ပှၤပၢဆှၢတၢ်ကမံးတံာ် အလံာ်ပရၢ
ဆူပှၤစံၣ်တဲၤတဲလီၤ ဘီမုၢ်တၢ်သးခုကစီၣ်တဖၣ်အအိၣ်–
ထံၣ်တမှံကွၢ်လၢ နကဲတၢ်မၢဖိတဂၤ ဒီးနၤဒီးတၢ်မၢဖိအဂၤတဖၣ် ဆၢထၢၣ်လၢ ကစၢၢ်သ့ၣ်စၤယံးလိၤ. ဒီးဖဲန့ၣ်ယ့ၣ်ၡူးဟဲဖျါထီၣ်လၢ သုမဲာ်ညါ. ဖဲအဝဲဘူးကက့ၤထီၣ်လၢ မူခိၣ်အခါ အတဲဝဲလၢ “ဖဲသးစီဆှံဟဲလီၤလၢ သုလိၤအခါ သုကဒိးန့ၢ်ဘၣ် တၢ်စိတၢ်ကမီၤ ဒီးသုကကဲထီၣ် ယပှၤအုၣ်အသးတဖၣ်လၢ ဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်လီၤ.” (မၤတၢ် ၁:၈) နမ့ၢ်နၢ်ဟူဘၣ် ယ့ၣ်ၡူးတဲဝဲဒ်န့ၣ်န့ၣ် နသးကမၤသးဒ်လဲၣ်.
တၢ်လၢ ယ့ၣ်ၡူးမၢပမၤတခါအံၤန့ၣ် ဘၣ်သ့ၣ်သ့ၣ် နကဆိမိၣ်ဘၣ်လၢ အကဲထီၣ်သး တသ့ဘၣ်. ဒီးနကဆိမိၣ်ဘၣ်လၢ ပအိၣ်စှၤကိာ်ဂၤလီၤအဃိ ပစံၣ်တဲၤတဲလီၤတၢ် “ပၢၢ်တုၤလၢ ဟီၣ်ခိၣ်ဒီဘ့ၣ်” ကသ့ဒ်လဲၣ်. ဒီးဘၣ်သ့ၣ်သ့ၣ် နကဆိမိၣ်ဘၣ် ယ့ၣ်ၡူးအတၢ်ကတိၤလၢ အတဲဝဲဖဲ အကသံအခါ. ဖဲန့ၣ် အဝဲတဲဝဲလၢ “ကုၢ်န့ၣ်တဒိၣ်န့ၢ် အကစၢ်ဘၣ်. အဃိ အဝဲသ့ၣ် မ့ၢ်မၤအၢမၤနးယၤန့ၣ် အဝဲသ့ၣ် ကမၤအၢမၤနးသု စ့ၢ်ကီးလီၤ. ဒီးအဝဲသ့ၣ် မ့ၢ်ဒိကနၣ် ယကလုၢ်န့ၣ် အဝဲသ့ၣ် ကဒိကနၣ် သုကလုၢ်စ့ၢ်ကီးလီၤ. ဘၣ်ဆၣ် လၢယမံၤအဃိန့ၣ် အဝဲသ့ၣ် ကမၤသုလၢ တၢ်သ့ၣ်တဖၣ်အံၤခဲလၢာ်, မ့ၢ်လၢအဝဲသ့ၣ် တသ့ၣ်ညါ ပှၤလၢ အဆှၢလီၤယၤတဂၤဘၣ် အဃိလီၤ.” (ယိၤ ၁၅:၂၀, ၂၁) ဒီးဖဲနဆိမိၣ်ထီၣ် ယ့ၣ်ၡူး အတၢ်ကတိၤတဖၣ်အံၤအခါ ဘၣ်သ့ၣ်သ့ၣ် နကသံကွၢ်လီၤနသးလၢ ‘ယကထံၣ်ဘၣ် တၢ်ထီဒုၣ်ထီဒါ ဒီးတၢ်မၤအၢမၤနးအဃိ ယစံၣ်တဲၤတဲလီၤတၢ် လီၤတံၢ်လီၤဆဲး ကသ့ဒ်လဲၣ်.’
ဆၢကတီၢ်ခဲအံၤစ့ၢ်ကီး ပကဆိမိၣ်ဘၣ်ဒ်န့ၣ်. ပကဲ ယဟိဝၤပှၤအုၣ်အသးအဃိ ပကဘၣ်စံၣ်တဲၤတဲလီၤတၢ် “ပၢၢ်တုၤလၢ ဟီၣ်ခိၣ်ဒီဘ့ၣ်” လၢ “ကယဲၢ်ပှၤကလုာ်တဖၣ်” အအိၣ်. (မး ၂၈:၁၉, ၂၀) ဘၣ်ဆၣ် ပှၤကထီဒါပှၤ ဒီးမၤအၢမၤနးပှၤအဃိ ပစံၣ်တဲၤတဲလီၤတၢ် ကသ့ဒ်လဲၣ်.
လံာ်မၤတၢ် ပာ်ဖျါထီၣ်ဝဲ ယဟိဝၤယွၤ မၤစၢၤဝဲတၢ်မၢဖိတဖၣ် ဒီးခရံာ်ဖိလၢ တၢ်မၢဖိအစိၤတဖၣ် ဒ်သိးကစံၣ်တဲၤတဲလီၤ တၢ်သးခုကစီၣ်အဂီၢ်. ဒီးလံာ်တဘ့ၣ်အံၤ ကပာ်ဖျါထီၣ်န့ၢ်ပှၤ ခရံာ်ဖိလၢညါတဖၣ်န့ၣ် ထံၣ်ဘၣ်ဒီး တၢ်အိၣ်သးမနုၤတဖၣ်လဲၣ်. ဒီးပကသ့ၣ်ညါဘၣ်လၢ အဝဲသ့ၣ် ထံၣ်ဘၣ်ဝဲလၢ တၢ်စံၣ်တဲၤတဲလီၤတၢ်မၤ လဲၤထီၣ်လဲၤထီချ့မးအဃိ အဝဲသ့ၣ် သးခုဒိၣ်မး. ဒီးပကထံၣ်ဘၣ် ခရံာ်ဖိလၢ တၢ်မၢဖိအစိၤတဖၣ် ဒီးခရံာ်ဖိလၢပစိၤတဖၣ် အတၢ်လီၤဂာ်လိာ်အသး အိၣ်အါမး. တၢ်လၢပမၤတဖၣ်န့ၣ် လီၤဂာ်လိာ်သးဒီးအဝဲသ့ၣ် တကးဒံးဘၣ် ပမၤအီၤလၢ ကျဲဒ်လဲၣ်န့ၣ် လီၤဂာ်လိာ်သးဒီးအဝဲသ့ၣ်စ့ၢ်ကီး. ပမ့ၢ်ဆိမိၣ်ထံ တၢ်ဂ့ၢ်တဖၣ်အံၤန့ၣ် ကမၤစၢၤပှၤဒ်သိး ပတၢ်နာ်လၢ ကစၢ်ယွၤအဖီခိၣ် ကဟဲဒိၣ်ထီၣ်. ဒီးပကနာ်လၢ ယဟိဝၤယွၤန့ၣ် အဆဲးဟံးစုနဲၣ်ကျဲ အတၢ်ကရၢကရိ လၢဟီၣ်ခိၣ်ချၢ.
ဖဲသုမၤလိသကိး တၢ်ဂ့ၢ်လၢ လံာ်မၤတၢ်အပူၤအခါ ပဃ့ထုကဖၣ်လၢသုဂီၢ် ဒီးပမုၢ်လၢ်လၢ သုကနာ်သပှၢ်တၢၢ်လၢယဟိဝၤယွၤ ကမၤစၢၤသု ဒီးအကဟ့ၣ်လီၤသု အသးစီဆှံ ဒ်သိးသုတူၢ်တၢ် ကန့ၢ်အဂီၢ်. နမ့ၢ်မၤထွဲ တၢ်ဂ့ၢ်လၢ နမၤလိဘၣ်တဖၣ်န့ၣ် နကအိၣ်ဒီးတၢ်ဂံၢ်တၢ်ဘါလၢ နကဆဲးစံၣ်တဲၤတဲလီၤ ယွၤအဘီအမုၢ်အဂ့ၢ် လီၤတံၢ်လီၤဆဲး. ဒီးနကအိၣ်ဒီး တၢ်ဂံၢ်တၢ်ဘါလၢ နကဆဲးမၤစၢၤပှၤဂၤ ဒ်သိး အကန့ၢ်ဘၣ် တၢ်အုၣ်က့ၤခီၣ်က့ၤအဂီၢ်.—မၤတၢ် ၂၈:၂၃; ၁ တံၤ ၄:၁၆.
သုဒီပုၢ်ဝဲၢ်,
ယဟိဝၤပှၤအုၣ်အသးတဖၣ်အပှၤပၢဆှၢတၢ်ကမံးတံာ်
