တၢ်မၤလိ ၁၄
“လၢတၢ်သးတဖျၢၣ်ဃီအပူၤ ပဆၢတဲာ်”
တချုးလၢ ပှၤပၢဆှၢတၢ်ကမံးတံာ် ဆၢတဲာ်တၢ်ဘၣ်ဃးဒီး တၢ်ကူးတရံးအခါ အဝဲသ့ၣ်မၤဝဲဒ်လဲၣ် ဒီးအဝဲသ့ၣ်အတၢ်ဆၢတဲာ်န့ၣ် ကဲဘျုးလၢ တၢ်အိၣ်ဖှိၣ်အဂီၢ်ဒ်လဲၣ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၅:၁၃-၃၅
၁, ၂. (က) ပှၤပၢဆှၢတၢ်ကမံးတံာ်လၢ တၢ်မၢဖိအစိၤန့ၣ် ကဘၣ်စံးဆၢဝဲ တၢ်အိၣ်ဖှိၣ်လၢ တၢ်သံကွၢ်မနုၤလဲၣ်. (ခ) ဒ်သိးဒီပုၢ်ဝဲၢ်လၢ အတီခိၣ်ရိၤမဲတၢ်တဖၣ်အံၤ ဆၢတဲာ်တၢ်လၢအဘၣ် ကသ့အဂီၢ် တၢ်မနုၤမၤစၢၤအဝဲသ့ၣ်လဲၣ်.
ခဲအံၤ ပှၤပၢဆှၢတၢ်ကမံးတံာ်တဖၣ် ကဘၣ်ဆၢတဲာ်တၢ်လီၤ. အဃိ အဝဲသ့ၣ် သူၣ်ပိၢ်သးဝးဒိၣ်မး. တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ တၢ်လၢ အဝဲသ့ၣ် ကဘၣ်ဆၢတဲာ်ဝဲန့ၣ် အရ့ဒိၣ်ဒိၣ်မး. အဃိ အဝဲသ့ၣ်ကွၢ်လိာ်သးမဲာ် တဂၤဒီးတဂၤ. ဒီးအဝဲသ့ၣ် ကဘၣ်စံးဆၢဝဲ တၢ်အိၣ်ဖှိၣ်တဖၣ်လၢ တၢ်သံကွၢ် ဘၣ်ဃးဒီး တၢ်ကူးတရံးအဂ့ၢ်. မ့ၢ်ခရံာ်ဖိတဖၣ်န့ၣ် အအိၣ်လၢ စီၤမိၤၡ့ အတၢ်သိၣ်တၢ်သီ အဖီလာ်ဒံးဧါ ဒီးကစၢ်ယွၤထံၣ်ဝဲလၢ ခရံာ်ဖိလၢ အကဲပှၤယူဒၤဖိတဖၣ်န့ၣ် အဂ့ၤဒိၣ်န့ၢ်ဒံး ခရံာ်ဖိလၢ အကဲကလုာ်ဂၤတဖၣ်ဧါ.
၂ ပှၤပိာ်ခွါလၢ အတီခိၣ်ရိၤမဲတၢ်တဖၣ်အံၤ အတဲသကိးဝဲ တၢ်ဂ့ၢ်အါမးလံ. အဝဲသ့ၣ် တဲသကိးဝဲ ဝံအတၢ်စံးပာ်တဖၣ် ဒီးတဲဖျါထီၣ်ဝဲ အနီၢ်ကစၢ်အတၢ်လဲၤခီဖျိလၢ အပာ်ဖျါထီၣ်ဝဲလၢ ယဟိဝၤယွၤတူၢ်လိာ်ဝဲ ခရံာ်ဖိလၢ အကဲကလုာ်ဂၤတဖၣ်. ဘၣ်ဃးဒီးတၢ်ဂ့ၢ်တခါအံၤန့ၣ် အဝဲသ့ၣ်ကိးဂၤဒဲး တဲဖျါထီၣ်ဝဲ တၢ်လၢအသ့ၣ်ညါဝဲခဲလၢာ်. အဃိ အဝဲသ့ၣ်အိၣ်ဒီး တၢ်ဂ့ၢ်တၢ်ကျိၤ လၢလၢပှဲၤပှဲၤလၢ ကဆၢတဲာ်တၢ်အဂီၢ်လံ. ဒီးယဟိဝၤယွၤ အဲၣ်ဒိးလၢအဝဲသ့ၣ် ကဆၢတဲာ်တၢ်ဒ်လဲၣ်န့ၣ် အဝဲသ့ၣ် သ့ၣ်ညါထီၣ်ဝဲ လီၤတံၢ်လီၤဆဲးလံ. အဃိ မ့ၢ်အဝဲသ့ၣ် ကမၤထွဲဝဲ ဒ်ယဟိဝၤယွၤ အသးစီဆှံ ဟံးစုနဲၣ်ကျဲဝဲအသိးဧါ.
၃. လၢမၤတၢ် အဆၢဒိၣ် ၁၅ န့ၣ်ပန့ၢ်ဘၣ် တၢ်မၤလိဒ်လဲၣ်.
၃ ပှၤပၢဆှၢတၢ်ကမံးတံာ်တဖၣ်အံၤ မ့ၢ်ဆၢတဲာ်တၢ် ဒ်ယဟိဝၤယွၤအသးစီဆှံ ဟံးစုနဲၣ်ကျဲ အဝဲသ့ၣ်အသိးန့ၣ် ယူဒၤအတၢ်ဘူၣ်တၢ်ဘါခိၣ်နၢ်တဖၣ် ကသးဟ့အဝဲသ့ၣ်ဒိၣ်ထီၣ်. တကးဒံးဘၣ် လၢတၢ်အိၣ်ဖှိၣ်ပူၤန့ၣ် ပှၤတနီၤအဲၣ်ဒိးဝဲလၢ ပှၤကမၤထွဲ စီၤမိၤၡ့အတၢ်သိၣ်တၢ်သီအဃိ တမ့ၢ်လၢ အဝဲသ့ၣ် ကအဲၣ်ဒိးတူၢ်လိာ်ဝဲ ပှၤပၢဆှၢတၢ်ကမံးတံာ် အတၢ်ဆၢတဲာ်အံၤဘၣ်. အဃိ ပှၤပၢဆှၢတၢ်ကမံးတံာ်တဖၣ် ကဆၢတဲာ်တၢ် ဒ်သးစီဆှံ ဟံးစုနဲၣ်ကျဲ အဝဲသ့ၣ်အသိးအဂီၢ် အဝဲသ့ၣ်လိၣ်ဘၣ် တၢ်သးဒူ ဒီးတၢ်နာ်သပှၢ်တၢၢ်. ဘၣ်ဆၣ် ပှၤပၢဆှၢတၢ်ကမံးတံာ် ကဆၢတဲာ်တၢ်ဒ်လဲၣ်န့ၣ် ပကကွၢ်သကိး. ပကထံၣ်ဘၣ်လၢ အဝဲသ့ၣ် ပာ်လီၤတၢ်အဒိအတဲာ်လၢ ပှၤပၢဆှၢတၢ်ကမံးတံာ်လၢ ပစိၤခဲအံၤအဂီၢ်ဒ်လဲၣ်. ဒီးပဝဲစ့ၢ်ကီး ဖဲပကဘၣ်ဆၢတဲာ်တၢ် ဒီးဖဲပထံၣ်ဘၣ် တၢ်ကီတၢ်ခဲအခါ ပကဘၣ်မၤထွဲ အဝဲသ့ၣ်အဒိအတဲာ်ဒ်လဲၣ်န့ၣ် ပကသ့ၣ်ညါဘၣ်.
“လီၤပလိာ်လိာ်အသးဒီး ဝံတဖၣ် အတၢ်ကွဲး” (မၤတၢ် ၁၅:၁၃-၂၁)
၄, ၅. ဒ်သိး ဒီပုၢ်ဝဲၢ်တဖၣ်ဆၢတဲာ်တၢ်ကဘၣ်အဂီၢ် စီၤယၤကိာ် တဲဖျါထီၣ်က့ၤဝဲ ဝံအတၢ်စံးပာ်မနုၤလဲၣ်.
၄ ဖဲတၢ်အိၣ်ဖှိၣ် တဘျီအံၤန့ၣ် ယ့ၣ်ၡူးအဒီပုၢ်ဝဲၢ်ခွါ စီၤယၤကိာ် ဆၢထၢၣ်တဲတၢ်. a ဒီးလီၤဂာ်လၢ အဝဲကဲဝဲ ပှၤပၢၤလီၢ်ဆ့ၣ်နီၤလၢ တၢ်အိၣ်ဖှိၣ်တခါအံၤ. ဒ်ပှၤလၢအပၣ်ဃုာ်လၢ တၢ်အိၣ်ဖှိၣ်ပူၤတဖၣ် အတၢ်ထံၣ်အိၣ်ဝဲအသိး စီၤယၤကိာ်ကျၢၢ်တံၢ်ဝဲ တၢ်ကတိၤလၢ “ဖဲမကၢာ် စီၤစူၤမ့းအိး ပာ်ဖျါထီၣ်ဝဲ လီၤတံၢ်လီၤဆဲးလၢ ကစၢ်ယွၤ တူၢ်လိာ် ပှၤကလုာ်တဖၣ် အဆိကတၢၢ်တဘျီ ဒ်သိး ကဃုထၢထီၣ် ပှၤလၢ အဝဲသ့ၣ်အကျါလၢ အမံၤအဂီၢ်လီၤ. ဒီးတၢ်ကတိၤတဖၣ်အံၤ လီၤပလိာ်လိာ်အသးဒီး ဝံတဖၣ် အတၢ်ကွဲး.”—မၤတၢ် ၁၅:၁၄, ၁၅.
၅ စီၤယၤကိာ် ဒိကနၣ်ဝဲ စီၤစူၤမ့းအိး လၢအမ့ၢ် စီၤၡံမိၣ်ပ့းတရူး အတၢ်ကတိၤ ဒီးတၢ်လဲၤခီဖျိလၢ စီၤဘၢ်နါဘၤ ဒီးစီၤပီလူး တဲဝဲဝံၤအလီၢ်ခံ လီၤဂာ်လၢ အဝဲက့ၤနီၣ်ဘၣ်က့ၤဝဲ လံာ်စီဆှံအဆၢလၢ ကမၤစၢၤဝဲ ဒီပုၢ်ဝဲၢ်တဖၣ် ဒ်သိးအဝဲသ့ၣ် ဆၢတဲာ်တၢ်ကဘၣ်အဂီၢ်. (ယိၤဟၣ် ၁၄:၂၆) စီၤယၤကိာ် တဲဝဲလၢအ “တၢ်ကတိၤတဖၣ်အံၤ လီၤပလိာ်လိာ်အသးဒီး ဝံတဖၣ် အတၢ်ကွဲး” ဝံၤဒီး အဝဲတဲဝဲ တၢ်ကတိၤလၢ ဧၤမိၣ် ၉:၁၁, ၁၂. လံာ်ဧၤမိၣ်န့ၣ် အပၣ်ဃုာ်လၢ “ဝံတဖၣ် အတၢ်ကွဲး” အကျါ လၢအအိၣ်လၢ လံာ်စီဆှံလၢ ဧ့ၤဘြံၤကျိာ်တကတြူၢ်အပူၤ. (မး ၂၂:၄၀; မၤတၢ် ၁၅:၁၆-၁၈) နကထံၣ်ဘၣ်လၢ တၢ်ကတိၤလၢ စီၤယၤကိာ်တဲဝဲန့ၣ် အလီၤဆီလိာ်သးဒီး တၢ်ကတိၤလၢ အအိၣ်ဖဲ လံာ်ဧၤမိၣ် လၢပဖးဘၣ်အီၤလၢ ပစိၤခဲအံၤအပူၤတစဲး. လီၤဂာ်လၢ စီၤယၤကိာ်န့ၣ် အဟံန့ၢ်ဝဲ လံာ်စီဆှံအဆၢလၢ စဲးထူးကၠ့း လံာ်စီဆှံအပူၤ. စဲးထူးကၠ့း လံာ်စီဆှံန့ၣ် မ့ၢ်ဝဲ လံာ်စီဆှံလၢ ဧ့ၤဘြံၤကျိာ်တကတြူၢ် လၢပှၤကွဲးကျိာ်ထံက့ၤအီၤလၢ ကြံးကျိာ်.
၆. ဒ်သိး ဒီပုၢ်ဝဲၢ်တဖၣ် ကသ့ၣ်ညါထီၣ် ကစၢ်ယွၤအတၢ်ထံၣ်အဂီၢ် လံာ်စီဆှံအဆၢတဖၣ် မၤစၢၤအဝဲသ့ၣ်ဒ်လဲၣ်.
၆ ယဟိဝၤယွၤ မၢဝံဧၤမိၣ် တဲဆိပာ်စၢၤဝဲလၢ အဝဲ “ကသူၣ်ထီၣ်ကဒီး စီၤဒၤဝံးအဒဲ” လၢအမ့ၢ် စီၤပၤအစၢၤအသွဲၣ်လၢ ကပၢတၢ်လၢ မ့းၡံအၤအဘီအမုၢ်. (ဃ့း ၂၁:၂၆, ၂၇) ယဟိဝၤယွၤ ပာ်ပနီၣ်ဝဲ အံၣ်စရ့လးအကလုာ် ဒ်ပှၤလီၤဆီတကလုာ်အသိးဒံးဧါ. တပာ်ပနီၣ်ဝဲလၢၤဘၣ်. ဝံအတၢ်စံးပာ် ဆဲးတဲဝဲလၢ “ပှၤကလုာ်ခဲလၢာ်” ကဘၣ်တၢ်ပာ်ဖှိၣ်ထီၣ်အီၤ ဒီးအဝဲသ့ၣ် ကကဲထီၣ် ပှၤကလုာ်လၢ “အဘၣ်တၢ်ကိးအီၤလၢ ယ [ကစၢ်ယွၤ] မံၤလီၤ.” ဖဲအပူၤကွံာ်တယံာ်ဒံးဘၣ်န့ၣ် စီၤပ့းတရူးတဲဝဲလၢ “အဝဲသ့ၣ် [ခရံာ်ဖိလၢ အကဲကလုာ်ဂၤ] မ့ၢ်ဂ့ၤ, ပဝဲဒၣ်အံၤ [ခရံာ်ဖိလၢ အကဲပှၤယူဒၤဖိ] မ့ၢ်ဂ့ၤ, ကစၢ်ယွၤထံၣ်ဝဲ ဒ်သိးသိးလီၤ. ဒီးအဝဲ မၤကဆှီထီၣ်က့ၤ အဝဲသ့ၣ်အသး ခီဖျိလၢ အဝဲသ့ၣ် အတၢ်နာ်အဃိ.” (မၤတၢ် ၁၅:၉) အဃိ ပမ့ၢ်တဲလၢ အဂၤတမံၤန့ၣ် ကစၢ်ယွၤအဲၣ်ဒိးဝဲလၢ ပှၤယူဒၤဖိမ့ၢ်ဂ့ၤ ပှၤကလုာ်ဂၤမ့ၢ်ဂ့ၤ ကန့ၢ်သါဘၣ် ယွၤအဘီအမုၢ်. (ရိ ၈:၁၇; အ့း ၂:၁၇-၁၉) ဒီးပှၤကလုာ်ဂၤတဖၣ် ကန့ၢ်သါဘၣ် ယွၤအဘီအမုၢ်အဂီၢ် ဝံအတၢ်စံးပာ် တတဲဝဲလၢ အဝဲသ့ၣ် ကဘၣ်ဒိးတၢ်ကူးတရံး မ့တမ့ၢ် ကဘၣ်နုာ်လီၤလၢ ပှၤယူဒၤဖိအတၢ်ဘါန့ၣ်ဘၣ်.
၇, ၈. (က) စီၤယၤကိာ် ဟ့ၣ်ကူၣ်ဝဲဒ်လဲၣ်. (ခ) စီၤယၤကိာ် အတၢ်ကတိၤန့ၣ် အအဲၣ်ဒိးတဲဝဲ အခီပညီဒ်လဲၣ်.
၇ ခီဖျိလၢ တၢ်အုၣ်အသးလၢ လံာ်စီဆှံအပူၤ ဒီးတၢ်လဲၤခီဖျိလၢ စီၤပ့းတရူး, စီၤဘၢ်နါဘၤ ဒီးစီၤပီလူး တဲဖျါထီၣ်ဝဲအဃိ စီၤယၤကိာ် သူၣ်ပိၢ်သးဝးဒိၣ်မး. ဒီးစီၤယၤကိာ်တဲဝဲလၢ “အဃိ မ့မ့ၢ်ယတၢ်ထံၣ်န့ၣ် တဘၣ်မၤတံာ်တာ် ပှၤကလုာ်တဖၣ် လၢအအဲၣ်ဒိးဘူၣ်ထီၣ်ဘါထီၣ် ကစၢ်ယွၤတဂ့ၤ. လၢတၢ်န့ၣ်အလီၢ် ပကကွဲးန့ၢ် အဝဲသ့ၣ်ဒ်သိး အကဟးဆှဲးတၢ်လၢ အဘၣ်ထွဲလိာ်သး ဒီးတၢ်ဘါတၢ်ဂီၤတၢ်ဖှီၣ်တဖၣ်, တၢ်မၤကမၣ်မုၣ်ကမၣ်ခွါ, ဆၣ်ဖိကီၢ်ဖိလၢ တၢ်စံၢ်သံအီၤ ဒီးတၢ်သွံၣ်လီၤ. နီၢ်ကီၢ်န့ၣ် စးထီၣ်လၢပျၢၤလံၤလံၤ ပှၤစံၣ်တဲၤတဲလီၤ စီၤမိၤၡ့ အတၢ်ကွဲးအသးလၢ အအိၣ်ဒီး တၢ်သိၣ်တၢ်သီတဖၣ်အံၤလၢ ဝ့ၢ်တဝ့ၢ်ဘၣ်တဝ့ၢ် အပူၤလီၤ. ပှၤမၤဒ်န့ၣ် ခီဖျိ ဖဲမုၢ်အိၣ်ဘှံးနံၤ ကိးဘျီဒဲးန့ၣ် ပှၤဖးထီၣ် စီၤမိၤၡ့ အတၢ်ကွဲးအသးလၢ ကလုၢ်ဖးဒိၣ် လၢဘူၣ်ဘျီၣ်ပူၤ.”—မၤတၢ် ၁၅:၁၉-၂၁.
၈ ပှၤပၢၤလီၢ်ဆ့ၣ်နီၤ စီၤယၤကိာ် တဲဝဲတၢ်ကတိၤလၢအမ့ၢ် “ယတၢ်ထံၣ်န့ၣ်” အခီပညီတမ့ၢ်လၢ အဆၢတဲာ်န့ၢ်တၢ်လၢ ပှၤပၢဆှၢတၢ်ကမံးတံာ် အခၢၣ်စးဘၣ်. အတဲဝဲ တၢ်ကတိၤအံၤန့ၣ် လီၤဂာ်ဒ်သိး အဟ့ၣ်ကူၣ်ဝဲ ဒီပုၢ်ဝဲၢ်တဖၣ်လၢ ကဆိမိၣ်ထံဝဲ တၢ်လဲၤခီဖျိ ဒီးလံာ်စီဆှံအဆၢလၢ အဘၣ်ဃးဒီး တၢ်ဂ့ၢ်လၢ အဝဲသ့ၣ်တဲသကိးဝဲ.
၉. စီၤယၤကိာ် အတၢ်ဟ့ၣ်ကူၣ်န့ၣ် အကဲဘျုးဝဲဒ်လဲၣ်.
၉ တၢ်မၢဖိတဖၣ် ဒီးတၢ်အိၣ်ဖှိၣ်သးပှၢ်တဖၣ်န့ၣ် တူၢ်လိာ်ဝဲ စီၤယၤကိာ် အတၢ်ဟ့ၣ်ကူၣ်အဃိ ပသ့ၣ်ညါဘၣ်လၢ စီၤယၤကိာ် အတၢ်ဟ့ၣ်ကူၣ်န့ၣ် အဂ့ၤဒိၣ်မး ဒီးအကဲဘျုးစ့ၢ်ကီး. အဒိ ဒ်အဝဲဟ့ၣ်ကူၣ်ဝဲအသိး ပှၤကလုာ်အဂၤလၢ အကဲဝဲခရံာ်ဖိတဖၣ်န့ၣ် တလိၣ်မၤထွဲ စီၤမိၤၡ့တၢ်သိၣ်တၢ်သီလၢၤဘၣ်အဃိ တကဲထီၣ်တၢ် “တံာ်တာ်” မ့တမ့ၢ် “တၢ်ကီတၢ်ခဲ” လၢအဝဲသ့ၣ် အဂီၢ်လၢၤဘၣ်. (မၤတၢ် ၁၅:၁၉; New International Version) တကးဒံးဘၣ် စီၤယၤကိာ် အတၢ်ဟ့ၣ်ကူၣ်န့ၣ် ကပာ်ဖျါထီၣ်စ့ၢ်ကီးဝဲလၢ အဝဲသ့ၣ်ပာ်ကဲ ပှၤယူဒၤဖိလၢ အကဲခရံာ်ဖိတဖၣ် အသးလၢအသ့ၣ်ညါဒၣ်တၢ် မ့ၢ်လၢ ပှၤယူဒၤဖိတဖၣ် နၢ်ဟူဘၣ်ဝဲ “ဖဲမုၢ်အိၣ်ဘှံးနံၤ ကိးဘျီဒဲးန့ၣ် ပှၤဖးထီၣ် စီၤမိၤၡ့ အတၢ်ကွဲးအသးလၢ ကလုၢ်ဖးဒိၣ် လၢဘူၣ်ဘျီၣ်ပူၤ” အနံၣ်ဖးယံာ်ညါ. b (မၤတၢ် ၁၅:၂၁) စီၤယၤကိာ် အတၢ်ဟ့ၣ်ကူၣ်န့ၣ် ကမၤစၢၤဝဲ ပှၤယူဒၤဖိ ဒီးပှၤကလုာ်အဂၤ လၢအကဲထီၣ်ခရံာ်ဖိတဖၣ် ဒ်သိး အဝဲသ့ၣ် ကအိၣ်ဃူဃူဖိးဖိး သပှၢ်တၢၢ်. တကးဒံးဘၣ် တၢ်ဟ့ၣ်ကူၣ်တခါအံၤန့ၣ် အဘၣ်လိာ်သးဒီး ယဟိဝၤယွၤ အတၢ်တိာ်ပာ်အဃိ ယဟိဝၤယွၤ ကဘၣ်သူၣ်ဘၣ်သးဝဲ. အဝဲသ့ၣ်မၤဝဲဒ်အံၤန့ၣ် မ့ၢ်ဝဲကျဲအဂ့ၤကတၢၢ်တဘိလၢ အကမၤဘၣ်ဂီၢ်က့ၤ တၢ်ဂ့ၢ်ကီလၢ အကမၤဘၣ်ဒိ တၢ်အိၣ်ဖှိၣ် အတၢ်ဃူတၢ်ဖိး. အဝဲသ့ၣ် အဒိအတဲာ်န့ၣ် ကဲဘျုးလၢ ခရံာ်ဖိတၢ်အိၣ်ဖှိၣ်လၢ ပစိၤခဲအံၤအဂီၢ်စ့ၢ်ကီး.
အါဘၢၤ စရူဒၢၤ တဲတၢ်ဖဲ ၁၉၉၈ ဟီၣ်ခိၣ်ဒီဘ့ၣ် တၢ်အိၣ်ဖှိၣ်ဖးဒိၣ်
၁၀. ပှၤပၢဆှၢတၢ်ကမံးတံာ် လၢပစိၤခဲအံၤန့ၣ် ကွၢ်လိဝဲ ပှၤပၢဆှၢတၢ်ကမံးတံာ် လၢတၢ်မၢဖိအစိၤဒ်လဲၣ်.
၁၀ ဒ်တၢ်မၤလိ လၢအပူၤကွံာ်တခါ ပာ်ဖျါထီၣ်ဝဲအသိး ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ် လၢပစိၤခဲအံၤန့ၣ် ကွၢ်လိဝဲ ပှၤပၢဆှၢတၢ်ကမံးတံာ်လၢ တၢ်မၢဖိအစိၤ အဒိအတဲာ်. အဝဲသ့ၣ်ဃုဝဲ ယဟိဝၤယွၤ လၢအပၢ မူခိၣ်ဒီးဟီၣ်ခိၣ်တဂၤအံၤ အတၢ်ဟံးစုနဲၣ်ကျဲ ဒီးတၢ်အိၣ်ဖှိၣ်အခိၣ် ယ့ၣ်ၡူးခရံာ် အတၢ်ဟံးစုနဲၣ်ကျဲ လၢတၢ်ဂ့ၢ်ကိးမံၤဒဲးအဂီၢ်. c (၁ ကရံၣ် ၁၁:၃) အဝဲသ့ၣ်မၤဝဲဒ်လဲၣ်. ဒီပုၢ်ဝဲၢ်ခွါ အါဘၢၤ ဒံၤ စရူဒၢၤ လၢအကဲဝဲ ပှၤပၢဆှၢတၢ်ကမံးတံာ် စးထီၣ်ဖဲ ၁၉၇၄ ဒီးအသံဝဲဖဲ လါမၢ်ၡး ၂၀၀၆ န့ၣ်အတဲဝဲလၢ “ဖဲပှၤပၢဆှၢတၢ်ကမံးတံာ် အိၣ်ဖှိၣ်သကိး ဖဲမုၢ်သၢနံၤကိးဘျီဒဲးန့ၣ် အဝဲသ့ၣ်စးထီၣ်ဝဲ အတၢ်အိၣ်ဖှိၣ်လၢ တၢ်ထုကဖၣ် ဒီးဃ့ဝဲ ယဟိဝၤယွၤ အသးစီဆှံ အတၢ်ဟံးစုနဲၣ်ကျဲ. ဒီးအဝဲသ့ၣ် အဲၣ်ဒိးဝဲလၢ တၢ်ဂ့ၢ်လၢ အတဲသကိးဝဲ ဒီးတၢ်လၢအဝဲသ့ၣ် ဆၢတဲာ်ဝဲကိးမံၤဒဲးန့ၣ် ကဘၣ်လိာ်သးဒီး ကစၢ်ယွၤအကလုၢ်ကထါ သပှၢ်တၢၢ်.” ဒီပုၢ်ဝဲၢ်ခွါ မ့လထၢၤ ကၠံၤ ဟဲခၠၢၤ လၢအကဲဝဲ ပှၤပၢဆှၢတၢ်ကမံးတံာ်ဖးယံာ် ဒီးအသံဝဲဖဲ လါမၢ်ၡး ၂၀၀၃ န့ၣ် အသံကွၢ်ဝဲ ပှၤလၢအဖျိထီၣ် ကံးလဧးကၠိ ၁၀၁ ဘျီန့ၣ်လၢ “တၢ်ကရၢကရိ အဂၤလၢ အဃုကွၢ်ဝဲ လံာ်စီဆှံ အတၢ်ဟံးစုနဲၣ်ကျဲ လၢကဆၢတဲာ်တၢ်အဂီၢ် ဒ်သိးဒီးပှၤန့ၣ် အိၣ်တဖုဖုဧါ.” တၢ်ကရၢကရိအဂၤလၢ အမၤဝဲဒ်အံၤန့ၣ် တအိၣ်နီတဖုဘၣ်.
“ဆှၢလီၤဝဲ ပိာ်ခွါခံဂၤလၢ အဘၣ်တၢ်ဃုထၢထီၣ်အီၤ” (မၤတၢ် ၁၅:၂၂-၂၉)
၁၁. ပှၤပၢဆှၢတၢ်ကမံးတံာ် ဒုးသ့ၣ်ညါဝဲ တၢ်အိၣ်ဖှိၣ်တဖၣ်လၢ အဝဲသ့ၣ်အတၢ်ဆၢတဲာ်ဒ်လဲၣ်.
၁၁ ဘၣ်ဃးဒီး တၢ်ကူးတရံးန့ၣ် ပှၤပၢဆှၢတၢ်ကမံးတံာ် လၢဝ့ၢ်ယရူၤၡလ့ၣ် ဆၢတဲာ်တၢ်လၢ တၢ်သးတဖျၢၣ်ဃီဝံၤလံ. အိၣ်တ့ၢ်ဒၣ်အဝဲသ့ၣ် ကဘၣ်ဒုးသ့ၣ်ညါ တၢ်အိၣ်ဖှိၣ်လီၤ. အဝဲသ့ၣ် မ့ၢ်ဒုးသ့ၣ်ညါဝဲတၢ်အိၣ်ဖှိၣ်န့ၣ် ကဘၣ်ဒုးသ့ၣ်ညါဝဲ ၡဲၡဲဖိ ဒီးကဘၣ်ဒုးသ့ၣ်ညါဝဲ ဒ်သိးကကဲထီၣ် တၢ်ဂံၢ်တၢ်ဘါလၢ ဒီပုၢ်ဝဲၢ်တဖၣ်အဂီၢ်. ထဲန့ၣ်မၣ် ကကဲထီၣ်တၢ်မၤစၢၤလၢ ဒီပုၢ်ဝဲၢ်တဖၣ် ကအိၣ်ဃူအိၣ်ဖိးအဂီၢ်. အဃိ အဝဲသ့ၣ်ကမၤဝဲဒ်လဲၣ်. လံာ်စီဆှံတဲဝဲလၢ “တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ် ဒီးတၢ်အိၣ်ဖှိၣ်ဒီတဖျၢၣ် ဆၢတဲာ်ဝဲလၢ ကဆှၢလီၤဝဲ ပိာ်ခွါခံဂၤလၢ အဘၣ်တၢ်ဃုထၢထီၣ်အီၤလၢ အဝဲသ့ၣ်အကျါ ဃုာ်ဒီးစီၤပီလူး ဒီးစီၤဘၢ်နါဘၤ ဒ်သိးကလဲၤလၢ ဝ့ၢ်အၣ်တံၤအီာ် အဂီၢ်လီၤ. ဒီးအဝဲသ့ၣ် ဆှၢလီၤဝဲ စီၤယူဒၤလၢ ပှၤကိးအီၤလၢ စီၤဘၢ်စဘါ ဃုာ်ဒီးစီၤစံလၤလီၤ. အဝဲသ့ၣ် မ့ၢ်ပှၤလၢ အတီခိၣ်ရိၤမဲတၢ်လၢ ဒီပုၢ်ဝဲၢ်တဖၣ် အကျါ.” တကးဒံးဘၣ် အဝဲသ့ၣ် ဟ့ၣ်လီၤဝဲ ပှၤပိာ်ခွါတဖၣ်အံၤလၢ လံာ်ပရၢ ဒ်သိးကဖးပၠးဝဲ တၢ်အိၣ်ဖှိၣ်လၢ ဝ့ၢ်အၣ်တံၤအီာ်, ကီၢ်စူၤရံ ဒီးကံၤလံၤကံ အကီၢ်ရ့ၣ်အပူၤ.—မၤတၢ် ၁၅:၂၂-၂၆.
၁၂, ၁၃. (က) ပှၤဆှၢလီၤ စီၤယူဒၤ ဒီးစီၤစံလၤအဃိ ကဲဘျုးဝဲဒ်လဲၣ်. (ခ) ပှၤပၢဆှၢတၢ်ကမံးတံာ် အလံာ်ပရၢန့ၣ် ကဲဘျုးဝဲဒ်လဲၣ်.
၁၂ စီၤယူဒၤ ဒီးစီၤစံလၤန့ၣ် အဝဲသ့ၣ်ကဲဝဲ “ပှၤလၢ အတီခိၣ်ရိၤမဲတၢ်လၢ ဒီပုၢ်ဝဲၢ်တဖၣ် အကျါ.” အဃိ အဝဲသ့ၣ်န့ၣ် တုၤထီၣ်ထီၣ်ဘးလၢ ကမၤတၢ်ဒ် ပှၤပၢဆှၢတၢ်ကမံးတံာ် အပှၤခၢၣ်စးအသိး. ပိာ်ခွါလွံၢ်ဂၤအံၤ တမ့ၢ်ထဲ အဝဲသ့ၣ် ကဘၣ်က့ၤစံးဆၢက့ၤဝဲ တၢ်အိၣ်ဖှိၣ် ဘၣ်ဃးဒီး တၢ်ဒိးတၢ်ကူးတရံးအဂ့ၢ်ဘၣ်. အဝဲသ့ၣ် ကဘၣ်ဒုးသ့ၣ်ညါစ့ၢ်ကီး တၢ်အိၣ်ဖှိၣ်တဖၣ်လၢ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲလၢအသီ. ပှၤဆှၢလီၤဝဲ ပှၤပိာ်ခွါလၢ အဘၣ်တၢ်ဃုထၢထီၣ်အီၤတဖၣ်အံၤအဃိ ကကဲထီၣ် တၢ်မၤစၢၤလၢ ပှၤကလုာ်ဂၤလၢ အကဲထီၣ်ခရံာ်ဖိတဖၣ် ဒီးပှၤယူဒၤဖိလၢ အကဲထီၣ် ခရံာ်ဖိတဖၣ် လၢဝ့ၢ်ယရူၤၡလ့ၣ်န့ၣ် ကအိၣ်ဃူအိၣ်ဖိးအဂီၢ်. ပှၤပၢဆှၢတၢ်ကမံးတံာ် ဆှၢလီၤဝဲ ပှၤပိာ်ခွါတဖၣ်အံၤအဃိ အဝဲသ့ၣ် အတၢ်ဆၢတဲာ်န့ၣ် အိၣ်ဒီးတၢ်အဲၣ်တၢ်ကွံ ဒီးတၢ်ကူၣ်သ့. အဃိ တၢ်ဃူတၢ်ဖိးအိၣ်ထီၣ်လၢ ကစၢ်ယွၤအပှၤဂီၢ်မုၢ်အကျါ.
၁၃ လၢလံာ်ပရၢအပူၤန့ၣ် ပၣ်ဃုာ်ဒီး တၢ်ဟံးစုနဲၣ်ကျဲလီၤတံၢ်လီၤဆဲး လၢဘၣ်ဃးဒီ တၢ်ကူးတရံး လၢပှၤကလုာ်ဂၤတဖၣ်အဂီၢ်. တကးဒံးဘၣ် ပၣ်ဃုာ်စ့ၢ်ကီးဒီး တၢ်ဂ့ၢ်လၢ အဝဲသ့ၣ် ကဘၣ်မၤဝဲ ဒ်သိးအဝဲသ့ၣ် ကန့ၢ်ဘၣ် ကစၢ်ယွၤအတၢ်ဆိၣ်ဂ့ၤအဂီၢ်. လၢလံာ်ပရၢပူၤ တၢ်ဂ့ၢ်လၢ အရ့ဒိၣ်ကတၢၢ်တနီၤန့ၣ် မ့ၢ်ဝဲ “သးစီဆှံ ဒီးပဝဲသ့ၣ်တဖၣ် တအဲၣ်ဒိးပာ်ထီၣ် တၢ်ဝံတၢ်ယိးအဂၤလၢ သုလိၤနီတမံၤဘၣ်, ဘၣ်ဆၣ် ထဲဒၣ်တၢ်လၢ အလီၢ်အိၣ်ဝဲ သပှၢ်တၢၢ် လၢလာ်တဖၣ်အံၤလီၤ. တၢ်လၢအဘၣ် တၢ်လုၢ်ထီၣ်အီၤလၢ တၢ်ဂီၤတၢ်ဖှီၣ်, တၢ်သွံၣ်, ဆၣ်ဖိကီၢ်ဖိလၢ တၢ်စံၢ်သံအီၤ ဒီးတၢ်မၤကမၣ်မုၣ်ကမၣ်ခွါန့ၣ် ဟးဆှဲးအီၤ ထီဘိတက့ၢ်. သုမ့ၢ်ဟးဆှဲး တၢ်သ့ၣ်တဖၣ်အံၤ လီၤတံၢ်လီၤဆဲးန့ၣ် ကကဲဘျုးလၢ သုဂီၢ်လီၤ. မ်သုအိၣ်ဆူၣ်အိၣ်ချ့တက့ၢ်.”—မၤတၢ် ၁၅:၂၈, ၂၉.
၁၄. ဆၢကတီၢ်ခဲအံၤန့ၣ် အိၣ်ထဲတၢ်သးဟ့လိာ်သး ဒီးတၢ်လီၤမုၢ်လီၤဖး သနာ်က့ ဘၣ်မနုၤအဃိ ယဟိဝၤယွၤအပှၤဂီၢ်မုၢ်တဖၣ် အိၣ်ဃူအိၣ်ဖိးသ့ဝဲလဲၣ်.
၁၄ ယဟိဝၤပှၤအုၣ်အသးတဖၣ် အိၣ်ဒီးတၢ်ဃူတၢ်ဖိးအနီၢ်ကီၢ်. လၢဟီၣ်ခိၣ်ဒီဘ့ၣ်န့ၣ် အဝဲသ့ၣ် အနီၣ်ဂံၢ် အိၣ်ဝဲဃိးကကွဲၢ်ဘျဲၣ် ဒီးတၢ်အိၣ်ဖှိၣ်အိၣ်ဝဲ တကလီၢ်ဘျဲၣ်. ဘၣ်ဆၣ် အဝဲသ့ၣ်နာ်တၢ်တမံၤဃီ ဒီးမၤတၢ်မၤတမံၤဃီ. ဆၢကတီၢ်ခဲအံၤန့ၣ် အိၣ်ထဲ တၢ်သးဟ့လိာ်သး ဒီးတၢ်လီၤမုၢ်လီၤဖး. သနာ်က့ ယဟိဝၤပှၤအုၣ်အသးတဖၣ် အိၣ်ဃူအိၣ်ဖိး သ့ဝဲဒ်လဲၣ်. ပဝဲယဟိဝၤပှၤအုၣ်အသးတဖၣ် ပအိၣ်ဒီးတၢ်ဃူတၢ်ဖိးသ့ ခီဖျိလၢ ပဒိးန့ၢ်ဘၣ် တၢ်ဟံးစုနဲၣ်ကျဲ လီၤတံၢ်လီၤဆဲးလၢ ပတၢ်အိၣ်ဖှိၣ်အခိၣ် ယ့ၣ်ၡူးအအိၣ်. ဒီးယ့ၣ်ၡူး ကတဲာ်ကတီၤန့ၢ်ပှၤတၢ်ဟံးစုနဲၣ်ကျဲ ခီဖျိ “ကုၢ်လၢအတီ ဒီးအကူၣ်တၢ်သ့” လၢအမ့ၢ် ပှၤပၢဆှၢတၢ်ကမံးတံာ်. (မး ၂၄:၄၅-၄၇) တကးဒံးဘၣ် ခီဖျိလၢ ပဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်န့ၣ် သးအိၣ်မၤထွဲဝဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအဃိ ပအိၣ်ဒီး တၢ်ဃူတၢ်ဖိးသ့ဝဲ.
“အဝဲသ့ၣ် ပှဲၤဒီးတၢ်သးခု ခီဖျိလၢ ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ အဃိ” (မၤတၢ် ၁၅:၃၀-၃၅)
၁၅, ၁၆. ဖဲတၢ်အိၣ်ဖှိၣ်တဖၣ် နၢ်ဟူဘၣ်ဝဲ ပှၤပၢဆှၢတၢ်ကမံးတံာ်အတၢ်ဆၢတဲာ် ဘၣ်ဃးဒီး တၢ်ကူးတရံးအခါ အဝဲသ့ၣ် တူၢ်ဘၣ်ဝဲဒ်လဲၣ် ဒီးပှၤပၢဆှၢတၢ်ကမံးတံာ် အတၢ်ဆၢတဲာ်န့ၣ် ဘၣ်မနုၤအဃိ ကဲဘျုးဝဲလဲၣ်.
၁၅ လံာ်မၤတၢ် ပာ်ဖျါထီၣ်န့ၢ်ပှၤလၢ ဖဲဒီပုၢ်ဝဲၢ်ခွါလၢ ဝ့ၢ်ယရူၤၡလ့ၣ်အပူၤလွံၢ်ဂၤ လဲၤတုၤလၢ ဝ့ၢ်အၣ်တံၤအီာ်အခါ “အဝဲသ့ၣ် ကိးဖှိၣ်ဝဲ ယ့ၣ်ၡူးအပျဲၢ်အဘီၣ်ခဲလၢာ် ဒီးဟ့ၣ်လီၤ အဝဲသ့ၣ် လံာ်ပရၢ.” ဖဲဒီပုၢ်ဝဲၢ်တဖၣ် န့ၢ်ဘၣ်ဝဲ တၢ်ဟံးစုနဲၣ်ကျဲလၢ အဟဲလၢ ပှၤပၢဆှၢတၢ်ကမံးတံာ်အအိၣ်အခါ အဝဲသ့ၣ်မၤဝဲဒ်လဲၣ်. “ဖဲအဝဲသ့ၣ်ဖးလံာ်အံၤ ဝံၤအလီၢ်ခံ အဝဲသ့ၣ် ပှဲၤဒီးတၢ်သးခု ခီဖျိလၢ ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ အဃိလီၤ.” (မၤတၢ် ၁၅:၃၀, ၃၁) စီၤယူဒၤ ဒီးစီၤစံလၤ “ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ် လၢတၢ်ကတိၤအါမံၤ ဒီးဒုးဆူၣ်ထီၣ် အဝဲသ့ၣ် အဂံၢ်အဘါ.” မ့ၢ်လၢအဝဲသ့ၣ် ဒုးသ့ၣ်ညါပှၤဂၤလၢ ကစၢ်ယွၤတၢ်ဘၣ်သးအဃိ လံာ်စီဆှံကိးအဝဲသ့ၣ်လၢ “ဝံ” ဒ်စီၤဘၢ်နါဘၤ, စီၤပီလူး ဒီးပှၤအဂၤတဖၣ်အသိး.—မၤတၢ် ၁၃:၁; ၁၅:၃၂; ၂ မိၤ ၇:၁, ၂.
၁၆ ယဟိဝၤယွၤ ဆိၣ်ဂ့ၤဝဲ ပှၤပၢဆှၢတၢ်ကမံးတံာ် အတၢ်ဆၢတဲာ်. အဃိ တၢ်အိၣ်ဖှိၣ်ခဲလၢာ် န့ၢ်ဘၣ်တၢ်ဂံၢ်တၢ်ဘါ. ဘၣ်မနုၤအဃိ တၢ်အိၣ်ဖှိၣ်တဖၣ် န့ၢ်ဘၣ်တၢ်ဂံၢ်တၢ်ဘါလဲၣ်. ခီဖျိလၢ သးစီဆှံအတၢ်မၤစၢၤအဃိ ပှၤပၢဆှၢတၢ်ကမံးတံာ်န့ၣ် ဟ့ၣ်လီၤဝဲ တၢ်ဟံးစုနဲၣ်ကျဲ ၡဲၡဲဖိ ဒီးဟ့ၣ်လီၤဝဲ ဘၣ်ဆၢဘၣ်ကတီၢ်. ဒီးအတၢ်ဟံးစုနဲၣ်ကျဲန့ၣ် အဘၣ်လိာ်သးဒီး ကစၢ်ယွၤအကလုၢ်ကထါ. တကးဒံးဘၣ် လၢတၢ်အဲၣ်တၢ်ကွံ ဒီးတၢ်ဒိသူၣ်ဒိသးအပူၤ ပှၤပၢဆှၢတၢ်ကမံးတံာ် ဆှၢလီၤဝဲ ဒီပုၢ်ဝဲၢ်တဖၣ်လၢ တၢ်အိၣ်ဖှိၣ်အပူၤ ဒ်သိးကဒုးသ့ၣ်ညါဝဲ တၢ်အိၣ်ဖှိၣ်တဖၣ်လၢ အဝဲသ့ၣ်အတၢ်ဆၢတဲာ်. အဃိ ကဲထီၣ်တၢ်ဂံၢ်တၢ်ဘါလၢ တၢ်အိၣ်ဖှိၣ်အဂီၢ်.
၁၇. ကဝီၤအပှၤကွၢ်တၢ်လၢ ပစိၤခဲအံၤန့ၣ် လီၤဂာ်ဒီး စီၤပီလူး, စီၤဘၢ်နါဘၤ, စီၤယူဒၤ ဒီးစီၤစံလၤ ဒ်လဲၣ်.
၁၇ ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်န့ၣ် အဟ့ၣ်လီၤဝဲ တၢ်ဟံးစုနဲၣ်ကျဲလၢ ဒီပုၢ်ဝဲၢ်မုၣ်ခွါလၢ အအိၣ်လၢ ဟီၣ်ခိၣ်ဒီဘ့ၣ် ဘၣ်ဆၢဘၣ်ကတီၢ်. ဖဲအဝဲသ့ၣ် ဆၢတဲာ်တၢ်ဝံၤအခါ အဝဲသ့ၣ် ဒုးသ့ၣ်ညါဝဲ တၢ်အိၣ်ဖှိၣ်တဘျီဃီ ဒီးဒုးသ့ၣ်ညါဝဲ လီၤတံၢ်လီၤဆဲး. တဘျီတခီၣ်န့ၣ် အဝဲသ့ၣ်ဆှၢလီၤဝဲ တၢ်ဟံးစုနဲၣ်ကျဲ ခီဖျိ ကဝီၤအပှၤကွၢ်တၢ်. ကဝီၤအပှၤကွၢ်တၢ်တဖၣ် ဟ့ၣ်လီၤအသး ဒီးလဲၤလၢ တၢ်အိၣ်ဖှိၣ် တဖျၢၣ်ဘၣ်တဖျၢၣ် ဒီးဒုးသ့ၣ်ညါဝဲ တၢ်အိၣ်ဖှိၣ်တဖၣ်လၢ တၢ်ဟံးစုနဲၣ်ကျဲ လီၤတံၢ်လီၤဆဲး ဒီးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါတဖၣ်လၢ တၢ်အဲၣ်တၢ်ကွံအပူၤ. ဒ်စီၤပီလူး ဒီးစီၤဘၢ်နါဘၤအသိး အဝဲသ့ၣ် စံၣ်တဲၤတဲလီၤတၢ်ဆူၣ်ဆူၣ် ဒီး “သိၣ်လိတၢ် ဒီးစံၣ်တဲၤတဲလီၤဝဲ ယဟိဝၤယွၤ အကလုၢ်ကထါ အတၢ်သးခုကစီၣ် ဃုာ်ဒီး ဒီပုၢ်ဝဲၢ်အါဂၤ.” (မၤတၢ် ၁၅:၃၅) ဒီးဒ်စီၤယူဒၤ ဒီးစီၤစံလၤအသိး ကဝီၤအပှၤကွၢ်တၢ်တဖၣ် “ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ် လၢတၢ်ကတိၤအါမံၤ” ဒီးဒုးဆူၣ်ထီၣ် ဒီပုၢ်ဝဲၢ်တဖၣ် အဂံၢ်အဘါ.
၁၈. ဒ်သိးပကန့ၢ်ဘၣ် ယဟိဝၤယွၤ အတၢ်ဆိၣ်ဂ့ၤအဂီၢ် ပကဘၣ်မၤဒ်လဲၣ်.
၁၈ ဟီၣ်ခိၣ်တဘ့ၣ်အံၤ တၢ်ဃူတၢ်ဖိးတအိၣ်သနာ်က့ ဘၣ်မနုၤအဃိ တၢ်အိၣ်ဖှိၣ်လၢ ဟီၣ်ခိၣ်ဒီဘ့ၣ်န့ၣ် အိၣ်ဒီးတၢ်ဃူတၢ်ဖိးလဲၣ်. စီၤယၤကိာ် ကွဲးဝဲလၢ “ပှၤလၢအဒိးန့ၢ်ဘၣ် တၢ်ကူၣ်သ့လၢထးန့ၣ် အဆိကတၢၢ် ကဆှီဝဲ ဝံၤဒီး ဒုးအိၣ်ဃူအိၣ်ဖိးတၢ်လီၤ. အတမ့ၢ်ပှၤလၢ အခိၣ်ကိၤဘၣ်, အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်, . . . တကးဒံးဘၣ် တၢ်တီတၢ်လိၤအတၤသၣ်န့ၣ် ဘၣ်တၢ်ဖှံလီၤအီၤလၢ တၢ်အိၣ်အသးလၢ အပှဲၤဒီးတၢ်ဃူတၢ်ဖိးအပူၤ ဒီးကဲဘျုးလၢ ပှၤလၢအမၤဃူမၤဖိးတၢ်တဖၣ် အဂီၢ်.” (ယၤ ၃:၁၇, ၁၈) ဖဲစီၤယၤကိာ်ကွဲးဝဲ တၢ်ကတိၤအံၤအခါ အဆိမိၣ်က့ၤဝဲ တၢ်အိၣ်ဖှိၣ်လၢ အဝဲသ့ၣ်မၤဝဲ ဖဲဝ့ၢ်ယရူၤၡလ့ၣ်အခါဧါန့ၣ် ပတသ့ၣ်ညါဘၣ်. ဘၣ်ဆၣ် ဒ်ပမၤလိဘၣ်လၢ လံာ်မၤတၢ် အဆၢဒိၣ် ၁၅ အသိး ပသ့ၣ်ညါဘၣ်လၢ ပမ့ၢ်အိၣ်ဃူဃူဖိးဖိး ဒီးဒိကနၣ် ပှၤလၢအတီခိၣ်ရိၤမဲတၢ်တဖၣ် အတၢ်ဟံးစုနဲၣ်ကျဲမၣ် ပကန့ၢ်ဘၣ် ယဟိဝၤယွၤအတၢ်ဆိၣ်ဂ့ၤ.
၁၉, ၂၀. (က) ဒီပုၢ်ဝဲၢ်တဖၣ်လၢ ဝ့ၢ်အၣ်တံၤအီာ် ဒိးန့ၢ်ဘၣ်ဝဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲ ဝံၤအလီၢ်ခံ အဝဲသ့ၣ် အိၣ်ဒီးတၢ်ဃူတၢ်ဖိးန့ၣ် ပသ့ၣ်ညါဘၣ်ဒ်လဲၣ်. (ခ) စီၤပီလူး ဒီးစီၤဘၢ်နါဘၤ မၤတၢ်မနုၤသ့လံလဲၣ်.
၁၉ ဖဲဒီပုၢ်ဝဲၢ်တဖၣ်လၢ ဝ့ၢ်အၣ်တံၤအီာ် န့ၢ်ဘၣ်ဝဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲ ဝံၤအလီၢ်ခံ တၢ်အိၣ်ဖှိၣ် အိၣ်ဝဲဒီးတၢ်ဃူတၢ်ဖိး. ဒီပုၢ်ဝဲၢ်တဖၣ်လၢ ဝ့ၢ်အၣ်တံၤအီာ်န့ၣ် အတူၢ်လိာ်ဝဲ ဒီပုၢ်ဝဲၢ်လၢ အဟဲလၢဝ့ၢ်ယရူၤၡလ့ၣ် ဒီးစီၤယူဒၤ ဒီးစီၤစံလၤ ဟဲအိၣ်သကိး အဝဲသ့ၣ်အဃိ အဝဲသ့ၣ် သးခုဒိၣ်မး. လံာ်စီဆှံ တဲဝဲလၢ “အဝဲသ့ၣ် အိၣ်ဝဲဒီး ဒီပုၢ်ဝဲၢ်ဖဲန့ၣ်တဖၣ် တတီၤဖိလီၤ. ဒီးဒီပုၢ်ဝဲၢ်တဖၣ် ဆၢဂ့ၤဆၢဝါ အဝဲသ့ၣ် ဝံၤဒီးအဝဲသ့ၣ် က့ၤကဒါက့ၤလၢ ပှၤလၢအဆှၢလီၤ အဝဲသ့ၣ်တဖၣ်အအိၣ်.” d (မၤတၢ် ၁၅:၃၃) ဖဲစီၤယူဒၤ ဒီးစီၤစံလၤ ဟဲက့ၤတဲဖျါထီၣ်ဝဲ အတၢ်လဲၤခီဖျိအံၤအခါ ပသ့ၣ်ညါသပှၢ်တၢၢ်လၢ ဒီပုၢ်ဝဲၢ်လၢ ဝ့ၢ်ယရူၤၡလ့ၣ်စ့ၢ်ကီး ကသးခုဝဲဒိၣ်မး. ခီဖျိလၢ ယဟိဝၤယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ အဝဲသ့ၣ် မၤလၢပှဲၤအမူဒါ န့ၢ်ဝဲဂ့ၤဂ့ၤ.
၂၀ ပှၤမၤဘၣ်ဂီၢ်ထီၣ်က့ၤ တၢ်ဂ့ၢ်ကီ ဘၣ်ဃးဒီးတၢ်ကူးတရံးအဂ့ၢ် ဝံၤအလီၢ်ခံ စီၤပီလူး ဒီးစီၤဘၢ်နါဘၤ အိၣ်တ့ၢ်ဝဲလၢ ဝ့ၢ်အၣ်တံၤအီာ်. တဘျီအံၤ အဝဲသ့ၣ် သးစၢၢ်ဆၢဝဲ လၢကကွၢ်ထွဲ တၢ်စံၣ်တဲၤတဲလီၤတၢ်မၤသ့လံ. လၢပစိၤခဲအံၤစ့ၢ်ကီး ဖဲကဝီၤအပှၤကွၢ်တၢ်တဖၣ် လဲၤအိၣ်သကိးဝဲ တၢ်အိၣ်ဖှိၣ်တဖၣ်အခါ အဝဲသ့ၣ် မၤဝဲဒ်န့ၣ်. (မၤတၢ် ၁၃:၂, ၃) ပဝဲ ယဟိဝၤယွၤ အပှၤဂီၢ်မုၢ်တဖၣ်န့ၣ် ပအိၣ်ဒီး ကဝီၤအပှၤကွၢ်တၢ် ဒ်သိးဒီး စီၤပီလူး ဒီးစီၤဘၢ်နါဘၤအဃိ အမ့ၢ်တၢ်ဆိၣ်ဂ့ၤလၢပဂီၢ်. စီၤပီလူး ဒီးစီၤဘၢ်နါဘၤန့ၣ် သးဆူၣ်လၢ တၢ်စံၣ်တဲၤတဲလီၤတၢ်မၤအဂီၢ် အဃိ ယဟိဝၤယွၤ သူအဝဲသ့ၣ် ဒ်လဲၣ်. ဒီးယဟိဝၤယွၤ ဆိၣ်ဂ့ၤအဝဲသ့ၣ်ဒ်လဲၣ်. ပကမၤလိဘၣ် တၢ်ဂ့ၢ်တဖၣ်အံၤ လၢတၢ်မၤလိ လၢခံတခါ.
ဆၢကတီၢ်ခဲအံၤ ခရံာ်ဖိတဖၣ် ဒိးန့ၢ်ဘၣ်ဝဲ တၢ်ဟံးစုနဲၣ်ကျဲလၢ ပှၤပၢဆှၢတၢ်ကမံးတံာ် ဒီးအပှၤခၢၣ်စးတဖၣ်အအိၣ်အဃိ အကဲဘျုးလၢ အဝဲသ့ၣ်အဂီၢ်
a ကွၢ်တၢ်လွံၢ်နၢၣ် လၢအမ့ၢ် “ စီၤယၤကိာ်—‘ကစၢ်အဒီပုၢ်ဝဲၢ်ခွါ.’”
b စီၤယၤကိာ် သူဝဲတၢ်ကတိၤ လၢအမ့ၢ် စီၤမိၤၡ့အတၢ်ကွဲး. အဃိ ပထံၣ်ဘၣ်လၢ အဝဲအိၣ်ဒီးတၢ်ကူၣ်သ့ဒိၣ်မး. လၢစီၤမိၤၡ့အတၢ်ကွဲးအပူၤန့ၣ် ပၣ်ဃုာ်ဒီး စီၤမိၤၡ့အတၢ်သိၣ်တၢ်သီ ဒီးကစၢ်ယွၤအတၢ်ဟံးစုနဲၣ်ကျဲ လၢအအိၣ်ပာ်စၢၤ တချုးလၢ စီၤမိၤၡ့အတၢ်သိၣ်တၢ်သီ အိၣ်ထီၣ်ဒံးဘၣ်အခါ. အဒိ လံာ် ၁ မိၤၡ့ ပာ်ဖျါထီၣ်ဝဲ ကစၢ်ယွၤအတၢ်ထံၣ် အဘၣ်ဃးဒီး တၢ်သွံၣ်, တၢ်အဲၣ်ဘၢမါအဲၣ်ဘၢဝၤ ဒီးတၢ်ဘါတၢ်ဂီၤတၢ်ဖှီၣ်အဂ့ၢ်ၡဲၡဲဖိ. (၁ မိၤ ၉:၃, ၄; ၂၀:၂-၉; ၃၅:၂, ၄) ဖဲန့ၣ် ပထံၣ်ဘၣ်လၢ ယဟိဝၤယွၤ ပာ်ဖျါထီၣ်ဝဲ တၢ်ဟံးစုနဲၣ်ကျဲလၢ ပှၤယူဒၤဖိမ့ၢ်ဂ့ၤ ပှၤကလုာ်အဂၤတဖၣ်မ့ၢ်ဂ့ၤ ကဘၣ်မၤထွဲဝဲ.
c ကွၢ်တၢ်လွံၢ်နၢၣ် လၢအမ့ၢ် “ ပှၤပၢဆှၢတၢ်ကမံးတံာ် လၢပစိၤခဲအံၤန့ၣ် ဘၣ်တၢ်ကရၢကရိထီၣ်အီၤဒ်လဲၣ်.”
d လၢ မၤတၢ် ၁၅:၃၄ န့ၣ်လံာ်စီဆှံတနီၤ တဲဝဲလၢ စီၤစံလၤအိၣ်တ့ၢ်ဝဲလၢ ဝ့ၢ်အၣ်တံၤအီာ်. (ခ့ကၠ့ ဘၢၡၢၤ) ဘၣ်ဆၣ် လီၤဂာ်လၢ ပှၤကွဲးဝဲ လံာ်မၤတၢ်ဝံၤမၣ် တၢ်ကတိၤအံၤန့ၣ် ပှၤဖၢနုာ်အါထီၣ်အီၤ.
