A nkañete mbamba foé bia nye’e:

Tame simesane na ô ne nlômane wua ya minlômane mi tele Nkôle Beolivier. Yésus a yené be mia. Ôsusua na a bet e yôp a jô na: “Mia ye nyoñe ngul éyoñe mfufube nsisim a ye so be mia, a mia ye bo bengaa bam e Jérusalem, e Judée ase a Samarie a mfa’a si ja dañ ôyap.” (Mame mi. 1:8) Wo wô’ôtan aya éyoñe wo wô’ô mejô mete?

Éko éziñe nlem ô tyele wo yôp éyoñe wo simesane beta ésaé a yange mia. Éko éziñe wo sili womiene na: ‘Aval avé mon angôse beyé’é nyi, a ne ngule ya kañete “mfa’a si ja dañ ôyap”?’ Éko éziñe na, wo beta simesane abendé Yésus a nga ve mia ngô’é a nga lôte si va ôsusua na a wu: “Mbo ésaé a nji dañe masa wé, nge be nga tibili ma, ba ye fe tibili mia; nge be nga tôñe mejô mam, ba ye fe tôñe mejô menan. Ve ba ye bo mia mame mete mese na be wosane mia e jôé dam, amu be nji yeme Nyu a nga lôme ma.” (Jean 15:20, 21) Wo fase mejô mete a wo yiane sili womiene na: ‘Aval avé me ne ke ôsu a kañete bôte bevok akusa bo étibila’a a mewosan?’

E den, bia fe bi tele été jia. Mbôle bi ne Bengaa be Yéhôva, bia yiane kañete “bôte ya meyoñe mese” mbamba foé akekui “mfa’a si ja dañ ôyap.” (Matt. 28:19, 20) Aval avé bi ne bo ésaé éte, e dañedañ éyoñe bôte ba wosane bia?

Kalate Mame minlôman a liti bia aval avé minlôman a bekristene bevo’o ya ntete mimbu ôsu ya É.J. be nga kui na be kañete a mvolane Yéhôva. Kalate wo lañe nyi a ye volô wo na ô yem abui mame bekristene be nga tôbane de. Wo ye fe wô’ôtane meva’a be nga wôk éyoñe be nga yen ane ésaé nkañete ja nen. Wo ye bo fe’e ne vema éyoñe wo ye yen abim éfunan é ne zañe bebo bisaé be Yéhôva ya ntete mimbu ôsu a ba ya melu ma. Wo ye yene na, éfunan éte é nji bo fo’o ve a lat a ésaé nkañete étam, ve ja fombô fe aval ésaé nkañete éte é ne nta’an. Éfunan éte ja ye volô wo na ô yemete ndi nleme jôé na, teke vaa nge beté, Yéhôva Zambe a ke ôsu a wulu ngabe ya ékôane jé é ne si va.

Bi too ndi a bia ye’elane na kalate nyi a yemete ndi nleme jôé na Yéhôva a ye volô wo, a na ngule ja so mfufube nsisime ja ye su’u wo. Ngo’o nge wo ke ôsu a ‘kañete bôte bevok ajô ya Éjôé Zambe,’ a volô be na be zu wulu zene ya ényiñ.​—Mame mi. 28:23; 1 Tim. 4:16.