Twa, Proklamater Rwayom Bondie Ki Nou Bien Kontan:

Mazine ki to enn parmi bann zapot. To pe debout lor Montagn Pie Zoliv ek Zezi aparet devan twa. Zis avan ki li mont dan lesiel, li dir: “Zot pou gagn pwisans kan lespri sin pou desann lor zot, ek zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Kouma to pou reazir?

Kitfwa to pe santi enn presion lor twa kan to mazinn sa bel travay ki ena pou fer la. Ek lerla to demann twa: ‘Kouma enn tigit disip koumsa pou kapav rann temwaniaz “ziska dan bann landrwa pli lwin lor later”?’ Anplis, kitfwa to rapel seki Zezi ti dir lanwit avan so lamor: “Enn esklav pa pli gran ki so met. Si bann-la finn persekit mwa, bann-la pou persekit zot osi; si bann-la finn obeir mo parol, bann-la pou obeir zot parol osi. Me bann-la pou fer tou sa bann kitsoz-la kont zot akoz mo nom, parski bann-la pa konn sa Kikenn ki’nn avoy mwa la.” (Zan 15:20, 21) Lerla, kitfwa kan to pe reflesi lor sa bann parol-la, to pe demann twa: ‘Kouma mo kapav rann temwaniaz afon malgre persekision?’

Azordi, nou osi nou poz nou sa bann mem kestion la. Antan-ki bann Temwin Zeova, nou bizin rann temwaniaz afon “ziska dan bann landrwa pli lwin lor later” ek ar “bann dimounn dan tou nasion.” (Mat. 28:19, 20) Kouma nou pou reisi fer sa travay-la, sirtou ki nou kone ki nou pou gagn persekision?

Liv Zistwar Bann Zapot rakont avek lantouziasm kouma Zeova finn ed bann zapot ek bann Kretien sa lepok-la pou prese. Sa liv ki dan to lame la, pou ed twa pou examinn seki ena dan liv Zistwar Bann Zapot ek pou viv bann levennman extraordiner ki li rakonte. To pou trouve ki ena boukou kitsoz ki parey, ant bann serviter Bondie dan premie siek ek bann serviter Bondie azordi. Sa pa konsern zis travay ki nou fer, me osi fason ki nou organiz sa travay-la. Kan to pou reflesi lor seki ena dan sa liv Labib la, to pou ena plis konfians ki Zeova pe kontign diriz parti so lorganizasion ki lor later.

Nou espere ek nou priye ki kan to pou examinn liv Zistwar Bann Zapot, sa pou donn twa plis konfians ki Zeova pou ed twa ek pou servi so lespri sin pou donn twa lafors pou andire. Nou espere ki seki to pou aprann pou ankouraz twa pou kontign “rann temwaniaz afon” lor Rwayom Bondie, ek ed lezot pou vinn lor sime ki amenn ver lavi.​—Zist. 28:23; 1 Tim. 4:16.