Fuanyikijabi ne:

Udi umue wa ku bapostolo muimane pa mukuna wa Olive. Yezu upatuka kumpala kuebe. Dîba dia kubanda mu diulu, udi wamba ne: “Nenupete bukole panupuekela nyuma muimpe, ne nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8) Neumvue bishi?

Pamuapa neumvue buôwa bua bunene bua mudimu. Udi mua kudikonka ne: ‘Mmunyi mutudi tuetu bayidi bakese nunku mua kufila bumanyishi too ne ku “miaba ya kule menemene ya pa buloba”?’ Udi mua kuvuluka didimuija divua Yezu mufile butuku bua muladilu wa lufu luende dia ne: “Mupika ki mmunene kupita mfumuende to. Bikalabu bankengeshe, nebanukengeshe penu; bikalabu batumikile dîyi dianyi, nebatumikile kabidi dienu. Kadi nebanuenzele malu onso aa bua dîna dianyi, bualu ki mbamanye Yeye uvua muntume.” (Yone 15:20, 21) Paudi wela meji a mêyi au, udi mua kudiebeja ne: ‘Mmunyi mundi mua kufila bumanyishi buonso menemene bobu banduisha ne bankengesha nanku?’

Lelu, tutu tudiela nkonko ya muomumue. Bu mutudi Bantemu ba Yehowa, mudimu wetu udi utulomba pawu bua tufile bumanyishi buonso menemene mu “miaba ya kule menemene ya pa buloba,” kudi “bantu ba mu bisamba bionso.” (Mat. 28:19, 20) Mmunyi mudi mudimu eu mua kukumbana, nangananga mudiku buluishi bukavuabu bambe?

Bienzedi bia bapostolo bidi bilonda malu mimpe a muvua Yehowa muambuluishe bapostolo ne bena Kristo nabu ba mu bidimu lukama bia kumpala P.Y. bua kukumbaja mudimu wabu. Mukanda uudi wenda ubala eu mmuenza bua kukuambuluisha bua ulonge malu au, ne umone pebe muvua mianda ya dikema ayi mienzeke. Nebikukemeshe bikole bua kumona mudi malu a bungi a batendeledi ba Nzambi ba mu bidimu lukama bia kumpala apetangana ne a batendeledi bende ba lelu. Neumone ne: malu au adi atangila mudimu utudi tuenza ne mushindu utudi balongolola bua kuwenza. Kakuyi mpata, wewe muelangane meji a malu au neukoleshe dishindika diebe dia ne: Yehowa Nzambi udi utungunuka ne kulombola tshitupa tshia bulongolodi buende tshidi pa buloba.

Tudi tusambila batekemene ne: dilonga dia mukanda wa Bienzedi nedikoleshe dishindika diebe dia ne: Yehowa neakuambuluishe, ne neakukuatshishe ne nyuma wende muimpe wa bukole. Dilonga adi dikukankamijaku bua kutungunuka ne “kufila bumanyishi buonso menemene” bua Bukalenge bua Nzambi, ne kuambuluisha bakuabu bua kubuela mu njila wa lupandu!​​—Bien. 28:23; 1 Tim. 4:16.