Jarwey lembanyong’a mi Ker ma jamer:

Kepar nia itie acel m’i kind jukwenda ma gicungo iwi got mir Oliv. Yesu unyuthere i weng’i. Tap kinde m’ebeciidho i polo, eyero kumae: “Wubinwang’u tego kinde ma tipo ma leng’ bibino i wiwu, man wubibedo jumulembe para i Yeruzalem, i Yudea ku Samaria ceke, man nitundo i theng ng’om ma bor m’usagu.” (Tic. 1:8) Iromo timo ang’o?

Saa moko nyo kumi copo miel pilembe ticne dwong’ akeca. Iromo penjiri kumae: ‘Nenedi ma wan wa julub ma wendwa de nok e, waromo miyo lembatuca nitundo “i theng ng’om ma bor m’usagu”?’ Nyo iromo poy i kum cimowang’ ma Yesu umiyo uthieno m’i wang’ tho pare, kinde m’eyero kumae: “Jatic dit ungo nisagu rwoth pare. Tek ginyayu ragedo i kuma, gibinyayu ragedo i kumwu bende; tek giworo lembe para, gibiworo lembe mwu bende. Ento gibitimo gin maeno ceke i kumwu pi nyinga, pilembe ging’eyo ngo Ng’atu m’uora.” (Yoh. 15:20, 21) Kinde m’ibenyamu i wec maeno, iromo kepenjiri kumae: ‘Acopo miyo lembatuca mii nenedi i wang’ jai man ragedo?’

Tin de wapenjara ku kit penji maeno. Tic mwa wa Jumulembe pa Yehova ubekwayu bende nia wamii lembatuca mii nitundo “i theng ng’om ma bor m’usagu,” ni “dhanu m’i thek ceke.” (Mat. 28:19, 20) Dong’ wacopo timo tic maeni nenedi, asagane ke nikum jai ma jular juewo pire?

Buku mi Tic mi Jukwenda ukoro kpawa ma mit mi kite ma jukwenda ku Jukristu mange mi rundi ma kwong’a N.N.Y. gipong’o ko tic migi ku kony pa Yehova. Juwodho buku maeni kara ukonyi niponjo kpawane man kara in bende inwang’ anyong’a nikum lembe ma beco ma jukoro i kpawane. Ii biwang’ lii nineno kite ma lembe urombo ko lee i kind jutic pa Mungu mi rundi ma kwong’a ku ma tin. Ibineno nia lembe m’urombone utie ngo kende kende tic ma wabetimo, ento bende kite ma wapangu ko lembe kakare kakare pi nitimo tije. M’umbe jiji, ninyamu i lembe iwi lembe m’urombone bitielo yiyoyic peri nia andha Yehova ubemedere nitelo wi thenge mi ng’om mi dilo pare.

Watie ku genogen man waberwo nia ponjo buku mi Tic mi Jukwenda udwok cwinyi udok tek nia Yehova bikonyi man nia tego mi tipo pare ma leng’ bidwoki tek. Dong’ wek etiel cwinyi kara imediri ‘nimiyo lembatuca mii iwi Ker pa Mungu’ man nikonyo jumange gikwany yojboth.​—Tic. 28:23; 1 Tim. 4:16.