Owhowho-Uvie Ọghaghae:

Dae rehọ iẹe nọ whọ rrọ usu ikọ Jesu nọ i dikihẹ Ugbehru Olivi. Jesu ọ tẹ romavia evaọ aro rai. Rekọ taure ọ tẹ nwani muvrẹ kpobọ odhiwu ọ tẹ ta nọ: “Wha ti wo ogaga nọ ẹzi ọfuafo na o te bru owhai ze no, wha ve ti se isẹri kpahe omẹ evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.” (Iruẹru 1:8) Eme who ti roro okioke yena?

Ẹsejọhọ ozọ u ti mu owhẹ nọ iruo na i bu vrẹ owhai abọ. O sae jọ nọ whọ te nọ nọ, ‘Ẹvẹ mai ilele nana nọ i tulo ho na ma te sae rọ ta usi uwoma na te “oria nọ o mai thabọ evaọ otọakpọ na”?’ Ẹsejọhọ whọ te kareghẹhọ unuovẹvẹ nọ Jesu ọ kẹ evaọ aso taure a te ti kpei evaọ okenọ ọ ta nọ: “Ọrigbo ọ rro vi olori riẹ hẹ. Otẹrọnọ a kpokpo omẹ, a ti kpokpo owhai re; otẹrọnọ a koko ẹme mẹ, a ti koko ẹme rai re. Rekọ a ti ru owhai eware nana kpobi fiki odẹ mẹ keme a riẹ Ọnọ o vi omẹ ze he.” (Jọn 15:20, 21) Ẹsejọhọ eme yena e te lẹliẹ owhẹ nọ omara nọ, ‘Nọ orọnọ a te wọso omai je kpokpo omai gaga na, ẹvẹ mẹ te sae rọ ta usi uwoma na ziezi?’

Ma be nọ omamai enọ itienana nẹnẹ re. Iruo nọ mai Isẹri Jihova ma wo nẹnẹ re họ usi uwoma na nọ ma rẹ ta ziezi rite “oria nọ o mai thabọ evaọ otọakpọ na” jẹ rọkẹ “ahwo erẹwho na kpobi.” (Mat. 28:19, 20) Kọ ẹvẹ ma sai ro ru iruo nana kpobi maero nọ a ta nọ a te wọso ilele Jesu na?

A jọ obe Iruẹru Ikọ gbiku epanọ Jihova o ro fiobọhọ kẹ ikọ na gbe Ileleikristi efa evaọ ikpe-udhusoi ọsosuọ ru iruo usi uwoma ota na. A kere obe nana nọ who bi se na re u fiobọhọ kẹ owhẹ kiẹ iku na riwi, re iku na nọ e wọhọ edrama na e jẹ daruọ owhẹ oma ziezi. Whọ te ruẹ nọ epanọ eware e jọ kẹ idibo Ọghẹnẹ evaọ oke ọsosuọ ere ọvona e rrọ kẹ omai nẹnẹ re. Whọ te ruẹ nọ iruo nọ ma bi ru gbe oghẹrẹ nọ ma bi ro ru iruo na nẹnẹ oghẹrẹ ovona. Ma riẹ nọ eware nana nọ who ti wuhrẹ na i ti ru ẹrọwọ ra ga inọ Jihova ọ gbẹ be kpọ abọ ukoko riẹ nọ o rrọ otọakpọ na nẹnẹ.

Ma bi rẹro jẹ be lẹ inọ, ajọ obe Iruẹru Ikọ nọ who ti wuhrẹ kpahe na u ru ei mu owhẹ ẹro ziezi nọ Jihova o ti fiobọhọ kẹ owhẹ jẹ rọ ogaga ẹzi ọfuafo riẹ thọ owhẹ. Fikiere ma be tuduhọ owhẹ awọ inọ gbẹ hai ‘se isẹri ziezi’ kpahe Uvie Ọghẹnẹ je fiobọhọ kẹ amọfa ruọ edhere uzuazọ na.—Iruẹru 28:23; 1 Tim. 4:16.