1, 2. (a) Jeruzalemant aslolea Sonchalon Monddollak kosle mhotvache prosn suttave korunk asle? (b) Tea bhavank sarko nirnnoi gheunk koxi modot zali?

 JERUZALEMANT, apostl ani vhoddil eka rumant eka-mekak polloit asat. Karonn tankam sunoti vixim ek mhotvacho nirnnoi gheuncho asa. Hea vorvim thodde prosn suttave zatole. Te mhunnttlear, Kristanvamnim Moizesa udexim dilʼle Kaide pallunk poddttole kai? Judev Kristanvam modem ani Videxi Kristanvam modem ontor astolo kai? Ho nirnnoi gheunk te sogle umedin asat.

² Apostlamnim ani vhoddilamnim zaitea puraveancher dhean dilam. Devachea Utrant aslolea bhasaunneancher ani Videxi Kristanvancher Jehovachi maniotai asa mhunn mellʼllolea puraveancher te uloileat. Hea vixim tannim ukteponnim aple vichar sangleat. Ani sarko nirnnoi gheunk tankam goroz ti sogli mahiti asa. Tannim koslo nirnnoi ghetlolo Jehovak zai tem tankam sarkem dison ailam. Tor Jehovachea povitr xokte udexim mellʼllolem nirdexon te manun ghetole kai?

3. Itihas odheai 15-nt aslole ghoddnnecher ami obheas kortat tednam amkam koso faido zatolo?

³ Sonchalon Monddollak ho nirnnoi gheunk khub bhavarthachi ani dhirachi goroz asa. Karonn tannim ghetlolea nirnnoiak lagon, Judevanche dhormik fuddari tancho anikui dves korunk xoktat. Toxench, Moizesa udexim dilʼlea Kaideam pormonnem jieunk zai mhunn sangtat te lok ghoddie ho nirnnoi apnnauchenant. Tor Sonchalon Monddollan koslo nirnnoi ghetlo tem ami hea odheai-ant polloitolim. Toxench, aiz Jehovachea Sakxeanchea Sonchalon Monddollak, nirnnoi gheunchea vixim tannim koxi ek dekh dovorlea tem-ui ami polloitolim. Ani ami Kristanvam zalʼlean amkam nirnnoi gheunche astat vo amchea jivitant oddchonneo ietat tednam ami tanchi dekh gheunk zai.

4, 5. Jakoban Provadeanchea Pustokantlea khoinchea utrancho ulʼlekh kelo?

⁴ Jakob Jezucho sovto bhav aslo ani ek xis aslo. a Ani hea vellar, to hea mittingent fuddakar ghetalo. Tor to ubo ravon aplem ulovop suru korta. Sonchalon  Monddollachea soglea bhavamnim mellon zo nirnnoi ghetla tea vixim to spoxtt toren thoim hajir aslolea sogleank kolloita. To oxem mhunntta: “Devan koxe porim poilech pavtti Judev nhoi toslea lokancher dhean dilem ani tanchea modle aplea nanva pasot lokank vinchun kaddle tea vixim Simeanvan bariksannen amkam sanglem. Ani Provadeanchea pustokamnim pasun oxench boroilʼlem asa.”​—Itihas 15:14, 15.

⁵ Simeanv, vo Simanv Pedrun jem sanglem, toxench Paulun ani Barnabasan sangloleo ghoddnneo Jakoban aikoleo. Hem aikon taka ghoddie thoddim versam ugddas ailim astolim, jea vorvim Jehovachem margdorxon somzonk bhavank modot zali. (Juanv 14:26) Uprant, “Provadeanchea pustokamnim pasun oxench boroilʼlem asa,” oxem sangon tannem Amos 9:11 ani 12-nt sanglolea utrancho ulʼlekh kelo. Hem pustok Hebrev Bhaxent Boroilʼlea Pustokancho bhag zaun asa, zankam chodd korun “Provadeanchim Pustokam” mhunnttleant. (Mt. 22:40; Itihas 15:16-18) Punn aiz ami Amosachea pustokant vachtat tim utram Jakoban mhunnttlolea utram thaun thoddim vegllim asat mhunn tumi dhean dilam astolem. Karonn tannem Septuagint-antlean ulʼlekh kelʼlo astolo, jem Hebrev Bhaxent Boroilʼlea Pustokancho, Grik bhaxen kelʼlem bhaxantor zaun asa.

6. Devachea Utrantlean tachi khuxi somzonk bhavank koxi modot zali?

⁶ Amos provadea udexim, Jehovan bhasaunni kelʼli, ki to “Davidacho moddlolo tombu” porot ubartolo. Tem mhunnttlear, oslo ek vell ietolo jednam tachea vonxavolli thaun ailʼlo Mesias razvottki choloitolo. (Ez. 21:26, 27) Tor hea vellar, Jehova porot fokot Judev lokankuch vinchun kaddttolo kai? Na! Karonn bhasaunnent to “soglea raxttranchea” lokank ektthaim kortolo ani tankam ‘Jehovachea nanvan vollkhotole’ mhunn sanglam. Ugddas korat, Devan “amchea [Judev Kristanvam] modem ani tanchea [Videxi Kristanvam] modem kainch bhedbhav korunk na, punn tanchea bhavarthak lagon tanchim kallzam xudʼdh keleant,” mhunn Pedrun somzailʼlem. (Itihas 15:9) Dusrea utramnim mhunnttlear, Judev toxench Videxi Kristanvam aplea Rajeache daiji zaunche mhunn Jehovachi khuxi asa. (Rom. 8:17; Ef. 2:17-19) Ani Devachea Rajeache daiji zaunk Videxi lokamnim sunot korunk zai vo tannim Judev dhorm apnnaunk zai mhunn khoincheach bhasaunnent sangonk na.

7, 8. (a) Jakoban kitem mhunnttlem? (b) Bhavamnim koslo nirnnoi gheunk zai tem tharaunk apleak odhikar asa oxem Jakob sangonk sodhtalo kai? Somzaiat.

⁷ Bhasaunneantlean, toxench Pedru, Barnabas ani Pauluchea ghoddnnentlean zo spoxtt puravo mellʼllo tachea adarit Jakoban oxem mhunnttlem: “Taka lagon, Deva koddem vollon aileat tea Judev nhoi tea lokank ami tras korcho nhoi oso mhozo nirnnoi asa. Punn tankam murti pujen boxttailʼlea vostum thaun, onoitik kuddichea sombonda thaun, gollo damun marlolea zonvarachea masa thaun ani rogta thaun pois ravchem mhunn boroun dhaddum-ia. Karonn poilinchea kallar thaun oxe lok asat je Moizesachea pustokamnim boroilʼleo vostu dor eka xarant porgott korit aile. Te dor eka sabathachea disak sobha-ghoramnim tachea pustokantlean dusreank vachun dakhoitat.”​—Itihas 15:19-21.

⁸ “Oso mhozo nirnnoi asa,” oxem Jakoban mhunnttlem tednam, apnnem mittingent fuddakar ghetla dekhun, bhavamnim koslo nirnnoi gheunk zai tem tharaunk  apleak odhikar asa mhunn to dakhounk sodhtalo kai? Na! Karonn “oso mhozo nirnnoi asa,” Grik bhaxentlean ailolea hea utrancho orth oso-i zata, “Hanv mhozo vichar sangtam” vo “oso nirnnoi gheunk zata.” Jakob sogleam bhavam pasot apunn ekloch nirnnoi gheunk sodhinaslo. Punn versancher ani puraveancher adarit koslo nirnnoi gheunk zata tem to sangonk sodhtalo.

9. Jakobache vichar apnnailolean kosle faide zatole asle?

⁹ Jakobacho vichar boro aslo kai? Hoi, karonn apostlamnim ani vhoddilamnim to manun ghetlo. Tacho kitem faido zalo? Ek faido mhunnttlear, ho nirnnoi ghetlolean Videxi Kristanvank “tras” zaunche nasle. Karonn tankam Moizesa udexim dilʼle kaide pallchi goroz nasli. (Itihas 15:19) Dusro faido mhunnttlear, ho nirnnoi ghetlolean, Judev Kristanvanchea ontoskornnak te man dakhounk pavtole asle. Karonn tannim zaitim vorsam ‘sobha-ghoramnim dor eka sabathachea disak, Moizes pustokantlean dusreank vachun dakhoitalo’ tem aikolʼlem. b (Itihas 15:21) Tea bhair, ho nirnnoi ghetlolean Judev ani Videxi Kristanvam modem aslolo sombond anik ghott zatolo aslo. Ani sogleam-von mhotvachem mhunnttlear, ho nirnnoi Jehovachea udʼdhexa pormonnem aslo dekhun to taka manvotolo aslo. Tor sobhechi xanti piddʼddear korunk xoktali tosli poristhiti tannim kitle bore toren suttavi keli nhoi! Hea toren tannim aichea Kristi sobhek ekdom borem udharonn dovorlam.

10. Poilea xekddeantlea Kristanvanchea Sonchalon Monddolla bhaxen aiz Sonchalon Monddoll koxem kam korta?

¹⁰ Fattlea odheai-ant sanglam toxem, poilea xekddeantlea Kristanvanchem Sonchalon Monddoll kam korta tech bhaxen, aiz Jehovachea Sakxeanchem Sonchalon Monddoll pasun kam korta. Dor eka vixoi-acher tankam margdorxon mellonk, te Sorvpodvedar Jehovacher ani Kristi sobhecho Mostok, Jezu Kristacher patieun ravtat. c (1 Kor. 11:3) Sonchalon Monddoll hem koxem korta? Albert D. Schroeder-an 1974-a thaun Sonchalon Monddollacho vangddi mhunn kam kelem ani Mars 2006-ant tannem prithumer visvaxiponnan apli seva sompoili to oxem mhunntta: “Dor Budvarak Sonchalon  Monddollachi mitting asta ani Jehovachea povitr xokte udexim margdorxon mellonk magnnem korun ti suru kortat. Toxench, bhasabhas kortat to dor ek vixoi ani nirnnoi Devachea Utracher adarit asa mhunn te khatri korun ghetat.” Tech bhaxen, Milton G. Henschel, zaitim vorsam Sonchalon Monddollacho vangddi aslo ani Mars 2003-ant tannem prithumer visvaxiponnan apli seva sompoili. Watchtower Bible Gilead Korsachea 101 klasintlea graduation-achea disa tannem ho mhotvacho prosn vicharlo: “Hea prithumer anik khoinchem-i songotton asa kai, zache fuddakar gheupi mhotvache nirnnoi gheunchea poilim Devachem Utor, Bible-acher patieun ravtat?” Khorench, oslem anik khoinchench songotton na!

11. Sonchalon Monddollan ghetlolo nirnnoi sobhentlea bhav-bhoinnank koxe kolloitat?

¹¹ Jeruzalemant Sonchalon Monddollan ekvottan sunoti vixim nirnnoi ghetlo, punn sobhentlea bhav-bhoinnank hea nirnnoia vixim sangtana tannim spoxtt ani urbevont ritin sangonk zai aslem. Karonn tankam sobhent bhav-bhoinnam modem ekvott samballunk zai aslo. Tor tannim kitem kelem? Bible sangta: “Apostlamnim, vhoddilamnim, ani akʼkhe sobhen tanchea modlea vinchlolea thoddea munxank Paulu ani Barnabasa borabor Antiokak dhaddpachem tharailem. Tannim Barsabas mhunnttat tea Judasak ani Silasak dhaddle. Te bhavam modem fuddakar ghetale.” Titlench nhoi, hea bhavam sangata tannim ek chitt boroun dhaddli, ji te Antiok, Siria, ani Silisiantlea bhav-bhoinnam pasot vachunk xoktale.​—Itihas 15:22-26.

12, 13. (a) Judas ani Silasak dhaddlolean koslo faido zalo? (b) Sonchalon Monddolla thaun chitt dhaddlolean kitem borem zaunk pavlem?

¹² Judas ani Silas “bhavam modem fuddakar ghetale” ani Sonchalon Monddollache prothinidi zaunk te purte asle. Hea char bhavamnim haddlolo sondex fokot sunoti vixim naslo, punn te sobhank novem margdorxon pasun diunche asle. He ‘vinchun kaddlole munis’ sobhent aslolea Videxi Kristanvam modem ani Jeruzalemant aslolea Judev Kristanvam modem ekvott ghott korunk modot korunk pavtole asle. Hea zannvaiechea munxank dhaddun tannim kitli bori manddavoll keli nhoi! Karonn hea vorvim Devachea lokam modem ekvott ani xanti vaddli mhunn kosloch dubhav na.

¹³ Hea chittint, Videxi Kristanvank fokot sunoti vixim nhoi, punn Jehovachi maniotai ani besanv mellonk tannim anik kitem korunk zai tem-ui sanglolem aslem. Hea chittintlim mhotvachim utram oxim asat: “Ami povitr xoktechea modotin oso tharav gheunk pavle ki fuddem sangloleo gorjecheo vostu soddun ami tumcher anik koslench vojem ghalchem nhoi: tumi murtek bhettoilʼlea vostum thaun, rogta thaun, gollo damun marlolea zonvarachea masa thaun ani onoitik kuddichea sombonda thaun sodanch pois ravat. Tumi zor dhean dilem ani hea vostum thaun pois ravle zalear tumchem sodanch borem zatolem. Mog asum!”​—Itihas 15:28, 29.

14. Aiz futt poddlolea sonvsarant Jehovachea lokam modem ekvott kiteak asa?

¹⁴ Aiz 1,00,000-am poros chodd sobhamnim 80,00,000-am poros chodd Jehovachim Sakxi asat. Itlim zannam asonui tanchea modem ekvott asa ani  tanchi patienni ek-sarki asa. Punn aiz futt poddlolea sonvsarant hem koxem zaunk xokta? Hachem mukhel karonn mhunnttlear, sobhechem Mostok Jezu Krist, ‘visvaxi ani xannea chakraʼ udexim, tem mhunnttlear, Sonchalon Monddolla udexim spoxttponnim margdorxon dita. (Mt. 24:45-47) Anik ek karonn mhunnttlear, Sonchalon Monddoll dita tem margdorxon sonvsarbhorchim bhav-bhoinnam khuxalkaien pallttat.

15, 16. Sonchalon Monddolla thaun mellʼllolem nirdexon zannam zaun sobhentlea bhav-bhoinnank koxem dislem, ani kiteak?

¹⁵ Itihas pustok amkam fuddem dakhoita, ki Jeruzalemantlean ailole charui bhav Antiokant pavle tednam, “tannim thoim soglea xisank ektthaim kele ani tankam ti chitt dili.” Sonchalon Monddollachem margdorxon asloli chitt vachun tea bhavank koxem dislem? Bible sangta: “Chitt vachun tankam khub urba mellʼlli ani te khub khuxal zale.” (Itihas 15:30, 31) Titlench nhoi, Judas ani Silasan, “khub bhaxonnam diun bhavank urba dili ani tancho bhavarth ghott kelo.” Dekhun tankam, toxench Barnabasak ani Pauluk pasun “provadi” mhunnttlole asat. Karonn tannim Devachi khuxi kitem asli tem dusreank dakhoilem.​—Itihas 13:1; 15:32; Sutt. 7:1, 2.

¹⁶ Sonchalon Monddollan ghetlolea nirnnoiancher Jehovachem besanv aslem mhunn sarkem dison ailem. Karonn sobhentlea soglea bhav-bhoinnank khub urba mellʼlli. Oxem kiteak zalem? Sonchalon Monddollan Devachea Utracher ani povitr xoktechea margdorxona pormonnem ho nirnnoi ghetlolo ani tannim sobhank sarkea vellar spoxtt ritin margdorxon dilʼlem. Toxench, bhavank dhaddun Sonchalon Monddollan aplo nirnnoi sobhank mogan ani doiall ritin kolloilʼlo.

17. Aiz sorkittachi dekhrekh korpi bhav, Paulu, Barnabas, Judas ani Silasa bhaxen koxe zaun asat?

¹⁷ Poilea xekddeantlea Sonchalon Monddolla bhaxen, aiz pasun Jehovachea Sakxeanchem Sonchalon Monddoll, sonvsarbhor aslolea bhav-bhoinnank sarkea vellar nirdexon dita. Te kosle-i nirnnoi ghetat tednam, hea vixim te sobhank spoxtt toren kolloitat. Oxem korunk ek vatt mhunnttlear, sorkittachi dekhrekh korpeam udexim. Te bhav svotacho teag korun eka sobhe thaun dusre sobhent voitat ani spoxtt toren margdorxon ditat, toxench bhav-bhoinnank urba ditat. Paulu ani Barnabasa bhaxen, te bhav-bhoinnam sangata sevent vavr kortat. Ani ‘zaitea lokam sangata mellon, Jehovachea utra vixim bori khobor xikoit ravtat ani porgottit ravtat.’ (Itihas 15:35) Toxench, Judas ani Silasa bhaxen te “khub bhaxonnam diun” bhav-bhoinnank urba ditat ani bhavarthan ghott zaunk modot kortat.

18. Jehovachem besanv mellonk tachea lokamnim kitem korunk zai?

¹⁸ Aiz futt poddlolea sonvsarant, sobhamnim xanti ani ekvott samballunk koxi modot zata? Jakoban aple chittint kitem boroilem tem ugddas korat. Tannem boroilem: “Sorgar thaun ieta ti zannvai sogleant poilim povitr, xant, somzon gheta tosli, adnea palltta tosli . . . Toxench, jim xanti samballttat, tim xantin vomplolem  ani nitivontponn utpon korta toslem pik lunvtolim.” (Jak. 3:17, 18) Him utram boroilʼlim tednam, Jakobachea monant Jeruzalemantli sobha asli vo na tem amkam khobor na. Punn Itihas odheai 15-nt ami xiktat, ki amchea modem ekvott aslear ani fuddakar ghetolea bhavanchem margdorxon ami pallttat zalearuch amkam Jehovachem besanv mellttolem.

19, 20. (a) Sonchalon Monddollacho nirnnoi kollʼllea uprant, Antiokantlea sobhent xanti ani ekvott aslo mhunn koxem dison ieta? (b) Tea vellar Paulu ani Barnabas kitem korunk pavle?

¹⁹ Antiokantlea bhavank Sonchalon Monddollacho nirnnoi kollʼllea uprant, tanchea modem xanti ani ekvott aslo. Tannim Jeruzalemantlean ailolea bhavancho virodh korunk na, punn tea bhavamnim tankam bhett dili mhunn te khub upkari asle. Karonn Bible sangta: “Tannim thoim thoddo vell sarlea uprant, thoinchea bhavamnim tankam bore korun vochat mhunn sangon, jea bhavamnim tankam dhaddlole tanche koddem tankam porot dhaddun dile,” mhunnche, Jeruzalemant. d (Itihas 15:33) Judas ani Silasan Antiokant kitem zalʼlem tea vixim Jeruzalemantlea bhavank sanglem tednam te-ui khub khuxal zale mhunn dubhav na. Jehovan favo nasloli doia dakhoili dekhun tankam ies mellʼllo!

²⁰ Paulu ani Barnabas, Antiokant ravle ani tannim porgottnnechea kamant fuddakar ghetlo. Aiz pasun, sorkittachi dekhrekh korpi bhav sobhank bhett ditat tednam toxench kortat. He bhav Jehova koddlean mellʼllolem ek besanv koxe zaun asat. (Itihas 13:2, 3) Punn Paulu ani Barnabasak, Jehovan fuddem koxe uzar kele ani tannim urben kelʼlea porgottnnechea kamacher koxem besanv ghatlem? Hea vixim ami fuddlea odheai-ant polloitolim.