Wɔ mɔ a bo Ɲanmiɛn Sielɛ’n i jasin’n:

Maan ɔ yo wɔ kɛ a ti Zezi i akoto’m be nun kun naan a o Olivie Oka’n su lɔ sa. Á nían-ɔn, Zezi w’a fite ɔ ɲrun lɛ. Kɛ ɔ́ wá kɔ́ ɲanmiɛn su’n, ɔ se kɛ: “Kɛ amun ko ɲan Ɲanmiɛn wawɛ’n, amún ɲán wunmiɛn. Ɔ maan amún kán min ndɛ Zerizalɛmun wa, nin Zide wunmuan’n nun, ɔ nin Samari lele fá jú asiɛ’n i tiwa lɔ.” (Yol. 1:8) ?Kɛ a ti i sɔ ndɛ’n, akunndan benin yɛ á bú-ɔ?

Atrɛkpa’n, ɔ́ yó ɔ kɛ junman sɔ’n tra wɔ kpɛn naan a su kwlá diman sa. A kwla se ɔ wun kɛ: ‘E nga e ti Zezi i sɔnnzɔnfuɛ’n, e juman lika fi. ?Ɔ maan é yó sɛ naan y’a kɛn i ndɛ lele y’a ju “asiɛ’n i tiwa lɔ”?’ Asa ekun’n, ɔ wla te kpɛn ndɛ kun mɔ Zezi kɛnnin i kɔnguɛ kwlaa naan b’a kun i’n su. Ɔ seli kɛ: “Kanga’n i kpa trɛmɛn i min. Sɛ be kleli min yalɛ’n, bé klé amun yalɛ wie. Sɛ be fali min ndɛ’n su’n, bé fá amun liɛ’n su wie. Sanngɛ min ti’n, bé fá ninnge sɔ’m bé yó amun, afin be siman Sran ng’ɔ sunmannin min’n.” (Zan 15:20, 21) Kɛ a bu ndɛ sɔ’n i akunndan’n, kɔlɛ’n a usa ɔ wun kɛ: ‘?Kɛ mɔ bé wá klé min yalɛ’n niɔn, ń yó sɛ naan m’an kwla kɛn i su ndɛ’n kwlaa m’an kle sran mun?’

Andɛ’n, e usa e wun sɔ wie. Afin kɛ mɔ e ti Zoova i Lalofuɛ’n, ɔ fata kɛ e bo jasin lele fa ju “asiɛ’n i tiwa lɔ,” naan “nvlenvle’m be kwlaa be nunfuɛ’m” be ti. (Mat. 28:19, 20) ?Kɛ mɔ sran’m bé wá klé e yalɛ’n niɔn, é yó sɛ naan y’a kwla di junman sɔ’n?

Sa Nga Akoto’m Be Yoli’n fluwa’n kan wafa nga Zoova ukali akoto mun nin be wiengu Klisifuɛ klikli mun naan b’a kwla bo jasin fɛ’n, i ndɛ weinwein. Fluwa nga a su kanngan nun yɛ’n, ɔ́ wá úka wɔ naan a si sa fanunfanun nga be juli Klisifuɛ sɔ’m be su’n. Kpɛkun á wá wún kɛ, kɛ Klisifuɛ sɔ’m be wunnin kɛ jasin fɛ bolɛ junman’n kɔ i ɲrun ndɛndɛ’n, be dili aklunjɔɛ dan. Kɛ á wá wún kɛ sa ng’ɔ juli Klisifuɛ sɔ’m be su’n, be nun sunman be ju Ɲanmiɛn i sufuɛ’m be su andɛ’n, ɔ nuan bó ɔ wun dan. Asa ekun’n, á wá wún kɛ junman’n nin wafa nga e siesie e wun naan y’a di junman sɔ’n, ɔ nin be liɛ’n ti kun. Sɛ a bu sa sɔ’m be su akunndan’n, á wá wún i wlɛ weiin kɛ, kɛ ɔ fɛ i laa lele andɛ’n Zoova yɛ ɔ kle i anuannzɛ’n i bue ng’ɔ o asiɛ’n su wa’n i atin-ɔn.

É srɛ́ kɛ Sa Nga Be Yoli’n fluwa’n i nun like mɔ á wá súan’n, ɔ yo maan a lafi su tankaan kpa kɛ Zoova wá úka wɔ. Yɛ ɔ́ fɛ́ i wawɛ’n súan ɔ bo naan w’a kwla jran kekle. Sɛ a fa afɔtuɛ nga be o fluwa nga nun’n be su’n, á ɲán wunmiɛn ‘kán Ɲanmiɛn Sielɛ’n i su ndɛ’n kwlaa’ klé ɔ wiengu mun naan be fa nguan atin’n su.—Yol. 28:23; 1 Tim. 4:16.