Ndóʼó na̱ nátúʼun xa̱ʼa̱ Reino Ndióxi̱:

Ná ndakanixi̱níyó ña̱ kúúyó sava na̱ apóstol ta íyoyó chí yuku̱ ña̱ Olivo. Ta sa̱kán ki̱ta ta̱ Jesús nu̱úyó, soo tá xa̱a̱ ku̱nu̱mí ndaara chí ndiví káʼa̱nra ña̱yóʼo xíʼinyó: “Ndakiʼinndó ndee̱ tá ná kixaa̱ espíritu santo sa̱tándó. Ta natúʼunndó xa̱ʼíi̱ chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú” (Hech. 1:8). ¿Ndáaña keʼéyó?

Sana yi̱ʼvíyó ña̱ keʼéyó chiñu káʼnu yóʼo ta kivi nda̱ka̱tu̱ʼunyó miíyó: “Soo loʼoníva kúúyó, ¿á ndixaví kuchiñuyó natúʼunyó xa̱ʼa̱ Ndióxi̱ ‘iníísaá nu̱ú ñuʼú’?”. Sana ndakaʼányó xa̱ʼa̱ ña̱ ni̱ka̱ʼa̱n ta̱ Jesús tá ñuú tá kúma̱níka kuvira: “Na̱ kúú esclavo va̱ása káʼnukana nu̱ú na̱ káchíñuna nu̱ú. Chi tá na̱kán i̱xandi̱va̱ʼana xíʼi̱n xa̱ʼa̱ ña̱ sáa̱-inina xínina yi̱ʼi̱, saátu keʼéna xíʼin ndóʼó; soo tá na̱kán xi̱niso̱ʼona ña̱ ni̱ka̱ʼi̱n saátu kuniso̱ʼona ña̱ káʼa̱n ndóʼó. Xa̱ʼa̱ ña̱ kándíxandó yi̱ʼi̱ keʼéna ndiʼi ña̱ʼa yóʼo xíʼinndó, chi kǒo xíni̱na ta̱ chi̱ndaʼá yi̱ʼi̱” (Juan 15:20, 21). Xíʼin tu̱ʼun ña̱ ni̱ka̱ʼa̱n ta̱ Jesús yóʼo kivi ndakanixi̱níyó: “¿Ndáa ki̱ʼva natúʼunyó xíʼin na̱ yiví xa̱ʼa̱ Ndióxi̱ tá koo na̱ sa̱a̱-ini kuni miíyó?”.

Vitin ná ka̱ʼa̱nyó xa̱ʼa̱ tiempo ña̱ ndóoyó. Nda̱a̱ táki̱ʼva ndo̱ʼo na̱ discípulo ta̱ Jesús saátu ndóʼo miíyó na̱ testigo Jehová tiempo vitin. Ta saátu miíyó xíniñúʼu natúʼunnyó xa̱ʼa̱ Ndióxi̱ “nda̱a̱ iníísaá nu̱ú ñuʼú” xíʼin na̱ yiví na̱ ndóo “iníísaá ñuyǐví” (Mat. 28:19, 20). Soo, ¿ndáa ki̱ʼva saxínuyó chiñu yóʼo tá káʼa̱n ña̱ Biblia ña̱ kundi̱va̱ʼana xíʼinyó?

Libro ña̱ Hechos káʼa̱nña xíʼinyó xa̱ʼa̱ na̱ apóstol xíʼin xa̱ʼa̱ inkaka na̱ cristiano na̱ ni̱xi̱yo tá siglo nu̱ú, ndáa ki̱ʼva chi̱ndeétáʼan Jehová xíʼinna ña̱ va̱ʼa sa̱xínuna chiñu yóʼo. Libro yóʼo na̱kuva̱ʼaña ña̱ chindeétáʼanña xíʼinyó ña̱ sakúaʼayó xa̱ʼa̱ tutu ña̱ Hechos ta saátu ña̱ kunda̱a̱-iniyó xa̱ʼa̱ ña̱ ku̱u tiempo saá. Ndakanda̱ní-iniyó tá ná kuniyó ña̱ kítáʼan ki̱ʼva ña̱ ni̱xi̱yo na̱ cristiano na̱ xi̱ndoo tá siglo nu̱ú xíʼin ki̱ʼva ña̱ ndóoyó tiempo vitin. Ta saátu kuniyó ña̱ inkáchiní kítáʼan ki̱ʼva ña̱ kéʼéyó chiñu xíʼin ki̱ʼva ña̱ xi̱keʼé na̱ xi̱ndoo tiempo xi̱naʼáña. Tá ná sakúaʼayó ña̱ inkáchiní íyo chiñu ña̱ kéʼéyó ndundakúka ña̱ kándíxayó Jehová chi ta̱yóʼo kúú ta̱ níʼi yichi̱ nu̱ú na̱ ñuura tiempo vitin.

Káʼa̱nníndi̱ xa̱ʼa̱ndó xíʼin Jehová, ña̱ tá ná kaʼvindó tutu ña̱ Hechos ná chindeétáʼanña xíʼinndó ña̱ xa̱a̱ndó kandíxaníkandóra ta saátu ña̱ kuniñúʼura espíritu santora ña̱ chindeétáʼanra xíʼinndó. Ta ndáaní-inindi̱ ña̱ chindeétáʼan libro yóʼo xíʼinndó, ña̱ ndakani ndiʼindó nu̱ú na̱ yiví tu̱ʼun va̱ʼa xa̱ʼa̱ Reino Ndióxi̱ ta saátu ña̱ chindeétáʼanndó xíʼin ku̱a̱ʼá na̱ yiví ña̱ va̱ʼa ka̱kuna (Hech. 28:23; 1 Tim. 4:16).