Ex aj yeehol chaabʼil esil:

Qakʼoxlaq naq laaʼo jun rehebʼ li apóstol ut wanko saʼ xbʼeen li tzuul Olivo. Li Jesús naxkʼut ribʼ chiqu ut naq ak xik re saʼ choxa kixye: «Teekʼul eewankil naq li santil musiqʼej tchalq saʼ eebʼeen. Ut laaʼexaq intestiiw aran Jerusalén, Judea ut Samaria, ut saʼ chixjunil li ruuchichʼochʼ» (Hech. 1:8). Chanru tqekʼa qibʼ?

Maare tooxiwaq xbʼaan li nimla kʼanjel aʼin ut tqakʼoxla: «Chanru tqakʼe chi naweʼk li chaabʼil esil “saʼ chixjunil li ruuchichʼochʼ” wi moko kʼiho ta?». Maare tqajultika li kixye li Jesús naq jun qʼoqyink chik ma nakamk: «Moko qʼaxal nim ta li moos chiru laj echal re. Wi xikʼ xineʼril laaʼin, xikʼ texʼileʼq ajwiʼ laaʼex. Wi aʼanebʼ xeʼxpaabʼ li waatin, teʼxpaabʼ ajwiʼ leeraatin. Xbʼaan linkʼabʼaʼ teʼxbʼaanu eere chixjunil aʼin xbʼaan naq inkʼaʼ nekeʼxnaw ru li kitaqlank chaq we» (Juan 15:20, 21). Naq naqakʼoxla rix ebʼ li aatin aʼin, maare tqaye: «Chanru tqaye li chaabʼil esil, wi ebʼ li xikʼ nekeʼilok qe tooʼeʼxrahobʼtesi?».

Anaqwan qakʼehaq qachʼool chirixebʼ li qakutan. Joʼ aj Testiiw naqakʼul ajwiʼ aʼin. Laaʼo ajwiʼ naqakʼe chi naweʼk li chaabʼil esil «saʼ chixjunil li ruuchichʼochʼ» ut rehebʼ «li qas qiitzʼin re chixjunilebʼ li tenamit» (Mat. 28:19, 20). Abʼan wi li Santil Hu kixye naq tooʼeʼxrahobʼtesi, chanru tqakʼe chi naweʼk li chaabʼil esil?

Li hu Hechos naxkʼut chiqu chanru ebʼ li apóstol ut ebʼ li xbʼeen aj paabʼanel xeʼxbʼaanu li kʼanjel rikʼin li xtenqʼ li Jehobʼa. Li hu aʼin kʼubʼanbʼil re naq tooxtenqʼa xtzolbʼal ut xkʼebʼal qibʼ saʼ xnaʼajebʼ li qas qiitzʼin li naʼaatinak wiʼ. Sachso qachʼool tookanaaq naq tqakʼe reetal chanru naxchap ribʼ li xeʼxbʼaanu li xbʼeen aj paabʼanel rikʼin li naqabʼaanu laaʼo. Tqil ajwiʼ naq moko kaʼaj tawiʼ naʼaatinak chirix li kʼanjel li naqabʼaanu, naxchap bʼan ajwiʼ ribʼ rikʼin chanru kʼubʼkʼu li qakʼanjel. Xtzʼilbʼal rix li kikʼulmank, tixkawresi li qapaabʼal chirix chanru li Jehobʼa yook xbʼeresinkil li xmolam li wank saʼ ruuchichʼochʼ.

Nokootijok cheerix ut naqaj naq xtzolbʼal li hu Hechos, tixkawresi leepaabʼal chirix li Jehobʼa ut naq aʼan ttenqʼanq eere rikʼin li xsantil musiqʼej. Naqoybʼeni ajwiʼ naq tixwaklesi eechʼool re naq teekʼe «chi naweʼk chi tzʼaqal re ru li Xʼawabʼejilal li Yos» ut xsikʼbʼalebʼ li kristiʼaan re naq teʼxnaw ru li Jehobʼa ut teʼxtaw li junelik yuʼam (Hech. 28:23; 1 Tim. 4:16).