1, 2. (a) Ano nga importante nga mga pamangkot ang dapat sabton sang nagadumala nga hubon sang Cristianong kongregasyon sang unang siglo? (b) Ano ang nagbulig sa ila para makahimo sang insakto nga desisyon?

 NALANGKAG ang tanan. Nagatinulukay ang mga apostoles kag ang mga gulang sa isa ka kuarto sa Jerusalem kay nahibaluan nila nga magahimo na sila sang importante gid nga desisyon. Dapat nila sabton ang importante nga mga pamangkot parte sa isyu sang pagtuli. Dapat bala gihapon tumanon sang mga Cristiano ang Mosaikong Kasuguan? Indi bala pareho ang pagtan-aw ni Jehova sa Judiyo kag sa Gentil nga mga Cristiano?

² Madamo katama nga impormasyon ang ginbinagbinag sang mga lalaki nga nagapanguna. Lakip sa sini ang mga tagna sa Pulong sang Dios pati man ang mga testimonya nga nagapakita sang pagpakamaayo ni Jehova. Nahambal na nila tanan ang ila nahibaluan kag ginabatyag parte sa sini. Tion na para magdesisyon. Ara na sa ila ang tanan nga impormasyon para makadesisyon gani maathag nga ginagiyahan sila sang espiritu ni Jehova. Sundon bala nila ang direksion?

3. Ano ang matun-an naton sa mga hitabo nga mabasa sa Binuhatan kapitulo 15?

³ Kinahanglan ang daku nga pagtuo kag kaisog para batunon ang paggiya sang espiritu sa sini nga sitwasyon. Posible nga magadugang pa gid ang pagdumot sa ila sang mga lider sang relihion sang mga Judiyo. Kag posible nga pamatukan man sila sang pila sa kongregasyon nga nagapamilit nga sundon gihapon sang katawhan ang Mosaikong Kasuguan. Ano ang himuon sang nagadumala nga hubon? Tan-awon naton. Samtang ginabinagbinag naton ini nga hitabo, makita naton kon paano sila nangin halimbawa para sa Nagadumala nga Hubon subong sang mga Saksi ni Jehova. Halimbawa man ini nga dapat naton sundon kon may kinahanglan kita desisyunan kag kon may mga problema kita.

4, 5. Ano nga mga bersikulo halin sa mga tagna sa Pulong sang Dios ang ginhambal ni Santiago sa ila pag-istoryahanay?

⁴ Naghambal ang utod sa iloy ni Jesus nga si disipulo Santiago. a Ginapakita  sini nga mahimo sia ang tsirman sa sining miting kag posible nga ginsumaryo lang niya ang ginkasugtan sang grupo. Nagsiling si Santiago sa mga nagatipon: “Ginsaysay sing tul-id ni Simeon nga ang Dios nagbaton na karon sa mga indi Judiyo, agod makapili sia halin sa ila sang katawhan nga tawgon sa iya ngalan. Kag nagaugyon sa sini ang ginsiling sang mga Manalagna.”—Binu. 15:14, 15.

⁵ Mahimo nga bangod sa pamulongpulong ni Simeon, ukon ni Simon Pedro, kag sa mga ginsiling nanday Bernabe kag Pablo, nadumduman ni Santiago ang mga teksto nga nagapaathag sang ila ginaistoryahan. (Juan 14:26) Pagkatapos magsiling nga “nagaugyon sa sini ang ginsiling sang mga Manalagna,” ginhambal ni Santiago ang mabasa sa Amos 9:11, 12. Ini nga libro ginlista sa bahin sang Hebreong Kasulatan nga gintawag ang “mga Manalagna.” (Mat. 22:40; Binu. 15:16-18) Matalupangdan mo nga ang mga ginsiling ni Santiago medyo may kinalain sa mabasa naton subong sa libro sang Amos. Kay man, mahimo nga ang ginkuhaan ni Santiago amo ang Septuagint, nga isa ka Griego nga translation sang Hebreong Kasulatan.

6. Paano nakabulig ang Kasulatan para mabal-an sang mga lalaki nga nagapanguna kon ano ang gusto ni Jehova?

⁶ Paagi kay manalagna Amos, gintagna ni Jehova nga magaabot ang tion nga tukuron Niya ang “payagpayag ni David,” nga amo ang kaliwatan sang mga hari nga magadul-ong sa Mesianikong Ginharian. (Ezeq. 21:26, 27) Ang pungsod sang Israel lang bala gihapon ang paboran ni Jehova? Indi. Ang tagna nagdugang nga ang “mga tawo sang tanan nga pungsod” tipunon bilang ‘mga tawo nga ginatawag sa ngalan sang Dios.’ Dumduma nga bag-o lang nagsiling si Pedro nga ang Dios ‘wala gid sing pinasulabi sa aton [Judiyo nga mga Cristiano] kag sa ila [Gentil nga mga kauturan], kundi ginpaputli ang ila tagipusuon paagi sa pagtuo.’ (Binu. 15:9) Buot silingon, kabubut-on sang Dios nga ang mga Judiyo kag ang mga Gentil pareho nga mangin mga manunubli sang Ginharian. (Roma 8:17; Efe. 2:17-19) Wala gid nagsiling ang mga tagna sa Biblia nga dapat anay tulion ukon mangin proselita ining Gentil nga mga Cristiano.

7, 8. (a) Ano ang ginsiling ni Santiago? (b) Paano naton hangpon ang mga ginpanugda ni Santiago?

⁷ Bangod sang maathag nga mga tagna kag sa malig-on nga mga testimonya nga iya nabatian, si Santiago nagsiling: “Gani ang akon desisyon, indi na pagpabudlayan ang mga tawo sang mga pungsod nga nagasimba sa Dios, kundi sulatan sila nga maglikaw sila sa mga butang may kaangtanan sa idolatriya kag sa seksuwal nga imoralidad, kag indi sila magkaon sing nakuga nga mga sapat, kag maglikaw sila sa dugo. Kay halin pa sang una may mga nagabantala na sa mga siudad tuhoy kay Moises, bangod ang iya sinulatan ginabasa sing mabaskog sa mga sinagoga kada adlaw nga inugpahuway.”—Binu. 15:19-21.

⁸ Sang nagsiling si Santiago nga “gani ang akon desisyon,” ginapilit bala niya ang iya awtoridad kay sia ang tsirman sang miting kag sia na ang nagdesisyon kon ano ang himuon? Wala gid! Ang tinaga nga “akon desisyon” sa Griego mahimo man magakahulugan sing “akon hukom” ukon “akon opinyon.” Imbes nga  manduan ang bug-os nga hubon, nanugda si Santiago nga ang ila desisyon dapat nabase sa mga pamatuod kag sa ginasiling sang Kasulatan.

9. Ano ang mga benepisyo sa panugda ni Santiago?

⁹ Maayo bala ang ginpanugda ni Santiago? Maathag nga maayo kay ginbaton ini sang ulihi sang mga apostoles kag sang mga gulang. Ano ang mga benepisyo? Una, ang ginrekomendar nga himuon amo nga “indi na pagpabudlayan,” ukon “pagpagamohan,” ang Gentil nga mga Cristiano paagi sa pagpatuman sa ila sang Mosaikong Kasuguan. (Binu. 15:19; Ang Biblia sang Philippine Bible Society) Ikaduha, ini nga desisyon nagapakita sing pagtahod sa konsiensia sang Judiyo nga mga Cristiano, nga sa sulod sang mga tinuig nakabati kay ‘Moises nga ginabasa sing mabaskog sa mga sinagoga kada adlaw nga inugpahuway.’ b (Binu. 15:21) Ang ginrekomendar nga himuon magapabakod gid sa kaangtanan sang Judiyo kag Gentil nga mga Cristiano. Ang pinakaimportante, malipay sa sini si Jehova nga Dios, kay ang desisyon base sa iya katuyuan. Maayo gid ini nga paagi sa pagsolbar sang problema nga mahimo magguba sang paghidait kag paghiusa sang kongregasyon sang katawhan sang Dios. Kag maayo gid ini nga halimbawa para sa Cristianong kongregasyon subong!

10. Paano ginasunod sang Nagadumala nga Hubon subong ang nagadumala nga hubon sang unang siglo?

¹⁰ Ginsambit sa nagligad nga kapitulo nga pareho sang nagadumala nga hubon sang unang siglo, ang Nagadumala nga Hubon sang mga Saksi ni Jehova subong nagasalig kay Jehova, ang Soberano sa Bug-os nga Uniberso, kag kay Jesucristo, ang Ulo sang kongregasyon, para giyahan ang tanan nga butang. c (1 Cor. 11:3) Paano? Si Albert D. Schroeder, nga miembro sang Nagadumala nga Hubon sugod sang 1974 asta nga natapos niya ang iya pagkabuhi diri sa duta sang Marso 2006, nagpaathag: “Nagamiting ang Nagadumala nga Hubon kada Mierkoles. Ginabuksan nila ini sa pangamuyo kag nagapangabay sang paggiya sang espiritu ni Jehova. Ginasigurado gid nila nga ang tanan nila nga ginamitingan kag ang tanan nila nga desisyon base sa Biblia,  ang Pulong sang Dios.” Si Milton G. Henschel, isa man ka miembro sang Nagadumala nga Hubon sa malawig nga tion kag natapos niya ang iya pagkabuhi diri sa duta sang Marso 2003. Ginpamangkot niya ining importante nga pamangkot sa manuggradwar nga mga estudyante sang ika-101 nga klase sang Watchtower Bible School of Gilead: “May iban pa bala nga organisasyon sa duta nga ang ila Nagadumala nga Hubon nagabinagbinag sang Pulong sang Dios, ang Biblia, antes maghimo sing importante nga mga desisyon?” Wala na sing iban pa.

11. Paano ginpalab-ot sa mga kongregasyon ang desisyon sang nagadumala nga hubon?

¹¹ Ang nagadumala nga hubon sa Jerusalem nag-ugyunay sa ila desisyon parte sa isyu sang pagtuli. Pero para may paghiusa ang mga kauturan sa mga kongregasyon, dapat maathag kag makapalig-on ang paagi sa pagpalab-ot sini nga desisyon. Paano ini mahimo? Ang rekord nagasiling: “Namat-od ang mga apostoles kag ang mga gulang, pati na ang bug-os nga kongregasyon, nga magpadala sa Antioquia sing pinili nga mga lalaki halin sa ila upod kay Pablo kag kay Bernabe. Ginpadala nila si Judas nga ginatawag Barsabas kag si Silas. Ini nga mga lalaki amo ang nagapanguna sa mga kauturan.” Dugang pa, may sulat nga ginpadala sa sining mga lalaki para basahon sa tanan nga kongregasyon sa Antioquia, Siria, kag Cilicia.—Binu. 15:22-26.

12, 13. Ano ang kaayuhan sang pagpadala (a) kanday Judas kag Silas? (b) sang sulat halin sa nagadumala nga hubon?

¹² Bilang ‘mga lalaki nga nagapanguna sa mga kauturan,’ kalipikado sanday Judas kag Silas nga mangin representante sang nagadumala nga hubon. Ang pagpadala sang apat ka lalaki magapaathag nga ang mensahe nga ila dala indi lamang sabat sa isyu parte sa pagtuli, kundi bag-o ini nga direksion halin sa nagadumala nga hubon. Ang presensia sining “pinili nga mga lalaki” magapabakod sang pag-updanay sang Judiyo nga mga Cristiano sa Jerusalem kag sang Gentil nga mga Cristiano sa iban nga lugar. Maalamon kag mahigugmaon gid ini nga desisyon! Gani, nagresulta gid ini sa paghidait kag paghiusa sa katawhan sang Dios.

¹³ Ang sulat may maathag nga direksion para sa Gentil nga mga Cristiano indi lamang sa pagtuli kundi kon ano man ang ila himuon para malipay sa ila si Jehova kag pakamaayuhon sila. Ang importante nga bahin sang sulat nagasiling: “Ginbuligan kami sang balaan nga espiritu sa pagpamat-od nga indi na kamo pagpabug-atan pa luwas sa sining mga butang nga kinahanglan himuon: Padayon kamo nga maglikaw sa mga butang nga ginhalad sa mga diosdios kag indi kamo magkaon sing nakuga nga mga sapat, kag maglikaw kamo sa dugo kag sa seksuwal nga imoralidad. Kon likawan gid ninyo ini nga mga butang, mangin maayo ang inyo kahimtangan. Maayo nga panglawas sa inyo!”—Binu. 15:28, 29.

14. Paano nahiusa ang katawhan ni Jehova sa nabahinbahin nga kalibutan subong?

¹⁴ Ang mga Saksi ni Jehova subong, nga nagadamo sing sobra sa 8,000,000 sa sobra sa 100,000 ka kongregasyon sa bilog nga duta, nahiusa man sa ila pagpati  kag hilikuton. Paano sila nahiusa kay magamo kag nabahinbahin ang kalibutan subong? Ang panguna nga rason sang paghiusa amo ang maathag kag sigurado nga direksion ni Jesucristo, ang Ulo sang kongregasyon. Ginahatag ini paagi sa “matutom kag mainandamon nga ulipon,” nga amo ang Nagadumala nga Hubon. (Mat. 24:45-47) May paghiusa man bangod sa kinabubut-on nga pagkooperar sang mga kauturan sa bilog nga kalibutan sa direksion sang Nagadumala nga Hubon.

15, 16. Ano ang reaksion sang mga kongregasyon sa direksion sang nagadumala nga hubon, kag ngaa?

¹⁵ Ginasugiran pa gid kita sang Mga Binuhatan nga sang nakalab-ot sa Antioquia ang mga kauturan nga ginpadala halin sa Jerusalem, “gintipon nila ang bug-os nga grupo sang mga disipulo kag ginhatag ang sulat sa ila.” Ano ang reaksion sang mga kauturan didto sa direksion sang nagadumala nga hubon? “Sang mabasa nila [ang sulat], nalipay gid sila tungod sa pagpalig-on sa ila.” (Binu. 15:30, 31) Dugang pa, “ginpalig-on [nanday Judas kag Silas] ang mga kauturan paagi sa madamo nga pamulongpulong kag ginpabakod sila.” Bangod ginsugid ukon ginpahibalo sining duha ka lalaki ang kabubut-on sang Dios, gintawag man sila nga “mga manalagna” pareho ni Bernabe, ni Pablo, kag sang iban pa. Kay ang tinaga nga manalagna nagapatuhoy sa mga nagabantala ukon nagapahibalo sang kabubut-on sang Dios.—Binu. 13:1; 15:32; Ex. 7:1, 2.

¹⁶ Maathag gid ang pagpakamaayo ni Jehova sa desisyon kay nasolbar sing madinalag-on ang isyu. Ano ang sekreto nga nangin madinalag-on ini? Bangod ginbase sa Pulong sang Dios kag sa paggiya sang balaan nga espiritu ang maathag kag nagakaigo nga direksion sang nagadumala nga hubon. Lakip sa sini ang mahigugmaon nga pagpalab-ot sang desisyon sa mga kongregasyon.

17. Ano ang ginbasihan sang pila ka hilikuton sang nagabisita nga mga manugtatap sang sirkito subong?

¹⁷ Ginasunod man subong sang Nagadumala nga Hubon sang mga Saksi ni Jehova ini nga halimbawa kon maghatag sila sing direksion para sa mga kauturan sa bilog nga duta. Kon may desisyon, ginapalab-ot nila ini sa mga kongregasyon sa maathag kag direkta nga paagi. Ang isa ka paagi amo ang pagbisita sang mga manugtatap sang sirkito. Ini nga mga kauturan nagasakripisyo gid paagi sa pagbisita sa mga kongregasyon para maghatag sing maathag nga direksion kag mahigugmaon nga pagpalig-on. Pareho nanday Pablo kag Bernabe, pirme sila sa ministeryo, nga ‘nagapanudlo upod sa madamo kag nagabantala sing maayong balita tuhoy sa pulong ni Jehova.’ (Binu. 15:35) Kag pareho nanday Judas kag Silas, ‘ginapalig-on nila ang mga kauturan paagi sa madamo nga pamulongpulong kag ginapabakod sila.’

18. Ano ang dapat himuon sang katawhan ni Jehova para pakamaayuhon niya sila?

¹⁸ Ano ang himuon sang mga kongregasyon subong sa bilog nga duta para padayon sila nga may paghidait kag paghiusa bisan pa nabahinbahin ang kalibutan? Dumduma nga nagsulat si disipulo Santiago sang ulihi: “Ang kaalam  nga halin sa langit una sa tanan putli, dayon mahidaiton, makatarunganon, handa sa pagtuman . . . Dugang pa, ang mga nagapakighidait magasab-ug sa mahidaiton nga mga kahimtangan kag magaani sang bunga sang pagkamatarong.” (Sant. 3:17, 18) Wala kita kabalo kon bala ang ginahunahuna ni Santiago amo ang miting sadto sa Jerusalem. Pero sa pagbinagbinag naton sang mga hitabo nga ginrekord sa Binuhatan kapitulo 15, maathag nga pakamaayuhon lamang kita ni Jehova kon nahiusa kita kag kon ginasunod naton ang mga instruksion sang mga nagapanguna.

19, 20. (a) Ano ang pamatuod nga may paghidait kag paghiusa sa kongregasyon sa Antioquia? (b) Ano na ang puede himuon nanday Pablo kag Bernabe?

¹⁹ Maathag gid ang paghidait kag paghiusa sa kongregasyon sa Antioquia. Imbes nga makigsuay sa mga kauturan nga halin sa Jerusalem, gin-apresyar gid sang mga kauturan sa Antioquia ang pagbisita nanday Judas kag Silas. Ang rekord nagsiling: “Pagkatapos nila magpabilin sing malawig nga tion didto, nagpaalam na sa ila ang mga kauturan kag nagbalik sila sa Jerusalem.” d (Binu. 15:33) Sigurado nga nalipay man ang mga kauturan sa Jerusalem sang mabatian nila ang panugiron sining duha ka lalaki parte sa ila paglakbay. Bangod sang wala tupong nga kaayo ni Jehova, malipayon nga natuman nila ang ila asaynment!

²⁰ Nagpabilin sa Antioquia sanday Pablo kag Bernabe. Makapokus na sila sa pagpanguna sa pagbantala. Subong, amo man sina ang ginahimo sang mga manugtatap sang sirkito kon nagabisita sila sa mga kongregasyon nga ila ginaatipan. (Binu. 13:2, 3) Pagpakamaayo gid ini sa katawhan sang Dios! Pero paano pa gid gingamit kag ginpakamaayo ni Jehova ining duha ka mapisan nga mga manugbantala? Mahibaluan naton ini sa masunod nga kapitulo.