1, 2. (a) Lain i bosim kongrigesen Kristen long taim bilong ol aposel i mas skelim wanem ol bikpela askim? (b) Ol dispela brata i kisim wanem helpim bilong wokim disisen i stret?

 OLGETA i wet long harim disisen. Ol aposel na ol hetman i stap long wanpela rum long Jerusalem, ol i lukluk long narapela narapela, ol i save olsem ol i mas mekim wanpela bikpela samting tru. Tok pait bilong katim skin i kamapim ol bikpela askim. Ol Kristen i stap aninit long Lo Bilong Moses o nogat? Ol Juda Kristen i stap narapela kain long ol Kristen bilong ol arapela lain?

² Lain i bosim ol Kristen i bin skelim planti samting. Ol i skelim tok profet bilong God na stori bilong ol narapela long ol samting ol i bin lukim we i soim blesing bilong Jehova. Ol i bin kamapim olgeta tingting bilong ol long dispela samting. I gat planti evidens i sapotim tok bilong ol, na dispela i kamapim klia olsem spirit bilong Jehova i stiaim ol. Bai ol dispela man i bihainim samting holi spirit i stiaim ol long mekim?

3. Taim yumi skelim Aposel sapta 15, dispela bai helpim yumi olsem wanem?

³ Bilong bihainim samting holi spirit i stiaim ol long mekim, ol i mas gat strongpela bel na bilip, bikos dispela inap kirapim ol hetman bilong lotu Juda long birua moa yet long ol. Na tu, sampela man insait long kongrigesen husat i strong long kirapim lain bilong God long bihainim Lo Bilong Moses, ol i agensim ol. Lain i bosim ol Kristen bai mekim wanem? Dispela sapta bai stori long dispela samting. Taim yumi skelim dispela stori, bai yumi kisim save long olsem wanem Gavening Bodi Bilong Ol Witnes Bilong Jehova long nau i bihainim pasin bilong ol. Yumi ol Kristen tu i mas bihainim pasin bilong ol taim yumi wokim ol disisen na bungim ol hatwok long laip bilong yumi.

4, 5. Jems i kamapim wanem ol tok bilong ol profet bilong givim sampela save moa long samting ol i stori long en?

⁴ Disaipel Jems, em brata bilong Jisas, i kirap toktok. a I luk olsem long  dispela bung em i mekim wok siaman. Ol tok bilong em i strongim samting em olgeta long dispela bung i wanbel long en. Jems i tokim ol man i bung, olsem: “Simeon i stori gut long olsem wanem God i bin tingim ol man bilong ol arapela lain long namba 1 taim. Na God i mekim olsem bilong kisim wanpela lain em nem bilong em i ken stap long ol. Na dispela i stret wantaim tok bilong ol Profet.”​—Apo. 15:14, 15.

⁵ Ating tok bilong Simeon o Saimon Pita, na ol evidens Barnabas na Pol i kamapim, i kirapim Jems long tingim sampela skripsa i givim sampela save moa long samting ol i stori long en. (Jon 14:26) Bihain long Jems i tok olsem, “dispela i stret wantaim tok bilong ol Profet,” em i kamapim tok bilong Amos 9:11, 12. Dispela buk i hap bilong Ol Skripsa Hibru ol i kolim olsem “Ol Profet.” (Mat. 22:40; Apo. 15:16-18) Bai yu lukim olsem tok Jems i kolim i narapela kain liklik long ol tok i stap long Buk Amos long nau. I luk olsem Jems i kamapim tok bilong Baibel Septuagint, em Ol Skripsa Hibru ol i bin tanim long tok Grik.

6. Olsem wanem Baibel i givim sampela save moa long tok ol aposel na ol hetman i wok long skelim?

⁶ Long rot bilong profet Amos, Jehova i tok profet olsem taim bai kamap we Em bai kirapim gen “haus win bilong Devit,” olsem em bai givim wok king long wanpela tumbuna pikinini bilong Devit na kamapim Kingdom Bilong Mesaia. (Ese. 21:26, 27) Olsem wanem? Jehova bai mekim gen ol samting wantaim lain Israel bilong skin tasol? Nogat. Tok profet i tok moa olsem “ol arapela lain” bai kam insait long lain “em nem bilong [God] i stap long ol.” Tingim, nau tasol Pita i bin tok olsem God “i no mekim olsem ol [man bilong ol arapela lain i bilip] i narapela kain long yumi [ol Juda Kristen], nogat. Ol i bilip na long dispela as em i mekim bel bilong ol i kamap klin.” (Apo. 15:9) Olsem na em laik bilong God long ol Juda na ol man bilong ol arapela lain i kisim Kingdom. (Rom 8:17; Efe. 2:17-19) Ol tok profet bilong Baibel i no tok olsem ol man bilong ol arapela lain i bilip, ol i mas katim skin pastaim o joinim lotu Juda bambai ol i ken mekim wok king long heven, nogat.

7, 8. (a) Jems i kamapim wanem tingting? (b) Yumi mas ting olsem wanem long tok bilong Jems?

⁷ Jems i pilim tru ol dispela tok bilong Baibel na ol evidens ol narapela i kamapim, na dispela i kirapim em long mekim dispela tok: “Olsem na tingting bilong mi i olsem, yumi no ken givim hevi long ol man bilong ol arapela lain husat i baut na i go long God, nogat. Mobeta yumi raitim pas i go long ol na tokim ol long sakim ol samting i kamap doti long rot bilong ol imis na sakim pasin pamuk, na no ken kaikai ol animal ol i pasim nek na kilim i dai, na ol i mas sakim blut. Ol buk bilong Moses i kamapim ol dispela lo, na kirap long bipo yet na i kam inap nau ol i autim ol tok bilong em long olgeta taun. Olsem long olgeta sabat ol i save ritim ol tok bilong em long ol manmeri long ol sinagog.”​—Apo. 15:19-21.

⁸ Yu ting Jems i abrusim mak bilong wok em i holim olsem siaman bilong  miting, na wokim nating disisen long samting ol i mas mekim? Nogat tru! Dispela tok bilong Jems olsem “tingting bilong mi” i soim olsem em i no traim long bosim ol hetman na ol aposel, nogat. Em i kamapim tasol tingting long samting ol inap mekim na ol hetman i ken skelim. Ol evidens ol narapela i kamapim na ol tok Baibel i mekim long dispela samting i as bilong tok Jems i mekim.

9. Tingting bilong Jems i kamapim wanem ol gutpela samting?

⁹ Olsem wanem? Tingting Jems i kamapim i gutpela? Yes, bikos bihain ol aposel na ol hetman i bihainim dispela tingting. Dispela i kamapim wanem gutpela samting? Dispela samting Jems i kirapim ol long mekim i no “givim hevi” long ol Kristen bilong ol arapela lain, bikos dispela i no fosim ol long bihainim Lo Bilong Moses. (Apo. 15:19) Na tu, dispela disisen i rispektim maus bilong bel bilong ol Juda Kristen, em planti yia pinis ol i bin harim ‘ol tok bilong Moses ol i ritim long ol manmeri long ol sinagog long olgeta sabat.’ b (Apo. 15:21) Dispela disisen bai strongim tru pasin wanbel namel long ol Juda Kristen na ol Kristen bilong ol arapela lain. Tasol bikpela samting moa, God Jehova i amamas long dispela disisen, bikos dispela i stret wantaim samting em i tingting pinis long mekim. Man! Em i gutpela rot tru bilong stretim hevi we inap bagarapim pasin wanbel na i stap bilong kongrigesen bilong lain bilong God. Na dispela i stap gutpela piksa tru long kongrigesen Kristen long nau!

10. Olsem wanem Gavening Bodi long nau i bihainim pasin bilong lain i bosim ol Kristen long bipo?

¹⁰ Olsem sapta 13 i kamapim, Gavening Bodi Bilong Ol Witnes Bilong Jehova long nau i bihainim pasin bilong lain i bosim ol Kristen long bipo. Ol i lukluk i go long Jehova, em King Bilong Heven na Graun, na long Jisas Krais, em Het bilong kongrigesen, long stiaim olgeta samting. c (1 Kor. 11:3) Ol i mekim dispela olsem wanem? Albert D. Schroeder, husat i bin insait long Gavening Bodi long 1974 i go inap Mas 2006, em taim em i pinisim wok bilong em long graun, i tok: “Gavening Bodi i save bung long olgeta Trinde, na ol i kirapim miting long rot bilong beten na ol i askim Jehova long stiaim ol long rot bilong spirit bilong em. Ol i wok  strong tru na bai olgeta samting ol i skelim na olgeta disisen ol i wokim i stret wantaim Tok Bilong God, em Baibel.” Milton G. Henschel i bin insait long Gavening Bodi inap longpela taim na i pinisim wok bilong em hia long graun long Mas 2003, i kamapim wanpela bikpela askim long ol sumatin i grediuet long klas 101 bilong Wastaua Baibel Skul Bilong Gileat. Em i askim ol: “Olsem wanem? I gat narapela oganaisesen long graun em lain i bosim ol i save skelim Tok Bilong God, em Baibel, paslain long ol i wokim disisen long sampela bikpela samting?” Bekim em klia stret.

11. Long wanem rot ol kongrigesen i kisim save long disisen bilong lain i bosim ol?

¹¹ Lain i bosim ol Kristen long Jerusalem i wanbel long disisen ol i wokim long pasin bilong katim skin. Tasol bilong ol brata insait long ol kongrigesen i ken mekim ol samting long pasin wanbel, ol narapela i mas kamapim klia dispela disisen long ol na mekim long gutpela pasin. Ol bai mekim olsem wanem? Baibel i tok: “Ol aposel na ol hetman wantaim olgeta i stap long bung ol i pasim tok long salim sampela man namel long ol i go long Antiok wantaim Pol na Barnabas; ol i salim Judas em ol i kolim Barsabas, na Sailas, tupela i stap olsem ol gopas namel long ol brata.” Na tu, ol i raitim wanpela pas na salim i go wantaim ol dispela man bambai ol i ken ritim pas long olgeta kongrigesen i stap long Antiok, Siria, na Silisia.​—Apo. 15:22-26.

12, 13. Wanem gutpela samting i kamap taim ol i salim (a) Judas na Sailas? (b) pas i kam long lain i bosim ol Kristen?

¹² Judas na Sailas em “ol gopas namel long ol brata,” olsem na ol inap tru long stap olsem mausman bilong lain i bosim ol Kristen. Dispela 4-pela brata ol i salim bai kamapim klia olsem tok ol i bringim i kam, i no bekim tasol askim bilong pasin bilong katim skin, nogat, ol i bringim tok bilong lain i bosim ol Kristen long samting ol Kristen i mas mekim. Taim Judas na Sailas i kam, dispela i strongim pasin wanbel namel long ol Juda Kristen na ol Kristen bilong ol arapela lain insait long ol kongrigesen. Ol i bihainim gutpela tingting na pasin taim ol i salim ol dispela brata i kam! Dispela i kamapim bel isi na pasin wanbel insait long lain bilong God.

¹³ Dispela pas i kamapim sampela tok long ol Kristen bilong ol arapela lain long pasin bilong katim skin, na tu, ol samting ol i mas mekim bambai Jehova i ken orait long ol na blesim ol. Bikpela poin bilong pas i tok: “Holi spirit na mipela yet i no laik putim sampela hevi moa long yupela. Ol samting yupela i mas mekim i olsem: sakim yet ol samting ol i sakrifaisim long ol imis na sakim blut, na no ken kaikai ol animal ol i pasim nek bilong ol na kilim ol i dai, na yupela i mas sakim pasin pamuk. Sapos yupela i strong long abrusim ol dispela samting, yupela bai stap gut. Yupela i ken stap gut!”​—Apo. 15:28, 29.

14. Olsem wanem lain bilong Jehova inap wok gut wantaim long dispela graun we ol lain i bruk nabaut?

¹⁴ Long nau, ol Witnes Bilong Jehova i stap wanbel long pasin na samting ol i  bilip long en. Ol inap olsem 8,000,000 long winim 100,000 kongrigesen long olgeta hap. Olsem wanem ol inap stap wanbel long dispela taim bilong hevi we pasin bilong brukim lain i go bikpela? Ol i stap wanbel bikos Jisas Krais, em Het bilong kongrigesen, i save givim ol tok i klia na i makim stret samting ol i mas mekim. Em i mekim olsem long rot bilong “gutpela wokboi i gat savetingting,” em Gavening Bodi. (Mat. 24:45-47) Na tu, pasin wanbel i stap taim lain bratasista long olgeta hap i redi long bihainim tok bilong Gavening Bodi.

15, 16. Taim ol i stretim tok bilong katim skin, wanem samting i kamap? Wanem ol samting i mekim na gutpela samting i kamap?

¹⁵ Buk Aposel i stori olsem taim ol brata bilong Jerusalem i kamap long Antiok, “ol i bungim bikpela lain manmeri na ol i givim dispela pas long ol.” Ol brata long dispela hap i mekim wanem taim ol i kisim tok i kam long lain bilong bosim ol Kristen? “Taim ol manmeri i ritim [pas] pinis, ol i amamas long dispela tok bilong strongim ol.” (Apo. 15:30, 31) Na tu, Judas na Sailas “i givim planti gutpela tok long ol brata na strongim ol.” I olsem tupela i mekim wok “profet,” wankain olsem Barnabas, Pol, na ol narapela em ol i bin kolim olsem profet—dispela tok i makim man husat i save tokaut long laik bilong God.​—Apo. 13:1; 15:32; Kis. 7:1, 2.

¹⁶ I klia tru olsem Jehova i blesim olgeta samting ol i mekim bilong stretim tok bilong katim skin. Wanem samting i mekim na gutpela samting i kamap? Lain bilong bosim ol Kristen i givim ol tok i klia na i kam long taim stret em Tok Bilong God i as bilong en na holi spirit i stiaim. Na tu, ol i toksave long ol kongrigesen long ol disisen ol i wokim long pasin we i soim olsem ol i tingim tru ol brata.

17. Olsem wanem ol wasman raun i bihainim pasin ol brata i bin mekim long taim bilong ol aposel?

¹⁷ Lain Gavening Bodi Bilong Ol Witnes Bilong Jehova long nau, i bihainim dispela pasin na i givim gutpela tok long taim stret bilong stiaim ol bratasista long olgeta hap. Taim ol i wokim ol disisen, ol i tokaut klia long dispela samting long ol kongrigesen. Wanpela rot bilong mekim olsem em long rot bilong ol wasman raun. Ol dispela brata i daunim laik bilong ol yet, na i visitim ol kongrigesen na givim ol tok i klia bilong stiaim na strongim ol brata. Olsem Pol na Barnabas, ol i lusim bikpela haptaim long wok autim tok, “ol i mekim wok tisa, na ol i autim gutnius bilong tok bilong Jehova na ol i mekim wantaim planti arapela.” (Apo. 15:35) Olsem Judas na Sailas, ol i “givim planti gutpela tok long ol brata na strongim ol.”

18. Bilong kisim yet blesing bilong Jehova, lain bilong God i mas mekim wanem?

¹⁸ Wanem samting bai helpim ol kongrigesen long olgeta hap long wok yet long stap bel isi na wanbel long dispela graun we ol lain i bruk nabaut? Tingim tok disaipel Jems i mekim bihain: “Savetingting i kam long heven i mekim na  pastaim man i stap klin, na bihain em i stap wanbel wantaim ol arapela, em i redi long bihainim tingting bilong narapela, em i redi long bihainim tok.  . . Na tu, sid bilong stretpela pasin ol i planim long taim bilong bel isi, ol i planim bilong ol man i save kamapim bel isi.” (Jems 3:17, 18)Taim Jems i mekim dispela tok, yumi no save sapos em i tingim bung i bin kamap long Jerusalem o nogat. Tasol taim yumi skelim ol samting em Buk Aposel sapta 15 i stori long en, yumi save olsem Jehova bai blesim lain bilong em sapos ol i stap wanbel na wok gut wantaim.

19, 20. (a) Olsem wanem i klia tru olsem bel isi na pasin wanbel i stap long kongrigesen Antiok? (b) Nau Pol na Barnabas inap mekim wanem?

¹⁹ I klia tru olsem bel isi na pasin wanbel i stap nau long kongrigesen Antiok. Ol i no tok pait wantaim ol brata i kam long Jerusalem, nogat. Ol brata long Antiok i amamas tru long visit bilong Judas na Sailas, na “tupela i stap longpela taim liklik, na ol brata i amamas na salim ol i go bek wantaim bel isi long dispela lain i bin salim ol i kam.” Ol i go bek long Jerusalem. d (Apo. 15:33) Yumi ken save olsem ol brata long Jerusalem tu i amamas taim ol i harim stori bilong raun bilong tupela. Bikpela pasin helpim bilong Jehova i mekim na ol i inapim gut wok bilong ol!

²⁰ Pol na Barnabas i stap bek long Antiok, na nau ol inap wok strong long i go pas long mekim wok autim tok, wankain olsem ol wasman raun long nau i save mekim taim ol i visitim ol kongrigesen. (Apo. 13:2, 3) Dispela em i gutpela samting tru bilong helpim lain bilong Jehova! Olsem wanem Jehova i yusim yet na blesim dispela tupela man bilong autim tok? Bai yumi skelim dispela samting long neks sapta.