1, 2. (a) Nemene la itre hnyinge ka jol nyine troa seng hnene la lapa ne xomi meköt ekö? (b) Nemene la ixatua hna kapa hnene la itre trejin matre axecië mekun hnyawa?

 ITRE keresiano asë a lapa treqene la mekun hna troa axeciën hnene la itre qatre thup me itre aposetolo e Ierusalema. Angatr a igoeë, ke tha ewekë ka co kö la ka troa traqa. Hetre mekune ka tru hna amejën hnene la ixötrehatreny: Itre keresiano pala kö fene la Wathebo i Mose? Ame koi Iehova, ka isapengöne pala hi la itre trejin ne Iudra memine la itre atre ne fen ka lö kowe la hmi keresiano?

² Tru catr la itre ewekë hna ce wang hnene la itre qatre thup. Hnei angatr hna ithanatane la itre hna perofetan hnei Akötresie, me dreng la itre hna melën ka amamane ka hape, Nyidrëti a kapa la itre atre ne fen. Tru hnei mekun hnei angatr hna ifekeun. Ase hë angatr kapa asë la itre ithuemacanyi ka troa xatua angatr troa axecië mekun. Mama hnyawa hi laka, uati hmitrötr a köja gojenyi angatr. Tro kö la itre trejin a dreng?

3. Nemene la hna ini së hnene la tusi Itre Huliwa mekene 15?

³ Nyipiewekë tro la lapa ne xomi meköt a catre me lapaun, matre troa kapa la hna amekötin hnene la uati hmitrötr göne la ewekë ka traqa. Tro lai a xele ma wai angatr hnene la itre he ne la hmi angetre Iudra. Nge e hnine la ekalesia, troa cile koi angatr hnene la itre ka catre fë la Wathebo i Mose. Tro jë angatre lai a tune kaa? Tro sa ce wang. Tro sa öhn e cili la tulu hna xötrethenge hnene la Lapa Ne Xomi Meköt ne la itre Temoë Iehova enehila. Tulu nyine tro fe sa xötrethenge la easa axecië mekun ngöne la itre ijine jol.

4, 5. Nemene la itre hna perofetan hnei Iakobo hna amexej?

⁴ Iakobo trejin me Iesu la ka ithanata, a ke maine jë angeic la perezida ne la icasikeu. Ame la angeic a xom la ithanata, ke angeice hi lai a qaja la mekuna ne la lapa ne xomi meköt. Hane hi la aqane nyiqaane angeic: “Simona qejepengöne hnyawa lo ijine Akötresieti a xötrei ujë kowe la itre atre  ne fen, me iëne qaathei angatre la ketre nöj thatraqane la ëje i nyidrë. Nge ka ihmeku memine la hna qaja hnene lo itre perofeta.”—Itre hu. 15:14, 15.  

⁵ Ame la cainöje i Simona, lo hna hëne ka hape, Simona Peteru, memine la itre mekun hna qaja hnei Banaba me Paulo, ke celë hi ka amekunë Iakobo la itre xötr ne la Tusi Hmitrötr, ka xatuane la itre mekun hna ithanatane ngöne la ijine cili. (Ioane 14:26) Thupene la hna öhne ka hape, ame la itre mekun hna ithanatan, ke ka “ihmeku memine la hna qaja hnene la itre perofeta,” hnei angeic hna qaja lo itre trenge ithanata i Amosa 9:11, 12. Ketre itusi ne la Itre Hna Cinyihan qene Heberu, lo hna hape, itre perofeta (Mat. 22:40; Itre hu. 15:16-18) Easa öhne laka, ame la hna qaja hnei Iakobo, ke ka nango isapengöne memine la hna qaja ngöne la tusi Amosa. Maine jë, hna xome qa ngöne la Septante, kolo Itre Hna Cinyihan qene Heberu hna ujën qene Geres.

6. Tune kaa la aqane alaine la ithanata i angatr hnene la Itre Hna Cinyihan?

⁶ Jëne Amosa perofeta, hnei Iehova hna qaja amë ka hape, tro ha traqa la ketre drai tro nyidrë a acil “la ihmelekap i Dravita,” ene la xötre Joxu uti hë la Mesia. (Ezek. 21:26, 27) Hapeu, tro hmaca kö Nyidrëti lai a ce huliwa memine la itretre Iudra? Waea. Önine la hna perofetan troa icasinekeun la nöjei atr qa ngöne la “itre nöj” me ‘xome nyine ëje i angatr la ëje i Akötresie.’ Peteru hi la a ase qaja ka hape, “Ame koi nyidrë tha sisitria kö së hui angatr, matre nyidrëti a ahmitrötrëne la itre hni angatr hnene la lapaune i angatr.” (Itre hu. 15:9) Kosë kola amamane e cili la aja i Akötresie laka, atre Iudra ju hë maine atre ne fen, ngo ijiji angatr asë troa hane lö hnine la Baselaia i Akötresie. (Rom. 8:17; Efe. 2:17-19) Eje hi, pëkö ngöne la itre hna perofetane qaathei Akötresie ka qaja ka hape, tro la itre atre ne fen a pane ixötrehatreny maine xome la hmi i angetre Iudra matre troa kepe angatr hnei Akötresie.

7, 8. (a) Nemene la mekune hna qaja hnei Iakobo? (b) Nemene la aqane tro sa trotrohnine la hnei Iakobo hna qaja?

⁷ Thupene la hna ketri Iakobo hnene la itre nyipici qa hnine la itre hna cinyany, memine la itre ewekë hnei angeic hna dreng, hetre aja i angeice hë troa ce thawa me angatr la itre mekune celë: “Nge ketre, tha ajange kö troa ajolëne la itre atre ne fen ka ujë koi Akötresie, ngo tro pe a cinyihane koi angatre troa iananyi memine la itre ewekë hna löth hnene la kuci idrola, me kuci ngazo, me itre öni hna jele nyinawan, me madra. Nge qaane ekö, hetre itre ka anyipici Mose ngöne la itre traon asë, ke kola e la Trenge Wathebo i angeic hnine la itre sunago e nöjei Sabath.”—Itre hu. 15:19-21.

⁸ Ame la Iakobo a qaja ka hape, “tha ajange kö lai,” nemene la aqane tro sa trotrohnin? Iakobo kö lai a musinëne la itre xan troa xötrethenge la mekune i angeic? Waea tha eje kö lai! Ame la aliene la qene Geres la hna hape, “ajange kö” kolo fe a hape, “Eni a mekun” maine “Ame koi ni.” Tha  Iakobo kö a thele troa musinë itre xan, ngo angeice pe a thel troa atrotrohninë angatr jëne la itre nyipici hna drenge memine la Itre Hna Cinyihan.  

9. Nemene la itre ewekë ka loi qa ngöne la mekuna i Iakobo?

⁹ Hapeu, ka loi kö la mekuna i Iakobo? Öö, pine laka hna kapa hnene la itre aposetolo me itre qatre thup. Nemene la itre eloine qa ngön? Ame la hnapan, tha tro kö lai a “ajolëne” la itre atre ne fen ka lö kowe la hmi keresiano, me musinë angatr troa xötrethenge la Wathebo i Mose. (Itre hu. 15:19) Ketre mina, kolo fe a metrötrëne la mekuthetheu ne la itre keresiano atre Iudra, lo itre ka majemine dreng qaane ekö la “kola e ngöne la itre sunago e nöjei sabath la wathebo i Mose.” b (Itre hu. 15:21) Tro la mekune hna axeciën a acasine la itre keresiano asë, atre Iudra ju hë maine tha atre Iudra kö. Ketre, tro ej a amadrinë Iehova, ke kolo ha eatrëne trongëne la aja i Nyidrë. Hane hi la ketre aqane ameköti ewekë ka lolo, matre tro palahi a thupëne la casi me tingeting ngöne la ekalesia i Akötresie! Nge ketre tulu hi lai nyine troa xötrethenge ngöne la ekalesia enehila!

10. Tune kaa la aqane xötrethenge la lapa ne xomi meköt ekö, hnene la Lapa Ne Xomi Meköt enehila?

¹⁰ Hne së lo hna ce wang laka, tune lo lapa ne xomi meköt ekö, Lapa ne Xomi Meköt enehila a thele ixatua thei Iehova, Joxu ne la hnengödrai me fen, me Iesu Keriso, Tane la ekalesia, matre troa amekötine la nöjei ewekë. c (1 Kor. 11:3) Nemene la aqane axecië mekun angatr? Hane hi la hna qejepengöne hnei Trejin Albert Schroeder, atrene la Lapa ne Xomi Meköt qaane lo 1974 uti hë la pune la mele i nyidrë e celë fen, lo Maac 2006: “Ame e nöjei merkredi, Lapa Ne Xomi Meköt a icasikeu. Angatr a nyiqane hnene la thith, matre sipone la ixatua ne la ua i Iehova. Tha ka hmaloi kö troa ithanatane me axeciën la nöjei mekun thenge la mekuna i Akötresie, e hnine la  Tusi Hmitrötr.” Hnei Trejin Milton Henschel, ketre atrene la Lapa Ne Xomi Meköt uti hë la pune la mele i nyidrë e celë fen lo Maac 2003, hna hnyinge kowe lo 101^èmeclasse ne Gileada ka hape: “Hetre ketre organizasio kö e celë fen ka xötrethenge la hna qaja hnei Tusi Hmitrötr la kola axecië mekun?” Waea, pëkö ketre organizasio.

11. Tune kaa la aqane thuemacanyine la itre ekalesia hnene la lapa ne xomi meköt?

¹¹ Hetre hna ce axeciën hnene la lapa ne xomi meköt ne Ierusalema. Ngo ame pe, nyipiewekë troa thuemacanyi hnyawan la itre trejin ngöne la itre ekalesia matre tro angatr a cas me kapa. Nemene la aqane troa kuca? Önine la xötr: “Hnene la itre aposetolo, me itre qatre thup, memine la ekalesia asë, hna ce axeciëne troa upe la itre xan qaathei angatr troa ce tro me Paulo me Banaba Anetioka eë; angatr a upi Iudra jë lo hna hëne ka hape, Basabasa me Sila. Lue trejin lai ka elemekene la huliwa.” Hnei angatre fe hna hnëkëne la ketre tus, me hamëne kowe la itre atre cili, matre troa e ngöne la itre ekalesia e Anetioka, Suria me Kilikia.—Itre hu. 15:22-26.

12, 13. Neneme la eloine la hna up (a) Iudra me Sila? (b) la tus ne la lapa ne xomi meköt?

¹² ‘Lue trene hnëqa nyidro [Iudra me Sila] nyipine la itre trejin,’ matre lue ka ijije hnyawa nyidro troa tro fë la huliwa ne la lapa ne xomi meköt. Ame la itre ekalesia a kapa la 4 lao trejin, trotrohnine ju hi angatr ka hape, ame la maca hna traqa fë hnene la itre trejin, ke tha kolo kö a sa hmekuj lo mekune hna tro fë, ngo hetre itre hna amekötin ka nyipiewekë fe qaathene la lapa ne xomi meköt. Ame la kola traqa hnei Iudra me Sila lo lue “hna axeciëne troa upe” ke kolo ha acasine hnine la ekalesia la itre keresiano atre Iudra me itre keresiano tha atre Iudra kö. Ka inamacane me lolo la aqane amekötine celë! Ej a axulune la tingetinge me cas ngöne la nöje i Akötresie.

¹³ Ka mama hnyawa ngöne la tus la itre ithuemacany göne la ixötrehatreny, memine fe la itre xaa nyine tro la itre keresiano ka tha atre Iudra kö a kuca matre troa kapa la manathith qaathei Iehova. Kola qaja hnene la xötre ka hape: “Hne huni memine la uati hmitrötr hna ce mekune laka, tha nyipiewekë kö troa sili xa ehnefe i nyipunie hune la itre ewekë ka nyipiewekë celë: Troa iananyi memine la itre ewekë hna huujëne kowe la itre idrola, me madra, me itre öni hna jele nyinawan, me kuci ngazo. Haawe, maine tro nyipunieti a catre iananyi memine la itre ewekë cili, tro ha lolo la mele i nyipunie. E ketre ijine hë!”—Itre hu. 15:28, 29.

14. Nemene la ka acasine la nöje i Iehova ngöne la fen ka isa kuci mekun?

¹⁴ Ame enehila, kola mama la cas ngöne la itre ini me huliwa, ne la 8 000 000 nge hetre munëne lao Temoë Iehova ngöne la 100 000 lao ekalesia ne la fen. Hnauëne laka, hetrenyi jë la cas ka tune lai ngöne la fen  ka zikoziko me ka isa kuci mekun enehila? Kola hetrenyi la thangane cili qa ngöne la itre ithuemacany ka lualai, hna hamëne hnei Iesu Keriso, Tane la ekalesia jëne la “hlue ka nyipici me ka inamacan,” ene la Lapa Ne Xomi Meköt. (Mat. 24:45-47) Kola hetrenyi fe la thangane cili qa ngöne la aqane lolo la aqane ce huliwa ne la itre trejine memine la Lapa ne Xomi Meköt.

15, 16. Nemene la hna kuca göne la ixötrehatreny, nge tune kaa ha la thangan?

¹⁵ Tusi Itre Huliwa a qaja la ka traqa koi angatr e Anetioka. Hnene la itre atr hna upe qa Ierusalema, hna “icasinekeune ju la gurup asë me hamë angatre la tus.” Nemene la aqane kapa la itre ithuemacany ne la lapa ne xomi meköt hnene la itre trejin ne Anetioka? “Nyudreni a madrine ju kowe la ithuecatre hna hamën.” (Itre hu. 15:30, 31) Ketre mina, hnei Iudra me Sila hna “thuecatrene la itre trejin jëne la itre cainöj.” Celë hi matre qaja jë fe ka hape, ame lo lue atr cili, ke “perofeta,” tui Banaba me Paulo me itre xan ju kö hna hëne fe ka hape, itre perofeta, kola qaja la itre atr ka tro fë me qaja amamane la aja i Akötresie.—Itre hu. 13:1; 15:32; Eso. 7:1, 2.

¹⁶ Kola mama hnyawa ka hape, hnei Iehova hna amanathithine la itre mekune hna axeciën, ke traqa ha la itre hna amekötin kowe la pune ka loi me madrin. Qa ngöne nemene matre traqa pi kowe la pune ka lolo celë? Qa ngöne laka, ame la itre ithuemacany, ke ka traqa hnyawa qaathene la lapa ne xomi meköt. Itre ithuemacany ka tha jole kö troa trotrohnin, ka traqa ngöne la nyipi ijin, nge hna nyitrepene hnene la Trengewekë i Akötresie me uati hmitrötr. Kola mama fe la elolone la aqane nyipiewekëne la itre atr ka troa kapa la maca ngöne la itre ekalesia.

17. Nemene la tulu hna xötrethenge hnene la itre trejin ka iwai trootro?

¹⁷ Lapa Ne Xomi Meköt a xötrethenge la tulu celë la angatr a hamëne la itre ithuemacany kowe la itre trejin ngöne la fene hnengödrai. Ame la angatr a axeciëne la ketre mekun, angatr a qaja hnyawan kowe la itre ekalesia la mekun hna xom. Nge angatre fe a upe la itre trejin ka iwai trootro, itre trejin ka nue la mele i angatr matre wange trongëne la itre ekalesia. Itre trejin cili a tro fë hnyawa la itre ithuemacanyi me itre ithuecatr. Tui Paulo me Banaba, angatr a nue la mele i angatr kowe la huliwa i Akötresie me ‘cainöjëne la maca ka loi ne la Trengewekë i Iehova.’ (Itre hu. 15:35) Nge tui Iudra me Sila, angatr a ‘xatuane me thuecatrene la itre trejin jëne la itre cainöj.’

18. Nemene la nyine troa kuca hnene la nöje i Akötresie matre tro pala hi a kapa la manathith?

¹⁸ Nge tune kaa ha la itre ekalesia? Troa hetre casi me tingetinge tune kaa ngöne la fene ka zikoziko? Mekune kö lo hna cinyihan ekö hnei Iakobo  ka hape: “Ame la inamacan qaa hnengödrai, tre ka pane wië, nge ka tingeting, nge ka menyik, nge ka canga iupe troa idrengethenge . . . Ketre, ame la itin ne la wene ne la meköt, tre hna tran ngöne la tingeting koi angetre melëne la tingeting.” (Iako. 3:17, 18) Thatreine kö tro sa qaja ka hape, angeic a cinyanyin thatraqane la ekalesia ne Ierusalema. Ngo kola mama hnyawa ngöne la mekene 15 ka hape, tro hi sa kapa la manathith qaathei Akötresie, e tro sa cas me ce huliwa.

19, 20. (a) Nemene la aqane mama la tingetinge me cas ngöne la ekalesia ne Anetioka? (b) Nemene la hnei Paulo me Banaba hna kuca e thupen?

¹⁹ Mama hnyawa ha ka hape, hetrenyi hmaca la tingeting me cas hnine la ekalesia ne Anetioka. Tha hnei angatre kö hna thele iwesitrë memine la itre trejin ne Ierusalema. Hnene pe la itre trejin ne Anetioka hna wangatrune la iwai i Iudra me Sila. Kola qaja ka hape, hnei nyidro “hna pane lapa me angatr,” nge thupene lai hna nue nyidro troa bëeke hmaca kowe lo itre trejine ka upi nyidro qa Ierusalema. d (Itre hu. 15:33) Eje hi laka, hnene la itre trejin ne Ierusalema hna madrin la Iudra me Sila a qejepengöne la tronge i nyidro. Jëne la ihnimi gufa i Iehova, lolo la aqane tro fë la lue trejin la huliwa i nyidro!

²⁰ Ame lo Paulo me Banaba a lapa e Anetioka, hnei nyidroti hna catre tro fë la maca. Hane fe hi lai hna kuca hnene la itre ka iwai trootro enehila ngöne la itre ekalesia hnei angatr hna wange trongën. (Itre hu. 13:2, 3) Drei la manathithi kowe la nöje i Akötresie! Nge nemene hmaca kö la aqane amanathithine Iehova lai lue ka catre cainöje cili? Tro së lai a ce wange ngöne la mekene e thupen.