1, 2.  a) He swini swivutiso leswi Huvo Leyi Zrangelaka ya bandla dzra wukriste a dzaneni dzra ku sungula yi fanelaka ku swi hlamula? b) He wini mpfunu lowu va wu kumiki akuva va kota ku teka xiboho lexinene?

 HINKWAVU ve zwee! A vapostola ni vakulu va tlhanganile ka sala dzra kukazri a Yerusalema, nakone va lavisana hikusa va fanela ku teka xiboho xa lisima. A mhaka ya mayelanu ni ku soka yi tlakuxe swivutiso swa lisima: Xana vakriste va le hansi ka Nawu wa Moxe? Xana ku fanela kuva ni ku hambana a makazri ka vakriste va Vayuda ni Vamatiko?

² A vavanuna lava zrangelaka va yi kambisisa hi wunyaminyami mhaka leyi. Va ma kambisisa ha hombe Mazritu ya wuprofeta bya Xikwembu Nkulukumba, nakone va ni wumboni lebyi kholwisaka bya leswaku Yehovha a ta va tovokisa ka xiboho lexi va taka xi teka. Hi ku ntsrhunxeka va hlaya mavonela yavu. A wumboni lebyi nyikeliwaka mayelanu ni mhaka leyi a byi kaneteki. A moya wa ku xwenga wa Yehovha wu swi beka livaleni leswi va fanelaka ku swi yentxa. Xana vavanuna lava va ta yi landzra minkongomiso yoleyo?

3. Hi nga pfuneka hi yini loko hi kambisisa dzrungula dzra Mintizro ndzrima 15?

³ Swi ta djula lipfumelo ledzri tiyiki ni xixixi akuva va landzra nkongomiso wa moya wa ku xwenga a mhakeni leyi. Loko va nga tivoneli, xiboho lexi va taka xi teka xi nga ha yentxa leswaku vazrangeli va wukhongoti bya Xiyuda va ya va va nyenya. Handle ka leswo va lavisana ni vavanuna lava tiyeliki tinhloko, lava tiyimiseliki ku yentxa leswaku vhanu va Xikwembu Nkulukumba va tama va landzra Nawu wa Moxe. I yini leswi Huvo Leyi Zrangelaka yi taka swi yentxa? A hi voneni nhlamulo ya xivutiso lexi ni xikombiso lexinene lexi vavanuna lava va xi siyiki, lexi Huvo Leyi Zrangelaka ya Timboni ta Yehovha ya ha tamaka yi xi landzra namunhla. I xikombiso lexi na hine hi fanelaka ku xi landzra loko hi djula ku teka swiboho kumbe loko hi kumana ni swikazratu a wuton’wini byezru swanga vakriste.

4, 5. He wani Mazritu ya wuprofeta lawa Yakobe a ma tsrhahiki?

⁴ Mudondzrisiwa Yakobe, lweyi a a li makwavu wa Yesu, a sungule ku vulavula. a Swi tikomba na a li yene lweyi a a zrangela ntlhanganu ka xiyentxakalu lexi, nakone swi tikomba na mazritu yake ma beke livaleni mavonela ya swizro hinkwaswu swa Huvo Leyi Zrangelaka. Yakobe a byele vavanuna hinkwavu lava a va li kone ka ntlhanganu lowo a ku: “Simiyoni a hi tlhamuxele ha hombe ndlela leyi Xikwembu Nkulukumba a va dzrimukiki ha yone vhanu va matiko ni leswaku a makazri kwavu a sungule ku hlawula vhanu lava taka vitaniwa hi vito dzrake. Nakone a mazritu lawa ma pfumelelana ni leswi tsraliwiki hi vaprofeta.”—Mint. 15:14, 15.

⁵ A wukaneli lebyi nyikeliwiki ha Simiyoni, kumbe Simoni Petro, ni wumboni lebyi nyikeliwiki ha Barnaba na Pawulo, swi nga yentxeka byi dzrimuxe Yakobe tindzrimana leti a ti yi tlhamuxela ha hombe mhaka leyi a va bula ha yone. (Yoh. 14:26) Xileswo a te: “A mazritu lawa ma pfumelelana ni leswi tsraliwiki hi vaprofeta.” Yakobe a game a tsrhaha mazritu ya Amos 9:11, 12, a nga buku ledzri a dzri hamba xiyenge xa Matsralwa ya Xiheberu lawa ma tiviwaka swanga “vaprofeta”. (Mat. 22:40; Mint. 15:16-18) U ta xiya leswaku mazritu lawa ma tsrhahiwiki ha Yakobe, ma hambananyana ni lawa ma kumekaka ka buku dzra Amos namunhla. Swi tikomba na Yakobe a tsrhahe mazritu ya Septuaginta, ku nga wundzruluteli bya Matsralwa ya Xiheberu hi Xigriki.

6. Xana Matsralwa ma pfune hi ndlela yini ku tlhantlha mhaka leyi a yi li kone?

⁶ Hi ku tizrisa muprofeta Amos, Yehovha a a hlaye leswaku a ku ta tlhasa nkama lowu a a ta pfuxa “yindlu ya Davhida”. Ku nga lixaka ledzri ka dzrone a ku ta huma tihosi leti a ti ta fuma ku za ku tlhasa Mfumu wa Mesiya. (Ezek. 21:26, 27) Xana leswo swi hlaya leswaku Yehovha a a ta tama a tizrisana ni Vayuda swanga tiko dzrake dzra ku hlawuleka? Nikutsrongo! A wuprofeta byi ya mahlweni byi ku: “Vhanu va matiko hinkwawu” a va ta tlhanganisiwa swanga ‘vhanu lava vitaniwaka hi vito dzra [Xikwembu Nkulukumba]’. Dzrimuka leswi Petro a swi hlayiki: “[Xikwembu Nkulukumba] a kombise leswaku hine [vakriste va Vayuda] na vone [vakriste Vamatiko] a hi vona hi ndlela leyi fanaka, hi ku basisa timbilu tavu hi kola ka lipfumelo dzravu.” (Mint. 15:9) Hi mazritu man’wana, a ku li ku zrandzra ka Xikwembu Nkulukumba kuva vakriste va Vayuda ni Vamatiko va faneleka kuva vamadapfindla va Mfumu. (Rom. 8:17; Efe. 2:17-19) A ku na mazritu ka wuprofeta lebyi, lawa ma kombisaka leswaku a vakriste Vamatiko a va fanela ku zranga hi ku sokisiwa kumbe va va vaprozelita.

7, 8. a) He wani mavonela lawa Yakobe a ma nyikeliki? b) Xana hi fanela ku ma twisisa hi ndlela yini mazritu lawa ma hlayiwiki ha Yakobe?

 ⁷ Hi ku susumetiwa hi wumboni lebyi nga Bibeleni ni wumboni lebyi nyikeliwiki, Yakobe a nyikele mavonela lawa: “Kutani hi mavonela yanga a swi ta va swi nga li swinene kuva hi bindzrisela vamatiko, lava djulaka ku tizrela Xikwembu Nkulukumba, kambe hi va tsralela leswaku va tsrhika mintxhumu leyi fambisanaka ni ku gandzrela swithombe, swiyentxo swa tingana hi tlhelo dzra tinkuku, swihazri leswi fiki hi ku tlimbiwa nkolo, ni ngati. Hikusa ku sukela minkameni ya khale, ku ni vhanu lava va zrezraka mazritu ya Moxe a madoropeni hinkwawu, hikusa hi masavata hinkwawu ku dondzriwa mabuku yake a masinagogeni akuva vhanu va ma yingiseta.”—Mint. 15:19-21.

⁸ Kutani loko Yakobe a te “hi mavonela yanga”, swanga mutlhanganisi, xana a o dzringisa ku titlakuxa mahlweni ka vamakwavu ni ku teka xiboho mayelanu ni leswi a swi fanela ku yentxiwa? Nikutsrongo! Hikusa lani ku tizrisiwe zritu dzra Xigriki ledzri ndzruluteliwiki dzri va “hi mavonela yanga”, kutani a matsrhan’wini ya ku tekela huvo xiboho, Yakobe a o beka mavonela lawa a ma seketeliwa hi wumboni lebyi a byi twiki ni leswi a Matsralwa a ma swi hlaya a mhakeni leyo.

9. Xana a ma ta va wani mabindzru ya ku landzra mavonela ya Yakobe?

⁹ Xana mavonela ya Yakobe a ma li manene? Handle ka ku ganaganeka, a ma li manene. Hikusa vakulu ni vapostola va game va ma tizrisa. A ma ta va wani mabindzru ya ku tizrisa mavonela yake? Mavonela lawa, a ma nge ti “bindzrisela vamatiko” hi ku va sindzrisa leswaku va landzra Nawu wa Moxe. (Mint. 15:19) Hi tlhelo dzrin’wana xiboho lexo a xi ta kombisa ku hlonipha mapfalu ya vakriste va Vayuda, lava ku dzringana malembe manyingi va yingeliki mazritu ya ‘Moxe na ma dondzriwa hi masavata hinkwawu a masinagogeni’. b (Mint. 15:21) Handle ka ku ganaganeka mavonela lawo a ma ta kulisa wuxaka lebyi Vayuda a va li na  byone ni vakriste Vamatiko. Ku tlula hinkwaswu a ma ta nyonxisa Yehovha hikusa a ma ta fambisana ni nkongometo wake. Mawaku ndlela ya ku xonga leyi va tlhantlhiki ha yone mhaka leyi a yi tsrekatsrekisa wumun’we ni wuhlayiseki bya bandla dzra vhanu va Xikwembu Nkulukumba! Nakone i xikombiso xa ku xonga lexi vakriste namunhla va nga xi yetiselaka!

10. Xana Huvo Leyi Zrangelaka namunhla yi xi landzra hi ndlela yini xikombiso lexi siyiwiki hi Huvo leyi a yi zrangela a dzaneni dzra ku sungula?

¹⁰ Hi lani hi swi voniki ha kone ka ndzrima leyi khalutiki, Huvo Leyi Zrangelaka namunhla yi yetisela xikombiso lexi siyiwiki hi Huvo leyi a yi zrangela a dzaneni dzra ku sungula, hi ku djula nkongomiso wa Yehovha, Mufumi wa wuyaku hinkwabyu, na Yesu Kriste Nhloko ya bandla, ka timhaka hinkwatu. c (1 Kor. 11:3) Xana leswo swi yentxiwa hi ndlela yini? Makwezru Albert D. Schroeder, lweyi a tizriki swanga xizro xa Huvo Leyi Zrangelaka ku sukela hi 1974 ku ya tlhasa wugan’wini bya ntizro wake wa lani misaveni hi Marsu wa 2006, a tlhamuxele leswi: “Hi wawuzrazru mun’wana ni mun’wana, Huvo Leyi Zrangelaka ya tlhangana. Yi pfula ntlhanganu lowo hi ku hamba xikhongoto yi kombela nkongomiso wa moya wa ku xwenga wa Yehovha. Huvo Leyi Zrangelaka ya tikazrata akuva yi tiyiseka leswaku mhaka yin’wana ni yin’wana ni xiboho xin’wana ni xin’wana lexi tekiwaka xi fambisana ni Zritu dzra Xikwembu Nkulukumba ku nga Bibele.” Hi ndlela leyi fanaka, makwezru Milton G. Henschel, lweyi a tizriki ku dzringana nkama wa ku leha swanga xizro xa Huvo Leyi Zrangelaka, lweyi a hetiki ntizro wake wa lani misaveni hi Marsu wa 2003, a sekelekise xivutiso xa lisima ka swidondzri swa turma dzra wu 101 swa xikole xa Bibele xa Giliyadi, xa Torre de Vigia. A vutise leswi: Xana ku ni nhlengeletanu yin’wana lani misaveni leyi vazrangeli va yone va zrangaka hi ku kambela Zritu dzra Xikwembu Nkulukumba na va nga si teka swiboho swa lisima? A nhlamulo yi le livaleni.

11. A xiboho xa Huvo Leyi Zrangelaka xi tivisiwe hi ndlela yini ka mabandla?

¹¹ A Huvo Leyi Zrangelaka kutani a yi teke xiboho mayelanu ni mhaka leyi ya ku soka. Kambe akuva vakriste hinkwavu a mabandleni va pfumelelana ni xiboho lexo, a xi fanela ku nyikeliwa hi ndlela leyinene ni ya lizrandzru. Xana a yi ta va yini ndlela ya ku yampswa ya ku yentxa leswo? A dzrungula dzri li: “Kutani a vapostola ni vakulu xikan’we ni bandla hinkwadzru, va kunguhata ku zrumela vavanuna a Antiyokiya lava va va hlawuliki makazri kwavu, akuva va famba na Pawulo na Barnaba. Va zrume Yudasi lweyi a vitaniwaka Barsabasi kun’we na Silasi, lava a va zrangela xikazri ka vamakwavu.” Handle ka leswo, ku lulamisiwe  papela ledzri nyiketiwiki vavanuna lavo akuva va dzri dondzra ka mabandla hinkwawu ya Antiyokiya, Siriya ni Kilikiya.—Mint. 15:22-26.

12, 13. a) Ma ve wani mabindzru ya ku zrumela Yudasi na Silasi a mabandleni? b) Xana ma ve wani mabindzru ya ku zrumela papela ledzri pfaka ka Huvo Leyi Zrangelaka mabandleni?

¹² Swanga vavanuna “lava a va zrangela xikazri ka vamakwavu”, Yudasi na Silasi a va faneleka ha hombe akuva va yimela Huvo Leyi Zrangelaka. Ntlawa lowu, lowu a wu vumbiwa hi mune wa vavanuna, a wu ta swi beka livaleni leswaku a dzrungula ledzri a wu dzri yisa mabandleni a ku ngo va nhlamulo ya xivutiso lexi va xi hambiki ntsena, kambe a a li nkongomiso wa Huvo Leyi Zrangelaka. A ku zrumeliwa ka Yudasi na Silasi, vavanuna “lava hlawuliwiki”, a ku ta tiyisa lizrandzru dzra vakriste va Vayuda a Yerusalema ni vakriste Vamatiko a mabandleni. Xongani ka lulamiselo ledzri dzra lizrandzru! Handle ka ku ganaganeka leswo swi yentxe leswaku ku va ni ku zrula ni wumun’we ka vhanu va Xikwembu Nkulukumba.

¹³ A papela ledzri dzri nyikele minkongomiso ya ku khanya ka vakriste Vamatiko. Ku nga li ntsena ka mhaka leyi khumbaka ku soka, kambe ni ka leswi a va fanela ku swi yentxa akuva va yamukeleka ka Yehovha ni ku tovokisiwa ha yene. A xiyengenkulu xa papela ledzri a xi hlaya leswi: “A moya wa ku xwenga kun’we na hine, hi vone swi yampswa kuva hi nga mi yengeseleli ntsrhwalu handle ka leswi swi nga swone swi vilelekaka, ku nga leswi: Mi tsrhika mintxhumu leyi nyikeliwiki swithombe, ngati, swihazri leswi fiki hi ku tlimbiwa nkolo, ni swiyentxo swa tingana hi tlhelo dzra tinkuku. Loko mi ya mahlweni mi tivonela ka mintxhumu leyi, swi ta mi fambela ha hombe. Hi mi navelela wutomi byinene!”—Mint. 15:28, 29.

14. Xana swi kotekisa kuyini kuva vhanu va Yehovha va va ni wumun’we ka misava leyi yavaniki?

¹⁴ Nambileswi Timboni ta Yehovha ti tlulaka 8.000.000, ka mabandla lawa ma tlulaka 100.000 a misaveni hinkwayu, ti ni wumun’we ka swiyentxo ni ka leswi ti swi kholwaka, ngopfungopfu ka masiku lawa ya wugamu lani vhanu va yaka va yavana. Leswo swo koteka hi leswi Yesu Kriste, Nhloko ya bandla, a nyikelaka minkongomiso leyi khanyaka ni leyi kongomiki hi ku tizrisa “nandzra wa ku dumbeka ni ku tlhazriha” kumbe Huvo Leyi Zrangelaka. (Mat. 24:45-47) Nakone a wumun’we lebyo byi tlhela byi koteka hi leswi vamakwezru a misaveni hinkwayu va landzraka minkongomiso leyo hi mbilu hinkwayu.

15, 16. Xana mhaka ya ku soka yi tlhantlhisiwe kuyini, nakone i yini lexi pfuniki akuva yi lulamisiwa hi ndlela leyo?

¹⁵ A dzrungula dzra Mintizro dzri ya mahlweni dzri hi byela leswaku  loko vakriste va le Yerusalema va tlhase Antiyokiya, “va hlengelete ntlawa hinkwawu va wu nyiketa papela”. Xana vakriste va Antiyokiya va yangulise kuyini loko va twa minkongomiso leyi a yi pfa hi ka Huvo Leyi Zrangelaka? A dzrungula dzri ya mahlweni dzri ku: “Ntsrhaku ka loko va dzri dondzrile, va nyonxa hi ndlela leyi dzri va tiyisiki ha yone.” (Mint. 15:30, 31) Handle ka leswo, Yudasi na Silasi “va kutxe vamakwavu ni ku va tiyisa hi mazritu manyingi”. Swanga hi leswi Barnaba, Pawulo ni van’wana a va vitaniwa vaprofeta, Yudasi na Silasi na vone a va li “vaprofeta”, hikusa va kutxe ni ku tiyisa vamakwavu. ‘Muprofeta’ i zritu ledzri tlhamuxelaka lweyi a twalisaka ku zrandzra ka Xikwembu Nkulukumba.—Mint. 13:1; 15:32; Eks. 7:1, 2.

¹⁶ Swi le livaleni leswaku Yehovha a tovokise minzamu hinkwayu leyi yentxiwiki, ni ku yentxa leswaku mhaka leyi yi lulamisiwa hi ndlela leyinene. Kambe i yini lexi yentxiki leswaku mhaka leyi yi famba ha hombe? Handle ka ku ganaganeka a ve minkongomiso leyi khanyaka ni leyi tlhasiki hi nkama, leyi a yi pfa hi ka Huvo Leyi Zrangelaka, leyi a yi seketeliwe ka Zritu dzra Xikwembu Nkulukumba ni ka nkongomiso wa moya wa ku xwenga. Handle ka leswo, xin’wana lexi pfuniki a ve ndlela ya lizrandzru leyi Huvo Leyi Zrangelaka yi nyikeliki ha yone minkongomiso leyo ka mabandla.

17. I yini leswi valaviseli va miganga va swi yentxaka loko va pfuxela mabandla, nakone va yetisela xikombiso xa mani?

¹⁷ Hi ku landzra xikombiso lexi siyiwiki hi Huvo Leyi Zrangelaka ya le dzaneni dzra ku sungula, a Huvo Leyi Zrangelaka ya Timboni ta Yehovha namunhla yi nyikela minkongomiso leyi tlhasaka hi nkama ka mabandla a misaveni hinkwayu. A swiboho leswi tekiwaka swi nyikeliwa  mabandleni hi ndlela ya ku khanya ni leyi kongomiki. Yin’we ya tindlela ta ku yentxa leswo i mayendzro ya valaviseli va miganga. Vamakwezru lava, lava tizraka hi ku swi zrandzra, va yendzrela mabandla ya ku siyanasiyana va nyikela minkongomiso leyi khanyaka ni ku tiyisa vamakwezru hi ndlela ya lizrandzru. Ku fana na Pawulo na Barnaba, va heta nkama wa ku leha na va li nsin’wini, na “va dondzrisa ni ku zrezra madzrungula lamanene ya zritu dzra Yehovha xikan’we ni vamakwavu van’wana va vanyingi”. (Mint. 15:35) Ku fana na Yudasi na Silasi, vamakwezru lava, va ‘kutxa vamakwavu ni ku va tiyisa hi mazritu manyingi’.

18. I yini leswi vhanu va Xikwembu Nkulukumba va fanelaka ku tama va swi yentxa akuva va kuma matovoko yake?

¹⁸ Kutani hi nga kuyini hi mabandla? I yini lexi taka pfuna leswaku mabandla a misaveni hinkwayu ma tama ma va ni ku zrula, a misaveni leyi yi yaka yi yavana? Dzrimuka leswaku a ve mudondzrisiwa Yakobe lweyi hi ku famba ka nkama a tsraliki leswi: “Kambe a wutlhazri bya le tilweni xa ku sungula ka hinkwaswu byi xwengile, byi gama byi va lebyi zruliki, byi yanakanyela, byi lulamela ku yingiseta . . . Handle ka leswo, a handzru wa wululami wu byaliwa ka swiyimu swa ku zrula wu byaleliwa lava kondletelaka ku zrula.” (Yak. 3:17, 18) A hi swi tivi leswaku loko Yakobe a tsrala mazritu lawa a a yanakanyisisa hi ntlhanganu lowu viki kone a Yerusalema kumbe im-him, kambe a wukambisisi lebyi hi byi hambiki bya swiyentxakalu leswi tsraliwiki ka buku dzra Mintizro ndzrima 15, byi swi beka livaleni leswaku Yehovha o hi tovokisa ntsena loko hi va ni wumun’we ni ntizrisanu.

19, 20. a) Swi tikombe hi ndlela yini leswaku kutani a ku ni ku zrula ni wumun’we a bandleni dzra Antiyokiya? b) Swoswi i yini leswi Pawulo na Barnaba a va ta kota ku swi yentxa?

¹⁹ Swi le livaleni leswaku kutani a ku ni ku zrula ni wumun’we a bandleni dzra Antiyokiya. A matsrhan’wini ya ku holovela Yudasi na Silasi, a vakriste va le Antiyokiya va nyonxile hi liyendzro dzravu. A dzrungula dzri li: “Ntsrhaku ka loko va tsrhame nkamanyana kolanu, vamakwavu va va tsrhike va famba hi ku zrula va tlhelela ka lava va va zrumiki”, kumbe a Yerusalema. d (Mint. 15:33) Hi nga tiyiseka leswaku vakriste va le Yerusalema na vone a va nyonxile loko vavanuna lavabidzri va va dzrungulela ndlela leyi liyendzro dzri fambiki ha yone. Hi kola ka timpswalu letikulu ta Yehovha, swi va fambele ha hombe ka liyendzro dzravu!

²⁰ Swoswi, Pawulo na Barnaba lava a va sale a Antiyokiya, a va ta yisa mahlweni ntizro wavu wa ku zrezra, hi lani valaviseli va miganga va yentxaka ha kone namunhla loko va yendzrela mabandla. (Mint. 13:2, 3)  Mawaku matovoko lawa ma kumiwaka hi vhanu va Xikwembu Nkulukumba! Kambe he swini swiyavelo ni matovoko man’wana leswi Yehovha a swi nyikiki vazrezri lavabidzri va nkhinkhi? Hi ta swi vona ka ndzrima leyi landzrelaka.