Kalata Kuli ya Kasimikila ya Wene:

Elenganyini ukuti muli pamwi na atumwa atiimilila pa Mwamba wa Miolivi. Lyene Yesu wiza pano muli. Lino kwasyala panono ukuti aye ukwi yulu, wamunena mwensi wati: “Mulapokelela maka lino umupasi wa muzilo uliza pali mwemwe, nupya mulaya inte zyane umu Yelusalemu, mu Yudeya monsi nu mu Samaliya alino nu kufika kuno insi yapela.” (Mili. 1:8) Nga mwacisile uli?

Limwi nga mwelenginye ukuti umulimo wakulisya. Limwi nga mwayuzizye ukuti, ‘Sweswe yanono sile, uzye tungakwanisya uli ukusimikila ilyasi lisuma “ukufika kuno insi yapela”?’ Limwi nga mwiwisye amazwi akucelula yano Yesu walanzile usiku ala atatala wafwa lino watiile: “Umuomvi ataacila umusambazi wakwe. Ndi cakuti yancuzizye, namwe kwene yalamucuzya; ndi cakuti yuvwile mazwi yane, yaluvwa na mazwi inu kwene. Lelo yalamucitila ivintu vii vyonsi pa mulandu wi zina lyane, pano yatamanya uwantumile.” (Yoa. 15:20, 21) Ukwelenganya pa mazwi yaa nga kwalenzile muyuzye mweineco muti, ‘Uzye ningakwanisya uli ukusimikila sana ilyasi lisuma na lino yakunkaanya nu kuncuzya?’

Na ndakai kwene, tungayuzya mauzyo ali yamwi. Umulimo uno twakwata swe Ya Nte Yakwe Yeova u wa kusimikila “ukufika kuno insi yapela” nu ku “yantu amu nko zyonsi.” (Mate. 28:19, 20) Uzye tungaomba uli umulimo uu sana sana lino tukucuziwa wakwe vino Yesu wasowiile?

Ibuku lya Milimo likalondolola vino atumwa na aina Klistu aakutandikilako yaomvile ningo umulimo uno yapeezilwe pa mulandu wakuti Yeova wayazwanga. Ibuku lii lino mukubelenga lyapangwa pakuti limwazwe ukumanya ningo malyasi aaya umwi buku lya Milimo alino na vino yacitikanga umu kukonkana. Mulalola ukuti ivintu vimwi ivyacitikilanga aomvi yamwi yakwe Leza aku cisila vyakolana ni vikacitikila aomvi yakwe Leza ayako ndakai. Mutalalola sile vino vyakolana umu mulimo uno tukaomba, lelo mulalola na vino vyakolana muli vino tukatungululwa lino tukuomba umulimo wa kusimikila. Ukwaula nu kutwisika, ukusambilila pali vino ivintu ivyacitikanga umu manda ya ina Klistu aakutandikilako vyakolana ni vikacitika umu manda itu, kulamwazwa ukukomya utailo winu uwakuti Yeova Leza acili akatungulula iuvi lyakwe ilya pano nsi.

Itutaila ukuti ukusambilila ivyaya umwi buku lya Milimo kulamwazwa ukusininkizya ukuti Yeova alatwalilila ukumwazwa nu kuti umupasi wakwe uwa muzilo ulatwalilila kumukomya. Nupya tukupepa ukuti mukakomeleziwe ukutwalilila ukulasimikila sana pa Wene wakwe Leza nu kwazwa yauze ukuya umu nzila ya ku umi.—Mili. 28:23; 1 Tim. 4:16.