalak e alu jelas keputusen kai si ate Jahwe iban kalak e. Nggit nge kalak e ngikutken petunjuk kesah si badia?

3. Pelajaren kai si banci sidat arah Perbahanen Rasul-Rasul pasal 15?

³ Perlu kel kalak e kiniteken bage pe sipat si perpang guna ngikutken petunjuk kesah si badia. Engkai? Perban banci reh segatna ate peminpin agama Jahudi man kalak e. Selain si e, turang senina si atena gelah umat Dibata ngikutken Undang-Undang Musa, banci saja tulakna keputusen e. Emaka, kai si ilakoken badan pinpinen e? Bas pembahasen enda siidah me kari usihen si iban kalak e si perlu iikutken Badan Pinpinen Saksi-Saksi Jahwe si gundari. Kita pe perlu ngusih kalak e sanga erban keputusen bage pe sanga lit masalahta.

4, 5. Ayat si apai nge si ikutip Jakup arah Ajaren Nabi-Nabi?

⁴ Ngerana me Jakup, adek tiri Jesus, si enggo jadi kalak Kristen. a Mbelin kemungkinenna bas kesempaten e ia si jadi ketua bas  rapat e. Selain si e, mbelin kemungkinenna kai si katakenna eme kesimpulen arah rapat e, si enggo isepakati kerina anggota badan pinpinen e. I lebe-lebe kalak e nina Jakup, “Jelas kel ceritaken Simeon uga Dibata tangtangna mperdiateken bangsa si deban guna milih arah kalak e sada umat man gelarNa. Si enda cocok ras kai si tertulis bas Ajaren Nabi-Nabi.”​—Perb. 15:14, 15.

⁵ Enggo begiken Jakup kai si ikataken Simeon, ntah pe Simon Petrus, bage pe bukti si ituriken Barnabas ras Paulus. Emaka, banci saja inget Jakup ayat-ayat si nampati kalak e ngangkai petunjuk Jahwe. (Joh. 14:26) Kenca kataken Jakup “enda cocok ras . . . Ajaren Nabi-Nabi,” ikutipna ka kata-kata bas Amos 9:11, 12. Ayat e termasuk bas Kitap-Kitap Heber si biasa igelari “Ajaren Nabi-Nabi.” (Mat. 22:40; Perb. 15:16-18) Sanga ikutip Jakup Amos 9:11, 12, gunakenna kata-kata si beda ras kai si gundari sibaca bas buku Amos. Engkai? Perban mbelin kemungkinenna ikutip Jakup ayat e arah Septuaginta, eme Kitap-Kitap Heber si iterjemahken ku bas bahasa Junani.

6. Uga Kitap-Kitap si Badia nampati kalak e meteh sura-sura Dibata?

⁶ Arah nabi Amos, inubuatken Jahwe maka seh me pagi waktuna pajekkenNa mulihi “sapo-sapo Daud.” Maksudna, keturunen Daud pagi si jadi raja bas Kerajan Dibata. (Esek. 21:26, 27) Mulihi ka nge anggap Jahwe kalak Jahudi jadi umatNa si istimewa? Lang. Bas nubuat e pe lit ikataken maka “kalak arah kerina bangsa” ipepulung jadi “umat si maba gelar [Dibata].” Perlu siinget, lit ikataken Petrus maka Dibata “sitik pe la bedakenNa kita [kalak Kristen Jahudi] ras kalak e [kalak Kristen si labo Jahudi]. Tapi bersihkenNa pusuh kalak e perban enggo erkiniteken.” (Perb. 15:9) Enda ertina, sura-sura Dibata eme gelah kalak Jahudi bage pe kalak si labo Jahudi ras-ras jadi ahli waris bas KerajanNa. (Rom. 8:17; Ep. 2:17-19) La lit nubuat bas Pustaka si ngataken maka kalak Kristen si labo Jahudi arus isunat ntah pe arus ngikutken agama Jahudi.

7, 8. (a) Kai nge saran Jakup? (b) Paksaken Jakup nge pendapatna? Jelasken.

⁷ Perban jelas kel akap Jakup bukti arah Pustaka bage pe kesaksin si begina, bagenda nina, “Emaka, adi kuakap la padah sisusahi kalak arah bangsa si deban si atena nembah Dibata, tapi perlu situlis surat man kalak e gelah pedauhna dirina arah kai pe si lit hubungenna ras berhala, perbahanen seks si salah, binatang si mate icekak, ras dareh. Mbarenda nari, kai si tulis Musa ibacaken bas ingan-ingan pulung kalak Jahudi tiap wari Sabat, alu bage enggo iberitaken ku tiap kota kerna Musa.”​—Perb. 15:19-21.

⁸ Paksaken Jakup nge pendapatna perban banci saja lit wewenangna selaku ketua bas rapat e? Lang. Si ikataken Jakup eme “adi kuakap.” Arah e siteh maka labo atena ia si erban keputusen bas rapat e, tapi ia  nuriken pendapatna saja. Pendapatna e banci nampati kalak e erban keputusen sesuai ras bukti si enggo begina bage pe ayat-ayat Pustaka kerna masalah e.

9. Kai saja nge gunana saran Jakup e?

⁹ Mejile nge saran Jakup e? Mejile, sebap dungna aloken rasul-rasul ras pertua-pertua saranna e. Adi man kalak Kristen si labo Jahudi, saran e la erban kalak e ‘susah’ perban la perlu dalanken kalak e Undang-Undang Musa. (Perb. 15:19) Adi man kalak Kristen Jahudi, saran Jakup e pe ngergai pusuh peraten kalak e, si enggo ertahun-tahun megiken “kai si tulis Musa ibacaken bas ingan-ingan pulung kalak Jahudi tiap wari Sabat.” b (Perb. 15:21) Saran e pasti erban hubungen kalak Kristen Jahudi ras si labo Jahudi reh deherna. Tapi si pentingna, si e erban meriah ukur Dibata Jahwe perban sesuai ras sura-suraNa. Enda contoh si luar biasa bas ndungi masalah, perban e banci erban runggun tetap dame ras ersada.

10. Uga Badan Pinpinen si gundari ngusih badan pinpinen abad pertama?

¹⁰ Bali bagi si ituriken bas pasal sebelumna, Badan Pinpinen Saksi-Saksi Jahwe si gundari pe ngusih badan pinpinen abad pertama. c Darami kalak e petunjuk Jahwe, Penguasa Alam Semesta, bage pe Jesus Kristus, Kepala runggun. (1 Kor. 11:3) Uga carana? Bagenda nina Albert D. Schroeder, si ngelayani jadi Badan Pinpinen mulai tahun 1974 seh ngasa ia mate bas bulan Maret 2006, “Badan Pinpinen rapat bas wari Rabu. Benaken kalak e alu ertoto janah pindo kalak e petunjuk Jahwe arah kesah si badia. Usahaken kalak e kel erban keputusen ras ndungi kerina masalah sesuai ras Kata Dibata.” Milton G. Henschel pe bage pengakapna. Ia enggo ndekah ngelayani jadi anggota Badan Pinpinen. Ia mate bas bulan Maret 2003. Banna penungkunen man siswa Gilead kelas pe-101-ken, nina, “Lit kin organisasi si deban bas doni enda si peminpinna mereksa  Pustaka si Badia sope erban keputusen-keputusen penting?” Pasti jelas siteh jawapenna.

11. Uga keputusen badan pinpinen ipeseh man runggun-runggun?

¹¹ Enggo iban badan pinpinen i Jerusalem keputusen kerna masalah sunat. Enggo ersada arih kalak e kerna keputusen e. Tapi gelah turang senina bas erbage runggun banci ndalanken keputusen e, si e arus ipeseh man kalak e alu jelas janah alu cara si perkeleng. Uga carana? Bas Pustaka ikataken, “Rasul-rasul, pertua-pertua, bage pe kerina runggun erban keputusen guna milih dua kalak senina arah kalak e gelah ikirim ras Paulus bage pe Barnabas ku Antiokia. Kirim kalak e Silas ras Judas si igelari Barsabas, si minpin senina-senina.” Selain si e, iban me surat guna ikirim arah dilaki-dilaki si iutus e gelah banci ibacaken bas kerina runggun i Antiokia, Siria, ras Kiliki.​—Perb. 15:22-26.

12, 13. Kai saja nge gunana (a) Judas ras Silas iutus? (b) surat si ikirimken badan pinpinen?

¹² Perban Judas ras Silas eme dilaki-dilaki “si minpin senina-senina,” cocok kel kalak e jadi utusen badan pinpinen. Utusen e lit empat kalak. Tugas kalak e eme maba berita. Berita si ipeseh kalak e labo saja jawapen penungkunen kerna sunat, tapi peseh kalak e ka petunjuk si mbaru arah badan pinpinen. Kerehen ‘dilaki-dilaki si enggo ipilih e’ erban reh kompakna kalak Kristen Jahudi i Jerusalem ras kalak Kristen si labo Jahudi bas runggun-runggun. Bijaksana kel pengaturen e janah perkeleng. Pengaturen e erban umat Dibata erdame ras ersada.

¹³ Bas surat e labo saja ibereken petunjuk si jelas kerna masalah sunat man kalak Kristen si labo Jahudi. Tapi, lit ka ijelasken kai si arus ilakoken kalak e gelah ngena ate Jahwe janah ipasu-pasu Jahwe. Bagin si pentingna i bas surat e isina, “Kesah si badia enggo nampati kami gelah ula nai nambahi baban si deban man kena, selain si penting enda: Pedauhlah diri kena arah kai pe si enggo ipersembahken man berhala, arah dareh, arah binatang si mate icekak, bage pe arah perbahanen seks si salah. Adi tuhu-tuhu pedauh kena diri kena arah kerina enda, pasti sikap geluh kena. Mbera terus kena sehat!”​—Perb. 15:28, 29.

14. Engkai maka umat Dibata banci ersada bas doni si dem perpecahen enda?

¹⁴ Gundari, Saksi-Saksi Jahwe enggo lebih waluh juta kalak bas lebih 100.000 runggun i sebelang doni. Tapi seri kiniteken kalak e. Engkai maka si e banci terjadi bas doni si dem perpecahen enda? Si utamana erban kita ersada eme perban bereken Jesus Kristus petunjuk si jelas ras tegas selaku Kepala runggun. Petunjuk e iberekenna arah “budak si setia ras pentar,” eme Badan Pinpinen. (Mat. 24:45-47) Kita pe banci  ersada perban turang senina i sebelang doni nggit ngikutken petunjuk arah Badan Pinpinen.

15, 16. Uga nge tanggapen runggun man petunjuk arah badan pinpinen e, ras engkai?

¹⁵ Bas buku Perbahanen Rasul-Rasul ituriken me kai si ilakoken utusen arah Jerusalem e sanga seh i Antiokia. “Pepulungna kerina murid-murid Jesus si lit i je, jenari berekenna surat e man kalak e.” Uga tanggapen turang senina sanga datna petunjuk arah badan pinpinen e? “Meriah kel ukur kalak e kenca bacana surat si mpegegehi e.” (Perb. 15:30, 31) Selain si e, Judas ras Silas ‘gedang ngerana man turang senina. Pegegehina janah petetapna ukur kalak e.’ Perban umumken ntah pe pebetehken kalak e sura-sura Dibata, duana kalak e ikataken “nabi,” bali bagi Barnabas, Paulus, ras si debanna.​—Perb. 15:32; 13:1; Kel. 7:1, 2.

¹⁶ Jelas kel, ipasu-pasu Jahwe keputusen badan pinpinen e. Hasilna, kerina runggun terpegegehi. Engkai maka bage? Si e pasti perban lit petunjuk si jelas ras tepat waktu arah badan pinpinen. Petunjuk e dasarna eme Kata Dibata janah sesuai ras arahen kesah si badia. Selain si e, keputusen e ipeseh man runggun-runggun alu cara si perkeleng.

17. Uga pertua keliling bas jaman si gundari ngusih contoh si enggo iban bas abad pertama?

¹⁷ Bage ka me si ilakoken Badan Pinpinen Saksi-Saksi Jahwe si gundari. Bereken kalak e petunjuk si tepat waktu man umat Jahwe i sebelang doni. Keputusen-keputusen si iban kalak e ipesehna ku runggun-runggun alu cara si terus terang ras jelas. Mon-mon igunaken Badan Pinpinen pertua keliling guna mpeseh petunjuk e. Pertua keliling eme kalak si nggit erkorban si reh ku runggun-runggun guna mereken petunjuk si jelas ras mpegegehi turang senina. Bali bagi Paulus ras Barnabas, mbue waktu si igunaken kalak e bas pelayanen guna “ngajar ras mberitaken berita si meriah kerna kata Jahwe.” (Perb. 15:35) Selain si e, bali bagi Judas ras Silas, “gedang kalak e ngerana man turang senina. Pegegehina janah petetapna ukur kalak e.”

18. Kai nge si perlu ilakoken umat Jahwe gelah bereken Jahwe pasu-pasuNa?

¹⁸ Kai si erban runggun-runggun i sebelang doni banci terus erdame ras ersada amin pe mbue perpecahen bas doni enda? Cuba siukuri kai si itulis Jakup, “Kepentaren si rehna surga nari, si pertama eme bersih, nggit erdame, masuk akal, patuh . . . Selain si e, buah perbahanen si mehuli isuan bas keadan si dame man kalak si ngena tena kedamen.” (Jak. 3:17, 18) Memang la siteh sanga tulis Jakup ayat e ingetna nge rapat bas Jerusalem ntah lang. Tapi, arah kai si enggo sibahas bas Perbahanen Rasul-Rasul pasal 15, banci siteh maka nggit Jahwe mereken pasu-pasuNa  adi nggit kita ersada janah sipatuhi petunjuk arah kalak si muat pinpinen.

19, 20. (a) Ja nari siteh maka turang senina bas runggun Antiokia dungna erdame ras ersada? (b) Kai nge si dungna banci ilakoken Paulus ras Barnabas?

¹⁹ Kenca turang senina si dilaki bas runggun Antiokia ngangkai keputusen badan pinpinen, dame janah ersada me runggun i Antiokia. Labo itentang kalak e dilaki-dilaki si iutus Jerusalem nari. Ergai turang senina i Antiokia e kel kerehen Judas ras Silas. Ja nari siteh? Perban “kenca enggo melala waktu si gunaken kalak e i je, peberkat turang senina kalak e alu ermeriah ukur. Jenari mulih kalak e [ku Jerusalem] ndahi kalak si enggo nuruh ia.” d (Perb. 15:33) Tek kita turang senina si i Jerusalem pe ermeriah ukur sanga begina laporen arah duana dilaki e kerna perdalanen kalak e. Perban kiniulin Jahwe si luar biasa, berhasil kalak e ndungi tugasna.

²⁰ Kenca masalah sunat idungi, Paulus ras Barnabas tetap tading i Antiokia. Dungna, enggo banci kalak e fokus minpin dahin erberita. Pertua keliling si gundari pe bage. (Perb. 13:2, 3) Kalak e jadi pasu-pasu man umat Jahwe bali bagi Paulus ras Barnabas. Tapi, tugas kai ka si bere Jahwe man Paulus ras Barnabas, janah uga Jahwe masu-masu duana perberita si semangat e? Sibahas kari kerna si e bas pasal selanjutna.