1, 2. (a) Ikkefa ekkewe kapas eis mi aúchea ewe mwichen soupwúngúpwúng lón Jerusalem epwe pélúweni? (b) Met a álisi ekkena mwán le féri kefil mi pwúng?

 EKKEWE aposel me mwán mi ásimaw mi nóm lón eú ruumw lón Jerusalem ra nennefengen lefiler. Ra mirititi pwe ewe kefil repwele féri mi fókkun aúchea. Iir meinisin ra mwétéresiiti pwúngúlóón ena kefil. A lamot ar repwe pélúweni ewe kapas eis mi aúchea mi ppiitá fán iten ewe mettóch sirikomsais. Ekkewe Chón Kraist ra nóm fán ewe Allúkún Moses? Mi wor sókkofesenin ekkewe chón Jus me ekkewe chón lúkún Israel me ren Jiowa?

² Ekkewe mwán mi wisen emmwen ra etittina chómmóng pwóróus. Ra pwóróusfengen ussun ekkewe oesini lón án Kot we Kapas me met ekkóch leir ra pwisin kúna mi ánneta pwe Jiowa a etiwa ekkewe chón lúkún Israel iir Chón Kraist. Iir meinisin ra en me apasaatá met ra silei ussun ena mettóch. A wor rer meinisin ekkewe pisekin pwáraatá mi lamot ngeniir fán iten ewe kefil repwele féri. Án Jiowa we ngún mi fel a affata ngeniir minne Jiowa a mochen repwe filaatá. Itá ekkena mwán repwe fiti emmwenien an na ngún mi fel?

3. Met sipwe káé seni Féffér sópwun 15?

³ A lamot an epwe wor án ekkena mwán watteen lúkú me pwora pwe repwe fiti emmwenien ewe ngún mi fel wóón ena mettóch. Eli epwe fen lapóló án néúwisin ewe lamalamen Jus oputer pokiten ena kefil. Me ekkóch chón ewe mwichefel, iir kewe mi mochen án néún Kot kewe aramas repwe fiti ewe Allúkún Moses, neman resap mochen fiti met repwe apwúngaló.  Iwe, met ena mwichen soupwúngúpwúng epwele féri? Sipwe ppii. Sipwe pwal ppii ifa ussun ekkena mwán ra isettiw eú leenien áppirú ngeni ewe Mwichen Soupwúngúpwúng lón ei fansoun. A pwal lamot ngenikich ach sipwe fiti ena leenien áppirú atun sipwe féri kefil are atun sia nóm lón osukosuk.

4, 5. Menni wokisin seni ekkewe oesini lón Paipel Jemes a aloni?

⁴ Ewe chón káé Jemes, pwiin Jises we, a akkomw fósetá. a Ussun i ewe chón átettel lón ar we mwiich. Lón an kewe kapas, ussun a menlapei ewe kefil iir meinisin ra tipeeúfengen wóón me apwúngaló. Iei met Jemes a ereniir: “Simion a kerán apwóróusa ngenikich pwe iei Kot a etiwa ekkewe ekkóch mwú, pwe epwe tongeni pwal filaatá aramas seniir fán ásengesin itan we. Iwe, ekkena kapas ra tipeeú ngeni makkeien ekkewe Soufós.”—Féf. 15:14, 15.

⁵ Jemes a aúseling ngeni met Simion, are Simon Piter, me Parnapas me Paul ra apasa. Ese mwáál ena a efisi an epwe ekieki ekkóch wokisin epwe álisi pwiin kewe chón lúkú le weweiti án Jiowa emmwen. (Jon 14:26) Mwirin án Jemes erá “ekkena kapas ra tipeeú ngeni makkeien ekkewe Soufós,” a aloni masouen Amos 9:11, 12. Ena puk a mak lón ewe kinikin lón ewe Tesin Ipru mi iteni “ekkewe Soufós.” (Mat. 22:40; Féf. 15:16-18) Lupwen Jemes a aloni masouen Amos 9:11, 12, a néúnéú kapas mi sókkóló seni met sia álleani lón ewe puken Amos lón ei fansoun. Ussun Jemes a aloni met mi nóm lón ewe Septuagint, eú afféún ewe Tesin Ipru lón fósun Krik.

6. Ifa ussun ekkewe wokisin lón Paipel ra álisi ekkewe mwán le silei met Kot a tipeni?

⁶ Me ren ewe soufós Amos, Jiowa a oesini pwe epwe war ewe fansoun lupwen epwe “aüsefälietä ewe mwün Tafit,” weween ewe tettelin famili ewe Messaia epwe feito seni. (Is. 21:26, 27) Itá Jiowa epwe pwal chék etiwa ewe mwúún Israel? Aapw. Ewe oesini a pwal apasa pwe “meinisin aramasen ekkewe ekkóch mwú” repwe kochufengen me wiliiti “aramas mi iteit ren” iten Kot we. Chemeni pwe Piter a kerán chék áweweei pwe Kot “ese  fókkun asókkafeseni lefilach [ekkewe Chón Kraist chón Jus] me iir [ekkewe chón lúkún Israel chón lúkú], nge a eliméchú letiper ren lúkú.” (Féf. 15:9) Ina minne letipen Kot pwe ekkewe chón Jus me ekkewe chón lúkún Israel repwe chón álemwir lón ewe Mwú. (Rom 8:17; Efi. 2:17-19) Ese wor eú oesini lón Paipel mi apasa pwe mi lamot án ekkewe chón lúkún Israel iir chón lúkú repwe sirikomsais are wiliiti chón ewe lamalamen chón Juta me mwen repwe chón álemwir lón ewe Mwú.

7, 8. (a) Met Jemes a apasa? (b) Itá Jemes a péchéú pwe mi wor an pwúúng le ereni chienan kewe minne repwe eáni kefil? Áweweei.

⁷ Pokiten fataffatéchún ekkewe pisekin ánnet mi pwá lón ewe Paipel me ekkewe pwóróus mi alúkúlúk Jemes a rong, iwe iei met a apasa: “Ina minne, meefiei pwe sisap aosukosuka chókkewe seni me lón ekkewe ekkóch mwú mi kul ngeni Kot, nge sipwe mak ngeniir ar repwe ttii seniir ekkewe mettóch mi riri ngeni uluulun, seni lisowumwáál, seni ekkewe man mi máán ffór, me seni chcha. Pún seni fansoun lóóm a kan wokkor chókkewe mi afalafala ussun Moses lón iteiten telinimw, pokiten iteiten Sapat lón ekkewe sinakok a wor chókkewe ra álleanawu ekkewe mettóch a makkeei.”—Féf. 15:19-21.

⁸ Jemes, ewe chón átettel lón ar we mwiich a erá: “Ina minne, meefiei pwe.” An apasa ena, a itá péchéú pwe mi wor an pwúúng le ereni chienan kewe minne repwe eáni kefil? Esap fókkun ina! Án Jemes erá “meefiei pwe” a pwáári pwe ese sótun féri kefil fán iter meinisin. A chék apasawu meefian nge mi lóngólóng wóón ekkewe pisekin pwáraatá a rong me wóón met ewe Paipel a apasa ussun ewe mettóch.

9. Met feiéchún minne Jemes a eáni memmeef?

⁹ Mi éch meefien Jemes we? Fókkun ewer pwe iwe ekkewe aposel me ekkewe mwán mi ásimaw ra pwal tipeeú ngeni.  Met feiéchún? Eú feiéchún met Jemes a eáni memmeef, ina ese “aosukosuka,” are “aweiresi” ekkewe Chón Kraist chón lúkún Israel pún ese lamot ar repwe pwal álleasochisi ewe Allúkún Moses. (Féf. 15:19; Testament mi Fö) Pwal eú feiéch, minne ra filaatá a pwáári ar súféliti mwelien letipen ekkewe chón Jus Chón Kraist mi kan rongorong ren fansoun langattam lón “iteiten Sapat lón ekkewe sinakok” ‘álleawuun ekkewe mettóch [Moses] a makkeei.’ b (Féf. 15:21) Ese mwáál meefien Jemes we a álisi ekkewe chón Jus me ekkewe chón lúkún Israel Chón Kraist ar repwe pacheéchfengen. Nge lap seni meinisin, epwe apwapwaai Jiowa Kot, pokiten ewe kefil a tipeeú ngeni letipan. A fókkun múrinné ifa ussun ra pwákini ewe osukosuk mi tongeni atai ewe kinamwe me tipeeú lón mwichefelin néún Kot kewe aramas. Me ina eú leenien áppirú mi múrinné fán iten ewe mwichefelin Chón Kraist lón ei fansoun.

10. Ifa ussun ewe Mwichen Soupwúngúpwúng lón ei fansoun a áppirú ewe mwichen soupwúngúpwúng lón fansoun ekkewe popun Chón Kraist?

¹⁰ Ewe sópwun mwen ei, a affata pwe ewe Mwichen Soupwúngúpwúng án Chón Pwáraatá Jiowa lón ei fansoun, a ussun ewe mwichen soupwúngúpwúng lón fansoun ekkewe popun Chón Kraist le lúkúlúk wóón Jiowa, ewe Sounemenemen unuselapen láng me fénúfan, me Jises Kraist, ewe Mékúren mwichefel, fán iten emmwen wóón mettóch meinisin. c (1 Kor. 11:3) Ifa ussun ra féri ena? Albert D. Schroeder, emén mi chóni ewe Mwichen Soupwúngúpwúng seni ewe ier 1974 tori an muchúló manawan wóón fénúfan lón ewe March 2006, a áweweei: “Ewe Mwichen Soupwúngúpwúng a kan mwichfengen lón Aúlúngát. Ra poputááni ar mwiich ren iótek me tingor án Jiowa emmwen ren álillisin an we ngún mi fel. Ra túmúnúfichi pwe meinisin met repwe pwóróusfengen wóón me apwúngaló a tipeeú ngeni án Kot we Kapas ewe Paipel.” Pwal  ina chék ussun, Milton G. Henschel, emén chón ewe Mwichen Soupwúngúpwúng ren fansoun langattam me a muchúló manawan wóón fénúfan lón ewe March 2003, a eisini ekkewe chón sukul repwele sochungio seni ewe 101 Sukulen Gilead: “Mi wor pwal eú mwicheich wóón fénúfan chókkewe mi wisen emmweni ra kútta álillis seni án Kot we Kapas, ewe Paipel, me mwen repwe féri kefil mi lamot?” Ese wor pwal eú mwicheich.

11. Ifa ussun a tour ngeni ekkewe mwichefel met ewe mwichen soupwúngúpwúng a apwúngaló?

¹¹ Chón ewe mwichen soupwúngúpwúng lón Jerusalem ra tipeeúfengen wóón met ra eáni kefil wóón ewe mettóch sirikomsais. Iwe nge, a lamot ar repwe atoura ngeni ekkewe mwichefel met ra apwúngaló lón napanap mi fataffatéch me apéchékkúl pwe epwe wor tipeeú lefiler. Ifa ussun repwe féri ena? Iei met Paipel a erá: “Ekkewe aposel me ekkewe mwán mi ásimaw, fitifengen me unusen ewe mwichefel, ra apwúngaló ar repwe tiinaaló ekkewe mwán ra filaatá seni me leir ngeni Antiok, eti Paul me Parnapas. Ra tiinaaló Jutas ewe mi iteni Parsapas me Sailas, iir kewe mi wisen emmwen me lein pwiir kewe.” Ra pwal ammólnatá eché taropwe me ngeni ekkena mwán repwe uwealó pwe epwe tongeni álleawu lón meinisin ekkewe mwichefel lón Antiok, Siria, me Silisia.—Féf. 15:22-26.

12, 13. Pwata a éch án ewe mwichen soupwúngúpwúng tiinaaló (a) Jutas me Sailas? (b) ewe taropwe?

¹² Pokiten Jutas me Sailas ra “wisen emmwen me lein pwiir kewe,” ina popun a fichitiir ar repwe tupuni ewe mwichen soupwúngúpwúng. A lamot ekkena fémén mwán repwe affata pwe ewe pwóróus ra atoura, esap chék pélúwen ewe kapas eis mi weneiti sirikomsais, nge pwal ina eú mineféén emmwen seni ewe mwichen soupwúngúpwúng. Ekkena “mwán ra filaatá,” ra tongeni álisi ekkewe Chón Kraist chón lúkún Israel ar repwe tipeeúfengen me ekkewe Chón Kraist chón Jus lón Jerusalem. Án ekkena mwán tiitiiló, ina eú kókkót mi pwáári mirit me tong. Ese wor tipemwárámwár pwe ena, a álisaatá ewe kinamwe me tipeeú lefilen néún Kot kewe aramas.

¹³ Ewe taropwe a awora emmwen mi fataffatéch fán iten  ekkewe Chón Kraist chón lúkún Israel, me ese chék fós ussun ewe mettóch sirikomsais, nge a pwal fós ussun ekkewe mettóch mi lamot repwe féri pwe repwe nóm fán án Jiowa chen me kúna feiéch. Ewe kinikin mi fókkun lamot lón ewe taropwe, a apasa: “Ren ewe ngún mi fel me ren ám, ese lamot ám áúpwe apachaatá pwal och chou ngenikemi, nge ekkeei chék mettóch mi lamot: Oupwe sópweeló le ttii senikemi ekkewe mettóch mi piin asor ngeni uluulun, chcha, ekkewe man mi máán ffór, me lisowumwáál. Iká oupwe túmúnúéchúkemi seni ekkeei mettóch, iwe manawemi epwe múrinné. Oune nónnóm!”—Féf. 15:28, 29.

14. Pwata a tufich án néún Jiowa kewe aramas repwe angangfengen fán tipeeú lón ei ótót mi kinikinfesen?

¹⁴ Lón ei fansoun, Chón Pwáraatá Jiowa ra enletin tipeeúfengen. A chék taitap met ra eáni lúkú me ewe angang ra féri inaamwo iká chóchóór a lap seni 8,000,000 lón lap seni 100,000 mwichefel wóón unusen fénúfan. Ifa ussun a tongeni wor tipeeú lefiler, ákkáeúin lón ei ótót aramasen lón ra kinikinfesen me chómmóng osukosuk? Sia tipeeúfengen pokiten chék án Jises Kraist, ewe Mékúren mwichefel, awora ngenikich emmwen mi fataffatéch me ren “ewe chón angang mi túppwél me tipáchem,” ewe Mwichen Soupwúngúpwúng. (Mat. 24:45-47) Sia pwal tipeeúfengen pokiten ach we mwichen pwipwi wóón unusen fénúfan a tipemecheres le fiti met ewe Mwichen Soupwúngúpwúng a eáni emmwen.

15, 16. Met meefien chón ekkewe mwichefel ren ewe emmwen seni ewe mwichen soupwúngúpwúng, me pwata ra meefi ena?

¹⁵ Ewe pwóróus lón puken Féffér a áiti ngenikich pwe atun ekkewe fémén mwán seni Jerusalem ra tori Antiok, “ra ochufengenni ewe mwichemmóngun chón káé me ngeniir ewe taropwe.” Met meefier ren ena kapasen emmwen seni ewe mwichen soupwúngúpwúng? “Mwirin ar álleani [ewe taropwe], ra pwapwa ren ekkewe kapasen pesepes.” (Féf. 15:30, 31) Pwal och, Jutas me Sailas ra pwal ‘pesei pwiir kana ren chómmóng afalafal me apéchékkúler.’ Pokiten átekkana ra afalafala are pwáraaló met Kot a tipeni, iwe ra iteni “ekkewe soufós,” ussun chék Parnapas, Paul, me ekkewe pwal ekkóch.—Féf. 13:1; 15:32; Eks. 7:1, 2.

¹⁶ A ffat pwe Jiowa a efeiéchú unusen ewe kókkót, ina popun meinisin chón ekkewe mwichefel ra pwapwa ren. Met a efisi ar pwapwa? Pokiten ewe mwichen soupwúngúpwúng a awora emmwen mi fataffatéch me a kawor lón fansoun mi fich mi lóngólóng wóón án Kot we Kapas me a nóm fán emmwenien ewe ngún mi fel. Pwal och, pokiten ewe mwichen soupwúngúpwúng a tiinaaló ekkewe mwán ar repwe esilei ngeni ekkewe mwichefel minne ra apwúngaló lón napanap mi pwáári tong me kirekiréch.

17. Ifa ussun ekkewe chónemmwen mi wisen sáifetál ikenái ra áppirú Paul, Parnapas, Jutas me Sailas?

¹⁷ Lón ei fansoun, ewe Mwichen Soupwúngúpwúng án Chón Pwáraatá Jiowa a pwal awora emmwen ngeni pwiir kewe wóón unusen fénúfan lón fansoun mi fich. Lupwen ra apwúngaló och mettóch, ra esilei ngeni ekkewe mwichefel lón napanap mi fataffatéch. Fán ekkóch, ra néúnéú ekkewe chónemmwen mi wisen sáifetál le atoura. Ekkena mwán mi pennúkúóló pwisin mocheniir, ra sái seni eú mwichefel ngeni pwal eú mwichefel me awora ngeniir emmwen mi fataffatéch me apéchékkúl. Iir ra ussun chék Paul me Parnapas, ra áeá watteen fansoun le afalafal, “iir me chómmóng pwiir kewe ra esilefeili ewe kapas allim ussun án Jiowa kapas.” (Féf. 15:35) Ra pwal ussun Jutas me Sailas, ra pesei “pwiir kewe ren chómmóng afalafal” me ra apéchékkúler.

18. Met a lamot néún Kot kewe aramas repwe féri pwe i epwe sópweeló le efeiéchúúr?

 ¹⁸ Nge ifa ussun ekkewe mwichefel? Met epwe álisi chón ekkewe mwichefel wóón unusen fénúfan ar repwe sópweeló ar kinamwe me tipeeú lón ei ótót mi kinikinfesen? Chemeni pwe mwirin och fansoun, ewe chón káé Jemes a makkeei: “Ewe tipáchem seni asan, áeúin a limeliméch, mwirin a kinamwe, tipemirit, tipemecheres le álleasochis . . . Chókkewe mi efisi kinamwe repwe fóffót fán kinamwe me kini uwaan pwúng.” (Jem. 3:17, 18) Sise silei iká Jemes a ekieki ewe mwiich mi fis lón Jerusalem atun a makkeei ena pwóróus. Nge sia káé seni Féffér sópwun 15 pwe Jiowa epwe chék efeiéchúkich iká pwe sia tipeeúfengen me álleasochisi ekkewe kapasen emmwen seni chókkewe mi wisen emmwenikich.

19, 20. (a) Met a pwáári pwe a wor kinamwe me tipeeú lón ewe mwichefel lón Antiok? (b) Met Paul me Parnapas ra tongeni féri iei?

¹⁹ Mwirin án ekkewe Chón Kraist lón Antiok rong met ewe mwichen soupwúngúpwúng a apwúngaló, a wor kinamwe me tipeeú lón ewe mwichefel. Iir rese ú ngeni ekkewe mwán mi feito seni Jerusalem, nge ra fen kilisou ren án Jutas me Sailas etto chuuriir. Ewe Paipel a apasa: “Mwirin ar nónnóm ikena ie ekis fansoun, pwiir kewe ra tiiniireló fán kinamwe ngeni chókkewe mi tiiniireto,” weween ra liwiniti Jerusalem. d (Féf. 15:33) Sia tongeni lúkúlúk pwe ekkewe chón lúkú lón Jerusalem ra pwal pwapwa lupwen ra rong met ekkewe rúúemén mwán ra apwóróusa ussun ar we sái. Kilisou ren án Jiowa úméúméch mi somwoló pwe a sópwéch me taweló ar we angang!

²⁰ Iei Paul me Parnapas, iir kewe mi nómotiw Antiok, ra tongeni unusen nefótófót wóón ar emmweni ewe angangen afalafal, ussun chék met ekkewe chónemmwen mi wisen sáifetál lón ei fansoun ra féri atun ra chuuri ekkewe mwichefel mi nóm fán ar túmún. (Féf. 13:2, 3) A ifa me feiéchún néún Jiowa kewe aramas! Nge ifa ussun Jiowa epwe néúnéú me efeiéchú ekkena rúúemén chón afalafal mi tinikken? Sipwe silei me lón en sópwun mwirin ei.