Lawosɛ Wanaa Dimiaa Yooŋgu Kɛndiaa:

Yiyaŋndɔ maa kiilanɔɔ opilɛ ŋ cho ni ma wa isisi o Pembii Ɔlifiive choo. Mi Chiisu fula num o hɔl. Nduyɛ mi i yɔŋnuŋ maa helɔɔ o cho choo choo ni, okoŋ mbo dimi aa: “La cho kpaayaa sɔla te nyina diandaa tol nya choo pɛ. Nduyɛ la cho seileŋ timbi a ya okɔɔ o Chulusalɛm niŋ, Chudiaa a Sameeliaa, a ba o ba fee o chieeŋndo choo.” (Walta. 1:​8) Yɛɛ ŋ wa yɛ tosa?

Naapum a wa kandɔɔ buulaŋndo a wali nda ke numndo okɔɔ. Kɛlɛŋgaa a wa yiyaŋ aa: ‘Vɛɛ naa buɛiyaa pɔmbuaa haa tiu yɛ niŋ ba miŋ timbi seileŋ “ba o ba fee o chieeŋndo choo”?’ Naapum a wa loonuŋ a nyɛ o dimi o nyumma ndɔ ma mɛɛlaŋ choo tuupa mbo sɔla piɔmndo wo aa: “Buɛiyo cho o bɛndu mbo hiau masanɔ ndɔɔ le. Te a tusi ya pɛ nyɛpalaa choo, mɛɛ nya bɛɛ a cho nya nyɛpalaa tusi choo. Te a bii pɛ pɛɛkula nilaŋ, mɛɛ a cho pɛɛkula nyalaŋ biyɔɔ. Sɔɔŋ muŋ kpou, a cho nya muŋ tosal le diola nilaŋ, kanifuule a sina wana vem ya wo le.” (Chɔŋ 15:​20, 21) Yiyaŋndo o diomndaŋ ndaŋ choo wa tosa mi num oo nyunaŋ aa: ‘Vɛɛ ya tiu yɛ niŋ ba mi timbi seileŋ te tɔɔndaŋndo a nyɛpalaa wa ya pɛ choo?’

Hau, mi naa bɛɛ nyunaŋ nyunala waa nuaa. Naa Seiyaa Chɛhowaa bɛɛ nɔ wallo le “ŋwaŋnda chiee” yooŋgu kɛndɔɔ dimullo “ba o ba fee o chieeŋndo choo.” (Maa. 28:​19, 20) Vɛɛ naŋ tiu yɛ ba miŋ tosa wallo hoo taama taama o nyɛkindilaa bɛŋgu?

Yau Walta Kiilaa nɔ konala sɔvɛlaŋ a mɛɛ Chɛhowa ndoo mala kiilaa vɛlɛ a chaaŋaa ndaa Kilisiɔŋnda, o wɔsiŋ kɛmɛ tasoŋ niŋ o faŋaŋ Chiisu wo kɔɔli, le wali ndaa tosaa yɛ. Yau ŋ cho hoo diomnda veeloo leniŋndo toosiaŋ le num malaa ma mɛɛndiaŋ konalaŋ ndaŋ, nduyɛ ma dɔɔnuŋ nyaale a sɔɔŋ cho leniŋndoŋ okɔɔ. A cho wa a kɔl kɛndɛ le saalɔŋndo sɔɔŋ bɔɔbɔɔ tosa mi velaŋndo wa buɛiyaa Mɛlɛkaa o wɔsiŋ kɛmɛ tasoŋ niŋnda tɛɛŋ, a wanaa nduaa hau wo. O cho ko a wali naŋ cho tosaa wo okɔɔ le naŋ velaŋ te, kɛ a mɛɛ naŋ cho bɛɛ a kɔɔnaa le ndu tosaa yɛ. Yiyaŋndo o hei choo cho laalaŋ numndo kindi maa, Chɛhowa cho hiouwɔɔ lachi a kumbuii kɔɔna ndɔ cho o lɛŋndeŋ choo wo nɛi chɔmaa kioo.

Piɛile naaleŋ le cho ni maa, te a veelu pɛ diomndaŋ o yau Walta Kiilaa niŋ, hei cho laalaŋ numndo kindi maa Chɛhowa cho num mala, nduyɛ kpaaya nyina ndɔ diandaa bɛɛ cho num manda. Ŋ cho num dɛɛniaa le ma hiou lachi a waŋnda “tɛɛsiallo [nyɛkɛndɛi] a Masale Mɛlɛkaleŋ okɔɔ”, vɛlɛ a nda malaa ma kuɛ o nɛi piŋi nda wo choo.—Walta. 28:​23; 1 Timo. 4:​16.