Kudi Akakushimwina aWanta:

Difwikijenu mudi kapostolu nawa munemani haMpidi yaNyiolivi. Yesu namwekani kudi enu. Hampinji yinakukeña kuyayi mwiwulu, nahoshi nindi: “Mwakatambula ñovu neyi spiritu yajila yinenzi hadi enu, nawa mwakekala ayinsahu jami muYerusalema, muYudeya nimuSamariya mwejima nikwakumina iseki dejima.” (Yilw. 1:8) Mukwiladi?

Hadaha mukwakamena mudimu weneni wunayinkiyi. Mukutachika kutoñojoka nenu, ‘Indi etu, atumbanji antesha hohu, tunateli kushimuna ñahi wunsahu “kwakumina iseki dejima”?’ Hekwawu mukwanuka kusoñamisha kwasoñamishiliyi Yesu hawufuku wakwila henohu kanda afwi nindi: “Anukenu mazu inayilejeli nami: Nduñu habadika nkaaka yindiku. Neyi anankabishi ami, akayikabisha ninenu nawa; neyi anahembi mazu ami, akahemba nimazu enu nawa. Ilaña enu akayikoña yuma yejimiyi hamuloña wejina dami, muloña hiyamwiluka Owu wantemesheliku.” (Yow. 15:20, 21) Chimwatoñojoka hanawa mazu, hadaha mukudihula nenu, ‘Nateli kushimuna ñahi chikupu wunsahu neyi inakumona ikañesha nimakabisha amuchidiwu?’

Ninetu makonu twadihulaña malwihu wowamu. Mudimu wutwekala nawu ninetu aYinsahu jaYehova wekala wakushimuna chikupu wunsahu “kwakumina iseki dejima,” kudi “antu akunyuza yejima.” (Mat. 28:19, 20) Iwu mudimu tunateli kuwumanisha ñahi, sweje-e neyi tutoñojoka hekañesha dashimwineñahu dehi?

Yilwilu yawapostolu yatulejaña nsañu yawapostolu niakwawu akaKristu amuyaaka nkulakaji yakusambila C.E. chatwesheliwu kuzata mudimu wayinkeliwu nawukwashu waYehova. Iwu mukanda wumunakutaña anawusoneki kulonda wuyikwashi kushinshika haniyi nsañu nikutiya kuwaha hayuma yamwekeni yasonekawu muYilwilu. Mukutiya kuwaha hakumona nsañu yayivulu chiyinadifwani hakachi kawambuña aNzambi amuyaaka nkulakaji yakusambila niamakonu. Mukwiluka nenu iyi nsañu bayi neyi yadifwana hohu kumudimu wutwazatañaku, ilaña nichitwadiloñeshaña kuzata iwu mudimu. Neyi tushinshika haniku kudifwana chikutukwasha kumukuhwelela Yehova Nzambi netu natwalekihu kulombola kuloñesha kwindi kwahamaseki.

Tunakuhweleli nawa tunakulomba netu chimukutañaña mukanda waYilwilu wukuyikwasha kwiluka nenu Yehova wukuyikwasha nawa spiritu yindi yajila yikuyinka ñovu. Dichi tunakuyikolesha netu twalekenuhu “kushimuna chikupu wunsahu” haWanta waNzambi nikukwasha antu kulonda ekali munjila yawamwinu.—Yilw. 28:23; 1 Tim. 4:16.