Kuli Enu Vaka-Kuvilika Wangana:

Achishinganyekenu muli hamukana wavaposetolo vaze vanemana haPili yaMilive, kaha Yesu mwasoloka kuli yenu. Kahomu ali kwakamwihi nakuya mwilu, mwahanjika kuli yenu ngwenyi: “Namukatambula ngolo omu shipilitu yajila nayikeza hali enu, kaha namukapwanga muvinjiho jami muYelusalema, namuYuleya mwosena, namuSamaliya, nakuvihela vyakwakusuku vyahamavu.” (Vili. 1:8) Uno namulinga ngachilihi?

Pamo namulizakamina chikuma hakwivwa mulimo uze namihane. Pamo munahase kulihulisa ngwenu, ‘Uno natuhasa ngachilihi kwambulula unjiho “nakuvihela vyakwakusuku vyahamavu” okunyi tuli kaha kalizavu katumbaji kakandende?’ Tunafwelela namwanuka mazu ahanjikile Yesu haufuku wamakumishilo shimbu kanda afwenga. Ambile ngwenyi: “Ndungo kahambakana kaka yenyiko. Kachi nge vananguyanjisa ami, kaha navakamiyanjisa nayenu nawa. Kachi nge vanalame mazu ami, kaha navakalama mazu enu nawa. Oloze navakamilinga vyuma vyosenevi mwomwo yalijina lyami, mwomwo kavatachikiza Uze angutumineko.” (Yowa. 15:20, 21) Nge namushinganyeka hamazu kana munahase kulihulisa ngwenu, ‘Uno ngunahase ngachilihi kwambulula kanawa unjiho kachi nge vanangufumbukila nakunguyanjisa?’

Makumbi ano, tuvosena tweji kulihulisanga vihula vyovimwe. Mulimo vatulweza kuzata etu Vinjiho jaYehova naukiko wapwa wakwambulula kanawa unjiho “nakuvihela vyakwakusuku vyahamavu,” kaha nawa ‘kuvatu vakumafuchi osena.’ (Mateu 28:19, 20) Uno mulimo kana tunahase kuutesamo ngachilihi chikumanyi nge navatufumbukila?

Mukanda waVilinga vyaVaposetolo watulweza mujimbu wakusolola omu vaposetolo navaka-Kulishitu vamulikulukaji lyamyaka lyakulivanga C.E. vahashile kutesamo mulimo wavo hakuvakafwa kuli Yehova. Ou mukanda muli nakutanga vanausoneka mangana umikafwe mukekese mujimbu kana, navyuma vyamwaza vize vyasolokele. Namwivwa kuwaha hakutachikiza omwo vyuma vize vyasolokele kuli vangamba jaKalunga mulikulukaji lyamyaka lyakulivanga, vyalifwana navize vili nakusoloka kuli vangamba jenyi makumbi ano. Vyuma kana shina mulimo tweji kuzatanga nomwo tweji kuuzatanga mukulonga. Kushinganyeka havyuma kana nachimikafwa mutachikize ngwenu Yehova Kalunga ali nakutwalaho lika kutwaminyina chihanda chaliuka lyenyi chahano hamavu.

Tunafwelela ngwetu kukekesa mukanda waVilinga nachimikafwa mufwelele chikupu ngwenu, Yehova mwamikafwa kaha nawa shipilitu yenyi yajila nayimijikijisa. Shikaho, twalenuho lika ‘kwambulula kanawa unjiho’ waWangana waKalunga nakukafwa vakwenu vatwaleho kutambuka mujila yakuya kukuyoya.—Vili. 28:23; Chimo. 1, 4:16.