Mukwa-Kwambujola Wanangana:

Achinyonga ngwe, uli umwe wa kuli apostolo waze ali hamuwika ni Yesu ha Mulundu wa Olevwe. Shimbu kanda achiya mu malilu Yesu masoloka kulutwe lienu ni kwamba ngwenyi: “Muze spiritu yisandu muyikeza hali yenu, munukatambula ndundo mba kumunukapwa yela jami mu Yerusaleme, ni mu Yundeya mweswe, ni mu Samaria, ndo ku masongo a hashi.” (Yili. 1:8) Kuchi mulivwa?

Muhasa kunyonga ngwe mulimo uze Yesu ananwichi uli ukalu chinji. Kota mulihula ngwe: ‘Yetu tuli akehe, mba kuchi mutuhasa kwambujola Wanangana wa Zambi “ndo ku masongo a hashi”?’ Hanji mwiuluka utowezo uze Yesu ahanyine muze te kanda achifwa wakwamba ngwo: “Ndungo keshi kuhiana mwata wenyi, nyi hanguhungumiona yami, ni yenu nawa kumanuhungumiona, nyi mononokena maliji jami, kumononokena nawa maliji jenu. Alioze kumakanulinga yuma yino yeswe yipi mumu ha jina liami, mumu kanyingikine Yoze wangutumine.” (Yoa. 15:20, 21) Muze munyonga ha maliji wano, kota mulihula nawa ngwe: ‘Kuchi munguhasa kwambujola Wanangana wa Zambi aku kananguhungumiona?’

Ni musono, twakulihula yihula yacho. Tuli Yela ja Yehova, kashika ni yetu tuli ni mulimo wa kwambujola sango ja Wanangana “ndo ku masongo a hashi” ni kuli “atu a ku mavungu eswe.” (Mateu 28:19, 20) Kuchi mutuhasa kulinga mulimo wacho chipwe muze anatuhunguniona?

Mukanda wa Yilinga unasolola chize apostolo ni Akwa-Kristu a ku sekulu yitangu ahashile kwambujola ni ukwaso wa Yehova. Mukanda uno unatange, muukukwasa kunyigika yuma yinji yize yalingiwile kuli Akwa-Kristu jacho, ni chize awahililile muze amwene kulitanda cha sango jipema. Mukomoka chinji muze mumona ngwe, yuma yinji yize yalingiwile kuli Akwa-Kristu a ku sekulu yitangu, ye ni yetu musono tunapalika. Mumona nawa ngwe, yuma yacho kuyalifwile wika ni chize tuli akululieka, alioze ni mutapu uze twakulingilamo mulimo wacho. Kupukuna ha yuma yacho, muchikolesa ujikijilo we hali Yehova ngwe, iye machinunga ni kusongwela chihanda cha ululikiso wenyi cha hano hashi.

Tunalemba hanga mukanda uno ukukwase kukolesa ujikijilo we hali Yehova ni ha ukwaso wa spiritu yenyi yisandu. Tunashimbwila ngwetu, chino muchikukwasa kutakama muze mununga ni kwambujola Wanangana wa Zambi ni kukwasa akwenu hanga akaalamwine.—Yili. 28:23; 1 Timo. 4:16.