CHAPTA 14
“Aala Wi Disaid”
Di govanin badi mi mek wahn impoatant disizhan weh yoonait di kangrigayshan dehn eevn moa
Dis chapta bays pahn Aks 15:13-35
1, 2. (a) Weh impoatant kweschanz di govanin badi da Jeroosalem mi haftu ansa? (b) Weh mi help dehndeh bradaz fi mek di karek disizhan?
DI APASLZ ahn di elda dehn eena di room da Jeroosalem mi veri eksaitid fi di disizhan weh dehn mi wahn mek. Az dehn mi-di luk pahn eech ada, dehn riyalaiz dat di taim reech fi mek wahn impoatant disizhan eena hischri. Di bradaz mi need fi ansa dehnya impoatant kweschanz bowt serkomsizhan: Kristyanz need fi obay di Laa weh Gaad gi Moaziz? Jehoava vyoo Jooish Kristyanz ahn Kristyanz weh da noh Jooz az difrent?
2 Dehndeh bradaz weh mi-di tek di leed mi jos gaahn chroo lata evidens. Fi egzampl, dehn mi taak bowt sohn prafesi eena Gaad Werd ahn di ekspeeryens a sohn bradaz weh proov dat Jehoava aksep peepl weh da neva Jooz. Evribadi mi seh weh dehn noa bowt di mata, ahn dehn mi ga aal di infamayshan fi mek wahn disizhan. Ahn dehn kuda mi si klyaa-wan weh disizhan Jehoava waahn dehn mek. Bot di kweschan da-mi dis: Dehn mi wahn alow Jehoava hoali spirit fi gaid dehn?
3. Weh wi ku laan fahn di akonk eena Aks chapta 15?
3 Dehndeh bradaz mi wahn need lata fayt ahn korij fi fala di gaidans a di hoali spirit fi mek da disizhan. Wai? Bikaaz di Jooish rilijos leedaz kuda mi hayt dehn eevn moa. Ahn som membaz a di kangrigayshan weh mi waahn foas Gaad peepl fi kantinyu obay di Laa kuda mi disaid fi noh aksep di disizhan a di govanin badi. Weh di govanin badi mi wahn du? Aks chapta 15 wahn help wi fain di ansa. Wi wahn aalso laan how dehndeh bradaz mi set wahn gud egzampl weh di Govanin Badi a Jehoava Witnisiz fala tudeh. An ih ku help wee az Kristyanz fi wen wee mek disizhanz er wen wi ga prablemz.
“Weh di Prafit Dehn Mi Rait Agree Wid Dis” (Aks 15:13-21)
4, 5. Weh prafesi Jaymz mi koat fi help di bradaz andastan Jehoava dairekshan?
4 Jaymz mi staat taak. a Hihn da-mi Jeezas haaf breda, an ih luk laik pahn dis okayzhan hihn da-mi di chyaaman a di meetin. Ih ku bee dat hihn mi som op di disizhan weh aala dehn mi mek. Dis da weh Jaymz mi seh: “Simiyan jos tel wi dat now Gaad di aksep peepl a di nayshanz ahn kaal dehn bai fi hihn naym. Ahn weh di prafit dehn mi rait agree wid dis.”—Aks 15:14, 15.
5 Weh Simiyan, er Saiman Peeta, mi seh ahn di akonk bowt Baarnabas ahn Paal mi praabli mek Jaymz tink bowt sohn skripchaz weh mi help di bradaz andastan Jehoava dairekshan. (Jan 14:26) Hihn mi eksplayn dat weh dehn mi seh agree wid “weh di prafit dehn mi rait.” Soh den, hihn mi koat Amos 9:11, 12, weh da paat a di Heebroo Skripchaz weh wi noa az “di werdz a di prafit dehn.” (Mach. 22:40; Aks 15:16-18) Yu wahn noatis dat Jaymz an Aymos werdz da noh egzakli di saym, maybi bikaaz Jaymz mi koat fahn di Septuagint, wahn Greek chranslayshan a di Heebroo Skripchaz.
6. How di Skripchaz mi help di bradaz fi noa wat da Gaad wil pahn di mata?
6 Jehoava mi anonks chroo Aymos prafesi dat Hihn wahn bil op bak “di hows a Dayvid.” (Ezek. 21:26, 27) Jehoava mi seh dat di Mesaiya wuda kohn fram Dayvid famili lain ahn bee king a fi hihn Kingdom. Dis noh di seh dat Jehoava wuda mek di nayshan a Izrel bee ih speshal peepl agen. Noatis, di prafesi seh dat “peepl a di nayshanz” wahn kohn tugeda az “peepl weh [Gaad] kaal bai [Fi Hihn] naym.” Ahn memba, Peeta mi jos eksplayn dat “Gaad noh si no difrens bitween wee [Jooish Kristyanz] ahn di peepl weh da noh Jooz, bot hihn kleen dehn haat bikaaz a dehn fayt.” (Aks 15:9) In ada werdz, da Gaad wil fi mek Jooz ahn peepl weh da noh Joo inherit ih Kingdom. (Roam. 8:17; Ifee. 2:17-19) Dehn noh ga no Baibl prafesi weh seh dat Kristyanz weh da noh Jooz fi geh serkomsaiz er fi jain di Jooish rilijan fi mek dehn ku inherit Gaad Kingdom.
7, 8. (a) Weh sojeshan Jaymz mi giv? (b) How wi noa dat Jaymz neva mi-di mek wahn disizhan fi di hoal groop?
7 Bikaaz a di evidens weh deh eena di prafesi dehn an eena di akonk dehn bowt Peeta, Baarnabas, ahn Paal, Jaymz mi seh: “Soh den, eena mai opinyan, wi shudn mek chrobl fi di peepl weh da noh Jooz ahn weh di chrai serv Gaad, bot wi ku rait tu dehn fi kip weh fahn eniting weh ga fi du wid aidol, fahn sekshwal imoraliti, fahn eni animal weh geh schrangl, ahn fahn blod. Fahn way bak, eena evri siti peepl mi aalwayz di preech bowt Moaziz, bikaaz pahn evri sabat eena di sinagag dehn, peepl reed di ting dehn weh hihn mi rait.”—Aks 15:19-21.
8 Laik wi mi seh erliya, Jaymz da-mi moa dan laikli di chyaaman a di meetin. Yu tink hihn mi-di seh dat hihn mi ga di atariti fi tel di ada bradaz weh disizhan dehn shuda mek wen ih mi seh, “eena mai opinyan”? Non ataal! Insted, hihn mi-di sojes weh dehn ku du bays pahn di evidens ahn pahn weh di Baibl seh bowt di mata.
9. Wat da-mi di benifits a Jaymz sojeshan?
9 Fi shoar, Jaymz mi gi wahn gud sojeshan, bikaaz di apaslz ahn di eldaz mi aksep it. Wan benifit da-mi dat da disizhan neva mi wahn kaaz “chrobl,” er mek it haad pahn Kristyanz weh da noh Joo, bikaaz dehn wudn need fi obay di Laa. (Aks 15:19) Wahn nada benifit da-mi dat dis disizhan wuda shoa rispek fi di kanshans a di Jooish Kristyanz, hoo fi lata yaaz mi hyaa “peepl reed di ting dehn weh [Moaziz] mi rait” pahn evri sabat eena di sinagag. b (Aks 15:21) Aalso, Jaymz sojeshan wuda mek Kristyanz weh da Joo ahn Kristyanz weh da noh Jooz bee kloasa ahn moa yoonaitid. Bot di moa impoatant benifit da-mi dat ih wuda pleez Jehoava bikaaz di disizhan mi bays pan ih perpos. Dat da-mi wahn ekselent way fi setl wahn prablem weh kuda mi afek di pees ahn yooniti monks Gaad peepl! No dowt, da wahn gud egzampl fi di Kristyan kangrigayshan tudeh!
Brada Albert Schroeder di gi wahn taak da di 1998 intanashanal kanvenshan
10. How di Govanin Badi kapi di egzampl a di apaslz ahn di elda dehn eena di fers senchri?
10 Laik wi mi menshan eena chapta 13 a dis buk, di Govanin Badi a Jehoava Witnisiz kapi di egzampl a di apaslz ahn di elda dehn eena di fers senchri. Dehn luk tu Jehoava, di Moas Hai, ahn tu Jeezas, di Hed a di kangrigayshan, fi dairekshan eena evriting. c (1 Kor. 11:3) Dis da weh Brada Albert D. Schroeder, hoo da-mi wahn memba a di Govanin Badi fahn 1974 til ih finish ih laif pahn ert eena Maach 2006, mi seh: “Di Govanin Badi meet evri Wenzdeh. Wi staat wi meetin wid wahn pryaa ahn wi aks fi Jehoava dairekshan chroo ih hoali spirit. Di Govanin Badi mek shoar dat evriting weh geh diskos an evri disizhan dehn mek goh lang wid Gaad Werd di Baibl.” Brada Milton G. Henschel, hoo mi serv fi lata yaaz az wahn memba a di Govanin Badi ahn weh mi finish ih laif pahn ert eena Maach 2003, mi seh sohnting simila. Hihn mi aks dis veri impoatant kweschan tu di 101 klaas a Gilyad: “Weh ada aaganaizayshan pahn ert ga peepl weh di tek di leed ahn weh kansida di Baibl bifoa dehn mek impoatant disizhanz?” Ih klyaa dat no ada wan deh.
“Disaid fi Sen Too Bradaz” (Aks 15:22-29)
11. How di govanin badi da Jeroosalem mi infaam di kangrigayshan dehn bowt di disizhan?
11 Di membaz a di govanin badi da Jeroosalem mi aal agree pahn di disizhan bowt serkomsizhan. Bot, fi mek di bradaz ahn sistaz eena di kangrigayshan dehn aksep di disizhan ahn stay yoonaitid, dehn mi haftu infaam dehn eena wahn klyaa, pazitiv, an inkorijin way. How dehn kuda du dis? Di Baibl seh: “Di apaslz ahn di eldaz, lang wid di hoal kangrigayshan, disaid fi sen too bradaz fahn monks dehn tu Antiyak, lang wid Paal ahn Baarnabas. Dehn mi sen Joodas, weh dehn kaal Baarsabas, ahn Sailas; dehnya too man mi ga sohn seeryos rispansabiliti monks di bradaz.” Dehn mi aalso gi wahn leta tu dehnya bradaz fi mek dehn reed it tu di kangrigayshan dehn eena Antiyak, Siriya, ahn Silaisya.—Aks 15:22-26.
12, 13. (a) Wai ih mi mek sens fi sen Joodas ahn Sailas? (b) How di leta weh di govanin badi mi sen mi help di kangrigayshan dehn?
12 Sins Joodas ahn Sailas “mi ga sohn seeryos rispansabiliti monks di bradaz,” dehn mi kwalifai fi reprizent di govanin badi. Dehnya foa bradaz wuda mek it klyaa dat di mesij dehn mi bring da neva jos wahn ansa tu di ishu bowt serkomsizhan, bot da mi aalso nyoo dairekshan fahn di govanin badi. Di fak dat Joodas ahn Sailas mi dehdeh wuda help di Kristyanz weh da neva Jooz eena di kangrigayshanz fi bee moa yoonaitid wid di Jooish Kristyanz da Jeroosalem. Da mi wahn waiz ahn lovin disizhan fi sen dehnya too bradaz! Fi shoar ih mi mek di pees ahn yooniti monks Gaad peepl schranga.
13 Di leta mi gi klyaa dairekshan bowt serkomsizhan tu di Kristyanz weh da neva Joo, ahn dehn mi noa weh dehn mi need fi du fi mek Jehoava aksep dehn wership ahn bles dehn. Di moas impoatant paat a di leta mi seh: “Di hoali spirit help wi fi disaid dat wi noh need fi put wahn ekschra berdn pahn unu. Bot unu need fi fala dehnya tingz: Unu fi kip weh fahn eniting weh ga fi du wid aidol, fahn blod, fahn eni animal weh geh schrangl, ahn fahn sekshwal imoraliti. Tingz gwehn gud fi unu if unu kip weh fahn dehnya tingz. Unu tek kayr!”—Aks 15:28, 29.
14. Wai ih pasabl fi mek Jehoava peepl werk tugeda eena yooniti eena dis werl weh soh divaidid?
14 Tudeh, dehn ga moa dan 8,000,000 Jehoava Witnisiz eena oava 100,000 kangrigayshanz rong di werl weh fala di saym teechinz, weh du di saym werk, ahn weh reeli yoonaitid. Bot weh help wi fi bee soh yoonaitid eena dis werl weh soh divaidid? Di mayn reezn da bikaaz Jeezas Krais, hoo da di Hed a di kangrigayshan, gi klyaa dairekshan chroo “di faytful ahn waiz slayv,” weh da aalso di Govanin Badi. (Mach. 24:45-47) Wi aalso yoonaitid bikaaz di bradaz ahn sistaz aal rong di werl wilin fi fala di Govanin Badi dairekshan.
“Evribadi Mi Ful Op a Jai ahn Dehn Mi Feel Inkorij” (Aks 15:30-35)
15, 16. How di kangrigayshanz mi riyak tu di dairekshan fahn di govanin badi, ahn wai?
15 Di akonk eena Aks tel wi dat wen di foa bradaz weh mi-di kohn fahn Jeroosalem mi reech Antiyak, “dehn gyada op wahn hoal groop a disaiplz ahn gi dehn di leta.” How di bradaz eena di kangrigayshan mi riyak tu di dairekshan fahn di govanin badi? Di Baibl seh: “Afta dehn reed di leta, evribadi mi ful op a jai ahn dehn mi feel inkorij.” (Aks 15:30, 31) Pahn tap a dat, Joodas ahn Sailas “inkorij ahn schrentn di bradaz wid sohn taak.” Bikaaz dehndeh bradaz mi mek adaz noa bowt Gaad wil, di Baibl kaal dehn “prafit,” jos laik Baarnabas, Paal, an ada servants a Jehoava.—Aks 13:1; 15:32; Eks. 7:1, 2.
16 Ih kristal klyaa dat Jehoava mi bles di disizhan a di govanin badi, ahn dat da wai di kangrigayshan dehn mi feel inkorij. Wai Jehoava mi bles dehn? Bikaaz di govanin badi mi gi klyaa dairekshan da di rait taim, di dairekshan mi bays pahn Gaad Werd, ahn dehn mi geh help fahn di hoali spirit. Ahn laas bot nat lees, di govanin badi mi sen sohn kain ahn lovin bradaz fi infaam di kangrigayshan dehn bowt di disizhan.
17. Eena weh wayz serkit oavaseeyaz da laik Paal, Baarnabas, Joodas, ahn Sailas?
17 Di Govanin Badi a Jehoava Witnisiz tudeh fala da saym egzampl ahn gi dairekshan tu aala di kangrigayshan dehn da di rait taim. Wen di Govanin Badi mek disizhanz, dehn gi klyaa ahn dairek inschrokshanz tu di kangrigayshan dehn. Sohntaim di Govanin Badi yooz serkit oavaseeyaz fi gi dehnya inschrokshanz. Dehnya bradaz, weh mek lata sakrifais ahn weh chravl fahn wan kangrigayshan tu di neks, fala di egzampl a Paal ahn Baarnabas, hoo “mi-di preech ahn teech lang wid sohn ada bradaz bowt di gud nyooz a di werd a Jehoava.” (Aks 15:35) Dehn da aalso laik Joodas ahn Sailas, hoo mi “inkorij ahn schrentn di bradaz wid sohn taak.”
18. Weh Gaad peepl need fi du soh dat Jehoava kantinyu bles dehn?
18 Weh ku mek di difrent kangrigayshan dehn rong di werl tudeh injai pees ahn yooniti eena dis werl weh soh divaidid? Memba weh Jaymz mi rait sohn taim layta? Ih mi seh: “Di fers ting wi need fi noa bowt di wizdom weh kohn fahn hevn da dis: ih kleen ahn pyoar. Den ih lov pees, ih noh waahn ih oan way aal di taim, ih redi fi obay . . . Pahn tap a dat, peepl hoo aalwayz get lang gud wid adaz wahn di spred pees, ahn dis mek dehn du tingz weh raichos.” (Jay. 3:17, 18) Wi noh noa if Jaymz mi-di tink bowt di meetin da Jeroosalem wen hihn mi rait dehndeh werdz. Eeda way, Aks chapta 15 teech wi dat wi ku onli geh Jehoava blesin dehn wen wi yoonaitid an obay di inschrokshanz a di bradaz weh di tek di leed.
19, 20. (a) Weh shoa dat di kangrigayshan da Antiyak mi geh bak dehn pees ahn yooniti? (b) Weh Paal ahn Baarnabas kuda mi foakos pan?
19 Afta di bradaz da Antiyak mi hyaa bowt di disizhan a di govanin badi, di kangrigayshan mi geh bak dehn pees ahn yooniti. Insteda ton gens di bradaz weh mi kohn fahn Jeroosalem, di bradaz fahn Antiyak mi tankful dat Joodas ahn Sailas mi vizit dehn. Di akonk seh: “Afta dehn mi spen sohn taim deh wid dehn, di bradaz tel dehn gudbai ahn dehn gaahn bak da Jeroosalem.” d (Aks 15:33) Fi shoar di bradaz da Jeroosalem mi hapi fi hyaa di ripoat fahn Joodas ahn Sailas. Tanks tu Jehoava grayt kainis, evriting gaahn gud eena dehn asainment!
20 Afta dehn mi setl di ishu bowt serkomsizhan, Paal ahn Baarnabas mi stay da Antiyak ahn dehn kuda mi foakos pahn di preechin werk. (Aks 13:2, 3) Tudeh, serkit oavaseeyaz du di saym ting wen dehn vizit di kangrigayshan dehn. Dehn da wahn blesin fi Jehoava peepl, jos laik Paal ahn Baarnabas! Eena di neks chapta, wi wahn si how Jehoava mi bles dehn too bradaz eena di preechin werk.
Tudeh, Kristyanz benifit fahn aal di spirichwal food weh di Govanin Badi ahn di ada bradaz weh di tek di leed provaid fi wi
a Reed di baks weh naym “ Jaymz—‘Di Laad Breda.ʼ”
b Ih da-mi wahn waiz aidyaa fi mek Jaymz menshan di tingz weh Moaziz mi rait. Weh hihn mi rait mi inklood di Laa weh Gaad gi Moaziz an akonks weh mi shoa wat da-mi Gaad perpos fi hyoomanz bifoa di Laa mi eevn egzis. Fi egzampl, eena Jenisiz wi si klyaa-wan weh Gaad tink bowt blod, adolchri, an aidol wership. (Jen. 9:3, 4; 20:2-9; 35:2, 4) Soh noh mata if wahn persn da-mi Joo er fahn di nayshanz, Jehoava mi teech bowt prinsiplz weh evribadi mos obay.
c Reed di baks weh naym “ How di Govanin Badi Aaganaiz Tudeh.”
